Kara Dika

Anina: Heberu bona Greek gado herevadia hegeregeredia, anina be “maka” reaia. Dirava sibona ese unai “maka” ia gwauraia hidi, ia ura taunimanima ese edia kara be unai maka ida do idia hahegeregerea. Idia reaia taudia edia kara be kara dika, kara gagevagagevadia eiava taravatu utua karadia unai. (Roma 3:23; 1 Ioane 5⁠:17; 3:⁠4) Dirava ena kara, ena taravatu, ena dala, bona ena ura be helaga; bema kara ta be unai hegeregeredia lasi, unai be kara dika. Tau ta ia kara dika, reana anina be ia kara kerere, o kara maorona ta ia reaia, o Dirava ia ura lasi herevadia ia gwauraia, o lalohadai mirodia ia laloa, o sibona mo ena namo tahua dalana ia laloa. Baibel ese ia hahedinaraia kara dikadia be idauidau; taunimanima be Adam ena amo idia vara dainai idia karaia karadia be idau, bona taunimanima ta ta be sibodia edia ura dikadia hegeregeredia idia karaia karadia be ma idau. Baibel ese danu ia hahedinaraia, taunimanima ta ese kara dikana ta ia karaia bena ia helalo-kerehai be idau, bona ta ese kara dika ia karaia loulou be ma idau.

Bema Adam ia goevadae, edena bamona ia kara dika diba?

Genese 1⁠:​27, 31 bona Deuteronomi 32⁠:4 ese idia hahedinaraia Adam ia goevadae. Iehova Dirava ese tanobada dekenai ia havaradia gaudia, tau bona hahine danu, ia gwauraidia “idia be namo herea” neganai, iena hereva ena anina be dahaka? Ena gaukara iboudiai be goevadae dainai, ena hereva ena anina be, unai ia karaia gaudia be iena maka hereadaena hegeregerena.

Adam bona Eva idia goevadae, anina be idia kara kerere diba lasi, a? Dirava ese Adam bona Eva be masini bamona ia karadia lasi, to ia ese kwara harana ia henidia, unai amo idia sibodia ese maoro eiava kerere idia abia hidi diba, bona kamonai eiava gwau-edeede idia abia hidi diba. Dirava ese taunimanima unai bamona ia karadia, unai dainai bema edia lalona be unai bamona idia hadaia diba lasi, unai ese ia hahedinaraia idia goevadae lasi. To bema edia lalona idia hadaia kerere, unai ese ia hahedinaraia lasi ia havaradia neganai idia goevadae lasi.​—⁠Deuteronomi 30:19, 20; Iosua 24:15 itaia danu.

Dirava ese Adam bona Eva ia havaradia neganai bema idia goevadae, anina be nega iboudiai edia lalona do idia hadaia maoromaoro sibona badina be do idia kerere dalana be lasi, a? Bema unai bamona, anina be sibodia edia lalona idia hadaia diba lasi dahaka do idia abia hidi. Dirava ese ia havaradia neganai masini bamona ia havaradia lasi, to ura-kwalimu bona diba ia henidia sibodia edia lalona do idia hadaia totona, bena idia lalokau henia dainai do idia kamonai henia diba. Eiava, bema edia lalona idia biagua lasi bona sibodia edia ura idia tahua, do idia gwau-edeede henia. Edena oi moalelaia​—⁠ia oi doria dainai oi ia durua tauna, eiava sibona ena ura dainai oi ia durua tauna?​—⁠Deuteronomi 11:1; 1 Ioane 5:⁠3 itaia danu.

Goevadae taudia be sibodia edia ura edena bamona idia tahua diba bena idia kara dika? Ena be Dirava ese ia havaradia neganai idia goevadae, to bema aniani namona idia ania lasi edia tauanina do idia goevadae noho lasi. Unai hegeregerena, bema edia lalona be lalohadai kereredia amo idia ubua, edia lalona do idia dika idia lao bona kara maoromaoro do idia badinaia noho lasi. Iakobo 1⁠:​14, 15 ia gwau: “Hedibagani ena badina korikori be, tau ta sibona ena ura dainai kara dika ta ese ia veria noho, bona ia koia noho. Vadaeni iena ura dikadia be idia rogorogo bamona, unai murinai kara dika ia havaraia.” Eva ese ura dikadia ia abia matamaia, Satana ena hereva, gaigai uduna amo ia gwauraia herevadia, ia kamonai neganai. Adam ese ena adavana ena hereva ia kamonai bona Dirava ese ia taravatulaia au huahuana ia ania. Lalohadai kereredia idia negea lasi, to sibodia edia ura kereredia idia laloa bada. Unai dainai idia kara dika.​—⁠Gen. 3:1-6.

