“Dirava Do Umui Tanikiu Henia”
1 Iesu be lepera taudia 10 ia hanamoa, to tamona sibona ia giroa bona Iesu ia tanikiu henia. Iesu ia henanadai: “Ibounai 10 idia namo, ani? Taudia 9 be edeseni?” (Luka 17:11-19) Iseda lalokau bona hariharibada guba Tamana, Iehova Dirava be ita dekenai harihari gaudia namodia ibounai ia henia dainai, Ia ita tanikiu henia be mai anina bada!—Kol. 3:15; Iam. 1:17.
2 Iehova ena harihari gaudia haida be dahaka? Iehova ita tanikiu henia badina Ia be Iesu ena mauri davalaia boubouna ia henia—unai be taunimanima dekenai ia henia harihari gauna hereadaena. (Ioa. 3:16) Danu, Iehova ita tanikiu henia badina Ia kahirakahira dekenai ita ia veria lao. (Ioa. 6:44) Ma danu, Iehova ita tanikiu henia badina tanobada hegegemadai iseda tadikaka taihu ida lalotamona ai ita noho. (Sal. 133:1-3) Reana Iehova ena harihari gaudia ma haida oi laloa diba. Ita ura lasi Israela taudia ita tohotohoa, badina idia be Iehova ena kara namodia idia laloa lasi bona idia tanikiu henia lasi!—Sal. 106:12, 13.
3 Eda Tanikiu Karana Ita Hahedinaraia: Reana lepera taudia 10 be Iesu ena kara idia moalelaia, to tamona sibona be tanikiu karana ia hahedinaraia. (Luka 17:15) Ita danu haroro gaukara ita karaia goadagoada neganai, iseda tanikiu karana ita hahedinaraia unai. Bema eda lalokau guba Tamana ese ia karaia gaudia ibounai ita laloa bada, unai ese ita do ia hagoadaia Iehova ena lalokau bona hariharibada karadia be ma haida dekenai ita herevalaia totona. (Luka 6:45) Bema ma haida dekenai Iehova ena kara bona lalohadai ita herevalaia, iseda lalokau bona tanikiu karana Iehova dekenai be do ia bada.—Sal. 40:5.
4 Ma Haida Durua Iehova Idia Tanikiu Henia: Namona be iseda natudia bona Baibel stiuden taudia ita durua Iehova idia tanikiu henia totona. Tama sina be natudia ida Iehova ia karaia gaudia idia itaia bona herevalaia hebou neganai, namona be edia natudia idia durua Iehova idia tanikiu henia totona. (Roma 1:20) Baibel stadi ita karaia neganai, namona be stiuden tauna ita nanadaia, “Inai kara ese ia hahedinaraia Iehova be edena bamona Diravana?” Stiuden tauna be Iehova ena kara ia lalopararalaia neganai, unai ese do ia hagoadaia Dirava ia lalokau henia bona Dirava ena taravatu ia badinaia hanaihanai totona.
5 Inai nega dokona lalonai, momo be tanikiu karana idia diba lasi. (2 Tim. 3:1, 2) To, Iehova ia moale badina ena hesiai taudia be haroro gaukara idia karaia goadagoada bona edia tanikiu karana idia hahedinaraia!—Iam. 1:22-25.