Nega Bona Gabu Idauidau ai Haroro

¹ Nega bona gabu idauidau ai haroro gaukarana amo hereva momokani idia dibaia pablisa hida be emu kongrigeisen ai idia noho? Reana unai namba dekenai do oi hoa. Nega bona gabu idauidau ai haroro ena anina be inai: Ita loaloa neganai, neiba o varavara ita vadivadi henia neganai, hoihoi gabudiai, sikuli dekenai, moni gaukara gabunai, o unai bamona gabudia dekenai sivarai namona ita harorolaia. Grup ta lalonai idia noho bapatiso Witnes taudia 200 mai kahana amo, 40 pesen bamona be unai dala amo hereva momokani idia dibaia. Unai dainai, nega bona gabu idauidau ai ita haroro be mai ena namo.

² Aposetolo edia negai, haida be nega bona gabu idauidau ai idia haroro. Hegeregere: Samaria ai, Iesu be Iakobo ena ranu gurina dekenai ranu ia utua hahinena ta ia haroro henia. (Ioa. 4:​6-26) Dagi bada Etiopia tauna ta be Isaia bukana ia duahia lalonai, Filipo ese ia nanadaia: “Oi diba dahaka oi duahia, a?” (Kara 8:​26-38) Filipi ena dibura ruma ai, aposetolo Paulo be dibura idia naria taudia ia haroro henia. (Kara 16:​23-34) Gabeai, ena be Paulo be dibura rumana ai ia noho lou, to ia ese “vadivadi taudia ibounai ia abia dae. Dirava ena Basileia ia harorolaia, bona Lohiabada Iesu Keriso ena sivarai ia hadibaia.”

³ Hamatamaia Dalana: Momo ese idau taudia idia haroro henia be auka. Danu, ena be haida ita diba, to toana be idia ita haroro henia be ia auka. To, bema Iehova ena kara namodia, hereva momokanidia, bona inai tanobada taudia edia noho dalana dikana ita lalohadailaia neganai, unai ese ita do ia doria ita haroro totona. (Iona 4:11; Sal. 40:5; Mat. 13:​52, NW ) Danu, Iehova ita noia diba ita ia durua “mai gari lasi danu” ita haroro totona. (1 Tes. 2:2) Gilead sikulina ia lao tadikaka ta ia gwau: “Nega haida lau itaia taunimanima lau haroro henia be ia auka, to guriguri karana ese lau ia durua idia lau haroro henia totona.” Bema oi davaria hekwakwanai be unai bamona, vadaeni emu lalona dekenai guriguri kwadogina oi gwauraia, unai murinai oi haroro.​​—Neh. 2:4.

⁴ Nega bona gabu idauidau ai haroro gaukarana be ruma-ta-ruma-ta ai haroro gaukarana bamona ita karaia lasi​—anina be haroro herevana ta o siri ta amo ita hamatamaia lasi. Reana eda hamatamaia herevana lalonai gau idauna ta ita kikilaia, bena dokonai, haroro herevana ita gwauraia. Pablisa momo idia gwau, unai bamona idia karaia bena edia hereva dokonai sivarai namona idia harorolaia. Bema ta ia ura lasi ia herevahereva, namo lasi ia ita doria. To, iena ura ita matauraia bona ita rakatania.

⁵ Maketi dekenai, ia hemarai momo taihu ta be ena matana bona kiri karana amo dala ia kehoa ma haida ia haroro henia totona. Bema taihu be ta ia itaia bona ia kiri henia, bona ia itaia tauna o hahinena ia kiri, vadaeni taihu ese hereva kwadogina ta ia gwauraia. Bema unai tauna o hahinena ia hereva danu, vadaeni taihu be ena hereva ia habadaia. Unai hahine o tau ia hereva neganai, taihu ia kamonai namonamo​—unai amo ia itaia diba edena sivarai namona do ia gwauraia kamonai tauna ena lalona ia veria totona. Unai dala amo, taihu ese buka momo ia hariharilaia bona Baibel stadi ta ia hamatamaia.

