“Dirava be Lalokau”
“To mai ena lalokau lasi tauna ese Dirava ia diba lasi, badina Dirava be lalokau.”—1 IOANE 4:8.
1-3. (a) Baibel ese Iehova ena lalokau karana be edena bamona ia herevalaia, bona edena dala ai unai hereva ia idau? (b) Dahaka dainai Baibel ia gwau “Dirava be lalokau”?
IEHOVA ena kara ibounai be namo herea. To Iehova ena kara ibounai amo lalokau be ena kara namo hereana. Gau ma ta lasi ese Iehova kahirakahira dekenai ita ia veria lao diba, lalokau ese ita ia veria hegeregerena. Moale gauna be, lalokau be iena kara bada hereana danu. Edena bamona unai ita diba?
2 Baibel ese lalokau be dala ma ta ai ia herevalaia danu, to Iehova ena kara badadia ma haida be unai bamona ia herevalaia lasi. Baibel ia gwau lasi Dirava be siahu, eiava Dirava be hahemaoro maoromaoro, eiava Dirava be aonega. Unai be iena kara, ia be unai kara toi edia badina. To, 1 Ioane 4:8 ese lalokau ia herevalaia, ia gwau: “Dirava be lalokau.” Oibe, Iehova ena lalokau be bada herea. Ia be unai kara ena badina korikorina. Reana inai bamona ita laloa diba: Iehova be ena siahu dainai ia hegeregere kara ta ia karaia. Iena hahemaoro maoromaoro bona aonega ese kara ta ia karaia dalana idia biagua. To Iehova ena lalokau ese iena lalona ia veria dainai kara ta ia karaia. Bona ena lalokau be nega ibounai ena kara haida ia gaukaralaia dalana ai ia hedinarai.
3 Nega momo Baibel ia gwau Iehova be lalokau. Unai dainai, bema ita ura lalokau ita dibaia, namona be Iehova ita dibaia. Mani Iehova ena lalokau ena kahana ma haida ita tahua.
Lalokau Karana Hereadaena
4, 5. (a) Histori ibounai lalonai edena kara be lalokau karana hereadaena? (b) Dahaka dainai ita gwau diba Iehova bona ena Natuna huanai ia noho lalokauna be goada herea, ma ta lasi be unai bamona?
4 Iehova be dala momo ai ena lalokau ia hahedinaraia, to idia ibounai ia hereaia lalokauna ta ia noho. Unai be dahaka? Unai be iena Natuna ia siaia ita dainai ia hisihisi bona ia mase totona. Ita gwau diba histori ibounai lalonai unai kara be lalokau karana hereadaena. Dahaka dainai unai bamona ita gwau diba?
5 Baibel ese Iesu ia gwauraia “vara guna Natuna.” (Kolose 1:15) Mani oi laloa—guba bona tanobada be idia do noho lasi neganai, Iehova ena Natuna ia noho. Tamana bona ena Natuna idia noho hebou ena daudau be edena bamona? Saiens taudia haida idia laloa unives be lagani 13 bilioni bamona ia noho vadaeni. To, ena be unai namba be maoro, ena daudau be Iehova ena vara guna Natuna ena mauri ida ita hahegeregerea diba lasi! Unai lagani ibounai lalonai dahaka gaukara ia karaia? Natuna be mai moale ida iena Tamana ena “gaukara karaia tauna bamona” ia noho. (Aonega Herevadia 8:30; Ioane 1:3) Iehova bona ena Natuna idia gaukara hebou gau ibounai idia havaraia totona. Idia ruaosi dekenai unai be moale negadia! Ita daika ese edia gaukara hebou siahuna, nega daudau ia noho gauna, ia lalo-pararalaia diba? Ia hahedinaraia goevagoeva, Iehova Dirava bona ena Natuna huanai ia noho lalokauna be ia goada herea, ma ta lasi be unai bamona.
6. Iesu ia bapatiso neganai, Iehova be edena dala ai Iena Natuna dekenai iena hemami ia hahedinaraia?
6 To, Iehova ese ena Natuna ia siaia tanobada dekenai bona beibi ta bamona ia vara. Unai dainai lagani 30 mai kahana lalonai, Iehova be guba dekenai ena Natuna lalokauna ida ia noho lasi. Mai Ena ura bada ida, guba amo ia itaia Iesu be tau goevadaena ai ia tubu daekau. Iesu ena mauri lagani be 30 neganai, bapatiso ia abia. Unai nega ai Tamana be guba amo ia hereva, ia gwau: “Inai be lauegu Natuna, egu lalokau, lau moale bada ia dekenai.” (Mataio 3:17) Iehova ia itaia Iesu be mai ena kamonai ida Baibel ia perovetalaia gaudia ibounai ia karaia, bona Iehova ia henia gaukara ibounai ia karaia, unai dainai ita diba reana iena Tamana be ia dekenai ia moale bada!—Ioane 5:36; 17:4.
