Dirava Ena Hesiai Taudia Hagoadaia Dalana
1 Lagani 1938 ai, Iehova ena orea ese dala matamatana ta idia hamatamaia. Kongrigeisen ta ta idia boiria soun hebouheboudia dekenai idia lao totona, hari idia gwauraia sekit hebouheboudia. Dahaka totona? January 1939 ai, pepapepa ladana Informant (hari idia gwauraia Iseda Basileia Gaukara), ia gwau: “Inai hebouheboudia be Iehova ena Tiokratik Oreana ena kahana ta bona Basileia ena hesiai gaukara ia durua. Unai hebouhebou dekenai idia gwauraia hadibaia herevadia be mai anina bada idia lao taudia ta ta dekenai, unai amo edia maduna idia huaia namonamo diba.” Lagani 1938 ai, Basileia idia harorolaia taudia edia namba be 58,000 sibona, to lagani 2009 ai, edia namba ia bada daekau 7,000,000 ia hanaia, unai amo ita diba momokani sekit hebouheboudia ese anina namona idia havaraia noho, bona hesiai taudia idia durudia “edia maduna idia huaia namonamo” totona!
2 Vaira Lagani Ena Sinado: Lagani 2011 ena program bona ita do ia hagoadaia dalana ita laloa bada be namo. Ena sinado be, “Umui be Tanobada Ena Lasi,” Ioane 15:19 amo idia abia. Edena tok ma haida ese Dirava ena hesiai taudia do ia durua bada? Saturday ai, tok ta do ita kamonai ena ladana be, “Edena Dala ai Ful-Taim Hesiai Gaukara ese Ita Ia Gimaia?” Danu ita be mai moale ida hereva toi do ita kamonai, ena ladana be “Namo Lasi Inai Gaudia ese Umui Idia Hamiroa:” “Dagedage Gauna,” “Ariara Hahine Badana,” bona “Hoihoi Taudia.” Sunday ai, hereva foa do ita kamonai, ena sinado be “Iehova Ita Lalokau Henia, Tanobada Lasi.” Tok ma haida be, “ ‘Umui be Idau Tano Taudia Bamona Bona Do Umui Noho Daudau Lasi’ ” bona “Umui Goada Noho Bona Tanobada Umui Halusia Diba!”
3 Taihu ta be guna haroro gaukara ia karaia momo lasi, to vanegai ita abia sekit hebouhebou dekenai ia lao murinai, ena revareva lalonai ia gwau ia kamonai program ese ia ia durua ena noho dalana ia laloa lou totona, bona ena lalona ia hadaia “haroro gaukara do ia karaia bona ekskius herevadia do ia gwauraia lasi!” Ita daradara lasi, vaira lagani ena sekit hebouhebouna ese ita do ia durua Iehova ita lalokau henia totona, to tanobada lasi. (1 Ioa. 2:15-17) Namona be unai hebouhebou dekenai oi noho bona oi kamonai namonamo, unai amo Dirava ese ena hesiai taudia ia hagoadaia dalana amo namo do oi davaria!
[Study Questions]
1. Lagani 1938 ai, dahaka dala matamatana ta idia hamatamaia, bona dahaka totona?
2. Lagani 2011 ena sekit hebouhebou ai, dahaka hereva haida do ita kamonai?
3. Sekit hebouhebou dekenai ita lao karana amo dahaka namo do ita davaria?