Dahaka Dainai Ia Auka Kara Namo Ita Karaia Totona

SAULO be kara dika ia karaia neganai, daika ia moale?— Satani Diabolo ia moale. To Iuda tomadiho gunalaia taudia idia moale danu. Gabeai Saulo be Hadibaia Tauna Badana ena hahediba tauna ta ai ia lao bona idia gwauraia Paulo neganai, unai tomadiho gunalaia taudia ese ia idia badu henia matamaia. Unai dainai, Iesu ena hahediba tauna ta ese kara namona ia karaia be auka ena badina oi lalo-pararalaia diba, a?—

Nega ta, hahelaga tauna badana Anania ese tatau haida ia hamaorodia Paulo ena vairana idia paisia totona. Danu, Anania ia ura Paulo be dibura dekenai ia atoa. Paulo be Iesu ena hahediba tauna ta ai ia lao neganai, hahetoho momo ia davaria. Hegeregere, kara dika taudia ese Paulo idia dadabaia bona idia hamasea toho totona nadi badadia amo idia hodoa.—Kara 23:​1, 2; 2 Korinto 11:​24, 25.

Momo ese iseda lalona do idia veria Dirava habadua karadia ita karaia totona. Unai dainai henanadai be inai, Kara namo oi ura henia bada, a? Oi ura henia bada dainai kara namo do oi karaia noho ena be ma haida ese oi idia badu henia, a? Unai oi karaia totona oi gari lasi be namo, ani?—

Reana oi laloa, ‘Dahaka dainai kara namo ita karaia dainai taunimanima ese ita idia badu henia? Idia moale be namo, ani?’ Reana unai bamona oi laloa diba. Nega momo taunimanima ese Iesu ia karaia kara namodia dainai ia idia ura henia. Nega ta, hanua taudia momo be ia noho rumana ena iduara badinai idia haboua. Idia mai badina Iesu ese gorere taudia ia hanamodia.—Mareko 1:​33.

To nega haida taunimanima ese Iesu ia hadibaia herevadia idia ura henia lasi. Ena be nega ibounai ia hadibaia herevadia be momokani, to haida ese ia idia badu henia badina hereva momokani ia gwauraia. Dina ta, Iesu ia tubu hanuana Nasareta dekenai unai ia vara. Iuda taudia be Dirava tomadiho henia totona idia lao dubuna lalonai ia vareai.

Unuseniai Iesu ese Baibel amo hereva namona ta ia henia. Matamanai taunimanima ese ena hereva idia ura henia. Iena uduna amo idia raka-lasi hereva namodia dainai idia hoa. Iena hereva idia abia dae be ia auka badina ia be edia huanai ia tubu merona.

To gabeai Iesu be hereva ta ia gwauraia. Idia dekenai Dirava ese Iuda lasi taudia ia lalo-namo henia negadia ia gwauraia. Unai neganai, dubu lalonai idia noho taudia idia badu. Ena badina oi diba, a?— Idia laloa Dirava ese idia sibona ia lalo-namo henia. Idia laloa idia ese ma haida idia hereaia. Unai dainai Iesu ia gwauraia herevana dainai idia badu. Bona ia dekenai idia karaia toho karana oi diba, a?—

Baibel ia gwau: ‘Iesu idia abia bona hanua murimurinai idia laohaia haraga. Ororo dekenai idia hakaua lao bona idia ura ororo amo idia negea diho bena do ia mase! To ia be edia huana dekena amo ia raka siri.’—Luka 4:​16-​30.

Bema oi dekenai unai bamona ia vara, do oi giroa lou unai taudia dekenai Dirava oi herevalaia totona, a?— Unai oi karaia totona oi gari lasi be namo, ani?— Lagani ta bamona murinai, Iesu be Nasareta dekenai ia giroa lou. Baibel ia gwau: “Edia dubu dekenai ia hadibaia.” Iesu be Dirava idia lalokau henia lasi taudia dainai ia gari lasi bona hereva momokani herevalaia karana ia hadokoa lasi.—Mataio 13:54.

