Oi be Herevalaia Bukana Oi Gaukaralaia, A?
1. Aposetolo Paulo bona Iesu be edena dala ai ma haida idia hadibaia?
1 Aposetolo Paulo be ‘Buka Helaga ia herevalaia.’ (Kara 17:2, 3; 18:19) Unai amo ia be Iesu ia tohotohoa, badina Iesu be Buka Helaga ia herevalaia momo bona laulau herevadia amo kamonai taudia ia durua Dirava ena ura idia lalopararalaia totona. (Mat. 12:1-12) Buka Helaga Herevalaia bukana ese oi do ia durua Iesu oi tohotohoa totona.
2. Edena dala ai Herevalaia bukana ita gaukaralaia hamatamaia hereva namodia ita hegaegaelaia totona?
2 Hamatamaia Hereva Namodia Hegaegaelaia: Buka Helaga Herevalaia bukana ena rau 9-17 lalonai, hamatamaia hereva namodia momo idia noho. Teritori haida dekenai umui haroro loulou dainai, bema hamatamaia hereva idauidau oi dibaia bona gaukaralaia, unai ese oi do ia durua emu haroro gaukara oi hanamoa o herevahereva oi hamatamataia totona. Telefon haroro o ruma badadia edia intercom amo taunimanima oi haroro henia neganai, namona be Herevalaia bukana amo hamatamaia herevana oi duahia hedinarai.
3. Herevalaia bukana ena rau 18-24 ai, edena hereva be haroro gaukara ai ita do ia durua?
3 Ura Lasi Herevadia Hanaia: Emu haroro teritori dekenai haida be koua herevadia do idia gwauraia dainai, haroro gaukara dekenai oi do lao lasi neganai, oi be miniti haida lalonai Herevalaia bukana ena rau 18-24 ai taunimanima edia koua herevadia haida oi riviulaia, a? Ruma taudia haida be Buddhist, Hindu, Jews, o Muslim, a? Bema oibe, vadaeni Herevalaia bukana (English gado gauna) ena rau 21-24 dekenai heduru hereva haida oi itaia diba.
4. Ruma tauna ta be henanadai ta ia henia o gau ta ia herevalaia neganai, edena dala ai Herevalaia bukana ita gaukaralaia?
4 Henanadai Haerelaia: Ruma tauna ta be henanadai ta ia henia o gau ta ia herevalaia neganai, Herevalaia bukana be ita ia durua diba danu. Reana ruma tauna oi hamaoroa oi ura mai anina bada gauna oi herevalaia, bena emu baege amo Herevalaia bukana oi abia raka-lasi. Buka ena rau maorona oi kehoa bona oi ura kikilaia gauna oi hahedinaraia. Buka ai idia noho henanadai idauidau oi hahedinaraia. Bema unai kahana oi davaria haraga lasi, vadaeni buka ena indeks oi gaukaralaia diba. Oi ura kikilaia gauna oi davaria neganai, maoromaoro buka amo oi duahia. Bema oi be siri ta oi herevalaia, namona be buka ena rau 445 ena kahana ladana, “Nega Momo Idia Gwauraidia Kerere Siridia” oi gaukaralaia.
5. Herevalaia bukana ena namo haida be dahaka?
5 Ma Gau Haida: Haida be sikuli o moni gaukara gabuna dekenai Herevalaia bukana idia abia lao danu, unai ese idia ia durua henanadai idauidau idia haerelaia totona, hegeregere: ‘Dahaka dainai holide dinadia oi moalelaia lasi?’ Matamata taudia haida idia gwau Herevalaia buka ai, inai sinado “Gau Iboudiai Havaradia” bona “Evolusen” ena kahana ese idia ia durua edia sikuli gaukaradia haida idia hegaegaelaia totona. Gorere tauna ta eiava mase dainai ia lalometau tauna ta do oi vadivadi henia, a? Herevalaia bukana ena kahana ladana “Lalona Hagoadaia Herevadia” ese oi do ia durua siri namona ta oi herevalaia totona. Danu, Herevalaia bukana ese haida ia durua edia tok bona haroro ena hebou idia hegaegaelaia totona.
6. Ita haroro neganai iseda ura gauna be dahaka?
6 Haroro gaukara lalonai, ita ura lasi taunimanima ida ita hepapahuahu; to ita ura sivarai namona ita harorolaia. Ita ura Baibel amo haere maorona ita henia. Bema Herevalaia bukana ita gaukaralaia namonamo, anina be ita hahedinaraia ita be sibona eda hadibaia hereva ita naria namonamo.—1 Tim. 4:16.