Maino Ia Havaraia Diba Matahakanina

“Tamana ese metau bona hisihisi ita dekenai ia henia neganai iseda lalona idia hisihisi, bona ita be moale lasi. To gabeai, inai matakani ese idia ia hamaoromaoroa vadaeni taudia ese kara maoromaoro ena davana namona mai maino danu do idia davaria.”​—HEBERU 12:11.

1, 2. (a) Heberu 12:​9-11 ena hereva hegeregerena, Dirava be ena lalokau dainai dahaka ia karaia? (b) Matahakani karana ta be dahaka, bona dahaka namo be ia dainai ia vara diba?

OI MARAGI negana mani oi laloa lou. Emu tamana bona sinana ese oi idia matahakani henia negana oi laloatao diba a? Ita momo be unai ita laloatao diba. Aposetolo Paulo ese unai ia gwauraia, parabole ta bamona, Dirava ena matahakani be Heberu 12:​9-11 ai ia gwauraia neganai.

² Dirava ena matahakani, tamana ta ena matahakani bamona, be mai ena toana idauidau. Ia ese iseda mauri na lauma dalanai ia durua diba. Ena matahakani ena toana ta be inai: Ena hahegani be, Dirava ena taravatu ia dadaraia tauna be Keristen kongregesen murimurinai do idia atoa. Unai dala amo ta idia matahakani henia neganai, reana do ia helalo-kerehai bona ena kerere do ia rakatania. Unai neganai, kongregesen ena kamonai taudia danu ese sisiba idia abia, badina unai ese idia danu ia hadibaia, Dirava ena taravatu maorodia idia badinaia be gau badana.​—1 Timoteo 1:20.

3. Taunimanima haida ese kongregesen amo atoa siri karana na edena bamona idia laloa?

³ Reana ta do ia gwau: ‘To, ta be orea amo idia atoa siri bena unai tau ida idia herevahereva lou lasi, be kara aukana ani?’ Vanegai, unai bamona lalohadai ia hedinarai, kota be hahine ta ena samani herevana idia kamonai neganai. Unai hahine ena tamana bona sinana be Iehova ena Witness taudia, bona ia be Witness taudia edia orea lalonai ia tubu daekau. Witness taudia ese ena tamana bona sinana be edia orea amo idia atodia siri. Hari hahine be unai bamona idia kara henia lasi, to ia sibona ese revareva ta ia siaia, Witness taudia ia hadibadia, ia be edia orea amo do ia gini siri. Ena revareva dainai kongregesen taudia idia hadibadia, hari ia be Iehova ena Witness hahinena ta lasi. Unai gabu ia rakatania, to lagani momo murinai unai gabu ia lou henia, bena ia davaria unuseniai idia noho Witness taudia idia ura lasi ia ida idia herevahereva. Unai dainai kota dekenai ia samanidia. Dahaka ia vara, bona ia vara gauna ena anina be dahaka oi dekenai? Ia vara gauna ena anina ita lalo-pararalaia momokani totona, namona be Bible ena hereva, orea amo atoa siri karana dekenai, ita tahua.

Dahaka Dainai Idia Karaia?

4. Kongregesen taudia ta ta ese dahaka idia karaia? (Galatia 6:1; Iuda 23)

⁴ Keristen taudia momokanidia kahirakahira iboudiai ese Dirava ena taravatu maoromaorodia be mai edia momokani ida idia badinadia. (1 Tesalonika 1:​2-7; Heberu 6:10) Nega ta ta, Keristen tauna ta be dala maorona amo ia raka siri. Ena be Keristen elda taudia ese idia durua toho, to ia helalo-kerehai lasi, Dirava ena taravatu ia utua noho. Eiava ia ese hahediba herevadia koikoidia ia hadibaia reana, unai amo ia ese hereva momokani ia dadaraia, eiava ia sibona be orea amo ia gini siri. Ta be unai bamona ia karaia neganai, dahaka idia karaia be namo? Aposetolo edia nega lalonai, unai bamona kara idia vara, unai dainai namona be edia hereva unai kara dekenai ita tahua.