Dina ma ta, unai be sabati dinana ai, Iesu be gabu ta dekenai ia noho bona unuseniai imana dika tauna ta ia noho danu. Iesu be Dirava amo siahu ia abia unai tauna ia hanamoa totona. To unuseniai idia noho taudia haida idia ura Iesu dekenai hekwakwanai idia havaraia. Hadibaia Tauna Badana be dahaka do ia karaia?— Ia nanadaidia: ‘Bema emu mamoe ta be Sabati Dinana ai matu badana ta lalonai ia moru, do umui veria daekau lasi, a?’

Oibe, Sabati dinana ai, edia laga-ani dinana unai, mamoe totona unai bamona do idia karaia. Unai dainai Iesu ia gwau: ‘Sabati Dinana ai tau ta lau durua be namo, badina tau ta ese mamoe ia hereaia!’ Unai ese ia hahedinaraia goevagoeva Iesu ese unai tauna ia hanamoa be namo!

Iesu ese unai tauna ia hamaoroa ena imana do ia atoa maoromaoro. Karaharaga ena imana ia namo. Unai tauna ia moale bada! To unai tatau haida be edena bamona? Idia moale, a?— Lasi. Unai ese edia badu Iesu dekenai ia habadaia. Idia raka-lasi bona ia alaia totona palani idia karaia!—Mataio 12:​9-​14.

Hari danu be unai bamona. Herevana dahaka ita karaia, taunimanima ibounai do ita hamoalea lasi. Unai dainai namona be ita abia hidi ita ura daika ita hamoalea. Bema ita ura Iehova Dirava bona ena Natuna, Iesu Keriso ita hamoalea, vadaeni namona be hanaihanai idia hadibaia gaudia ita karaia. To bema unai bamona ita karaia, daika ese ita do ia badu henia? Daika ese ita ia koua kara namo ita karaia totona?—

Satani Diabolo ese. To daidia danu?— Diabolo ese ia koidia bena kara kereredia idia abia dae taudia. Iesu be ena negai idia noho tomadiho gunalaia taudia ia hamaorodia: “Umui be emui tamana Satani dekena amo umui mai, bona umui ura emui tamana ena ura dikadia do umui karaia.”—Ioane 8:​44.

Diabolo be taunimanima momo ia ura henia. Iesu ese idia ia gwauraia “tanobada.” Dahaka oi laloa, Iesu be edena tanobada ia herevalaia?— Mani Ioane karoa 15, siri 19 ita itaia. Unuseniai Iesu ia gwau: “Bema umui be tanobada ena taudia momokani neganai, tanobada taudia ese umui do idia lalokau henia. To umui be tanobada ena lasi, lau ese tanobada dekena amo lau abia hidi umui, unai dainai tanobada ese umui do ia badu henia.”

Unai dainai Iesu ena hahediba taudia idia badu henia taudia be Iesu ena murinai idia raka taudia lasi. Dahaka dainai tanobada ese Iesu ena hahediba taudia ia badu henia?— Mani unai oi laloa. Daika be inai tanobada ena lohia?— Baibel ia gwau: “Satani ese tanobada taudia ibounai ia gunalaia noho.”—1 Ioane 5:​19.

Hari oi itaia diba dahaka dainai ia auka kara namo ita karaia totona, a?— Satani bona ena tanobada dainai kara namo ita karaia be auka. To badina ma ta ia noho. Unai gauna oi laloatao, a?— Inai buka ena Karoa 23 ai, ita dibaia gauna be ita ibounai be mai kara dika ida ita vara. Do ia namo herea bema kara dika, Diabolo bona ena tanobada idia ore, ani?—

Baibel ia gwau: “Tanobada . . . be kahirakahira do ia ore.” Anina be Hadibaia Tauna Badana murinai idia raka lasi taudia ibounai be do idia ore. Mauri hanaihanai do idia abia lasi. Oi diba daidia ese mauri hanaihanai do idia abia?— Baibel ma ia gwau: “Dirava ena ura ia karaia noho tauna be do ia noho ela bona hanaihanai.” (1 Ioane 2:​17) Oibe, kara namo bona “Dirava ena ura” idia karaia taudia sibona be Dirava ena tanobada matamata dekenai do idia mauri hanaihanai. Unai dainai, ena be ia auka, to ita ura kara namo ita karaia noho, ani?—