Dahaka Dainai Ita Haroro?

1. Daidia ita lalokau henia dainai haroro gaukara ita goadalaia?

¹ Hari, Dirava ena Basileia sivarai namona ita harorolaia be gau badana. Inai gaukara ita karaia neganai, ita be taravatu rua ita badinaia: Iehova bona eda dekena taudia ita lalokau henia. (Mar. 12:29-31) Unai lalokau dainai, haroro gaukara ita goadalaia diba.—1 Ioa. 5:3.

2. Edena dala ai haroro gaukara amo ita hahedinaraia Iehova ita lalokau henia?

² Iehova Ita Lalokau Henia: Eda Turana Iehova ita lalokau henia dainai, Iena ladana ita abia isi bona harorolaia. Badina lagani 6,000 bamona lalodiai, iena ladana be Satani ese ia hadikaia. (2 Kor. 4:3, 4) Unai dainai, taunimanima idia laloa Dirava ese hel lahina lalonai kara dika taudia ia hahisia, ia be Toi Tamona Diravana, bona ia be taunimanima ia laloa bada lasi. Momo idia laloa Dirava ia noho lasi. Ita ura bada taunimanima be eda guba Tamana ena sivarai momokanina idia diba! Dirava ena witnes gaukara ita karaia namonamo dainai, Iehova ia moale to Satani ia badu.—Aon. 27:11; Heb. 13:15, 16.

3. Edena dala ai eda haroro gaukara amo ita hahedinaraia eda dekena taudia ita lalokau henia?

³ Eda Dekena Taudia Ita Lalokau Henia: Ta ita haroro henia neganai, ita hahedinaraia ia ita lalokau henia. Inai nega dokona lalonai, taunimanima ese sivarai namona idia kamonai be gau badana. Momo be Iona ena negai idia noho Nineva taudia bamona, badina “edia imana idibana bona imana laurina edia idau idia diba lasi.” (Iona 4:11, BHḡ) Eda haroro gaukara amo taunimanima ita hadibaia edena bamona mauri namona idia moalelaia diba. (Isa. 48:17-19) Idia dekenai Helaro ia henia. (Roma 15:4) Bema sivarai namona idia kamonai bona idia dibaia gaudia idia badinaia, “hahemauri do idia abia.”—Roma 10:13, 14.

4. Iehova ese dahaka do ia laloaboio lasi?

⁴ Natu namodia be dina badadia sibona lasi, to nega ibounai idia hahedinaraia edia tama sina idia lalokau henia. Unai hegeregerena, Dirava bona eda dekena taudia ita lalokau henia dainai, nega ibounai dala do ita tahua ma haida ita haroro henia totona. Haroro gaukara ita hadokoa lasi. (Kara 5:42) Iehova ese unai lalokau karana do ia laloaboio lasi.—Heb. 6:10.