5 Korinto kongregesen lalonai, tau ta be ia heudahanai bona ia helalo-kerehai lasi neganai, Paulo ese kongregesen be inai bamona ia hereva henia, ia gwau: “Iseda ekalesia tauna ta, bema ia be heudahanai tauna, o mataganigani tauna, o kaivakuku tomadiho henia tauna, o hereva dika tauna, o kekero tauna, o henaoa tauna, umui be ia danu do umui turana karaia lasi. Bona ia danu do umui aniani hebou lasi.” (1 Korinto 5:​11-13) Hereva momokani idia dadaraia taudia, Humenaio bamona, dekenai danu unai bamona ia vara: “Ekalesia idia hapararaia noho tauna be nega ginigunana bona nega iharuana do oi sisiba henia. Bema oiemu hereva ia kamonai lasi neganai, unai tau do oi negea. Oi diba, unai bamona tauna be mai ena kerere bona ia be dika momokani.” (Tito 3:​10, 11; 1 Timoteo 1:​19, 20) Kongregesen idia dadaraia taudia danu idia dadaraidia be maoro: “Inai taudia ese iseda orea idia rakatania. To guna idia be iseda taudia korikori lasi, unai dainai ita dekena amo idia raka siri. Bema idia be iseda orea taudia korikori neganai, idia be ita danu do idia noho hebou. To idia ese ita idia rakatania, vadaeni unai dekena amo idia hedinaraia idia be iseda orea lasi taudia.”​—1 Ioane 2:​18, 19.

5, 6. (a) Bible ia gwau, kara dika rohoroho idia karaia to idia helalo-kerehai lasi taudia, be edena bamona ita kara henidia be maoro? (Mataio 18:17) (b) Edena henanadai idia vara?

⁶ Iseda ura be unai bamona kara ia karaia tauna be do ia helalo-kerehai, bena kongregesen ese do idia abia dae lou diba. (Kara 3:19) To ia do helalo-kerehai lasi negana lalonai, nega haida Keristen taudia ese idia bamoa diba a, eiava namona be idia dadaraia vaitani a? Bema idia dadaraia vaitani be maoro, dahaka dainai unai be maoro?

Dadaraia Vaitani A?

7. Iseda orea ena kara dika taudia dekenai ita karaia karana bona kara dika taudia oredia dekenai ita karaia karana be edena bamona idia idau?

⁷ Keristen taudia ese taunimanima iboudiai idia dadaraidia lasi. Iseda dekena taudia, ita ida idia gaukara hebou taudia, ita ida idia sikuli hebou taudia, bona ma haida danu, ena be “idia heudahanai, idia mataganigani, idia henaoa, idia kaivakuku tomadiho henia,” to ita hereva henidia. Paulo ia gwau unai taudia ita rakatanidia vaitani diba lasi; ‘dala tamona be inai tanobada do ita rakatania momokani.’ To ia be ma ia gwau, iseda kara, unai bamona kara ia karaia “ekalesia tauna” dekenai be idau; ia gwau: “Iseda ekalesia tauna ta, bema ia be [unai kara ia lou henidia], umui be ia danu do umui turana karaia lasi. Bona ia danu do umui aniani hebou lasi.”​—1 Korinto 5:​9-11; Mareko 2:​13-17.

8. Aposetolo Ioane ese hedadarai karana edena bamona ia sisibalaia?

⁸ Aposetolo Ioane ese Keristen taudia ia sisiba henidia, namona be unai bamona taudia idia dadaraidia; ia gwau: “Tau ta bema Keriso ena hadibaia hereva ia badinaia lasi, to ia raka siri, bona hadibaia hereva idauna ta ma ia badinaia, unai tau dekenai Dirava ia noho lasi. . . . Unai dainai, bema tau ta umui dekenai ia mai, bona inai Keriso ena hadibaia hereva ia gwauraia lasi neganai, emui ruma dekenai do umui abia dae lasi. Bona hanamoa hereva do umui henia lasi. Badina be unai tau do ia hanamoa [Greek gado, khaiʹro] tauna ese unai tau ena kara dika do ia durua.”a​—2 Ioane 9-11.

