Dirava Ena Hereva be mai Ena Namo Hadibaia Totona
1. Lagani 2014 ena sekit hebouhebou ena sinado be dahaka, bona edena henanadai do ia haerelaia?
1 Iehova be eda “Hadibaia Tauna Hereadaena.” (Isa. 30:20, 21, NW) Edena dala ai Iehova ese ita ia hadibaia? Ia ese buka hereadaena ta ia henia, unai be Baibel. Edena dala ai Dirava ena hereva ese ita ia durua eda tauanina, lalona, hemami bona Dirava ita tura henia karana ita gimaia? Unai henanadai be lagani 2014 ena sekit hebouhebou ese do ia haerelaia. Sinado be, “Dirava Ena Hereva be mai Ena Namo Hadibaia Totona,” 2 Timoteo 3:16 amo idia abia.
2. Edena henanadai ese hebouhebou ena point badadia idia hahedinaraia?
2 Inai Point Badadia Laloa: Henunai henanadai edia haere ese hebouhebou ena point badadia do idia hahedinaraia:
• Baibel ese edena dala idauidau ai ita ia durua diba? (Isa. 48:17, 18)
• Bema eda noho dalana ita haidaua bena ful-taim hesiai gaukara ita karaia, dahaka do ia vara? (Mal. 3:10)
• Haida ese ‘hadibaia hereva idau hereadia’ idia gwauraia neganai, dahaka ita karaia be namo? (Heb. 13:9)
• Edena dala ai Iesu ena “hadibaia dalana” ita tohotohoa diba? (Mat. 7:28, 29)
• Dahaka dainai kongrigeisen idia hadibaia taudia ese sibona idia hadibaia danu be namo? (Roma 2:21)
• Dirava ena Hereva ena namo be dahaka? (2 Tim. 3:16)
• Dirava ese bese ibounai ia “hamarerea” neganai, dahaka do ia vara? (Hag. 2:6, 7)
• Iehova ia diba dahaka ita karaia diba? (Efe. 5:1)
• Iehova ena hadibaia hereva ita badinaia noho totona, dahaka dainai ita hekwarahi bada be namo? (Luka 13:24)
3. Dahaka dainai hebouhebou ita lao bona program ita kamonai namonamo be namo?
3 Paulo ese 2 Timoteo 3:16 ia do torea lasi neganai, ia ese matamana siridia ai nega aukadia ia herevalaia. Ia gwau: “Kara dika taudia bona koikoi taudia ese edia kara dika do idia habadaia momokani, bona idia ese ma haida do idia hakaua kerere bona idia danu be ma haida ese do idia hakaua kerere.” (2 Tim. 3:13) Gau badana be Dirava ena hereva ita kamonai bona badinaia, unai amo ma haida ese ita do idia hakaua kerere lasi. Unai dainai, namona be hebouhebou ita lao bona program ibounai ita kamonai namonamo.