⁶ Herevahereva Hamatamaia: Edena dala ai herevahereva ita hamatamaia diba? Iesu ese herevahereva ia hamatamaia dalana be inai: Ranu gurina dekenai hahine ia noia ranu sisina ia henia totona. (Ioa. 4:7) Unai dainai, reana hanamoa herevana o henanadai ta amo herevahereva ita hamatamaia diba. Bena umui herevahereva lalonai, reana siri namona ta oi gwauraia o hereva momokani ena uhe ta oi hadoa. (Had. 11:6) Haida be lalona veria hereva ta idia gwauraia, unai ese dala ia kehoa kamonai tauna ia hereva o henanadai totona. Hegeregere, doketa oi naria noho lalonai, reana oi badinai ia helai tauna ta oi hamaoroa, “Lau moale badina nega ta gorere do idia ore.”

⁷ Ita itaia bona kamonai gaudia ese danu dala do idia kehoa herevahereva ita hamatamaia totona. Bema ita itaia natuna ta ena kara be namo herea, reana ena tamana o sinana ita hanamoa guna, bena ita nanadaia: “Dahaka ese oi ia durua emu natuna oi hadibaia namonamo totona?” Gaukara gabunai, taihu ta be haida idia herevalaia gauna ia kamonai neganai, unai ese ia durua ena turana edia lalona ia veria herevadia ia gwauraia totona. Nega ta ai ia kamonai ena turana ta do ia headava dainai, taihu ese headava ena palani ia herevalaia Awake! ta ia henia. Unai ese dala ia kehoa Baibel idia herevalaia totona.

⁸ Dala ma ta be inai: Haida ese ita idia itaia diba gabunai buka o magasin ita duahia be namo. Tadikaka ta be Gima Kohorona o Awake! ia abia neganai, lalona veria hereva kwarana ta dekenai ia kehoa, bena mai regerege lasi ida ia duahia. Bema ia itaia ia badinai ia helai tauna be unai magasin ia itaia danu, vadaeni henanadai ta ia henia o unai magasin ena hereva o sivarai ta ia gwauraia. Nega momo unai ese herevahereva o haroro dalana ia kehoa. Eiava Gima Kohorona o Awake! magasin be taunimanima idia itaia diba gabunai ita rakatania, reana iseda sikuli turadia o gaukara taudia haida be unai do idia itaia bena do idia henanadai.

⁹ Dala Ma Haida: Nega bona gabu idauidau ai haroro gaukarana be mai anina bada danu. Unai dainai, ita hegaegae namonamo nega bona gabu idauidau ai ita haroro totona. Hegeregere oi henanadai, daika do oi davaria, bona edena dala ai herevahereva do oi hamatamaia. Baibel, buka, o magasin haida oi abia, unai amo oi gaukaralaia diba kamonai taudia oi haroro henia totona.​​—1 Pet. 3:​15.

¹⁰ Pablisa momo be unai bamona idia karaia. Taihu ta be sekuriti ese idia naria ruma badana ta dekenai ia noho, bona ia ese daiutu ta ia gaukaralaia laulau mai hairaidia (jigsaw puzzle gaudia) ia hahedinaraia totona. Taunimanima ese unai laulau idia itaia bona herevalaia neganai, unai ese dala ia kehoa taihu ia haroro totona​—idia ia hamaoroa Baibel be “guba matamatana bona tanobada matamatana” ia gwauhamatalaia. (Apok. 21:​1-4) Nega bona gabu idauidau ai oi haroro daladia ma haida be dahaka?

¹¹ Lou Henia Karaia: Kamonai taudia oi lou henidia toho be namo. Bema ta ia kamonai, reana oi gwau diba: “Iseda hereva lau moalelaia. Oi laloa edena negai ita hereva lou diba?” Pablisa haida be edia adres bona telefon namba idia henia bena idia gwau: “Iseda hereva lau moalelaia. Bema oi ura hereva ma haida oi diba, lau oi davaria dalana be inai.” Bema unai tauna oi lou henia be auka badina ia be emu kongrigeisen ena teritori ai ia noho lasi, vadaeni dala oi karaia kongrigeisen ma ta ena pablisa ese ia lou henia totona. Bema mai dalana, emu kongrigeisen ena seketere oi hadibaia, unai amo ia ese kongrigeisen maorona do ia hadibaia unai tauna idia lou henia totona.