⁹ Dahaka dainai hari inai negai danu, unai bamona taudia ita dadaraidia be namo? Dirava ena Taravatu Israel taudia dekenai mani oi laloa. Ena taravatu be, mai edia ura ida Dirava ena Taravatu badadia idia utua taudia edia davana be mase. (Levitiko 20:10; Numera 15:​30, 31) Idia hamasedia murinai, edia varavara o ma haida be idia ida idia herevahereva diba lasi. (Levitiko 19:​1-4; Deuteronomi 13:​1-5; 17:​1-7) Unai negai idia noho Israel taudia be taunimanima oredia hegeregeredia; ita bamona idia lalohisihisi, to idia diba Iehova be lalokau bona kara goevagoeva Diravana bona ena Taravatu ese ia naridia, lauma dalanai bona tauanina dalanai idia goeva noho totona. Unai dainai Dirava ena taravatu, kara dika taudia hamasedia taravatuna, idia abia dae, badina unai be kara namona bona maoromaorona.​—Iobu 34:​10-12.

9, 10. (a) Israel lalonai, taravatu utua taudia bema idia helalo-kerehai lasi, dahaka ia vara idia dekenai? Badina be dahaka? (b) Hari inai negai idia kara dika to idia helalo-kerehai lasi taudia na kongregesen amo atodia siri karana be edena bamona ita laloa be namo? (2 Petro 2:​20-22)

¹⁰ Ita diba danu Dirava ena taravatu, ena kara dika amo ia helalo-kerehai lasi dainai Keristen taudia ese kongregesen amo idia atoa siri tauna do ita dadaraia taravatuna, ese ita ia naria diba. “Hatubua gauna gunana, kara dika unai, do umui kokia, paraoa matamata ia goeva bamona do umui noho totona.” (1 Korinto 5:7) Sibodia edia ura dainai Keristen kongregesen idia rakatania taudia dadaraidia karana ese Keristen taudia ia naridia, unai taudia edia maumau herevadia o hahediba herevadia koikoidia ese idia hakereredia garina.​—Heberu 12:​15, 16.

Varavara be Edena Bamona?

11, 12. (a) Israel lalonai kara dika tauna ta idia hamasea neganai, unai ena anina ena varavara dekediai be dahaka? (b) Kamonai karana ena namo mani oi gwauraia hedinarai.

¹¹ Dirava ia diba iena taravatu maoromaorona, kara dika taudia dadaraidia taravatuna, be mai anina unai taudia edia varavara dekenai danu. Atai herevana ta hegeregerena, kara dika Israel tauna ta idia hamasea murinai, ena varavara ese idia hereva henia diba lasi o idia bamoa diba lasi. Dirava ena taravatu be, bema mero ta be aniani dika tauna bona inuinu kekero tauna, ena tamana bona sinana ese diadi taudia vairadiai do idia hakaua lao, bona bema ia helalo-kerehai lasi, ena tamana bona sinana be hanua taudia ida do idia hodoa mase, ‘unai amo dika gaudia edia bogaragina amo do idia kokia.’ (Deuteronomi 21:​18-21) Oi diba, unai bamona idia karaia be auka herea ani? Danu, unai kara dika tauna ena tadikakadia bona taihudia, bona ena tubudia danu idia lalo-metau ani? To, bema edia kara maoromaoro Diravana idia badinaia dainai edia varavara idia hebogahisi henidia lasi, unai ese ia hamauridia diba.

¹² Kora ena sivarai mani oi laloa: Mose ena amo Dirava ese Israel taudia ia hakaudia, to Kora ese unai ia abia dae diba lasi, ia gwau-edeede. Iehova be kara maoromaoro Diravana dainai, ia gwau namona be Kora do ia mase. To Mose ese Dirava badinaia taudia ia hamaorodia, ia gwau: “Inai kara dika taudia edia kalaga amo umui raka oho, bona edia gau ta umui daua toho lasi, idia edia dika ai do umui dika na garina.” Kora ena varavara, Dirava ena hereva idia abia dae lasi taudia, be unai kara dika taudia ida idia mase hebou. To Kora ena varavara haida ese Iehova idia badinaia, unai dainai idia mase lasi bona gabeai hahenamo idia davaria.​—Numera 16:​16-33; 26:​9-11; 2 Sisiga 20:19.

13. Bema edia ruma bese tauna ta be murimuriai idia atoa o sibona ena ura dainai kongregesen amo ia gini siri, kamonai Keristen taudia be edena bamona do idia kara henia?

