Haroro Gaukara amo Ita Laga-Ani Diba, A?
1. Edena bamona ita diba, Keristani taudia ginigunadia be haroro gaukara amo idia laga-ani lasi?
1 Keristani taudia ginigunadia be mai ura bada ida taunimanima idia noho gabudia ai sivarai namona idia harorolaia, bona idia “hadokoa lasi.” (Kara 5:42) Unai dainai, ruma-ta-ruma-ta haroro gaukara totona idia lao neganai, dala ai idia davaria taudia idia haroro henia danu. Haroro gaukara murinai, maketi gabudia dekenai hoihoi totona idia lao neganai, haida idia haroro henia danu. Iesu bamona, haroro gaukara amo idia laga-ani lasi.—Mar. 6:31-34.
2. Iseda ladana hegeregerena ita noho totona, dahaka ita karaia be namo?
2 Hanaihanai Ita Hegaegae: Iseda ladana, Iehova ena Witnes taudia, ese dahaka ita karaia ia herevalaia sibona lasi; to ita be daidia ia hahedinaraia danu. (Isa. 43:10-12) Unai dainai, ena be ruma-ta-ruma-ta gaukara totona ita lao lasi, to namona be hanaihanai ita hegaegae eda helaro ita gwauraia hedinarai. (1 Pet. 3:15) Nega bona gabu idauidau ai do oi haroro diba negadia, bona do oi herevalaia gaudia oi lalohadailaia, a? Buka bona magasin oi abia loaloa, unai amo kamonai taudia dekenai oi henia diba, a? (Aon. 21:5, NW) Oi be ruma-ta-ruma-ta sibona dekenai oi haroro, o gabu ma haida ai sivarai namona oi harorolaia, a?
3. “Taunimanima edia vairana dekenai” ita haroro ena anina be dahaka? Bona dahaka dainai unai gaukara ita laloa bada be namo?
3 Taunimanima Vairanai Haroro: Aposetolo Paulo ia gwau ia be “taunimanima edia vairana dekenai” bona ruma-ta-ruma-ta ai ia haroro. (Kara 20:20) Unai dainai, “taunimanima edia vairana dekenai” ita haroro ena anina be, dala ai, motuka atoa gabudiai, bisinesi gabudiai, bona ma gabu haida ai ita haroro. To taunimanima dekenai Basileia ena sivarai ita gwauraia dala badana be, ruma-ta-ruma-ta gaukarana amo. Keristani taudia ginigunadia be ruma idia laloa bada lasi, to taunimanima idia laloa bada. Idia ese dala idauidau ibounai idia gaukaralaia hereva momokani idia gwauraia totona, herevana unai be taunimanima edia vairanai, nega bona gabu idauidau ai bona ruma-ta-ruma-ta ai. Namona be ita danu ese taunimanima ita laloa bada, unai amo eda hesiai gaukara do ita hagugurua diba.—2 Tim. 4:5.