Nega Matamata Baibel Ena Kahana Haida​—Kahana 2

Baibel Ena Hereva Badadia: Nega Matamata Baibel ena murina ai kahana ta ia noho, bona haroro gaukara ai ita do ia durua bada. Rau 618 ai “Baibel Ena Hereva Badadia” ia noho. Idia ibounai be 44 bona alfabet ena oda dekenai idia noho. Unai kahana be edena bamona do ita gaukaralaia?

Bema ruma tauna be hereva idauna ma ta ia gwauraia bona siri ta oi laloatao diba lasi, vadaeni emu Baibel ena murina kahana oi kehoa bona ia gwauraia herevana oi tahua. Eiava, bema ruma tauna ida siri ta o rua umui herevalaia hebou, to oi ura siri ma haida oi gaukaralaia, vadaeni umui herevalaia kahana oi tahua bona siri ma haida oi davaria diba.

Hegeregere, emui herevahereva lalonai, ruma tauna ese Iehova ena Witnes taudia be rara idia abia hanai lasi ena badina ia henanadailaia. Oi ese Kara 15:28, 29 oi laloatao dainai, unai siri oi duahia, to oi itaia ruma tauna ena lalona ia do hegeregere lasi. Baibel siri ma haida oi davaria totona, “Baibel Ena Hereva Badadia” dekenai inai hereva, “Rara” ena henunai siri ma haida oi itaia diba. Unuseniai idia noho siridia ese idia hahedinaraia, unai be Iehova ena taravatu bona Noa ena nega amo unai taravatu ia gwauraia. Danu inai kahana, “B. Ta hamauria karana ese maoro ia henia lasi, Dirava ena taravatu utua totona” bona ena durua siridia idia noho. Unai dala amo, haroro gaukara do oi karaia namonamo.

Ita moale badina Iehova ese “igui hesiai tauna mai ena kamonai bona mai ena kara maoromaoro” amo ita dekenai Baibel namo hereana ia henia. (Mat. 24:45) Namona be inai Baibel ena kahana idauidau ita gaukaralaia, “mauri hanaihanai idia ura kudou-maoro taudia ibounai” ita durua, abidadama taudia ai idia lao totona.​—Kara 13:48.

This article is unique to PNG