¹³ Ta be Keristen kongregesen amo idia atoa siri o sibona ena ura dainai kongregesen amo ia gini siri neganai ia mase lasi, unai dainai reana ia be ena adavana bona ena natudia ida idia do noho hebou. Dirava ena kara maoromaoro bona kongregesen ena kara idia matauraia dainai, ena adavana bona ena natudia idia diba, iena kara dainai ia ese edia hebamo lauma dalanai ia hadikaia. To, ena be kongregesen amo idia atoa siri, to unai ese edia headava ia hadokoa lasi; unai dainai idia noho hebou diba bona idia herevahereva hebou diba.

14. Bema iseda varavara ta, iseda ruma tauna lasi, be kongregesen amo idia atoa siri o sibona ena ura dainai kongregesen amo ia gini siri, edena sisiba Bible lalonai ese iseda kara do ia biagua be namo?

¹⁴ Bema kongregesen amo idia atoa siri tauna o sibona ena ura dainai kongregesen amo ia gini siri tauna be orea tauna ena varavarana, to ena ruma bese tauna ta lasi, orea tauna ese do ia kara henia lasi, sibona ena ruma tauna ia kara henia hegeregerena. Reana dala ia noho do ia hereva henia lasi. To bema edia bese lalonai ia vara gauna be kerere tauna ida idia herevalaia hebou be namo, namona be unai hereva sibona idia herevalaia. Bible ena taravatu be inai: “Iseda ekalesia tauna ta, bema ia be heudahanai tauna, o mataganigani tauna, [o kara dika badana ma ta ia karaia tauna], . . . umui be ia danu do umui turana karaia lasi. Bona ia danu do umui aniani hebou lasi.”​—1 Korinto 5:11.

15. Unai ia vara neganai, kerere tauna ena varavara ese edia lalona edena bamona idia biagua diba? (Salamo 15:​1-5; Mareko 10:​29, 30)

¹⁵ Momokani, unai bamona kara be mai ena hekwarahi, badina vaia edia kara taunimanima ese edia varavara idia lalokau henidia, hegeregere taunimanima burukadia ese edia tubudia idia lalokau henidia bamona. To, unai ese iseda kara maoromaoro Dirava dekenai ia tohoa, taihu ta ena hereva bamona, rau 22 ai. Bema ta ena lalona ia hisihisi badina be ena varavara, murimuri ai idia atoa tauna ena kara dainai, reana Kora ena varavara haida edia sivarai ese ena lalona do ia hagoadaia lou diba.​—Salamo 84:​10-12.b

Kota ena Hereva

16-18. Guna ai gwauraia kotana dekenai, diadi taudia edia lalohadai be dahaka? Kota ese edena hereva ma haida ia gwauraia?

¹⁶ Hahine ta ese Witness taudia na kota dekenai ia samanidia, badina be sibona ena ura dainai edia orea ia dadaraia murinai, ena bamodia gunadia ese idia hereva henia lasi. Reana oi ura oi diba, kota dekenai dahaka ia vara.

¹⁷ Distrik kota dekenai kota idia do karaia lasi neganai, kota naria taudia idia gwau unai hahine ena samani herevana be anina lasi. Idia gwau, idia ese tomadiho oreadia be edia orea taudia idia matahakani henidia karadia idia kotalaia diba lasi. Bena unai hahine ese kota ma ta ia noia ena hereva do idia kamonai. Mai edia lalo-tamona ida idia gwau: ‘United States ena Constitution (taravatu) ia gwau, taunimanima ese sibodia edia ura hegeregerena edia tomadiho karana idia badinaia diba; . . . hedadarai karana be Iehova ena Witness taudia edia tomadiho karana ta, unai dainai aiemai lalohadai be, hari hahine do ia kwalimu diba lasi. Gavamani ena taravatu dainai, ia samanidia taudia be mai edia gwaumaoro hedadarai karana do idia karaia. Unai hegeregerena, ai ese distrik kota ena hahemaoro herevana ai hamomokania.’

¹⁸ Unai kota be ma ia gwau: ‘Iehova ena Witness taudia ese hedadarai karana idia karaia, badina idia gwau Bible ena siri haida ese unai kara idia gwauraia, bona unai siri edia anina idauna ai gwauraia diba lasi . . . [Hari hahine ese] ia samanidia taudia be mai edia maoro edia tomadiho ena hahediba herevadia idia badinadia . . . Kota ese tomadiho oreana ta ena memba taudia (o memba taudia gunadia) idia kara heheni karadia idia tahua namonamo lasi. Tomadiho oreadia be mai edia maoro, edia memba taudia o memba taudia gunadia do idia matahakani henidia. Ai be Justice Jackson [U.S. Suprim Kota tauna gunana] ena hereva ai hamomokania; ia gwau, “Tomadiho oreadia be sibodia edia orea taudia dekenai idia karaia karadia be taravatu lasi.” . . . [Unai hahine] ia rakatania tomadiho oreana ena memba taudia ese edia lalona idia hadaia vadaeni, idia gwau idia ura lasi do idia bamoa noho. Ai gwau, idia be mai edia maoro unai bamona do idia karaia.’