7, 8. (a) Nisan 14, 33 C.E. ai, Iesu be dahaka gaudia ia haheaukalaia, bona iena guba Tamana be edena bamona ia laloa? (b) Dahaka dainai Iehova ese iena Natuna ena hisihisi bona mase ia koua lasi?
7 Nisan 14, 33 C.E. ai, Iesu idia samania bona idia badu taudia hutuma ese idia dogoatao neganai, Iehova be edena bamona ia laloa? Bona Iesu idia kirikirilaia, idia kanudia, bona edia imana amo idia botaia neganai? Idia kwadia noho lalonai, iena doruna ena tauanina ia darea neganai? Bona au ta latanai iena imana bona aena idia kokoa bona idia rakatania ia noho taunimanima ese idia hevasehalaia totona? Tamana be edena bamona ia laloa ia lalokau henia Natuna be hisihisi dainai ia dekenai ia boiboi neganai? Iehova be ia havaraia gaudia ia karaia negana amo, ia lalokau henia Natuna be ia danu ia noho, to hari Iehova ese do ia itaia ia be hahodi ginigabena do ia abia bona do ia mase, ia be hegeregere do ia noho lou lasi. Unai kara dekenai Iehova be edena bamona ia laloa?—Mataio 26:14-16, 46, 47, 56, 59, 67; 27:26, 38-44, 46; Ioane 19:1.
8 Iehova be mai ena hemami dainai, ena Natuna ena mase amo ia mamia hisihisina, be hereva amo ita gwauraia diba lasi. Ita herevalaia diba gauna be Iehova ese unai ia koua lasi ena badina. Dahaka dainai Tamana ese unai bamona hisihisi ia haheaukalaia? Ioane 3:16 ai Iehova ese ita dekenai gau namo hereana ta ia hahedinaraia—ia be mai anina bada Baibel sirina ta dainai, idia gwauraia Sivarai Namona ena anina. Ia gwau: “Badina be Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” Vadaeni Dirava ese unai ia koua lasi ena badina be: lalokau. Unai bamona lalokau karana badana be ma ta ese ia hahedinaraia lasi.
Iehova ese Iena Lalokau Ita Dekenai Ia Hadibaia Dalana
9. Satani ia ura Iehova ena lalohadai ita dekenai be edena bamona do ita laloa, to Iehova be ita dekenai dahaka ia hadibaia?
9 To, mai anina bada henanadai ia vara: Dirava ese ita ta ta ia lalokau henia, a? Ioane 3:16 ia hereva bamona, haida idia abia dae Iehova ese taunimanima ibounai be orea ta bamona ia lalokau henia. To idia laloa, ‘Dirava ese ta ta ia lalokau henia bamona lau ia lalokau henia diba lasi.’ Hereva momokanina be, Satani Diabolo ia ura bada ita abia dae Iehova ese ita ia lalokau henia lasi bona ita ia laloa bada lasi. To, herevana ita laloa ta ese ita ia lalokau henia diba lasi eiava ita laloa ita be anina lasi, Iehova ese ita ia hadibaia ia idia hesiai henia taudia ta ta ia lalodia bada.
10, 11. Edena dala ai Iesu ia gwauraia manu maragidia edia haheitalai ese idia hahedinaraia Iehova ena matana ai ita be mai anina bada?
10 Hegeregere, Iesu ena hereva Mataio 10:29-31 dekenai mani oi laloa. Iesu ese ena hahediba taudia ia herevalaia neganai, ia gwau: “Manu maragidia rua be moni maragimaragi tamona dekenai do idia hoia, ani? To idia ta be tano dekenai do ia moru lasi, emui Tamana bema ia ura lasi neganai. To umui emui kwarana huina ibounai be Dirava ese ia duahia haorea momokani. Do umui gari lasi, badina umui ese manu maragi momo umui hereaia.” Iesu ena hereva idia kamonai henia taudia ginigunadia dekenai, unai hereva ena anina mani ita laloa.
11 Iesu ena negai unai manu maragidia, aniani gaudia, edia davana be maragi herea. Manu maragidia rua be moni maragimaragi tamona dekenai idia hoia. To Luka 12:6, 7 ena hereva hegeregerena, Iesu be gabeai ia gwau, tau ta ese toea rua amo manu maragidia foa do ia abia lasi, to faiv do ia abia. Unai manu maragina ta be davana lasi bamona idia atoa kau. Reana taunimanima edia matana ai unai bamona manu maragidia be anina lasi, to Havaraia Tauna ese edena bamona ia lalodia? Iesu ia gwau: “Dirava ese idia ta [idia atoa kau gauna danu] ia laloaboio lasi.” Iesu ena hereva ita lalo-pararalaia diba. Iehova be unai manu tamona ia laloa bada dainai, ita diba taunimanima ia lalodia bada danu! Iesu ia hereva bamona, Iehova be ita ia diba namonamo. Oibe, iseda kwarana huina ibounai be ia ese ia duahia ore!
