Memorial (Lohiabada ena Anibou)

Anina: Anibou ta, Iesu ena mase laloa totona idia karaia. Iena mase be mai anina bada, taunimanima oredia iboudiai edia mase be mai anina maragi. Lohiabada Iesu Keriso ese ena hahediba taudia ia oda henidia iena mase be anibou amo do idia laloa lou; gau ma ta be inai bamona ia haganilaidia lasi. Hari anibou ena ladana ma ta be Lohiabada ena Anibou.​—⁠1 Kor. 11⁠:20.

Memorial be dahaka totona idia karaia?

Iesu ese ena aposetolo, ia idia badinaia noho taudia, ia hamaorodia, ia gwau: “Inai bamona do umui karaia, lau dekenai do umui laloa totona.” (Luka 22⁠:19) Keristen ekalesiana taudia, Dirava ese ena lauma amo ia havaradia lou taudia, be aposetolo Paulo ese ia tore henidia neganai, ia gwau: “Inai anina be, inai paraoa umui ania bona inai kapusi umui inua negadia ibounai, umui ese Lohiabada ena mase umui gwauraia hedinarai, ela bona do ia giroa mai.” (1 Kor. 11⁠:26) Unai hegeregerena, Memorial ese Iesu Keriso ena mase ena anina Iehova ena palani lalonai ia hahedinaraia. Ia hahedinaraia Iesu ena mase boubou gauna ta bamona be mai anina gwauhamata matamatana dekenai, bona ia ida guba Basileiana lalonai edia ahuna do idia abia taudia dekenai danu.​—⁠Ioane 14⁠:​2, 3; Heb. 9⁠:15.

Memorial ese danu ia hahedinaraia, Iesu ena mase bona ena mase dalana, Dirava ese ena palani Genese 3⁠:15 ai bona unai murinai ia gwauraia hegeregerena, ese Iehova ena ladana idia abia isi. Iesu ese Iehova ia badinaia ela bona mase; unai amo ia hahedinaraia Adam ena kara dika be Dirava ese taunimanima ia karadia kerere dainai lasi, bona taunimanima ta ese Dirava ia badinaia goevagoeva diba, hekwarahi bada negana lalonai danu. Unai amo Iesu ese ia hahedinaraia Iehova ese gau iboudiai ia havaradia maoromaoro bona ia lohiadia maoromaoro danu. Danu, Iehova ese ia abia guna lalohadaina be, Iesu be ena mase amo ena mauri goevadaena do ia bouboulaia, Adam ena bese taudia edia mauri davana karaia totona; unai dainai abidadama taudia milion momo be paradaiso tanobadana dekenai do idia mauri hanaihanai diba. Unai dala amo Iehova ese ena lalohadai, matamana neganai ia abia lalohadaina, do ia hagugurua, bona iena lalokau bada taunimanima dekenai do ia hahedinaraia.​—⁠Ioane 3⁠:16; Gen. 1⁠:28.

Iesu be taunimanima ta hegeregerena tanobada dekenai ia noho negana ena hanuaboi ginigabena ai, ia ese maduna bada hereana ia huaia! Iena Tamana guba dekenai ena palani ia totona be ia diba, bona ia diba ia do idia tohoa neganai do ia badinaia noho be namo. Bema ia moru, unai ese ena Tamana do ia hahemaraia bada, bona taunimanima hamauridia dalana do ia haboioa vaitani! Iena mase amo ia karaia gwauraia gaudia iboudiai dainai, Iesu ese ena mase laloa karana unai bamona ia haheganilaia be maoro.

Paraoa bona uaina, Memorial dekenai idia henidia gaudia, edia anina be dahaka?

Idia hatubua lasi paraoana, Iesu ese Memorial ia hamatamaia neganai ena aposetolo ia henidia gauna, be ia ese ia herevalaia, ia gwau: “Lauegu tauanina be inai.” (Mar. 14⁠:22) Unai paraoa ese sibona ena tauanina, kara dika lasi gauna, ia laulaulaia. Ia bouboulaia gwauraia, taunimanima ese mauri hanaihanai helarona do idia abia totona. Memorial neganai, guba Basileiana lalonai Iesu ida do idia lohia totona Dirava ese ia abidia hidi taudia edia helaro be Iesu ese ia herevalaia momo.

