Dala Idia Kehoa Negadiai Basileia Sivaraina Harorolaia!

1. Davida ena haheitalai amo dahaka ita dibaia?

¹ King Davida be gau ta ese ia koua lasi. Hegeregere, Davida ia ura Iehova ena dubu ta ia karaia. Unai ia vara lasi neganai, Davida ese ena tahua gauna ia haidaua bona Solomona ia durua dubu helaga haginia kohudia ia abia hegaegae totona. (1 Kin. 8:17-19; 1 Siv. 29:3-9) Davida be ia karaia diba lasi gauna ia laloa lasi, to do ia karaia diba gauna sibona ia laloa. Davida bamona, edena dala idauidau ita tahua Basileia sivaraina ita harorolaia totona?

2. Edena dala ai eda noho dalana ita tahua namonamo?

² Oi Karaia Diba Gaudia: Momo be edia noho dalana idia haidaua, unai amo idia heduru o regula painia diba. (Mat. 6:22) Oi danu unai bamona oi karaia diba, a? Emu noho dalana oi laloa bona oi gurigurilaia neganai, do oi itaia “gaukara ena iduara badana” be oi dekenai do ia kehoa. Bema unai ia vara, unai nega oi gaukaralaia namonamo!​—1 Kor. 16:8, 9.

3. Ena be ita haida ita painia diba lasi, to edena dala idauidau ai ita haroro diba?

³ To, bema emu noho dalana dainai oi painia be auka, dahaka oi karaia diba? Dala idauidau oi gaukaralaia diba. Hegeregere, bema witnes lasi taudia ida oi gaukara hebou, dala ta ai idia oi haroro henia diba, a? Eiava oi gorere neganai, oi idia naria taudia oi haroro henia diba, a? Laloatao, buruka o gorere bada dainai idia haroro momo lasi pablisa ese miniti 15 idia ripotilaia diba. Namona be nega bona gabu idauidau ai oi haroro ena hora, oi hariharilaia buka bona magasin, pepapepa, memorial bona hebouhebou ena invateisen be haroro ripoti ai oi torea. Ena be miniti haida sibona oi haroro, to unai hora ibounai oi haboua neganai, emu hora do ia bada!

4. Emu lalona oi hadaia dahaka oi karaia totona?

⁴ Ena be eda noho daladia be idauidau, to dala idia kehoa negadiai sivarai namona ita harorolaia. Unai amo moale do ita davaria, badina ita diba Basileia totona ita gaukara goada.​—Mar. 14:8; Luka 21:2-4.