¹² Nega bona gabu idauidau ai ita haroro ena taim ita ripotilaia be namo. Dina ta ta ai, herevana miniti sisina o hida ita haroro, to ita ripotilaia. Mani oi laloa: Bema dina ta ta ai pablisa ibounai 7 milioni mai kahana be miniti 5 lalonai nega bona gabu idauidau ai idia haroro, anina be hua ta ta ai hora 17 milioni mai kahana idia haroro vadaeni.

¹³ Nega bona gabu idauidau ai ita haroro ena badina be inai: Dirava bona eda dekena taudia ita lalokau henia. (Mat. 22:​37-39) Oibe, Iehova ena kara bona ura ita diba dainai, ita ura dikadika ena “King siahuna ena hairaina” ita harorolaia. (Sal. 145:​7, 10-12) Danu, eda dekena taudia edia namo ita laloa bada dainai, nega dokona ia do ginidae lasi lalonai, ita ura dikadika nega bona gabu idauidau ai sivarai namona ita harorolaia. (Roma 10:​13, 14) Ita hegaegae namonamo neganai, nega bona gabu idauidau ai ita haroro diba bona moale do ita davaria badina kudou-maoro tauna ta ita durua hereva momokani ia dibaia.

[Study Questions]

1. (a) Nega bona gabu idauidau ai haroro ena anina be dahaka? (b) Hari idia hebou taudia hida be inai dala amo hereva momokani idia dibaia?

2. Edena sivarai ese idia hahedinaraia haida be nega bona gabu idauidau ai idia haroro?

3. Dahaka ese ita ia durua diba ita hemarai lasi totona?

4. Nega bona gabu idauidau ai haroro gaukarana lalonai dahaka ita karaia guna be namo, bona dahaka dainai?

5. Dahaka ese ia hemarai momo taihu ta ia durua nega bona gabu idauidau ai ia haroro totona?

6. Edena dala ai herevahereva ita hamatamaia diba?

7. Edena dala ai ita itaia bona kamonai gaudia ese ita do ia durua nega bona gabu idauidau ai ita haroro totona?

8. Edena dala ai iseda magasin amo herevahereva ita hamatamaia diba?

9, 10. (a) Nega bona gabu idauidau ai haroro daladia haida be dahaka? (b) Edena dala ma haida ai oi haroro?

11. Kamonai tauna be edena bamona ita lou henia diba?

12. (a) Dahaka dainai nega bona gabu idauidau ai ita haroro ena taim ita ripotilaia be namo? (b) Nega bona gabu idauidau ai ita haroro ena namo haida be dahaka? (“Ekspiriens Haida” mauana itaia.)

13. Dahaka ese ita do ia doria nega bona gabu idauidau ai ita haroro totona?

[Blurb on page 4]

Emu tahua gauna be, taunimanima oi davaria neganai herevahereva hamatamaia

[Blurb on page 5]

Pablisa momo be dala idia tahua nega bona gabu idauidau ai idia haroro totona

[Box on page 5]

Herevahereva Hamatamaia Daladia Haida

◼ Guriguri amo Iehova ena heduru oi noia

◼ Do idia kamonai bona idia bisi lasi taudia oi tahua

◼ Matana, kiri, bona lalona veria herevadia gaukaralaia

◼ Oi kamonai namonamo

[Box on page 6]

Ekspiriens Haida

• Tadikaka ta be motuka karaia gabuna dekenai ia lao, ena motuka idia hanamoa totona. Ia naria noho lalonai, haida ia haroro henia bona boiboi pepadia amo ia boiridia pablik tok idia kamonai totona. Lagani ta murinai, hebouhebou gabunai, tadikaka ta be unai boiboi pepana ia henia tadikaka dekenai ia lao bona ia hedavari henia. Lagani gunanai, unai tadikaka be motuka karaia gabunai boiboi pepana ta ia abia! Pepa ia abia neganai ia lao pablik tok ia kamonai. Unai tok murinai ena ladana ia henia, ta ese ia stadi henia totona. Hari, ia bona ena adavana be bapatiso idia abia vadaeni.