19, 20. Dahaka dainai kongregesen amo idia atoa siri tauna o sibona ena ura dainai kongregesen amo ia gini siri tauna be dala lasi kota dekenai kompenseisen monina do ia abia?

¹⁹ Unai kota ia gwau, ena be hari hahine ia lalo-metau badina be ena bamodia gunadia idia ura lasi idia hereva henia, to ‘bema gwaumaoro do ai henia, idia edia amo kompenseisen monina do ia abia totona badina edia kara amo ena lalona idia hahisia dainai, unai ese gavamani ena taravatu do ia utua, badina be Iehova ena Witness taudia be mai edia maoro edia tomadiho karana do idia karaia, sibodia edia ura hegeregerena.’ Unai kota ese ena hahemaoro herevana ia gwauraia murinai, ma kota ta ese ena hereva ia hamomokania. Edena bamona? Hari hahine be United States ena Suprim Kota ia noia ena hereva do ia kamonai henia bona kota gunadia edia hereva do ia hakoikoidia. To, November 1987 ai, Suprim Kota ia gwau ena hereva do ia kamonai lasi.

²⁰ Unai dainai, unai kota ese idia hahedinaraia, Iehova ena Witness taudia ese murimuri ai idia atoa tauna o sibona ena ura dainai kongregesen amo ia gini siri tauna bema idia dadaraia, unai tau ese ia samanidia diba lasi, idia edia amo kompenseisen monina abia totona.c Kongregesen taudia ese hahegani goevadaedia Dirava ena Hereva lalonai idia badinaia, unai dainai murimuri ai ia noho tauna ese gau namodia haida ia reaia, sibona ena kara dainai.

Matahakani ese Momo Ia Hanamodia

21. Dahaka dainai kongregesen amo atoa siri karana ita laloa namonamo be namo?

²¹ Murimuri taudia haida be murimuri ai atoa karana ena sivarai idia kamonai neganai, idia ese kerere tauna, Keristen kongregesen taudia ida ia herevahereva diba lasi tauna, idia bogaia hisi. To unai tau idia bogaia hisi be maoro lasi, ani? Kerere tauna bona ma haida ese idia davaria diba hahenamodia, mani oi laloa.

22, 23. Ta ena sivarai amo oi hahedinaraia, kongregesen amo idia atodia siri taudia na Dirava ena ura hegeregerena ita lalodia be gau badana, bona unai amo namo ita davaria diba.

²² Rau 22 ai, hahine ta ladana Lynette ia gwau ena lalona ia hadaia, ena tadina Margaret, kongregesen amo idia atoa siri hahinena unai, ‘do ia dadaraia vaitani.’ Ia bona ena Keristen varavaradia ‘idia laloa Iehova ena dala be dala hereadaena.’ Bona unai be momokani vaitani!

²³ Gabeai, Lynette ena tadina ese ia hamaoroa, ia gwau: ‘Lau diba, kongregesen amo atoa siri karana bema oi laloa bada lasi, kara ta lau karaia haraga lasi, orea lalonai lau vareai lou totona. Lauegu lalokau taudia bona kongregesen taudia ese lau idia bamoa lasi dainai, lau ura lau helalo-kerehai. Lau lalo-parara lauegu kara be dika momokani, bona lau diba namona be Iehova dekenai lau giroa lou.’

24. Taihu ta ena varavara be kongregesen amo idia atoa siri murinai, edena bamona ia kara, bona ena kara ena anina be dahaka, ia bona ma haida dekenai?

