Ruma Bese Sediual—Ruma Bese Haroro Gaukara
1 Iehova ia moale bema matamata taudia ese ena ladana idia hanamoa. (Sal. 148:12, 13) Iesu ena negai, ‘natudia maragidia bona rata idia inua memero ese Dirava idia hanamoa.’ (Mat. 21:15, 16) Hari inai negai unai bamona ia vara noho. Tama sina e, edena dala ai Keristani hesiai gaukara ai emui natudia oi durua diba Iehova idia hanamoa taudia goadadia ai idia lao totona? Oiemu haheitalai be gau badana. Tamana ta be tama sina momo ese idia mamia gauna ia herevalaia neganai, ia gwau: “Natudia be oi hereva gauna idia karaia lasi, to oi karaia gauna idia karaia!”
2 Dirava idia gari henia tama sina ese idia naria taihu ta ia gwau: “Saturday dabai ai noga bena ai henanadai lasi ai be do ai lao haroro eiava. Ai diba vadaeni do ai lao.” Unai hegeregerena, ruma bese ida pura ta ta ai hanaihanai haroro gaukara umui karaia neganai, emu natudia dekenai oi hadibaia diba haroro gaukara be mai anina bada. Unai ese dala ia kehoa natudia ese oi idia itaia amo diba idia abia sibona lasi, to oi danu be natudia edia kara bona edia hadibaia dalana oi itaia diba.
3 Hadibaia Noho: Natudia be haroro gaukara idia moalelaia totona idia hegaegae be namo, unai amo haroro gaukara idia karaia namonamo diba. Guna ita gwauraia taihu ia gwau: “Ai be emai tamana bona sinana edia gaukara lalonai edia murinai ai raka loaloa kava taudia lasi. Ai diba ai danu be mai emai kahana, herevana iduara ena gaba maragina ai toua bona pepapepa ta ai henia sibona. Pura ta ta edia dokona ena gaukara ai hegaegaelaia namonamo guna karana amo ai diba dahaka do ai gwauraia.” Oiemu natudia be unai bamona oi hadibaia diba, pura ta ta ai nega oi atoa ruma bese stadi lalonai eiava ma nega ta ai emu natudia be haroro gaukara totona oi hegaegaelaia.
4 Ruma bese ida oi haroro neganai, unai ese dala ia kehoa hereva momokani be emu natudia dekenai oi hadibaia totona. Keristani tamana ta be kilomita 10 ia raka lao koura ma ta dekenai idia noho hanuadia dekenai pepapepa ia hariharilaia totona neganai, ena natuna kekeni ese ia bamoa. Unai kekeni ia gwau: “Unai raka negadia lalonai egu tamana ese hereva momokani ia atoa egu kudouna dekenai.” (Deu. 6:7) Haroro gaukara be emu ruma bese sediual ai umui halaoa dainai, Dirava ese umui do ia hanamoa.
This is a repeat of article in km 5/05 taken from km-E 5/05 ”Family Schedule-Family Field Service”