• Nega bona gabu idauidau ai haroro gaukarana amo hereva momokani ia dibaia taihu ta ia gwau, ena natuna toi dainai taunimanima ia haroro henia diba. Ia ese sikuli dekenai bona tama sina edia hebou dekenai ia davaria tama sina bona dekena taudia ia haroro henia. Hamatamaia hereva kwadogina ia gwauraia murinai, ia gwau: ‘Baibel ena hereva ese lau ia durua egu natuna lau naria totona.’ Bena, ena haroro herevana ia haidaua bona Baibel ena hereva ma haida ia herevalaia. Unai dala dainai, ia ese taunimanima 12 ia durua bapatiso idia abia.

• Insurens kampani tauna ta ia vadivadi neganai, taihu ta ese ia haroro henia. Taihu ia henanadai, ‘Oi ura heduru oi abia oi gorere lasi, oi moale, bona oi mauri hanaihanai totona, a?’ Unai tauna ia haere “oibe,” bona taihu ia nanadaia edena insurens kampani ia herevalaia. Taihu ese Baibel ena gwauhamata ia herevalaia bona iseda buka ta ia henia. Unai hanuaboi ta ai, unai tau ese unai buka ia duahia. Gabeai stadi ia abia, kongrigeisen heboudia dekenai ia lao, bona bapatiso ia abia.

• Peleini dekenai, taihu ta be ia badinai ia helai hahine ta ia haroro henia. Peleini ia ginidae neganai, taihu ese ena adres bona telefon namba be unai hahine dekenai ia henia bona hahine ia hamaoroa, ‘Bema Iehova ena Witnes taudia ese oi idia vadivadi henia, namona be Baibel stadi oi noia.’ Dina iharuana ai, Witnes taudia rua be unai hahine ena ruma dekenai idia vadivadi. Hahine ese stadi ia hamatamaia, ia goada ia lao, ia bapatiso, bona daudau lasi murinai stadi toi ia hamatamaia.

• Tadikaka ta ena mauri lagani be 100 bamona, ia be matakepulu, bona buruka taudia naria hospital dekenai ia noho. Nega momo ia gwau: “Basileia ia mai be namo.” Unai hereva dainai nesi bona gorere taudia haida be henanadai idia henia, unai ese dala ia kehoa Basileia ena anina ia herevalaia totona. Unuseniai ia gaukara hahine ta ese tadikaka ia nanadaia: ‘Oi ura Paradaiso lalonai dahaka do oi karaia?’ Tadikaka ia haere: ‘Egu matana do ia kehoa, do lau raka lou, bona egu wilisea do lau gabua.’ Tadikaka ia matakepulu dainai, unai hahine ia noia magasin ia duahia badabada totona. Tadikaka ena natuna kekeni ia vadivadi neganai, unai hahine ia noinoi: ‘Ia namo magasin haida lau abia lao egu ruma dekenai.’ Ma ia gwau: “Inai hospital dekenai sinado matamata ta ai atoa, ena ladana be: ‘Basileia ia mai be namo.’ ”

• Taihu ta be hotel ta dekenai ia naria lalonai, ia kamonai tatau burukadia haida be politikol gaudia idia herevalaia. Ta ia gwau, gavamani be eda hekwakwanai ia hamaoromaoroa diba lasi. Taihu be ena lalona dekenai ia gwau, ‘Inai be nega namona idia lau haroro henia totona.’ Guriguri kwadogina ia gwauraia murinai idia dekenai ia lao. Iena ladana ia gwauraia bona idia ia hamaoroa, Dirava ena gavamani sibona ese taunimanima edia hekwakwanai do ia hamaoromaoroa, bona ia dogoatao buklet ia hariharilaia. Nega sisina murinai hotel ena bosi ia mai. Taihu ia laloa bosi ese do ia lulua. To lasi, bosi ia gwau ia be taihu ena hereva ia kamonai danu, bona ia ura unai buklet ta ia abia. Unuseniai ia gaukara tauna ta danu be unai hereva ia kamonai, bona taihu dekenai ia lao mai matana ranu danu. Ia be stadi gunana ta, bona ia ura stadi ia hamatamaia lou.