12. Iesu ia gwau iseda kwarana huina ibounai Ia duahia neganai, dahaka dainai ita abia dae iena hereva be momokani?
12 Reana haida idia laloa Iesu be unai hereva ia habadaia kava. To, mani toreisi lou oi laloa. Iehova be ita ia havaraia lou totona namona be ita ia diba namonamo! Ita ia laloa bada dainai iseda tauanina ena kahana maragimaragi ibounai ia laloatao diba, eda gene ena gaukara dalana bona lagani momo lalonai ita dibaia bona laloatao gaudia danu. Unai ia karaia diba dainai, ena be taunimanima ta ena kwarana huina, nega momo 100,000 bamona, ia duahia be haraga herea. Iesu ena hereva amo ita diba Iehova ese ita ta ta ia laloa bada!
13. King Iehosapata ena sivarai ese edena bamona ia hahedinaraia Iehova ese iseda kara namodia ia tahua, ena be ita goevadae lasi?
13 Baibel be gau ma ta ia hahedinaraia, unai ese ita ia hadibaia Iehova be ita ia lalokau henia. Iseda kara namodia ia tahua bona laloa bada. King Iehosapata mani oi laloa. King ese kavakava karana ta ia karaia neganai, Iehova ena peroveta tauna ese ia hamaoroa: “Inai dainai Lohiabada ena badu be oi dekenai ia ginidae vadaeni.” Unai hereva ita laloa namonamo! To Iehova ena hereva be unuseni ai ia doko lasi. Ma ia gwau: “To namo sisina be oi dekenai ia noho.” (2 Sivarai 19:1-3) Unai dainai Iehova ese Iehosapata ia badu henia be maoro, to ia ese Iehosapata ena “namo sisina” ia laloa. Ita moale badina ita diba Dirava ese iseda kara namodia ia tahua ena be ita goevadae lasi, ani?
‘Kara Dika Ia Gwauatao’ Diravana
14. Ita kara dika neganai, reana edena bamona hemami ese ita idia hametaua, to edena bamona Iehova ena dika gwauatao karana amo namo ita abia?
14 Ita kara dika neganai, ita lalo-hisihisi bona hemarai dainai reana ita laloa ita be hegeregere lasi Iehova ita hesiai henia totona. To inai oi laloaboio lasi, Iehova be ia noho hegaegae iseda ‘kara dika ia gwauatao’ totona. (Salamo 86:5) Oibe, bema ita karaia kara dika amo ita helalo-kerehai bona ita hekwarahi unai ita karaia lou lasi totona, Iehova ena kara dika gwauatao karana amo namo do ita abia diba. Baibel ese Iehova ena lalokau karana hereadaena ia gwauraia dalana mani ita laloa.
15. Iehova ese iseda kara dika be ita amo ia kokia neganai, ena daudau be edena bamona?
15 Salamo torea tauna, Davida, ese Iehova ena dika gwauatao karana be inai bamona ia herevalaia: “Dina ia daekau kahana, bona dina ia diho kahana be daudau herea. Unai daudauna hegeregerena be Dirava ese, iseda kara dika ita dekena amo ia kokidia lao vadaeni.” (Salamo 103:12) Dina ia daekau kahana ena daudau be edena bamona dina ia diho kahana amo? Ita gwau diba dina daekau kahana be daudau herea dina ena diho kahana amo; unai kahana ruaosi idia hedavari diba lasi. Diba bada tauna ta ia gwau unai hereva ena anina be, “ia be daudau herea; daudau herea momokani.” Dirava ena lauma amo Davida ese ia torea herevana ese ita ia hamaoroa Iehova ese iseda kara dika ia gwauatao neganai, ia be hegeregere unai kara dika be ita amo ia kokia bona daudau herea momokani ia atoa.