Adam ia kara dika be “Dirava ena palani” hegeregerena, a?

Rau 30-1 itaia, inai sinado “Adam bona Eva” henunai, bona rau 298-9 inai sinado “Mauri Biagua Siahuna” henunai danu.

Hari inai negai kara haida be “kara dika” ita gwauraia be hegeregere, a?

Hereva hegeregeredia: Bema gorere tauna ese tauanina ena siahu hahetohoa gauna ia hamakohia, unai ese ia hamomokania ia be mai ena fiva lasi, a? Bema henao tauna ese gavamani ena taravatu ia abidadama henia lasi, ia henaohenao neganai ia be mai ena kerere lasi, a? Unai hegeregerena, ena be taunimanima momo idia laloa Baibel ena taravatu idia badinaia be anina lasi, to unai ese edia kara dika ia kokia lasi.​—⁠Ioane Ginigunana 1⁠:8 itaia.

Reana taunimanima haida ese edia lalona idia hadaia Dirava ena Hereva ese ia taravatua karadia do idia karaia. To unai ese ia hamomokania lasi Baibel ia kerere. Galatia 6⁠:​7, 8 ia gwau: “Umui laloa kerere lasi, Dirava ita koia diba lasi. Bema tau ta aniani uhena ia hadoa, vadaeni unai bamona aniani sibona be do ia abia. Bema tauanina ena ura ia hadoa neganai ia be mase do ia abia.” Matabodaga karadia amo idia vara goreredia be taunimanima momo herea dekenai idia hanai, bona headava taudia momo ese edia adavadia idia rakatanidia; unai ese ia hahedinaraia Baibel ena hereva be momokani. Dirava ese taunimanima ia havaradia; Ia diba dahaka ese ita do ia hamoalea hanaihanai; Baibel amo unai ia hadibaia ita dekenai. Dirava ita kamonai henia be aonega karana, ani? (Sinado badana “Dirava” henunai idia noho herevadia amo oi hamomokania Dirava ia mauri noho.)

Idia gwauraia dika karadia momo be taunimanima edia kara korikori mo, a?

Mahuta hebou karana be kara dika, a? Adam bona Eva idia mahuta hebou neganai, idia kara dika unai, a? Baibel be unai bamona ia hereva lasi. Genese 1⁠:28 ia gwau Dirava ese Adam bona Eva ia hamaorodia, ia gwau: “Emui bese umui havaraia, do umui hutuma. Tanobada ena gabu ibounai dekenai umui noho.” Unai hereva ena anina be do idia mahuta hebou, ani? Bona Salamo 127⁠:3 ia gwau: “Memero na Iehova ena herahia, . . . ena harihari ḡaudia.” Eva ese taravatu auna ena huahua ia ania guna, ia sibona ia noho neganai; gabeai ia ese ena adavana danu ia henia. (Gen. 3⁠:⁠6) Unai au bona ena huahua be gau korikoridia. Baibel ese tau ta mai adavana ida idia mahuta hebou karana ia taravatulaia lasi, to headava lasi taudia idia mahuta hebou karana, heudahanai, tatau be tatau ida idia mahuta hebou karana, bona taunimanima be boroma ida idia mahuta hebou karana, ia taravatulaia. Unai kara edia huahua dikadia ese idia hahedinaraia, ita ia havaraia dalana ia diba Diravana ese ita ia lalokau henia dainai unai kara ia taravatulaia.

Gen. 1:27: “Dirava ese taunimanima [Adam] ia karaia, ia sibona ena laulau bamona, Dirava ena toana hegeregerena ia karaia.” (Adam ena kara korikori be Dirava ena kara helagadia ia tohotohoa bona ena oda ia badinaia. Bema unai bamona ia karaia lasi, ia kara rea, ia kara dika. Roma 3⁠:23; 1 Petero 1⁠:​14-16 itaia danu.)