Uaina be ena aposetolo ia henidia neganai, Iesu ia gwau: “Lauegu rarana be inai, taravatu matamata ena rarana, ia bubua taunimanima momo dainai.” (Mar. 14⁠:24) Unai uaina ese sibona ena rarana ia laulaulaia. Ena rarana do ia hebubu murinai, unai rara idia abidadama henia taudia edia kara dika be Dirava ese ia dainai do ia gwauatao diba. Unai anibou dekenai Iesu ese ia ida edia ahuna do idia abia taudia edia kara dika huria oho dalana ia gwauraia. Iena hereva ese danu ia hahedinaraia, Iehova ese Keristen ekalesiana taudia, lauma amo ia horodia taudia, dekenai ia karaia gwauhamatana ena anina be unai rara dainai do ia havaraia matamaia.

Rau 280-2 itaia danu, inai sinado “Mass” henunai.

Daidia ese paraoa idia ania bona uaina idia inua be maoro?

Iesu ena mase negana be ia kahirakahira neganai, Lohiabada ena Anibou ia hamatamaia neganai, daidia ese paraoa idia ania bona uaina idia inua? Ia idia badinaia taudia 11 ese. Iesu ese ia hereva henidia, ia gwau: “Unai dainai, egu Tamana ena Basileia ta ia henia lau dekenai hegeregerena, lau danu Basileia ta lau henia umui dekenai.” (Luka 22⁠:29) Idia iboudiai be Dirava ese ia boiridia, Keriso ena guba Basileiana lalonai ia ida do idia lohia hebou totona. (Ioane 14⁠:​2, 3) Unai hegeregerena, hari inai nega lalonai danu, Keriso ese Basileia ia gwauhamatalai henidia taudia mo sibodia ese paraoa idia ania bona uaina idia inua be maoro.

Paraoa idia ania bona uaina idia inua taudia be hida? Iesu ia gwau “orea maragi” sibona ese guba Basileiana do idia abia. (Luka 12⁠:32) Edia momo be 144,000. (Apok. 14⁠:​1-3) Unai orea be lagani 33 C.E. lalonai ia abidia hidi matamaia; unai dainai, hari inai nega lalonai idia ania bona idia inua taudia be momo lasi.

Ioane 6⁠:​53, 54 ese ia hahedinaraia paraoa idia ania bona uaina idia inua taudia mo sibodia ese mauri hanaihanai do idia abia, a?

Ioane 6:​53, 54: “Iesu ma ia haere, ia gwau, ‘Momokani, momokani umui lau hamaoroa, Taunimanima ena Natuna iena tauanina bema umui ania lasi bona ena rarana danu bema umui inua lasi, mauri be umui emui lalona dekenai do ia noho lasi. To lauegu tauanina do ia ania, bona lauegu rarana do ia inua tauna ese mauri hanaihanai do ia abia, bona dokona dina dekenai lau ese do lau hatorea isi.’ ”

Bema Iesu Keriso ena tauanina idia ania momokani bona ena rarana idia inua momokani, Dirava ena taravatu idia utua unai. (Gen. 9⁠:4; Kara 15⁠:​28, 29) Unai dainai ia hedinarai goevagoeva Iesu ena hereva ena anina be idau. To mani inai oi laloa: Iesu ena hereva Ioane 6⁠:​53, 54 dekenai be ia ese ia gwauraia lasi Lohiabada ena Anibou ia hamatamaia neganai. Iena hereva idia kamonai taudia ese unai anibou, ia dekenai paraoa bona uaina ese Keriso ena tauanina bona ena rarana idia laulaulaia anibouna, be idia do diba lasi. Unai kara ia hamatamaia lasi ela bona lagani ta bamona ia ore murinai, bona aposetolo Ioane ese Lohiabada ena Anibou sivaraina ia torea lasi, ela bona ma karoa 7 ia torea murinai iena Evanelia Bukana ena karoa namba 14 lalonai ia torea.