²⁴ Hahine ma ta ladana Laurie ena tamana bona sinana be kongregesen amo idia atodia siri. To ia gwau: ‘Lauegu hebamo karana idia dekenai lau hadokoa lasi, to lau habadaia. Metairametaira lauegu haroro gaukarana lau hamaragia. Gabeai, hebou iboudiai lau reaia.’ Bena Gima Kohorona, January bona February 1982 gaudia ia duahidia. Idia ese 1 Korinto 5:​11-13 bona 2 Ioane 9-11 ena sisiba idia gwauraia. Ia gwau unai neganai lalo-parara ia abia. Ma ia gwau: ‘Lau diba namona be lauegu kara lau haidaua. Hari lau ese Mataio 10:​34-36 ena anina lau lalo-pararalaia. Lauegu tamana bona sinana ese lauegu lalohadai idia abia dae be auka herea, badina aiemai bese lalonai ia noho merona tamona be lauegu natuna, lagani 5 ia abia merona, bona idia lalokau henia bada herea.’ Iena tamana bona sinana ia bamodia lasi dainai reana do idia helalo-kerahai, Margaret be Lynette ena kara dainai ia helalo-kerehai hegeregerena. Unai matahakani ese Laurie ia durua; ia gwau: ‘Haroro gaukara lau karaia lou hari. Lauegu headava bona egu ruma bese idia goada badina egu kara lau haidaua dainai, bona lau danu lau goada.’

25. Kongregesen lalonai ia vareai lou hahinena ta ese Dirava ena matahakani na edena bamona ia laloa?

²⁵ Hahine ta ladana Sandi be kongregesen amo idia atoa siri bena gabeai ia helalo-kerehai dainai ia vareai lou. Ena lalona ena mamina mani oi laloa; ia gwau: ‘Lau ura umui lau tanikiu henia, unai hadibaia bona heduru herevadia dainai, sisiba henia karana bona kongregesen amo atoa siri karana herevadia unai. Lau moale badina be Iehova ese ena orea taudia ia lalokau henia bada dainai, ena orea ia naria ia goeva noho totona. Murimuri taudia idia laloa unai be kara aukana, to ia be mai anina bada bona ia be lalokau karana. Iseda Tamana guba dekenai ia noho lau tanikiu henia, badina be ia be lalokau Diravana bona dika ia gwauatao.’

26. Matahakani idia abia dae taudia ese dahaka gau namona do idia davaria diba? (Salamo 94:​10, 12)

²⁶ Dirava ena taravatu be, ia helalo-kerehai lasi kara dika tauna be kongregesen murimurinai do idia atoa, to ia ese danu ia hahedinaraia, kara dika tauna bema ia helalo-kerehai bona ena kara dika bema ia rakatania vaitani, kongregesen lalonai do ia vareai lou diba. (Sibona ena ura dainai kongregesen amo ia gini siri tauna danu bema kongregesen ia noia, ia vareai lou diba.) Unai murinai, Keristen taudia ese edia lalokau ia dekenai do idia hahedinaraia lou, unai amo ena lalona do idia hagoadaia. (2 Korinto 2:​5-11; 7:​8-13) Paulo ena hereva be momokani; ia gwau: “Tamana ese metau bona hisihisi ita dekenai ia henia neganai iseda lalona idia hisihisi, bona ita be moale lasi. To gabeai, inai matakani ese idia ia hamaoromaoroa vadaeni taudia ese kara maoromaoro ena davana namona mai maino danu do idia davaria.”​—Heberu 12:11.

[Footnotes]

Inai Hereva Mani Oi Laloatao

◻ Edena dala ai kongregesen amo atoa siri karana be matahakani karana?

◻ Dahaka dainai Keristen tauna ena kara murimuriai idia atoa taudia dekenai be idau, bona ena kara tanobada ena kara dika taudia dekenai be ma idau?

◻ Ena be iseda varavara ta be murimuriai idia atoa, to namona be edena Bible sisibana ita laloa?

◻ Kota badana ese sibona ena ura dainai kongregesen amo ia gini siri hahinena ena hereva ia kamonai neganai, dahaka ia gwau?

◻ Haida edia hereva, kongregesen amo atoa siri karana idia herevalaia, ese dahaka idia hadibaia ita dekenai?

[Blurb on page 22]

“[Lauegu tadina, murimuriai idia atoa hahinena] Margaret ai dadaraia vaitani neganai, unai ese ai ia tohoa Iehova do ai badinaia noho eiava lasi. Unai ese dala ia kehoa, do ai hahedinaraia ai laloa Iehova ena dala be dala hereadaena.”​—Lynette.