Ef. 2:1-3: “Guna umui [Keristen taudia] be emui kara dika bona kerere dainai umui mase. Unai neganai inai tanobada ena kara dika dalana umui raka. Umui ese lauma dikadia edia biaguna umui kamonai henia. Inai lauma ese Dirava idia kamonai henia lasi taudia edia lalona dekenai harihari ia gaukara noho. Guna ita ibounai be idia bamona ita karaia. Iseda tauanina edia ura dikadia, bona iseda lalona edia ura kava sibona ita karaia. Vadaeni unai bamona ita noho dainai, iseda dika davana korikori be Dirava ena badu, taunimanima oredia ibounai hegeregerena.” (Ita be Adam ena bese taudia dainai kara dika lalonai ita vara. Ita maragi negana ela, iseda ura idia dika. Bema unai ura dikadia ita koua lasi, unai mauri dalana do ita manadalaia. Reana do ita laloa unai be taunimanima edia kara “korikori,” badina idia bogaragidiai ita noho taudia danu be unai bamona idia karaia. To Baibel ese ia hahedinaraia dahaka be maoro bona dahaka be kerere Dirava ena matana ai; ia ese taunimanima ia havaradia dalana bona iena palani idia totona hegeregeredia unai kara ia lalohadailaia. Ita ia havaraia Diravana bema ita kamonai henia bona mai eda lalokau ida ita badinaia, iseda mauri be mai anina bada bona mauri hanaihanai do ita davaria diba. Mai ena lalokau ida ita ia noia, do ita mamia toho bena do ita diba ia be namo herea.​—⁠Sal. 34⁠:⁠8.)

Taunimanima ta ena kara dika dainai Dirava ese edena bamona ia laloa?

1 Ioane 3:4, 8: “Kara dika tauna ese Dirava ena taravatu ia utua noho, badina kara dika be taravatu utua gauna. . . . Kara dika ia karaia noho tauna be Satani ena tauna.” (Mai edia ura ida idia kara dika loulou taudia be Dirava ese ia gwauraidia taravatu utua taudia. Idia ese Satana ena dala idia abia hidi.)

Roma 5:8, 10: “Ita be do kara dika noho taudia neganai Keriso be ita dainai ia mase. Guna ita maino lasi Dirava dekenai, to iena Natuna ia mase dekena amo be maino ia karaia, vadaeni ia bona ita be turana vadaeni.” (Baibel ese kara dika taudia ia gwauraidia Dirava ena inai taudia. Unai dainai, Dirava ese ita be ia ida do ita maino totona ia karaia dalana ita abia dae be namo!)

1 Tim. 1:13: “[Aposetolo Paulo ia gwau:] Dirava ese lau ia bogahisihisi henia, badina be abidadama lau do diba lasi, bona lauegu kara ena dika lau do diba lasi dainai.” (To Lohiabada ese dala maorona ia hahedinarai henia neganai, maoromaoro ia badinaia.)

2 Kor. 6:1, 2: “Ai be Dirava danu ai gaukara hebou dainai, umui ai noia goada inai bamona, ‘Umui ese Dirava ena hariharibada umui abia vadaeni, be umui negea kava lasi.’ Badina Dirava be inai bamona ia hereva, ia gwau, ‘Lauegu hariharibada henia ena dina ia ginidae neganai, umui emui taitai lau kamonai. Lau ese mauri umui do lau henia dinana ia ginidae neganai, umui dekenai durua do lau henia.’ Umui kamonai! Dirava ena hariharibada ita abia ena nega namona be harihari! Hari dina hahemauri ita abia dae be namo!” (Hahemauri dalana be ia kehoa hari. Dirava ese kara dika taudia inai bamona do ia bogadia hisi hanaihanai lasi. Unai dainai namona be ita naria namonamo, Dirava ena hariharibada ena anina do ita reaia garina.)

Dahaka ese taunimanima kara dika amo ia ruhadia diba?

Inai sinado badana “Mauri ena Davana” itaia.