Vadaeni, bema ta ese Memorial dekenai paraoa ia ania lasi bona uaina ia inua lasi, edena dala amo ‘Taunimanima ena Natuna ena tauanina ia ania diba bona ena rarana ia inua diba’? Mani inai oi laloa: Iesu ia gwau unai bamona idia aniani bona idia inuinu taudia ese “mauri hanaihanai” do idia abia. Guna, Ioa 6 siri 40 lalonai, taunimanima ese mauri hanaihanai do idia abia totona do idia karaia karadia ia herevalaia neganai, ia gwau iena Tamana ena ura be dahaka? Iena ura be inai: “Ena Natuna do idia itaia noho bona do idia abidadama henia taudia ibounai be mauri hanaihanai do idia abia.” Unai ese ia hahedinaraia, inai hereva, ‘iena tauanina idia ania bona iena rarana idia inua,’ ena anina be, idia ese Iesu ena tauanina bona ena rarana, ia bouboulaia gaudia, edia hahemauri siahuna idia abidadama henia. Mauri ena honuhonu-dae do idia abia taudia iboudiai ese unai bamona idia abidadama henia be namo; guba dekenai Keriso ida do idia abia taudia, bona tanobada ena Paradaiso dekenai do idia abia taudia danu.

Memorial be nega hida bona edena negai idia karaia be maoro?

Iesu ia gwau lasi lagani ta ta amo nega hida do idia karaia. Iena hereva be inai sibona: “Inai bamona do umui karaia, lau dekenai do umui laloa totona.” (Luka 22⁠:19) Paulo ia gwau: “Inai anina be, inai paraoa umui ania bona inai kapusi umui inua negadia ibounai, umui ese Lohiabada ena mase umui gwauraia hedinarai, ela bona do ia giroa mai.” (1 Kor. 11⁠:26) Bema tau ta ese gau badana ta, iena headava dinana o unai bamona gauna ma ta, laloa lou totona bema kara ta ia karaia, nega hida ia karaia? Eiava, bema bese ta ese guna idia dekenai ia vara gauna badana laloa lou totona kara ta bema idia karaia, nega hida idia karaia? Lagani ta ta amo nega tamona idia karaia, unai gau ia vara dinana korikori ai. Unai hegeregerena, Lohiabada ese ena Anibou karaia karana, gabeai do idia karaia loulou karana, be Iuda taudia edia Paseka dinana ai ia hamatamaia; Keristen taudia ai idia lao murinai, Paseka Ariana, guna lagani ta ta amo nega tamona idia karaia ariana, idia karaia lou be anina lasi.

Iehova ena Witness taudia ese Memorial idia karaia Nisan 14 ai, dina ia diho murinai. Unai dina be Iuda taudia edia kalenda, Iesu ena nega lalonai idia gaukaralaia gauna, hegeregerena idia duahia hidi. Iuda taudia edia dina ta be dina ia diho neganai ia matamaia, bena kerukeru, dina ia diho lou neganai, ia doko. Edia kalenda hegeregerena, Iesu ese Memorial ia hamatamaia bena unai dina tamona lalonai ia mase. Nisan huana ena matamana idia davaria dalana be inai: Au rauraudia idia tubu lou negana lalonai, dina bona hanuaboi edia lata be hegeregere negana kahirakahira momokani, hua matamatana be Ierusalem amo idia itaia matamaia negana murinai, dina ia diho negana ginigunana be Nisan huana ena matamana idia gwauraia. Ma dina 14 murinai be Memorial dinana. (Reana memorial dinana be idau, Iuda taudia hari inai negai idia noho edia Paseka dinana hegeregerena lasi. Badina be dahaka? Badina be, edia kalenda edia hua ta ta edia matamana idia gwauraia hidi, saiens taudia ese idia duahia guna negadia hegeregeredia. Nega haida hua matamatana be Ierusalem ataiai ia hedinarai lasi, ela bona saiens taudia ese idia gwauraia hidi guna negana murinai hora 18 o 30 idia ore. Danu, hari inai negai Iuda taudia momo ese Paseka idia karaia Nisan 15 ai, to Iesu ese Nisan 14 ai ia karaia, Mose ena Taravatu hegeregerena.)