16. Iehova ese iseda kara dika ia gwauatao neganai, dahaka dainai ita diba momokani iena matana ai ita goeva?
16 Nega ta dabua kurokuro amo miro oi kokia toho, a? Herevana oi hekwarahi bada oi kokia totona, to miro ia do noho. To Iehova ena hereva dika gwauatao karana dekenai mani oi laloa: “Umui emui dika be bada, rara ia kakakaka momokani bamona, to lau ese umui do lau huria, vadaeni do umui goeva, sinou ia kurokuro bamona. Momokani emui miro be kakakaka herea, to lau huria neganai ia be kurokuro, mamoe ena huina hegeregerena.” (Isaia 1:18) Iseda kara dika ena miro be kakakaka momokani bamona bona sibona eda goada amo unai ita kokia diba lasi. To, Iehova ia hegeregere iseda dika, ia kakakaka momokani gauna, be sinou kurokurona eiava mamoe ena huina kurokurona bamona ai ia halaoa. Unai dainai Iehova ese iseda kara dika ia gwauatao neganai, namo lasi ita laloa iseda kara dika ena miro be iseda mauri ibounai lalonai do ia noho.
17. Edena dala ai Iehova ese iseda kara dika be iena murina dekena ia negea?
17 Hesekaia be gorere dikana amo ia namo murinai, ia ese tanikiu anena ta ia torea, unai ane dekenai Iehova ia hamaoroa: “Oi ese egu kara dika ibounai oi abia bona emu murina dekenai oi negea.” (Isaia 38:17, NW ) Unai laulau herevana dekenai ia hahedinaraia Iehova ese ia helalo-kerehai kara dika tauna ena dika ia abia bona Iena murina dekenai ia negea, unai amo do Ia itaia lasi bona do Ia laloa lou lasi. Buka ta ia gwau, unai siri ia ura hahedinaraia lalohadaina be inai: “Oi ese [egu kara dika] oi kokia bona ia be hegeregere lau karaia lasi.” Unai be hagoadaia herevana, ani?
18. Edena dala ai peroveta tauna Mika ia hahedinaraia Iehova ese iseda kara dika ia gwauatao neganai, anina be ia kokia momokani?
18 Hanamoa lou gwauhamatana ai, peroveta tauna Mika ia hahedinaraia ia diba momokani Iehova ese ena bese taudia huanai idia helalo-kerehai taudia, edia dika do ia gwauatao, ia gwau: “Lohiabada e, Dirava ta oi hegeregerena be ia noho lasi. Oi ese oiemu bese taudia, idia do mauri noho taudia, edia kara dika oi gwauatao noho. . . . Kara dika do oi moia diho ore, davara ena dobu herea gabuna dekenai do oi atodia siri.” (Mika 7:18, 19) Baibel negadia ai idia noho taudia dekenai unai hereva ena anina mani oi laloa. Oi laloa “davara ena dobu herea gabuna dekenai” idia negea diho gauna be ta ese ia abia lou diba, a? Mika ena hereva ena anina be Iehova ese iseda kara dika ia gwauatao neganai, ia kokia momokani.
“Iseda Dirava Ena Hebogahisi be Bada”
19, 20. (a) Inai Heberu herevana idia hahanaia hebogahisi ena anina be dahaka? (b) Edena dala ai Baibel ese sina ta ena hemami ena natuna dekenai be Iehova ena hebogahisi karana dekenai ita ia hadibaia?
19 Hebogahisi be Iehova ena lalokau karana ta. Hebogahisi be dahaka? Baibel lalonai, Heberu bona Greek herevadia haida ese hebogahisi idia hahedinaraia. Hegeregere, inai Heberu herevana ra·chamʹ, Iehova ia gwau ia sibona ese unai kara ia hahedinaraia, ia be inai hereva “beibi ena puse” ida ia hegeregere bona idia gwauraia diba “sinana ena hebogahisi karana.”
20 Baibel be sinana ese ena beibi dekenai ia hahedinaraia hemamina ia gaukaralaia Iehova ena hebogahisi ita dekenai, ia hadibaia totona. Isaia 49:15 ia gwau: “Hahine ta ese iena natuna maragina ia laloaboio diba, a? Iena bogana dekena amo ia havaraia merona, be do ia bogahisihisi [ra·chamʹ] henia lasi, a? Io, sedira sinana ta ese iena natuna maragina ia laloaboio diba, to lau ese umui do lau laloaboio lasi momokani.” Sina ta ese rata ia do inua natu maragina ia naria lasi bona ia ubua lasi ita laloa be auka. Momokani, unai bamona natu maragina be sibona ia naria diba lasi; dina bona hanuaboi ai sinana ese ia naria be namo. To madi, hari inai “nega ena dokona dekenai,” ita kamonai sina momo ese edia beibi idia naria lasi. (2 Timoteo 3:1, 3) Iehova ia gwau: “To lau ese umui do lau laloaboio lasi momokani.” Iehova ia mamia hebogahisi be bada herea iena hesiai taudia totona, sinana ese ena natuna maragina dekenai ia hahedinaraia hebogahisina ia hereaia momokani.
21, 22. Idaunegai Aigupito dekenai, Israela taudia be dahaka idia mamia, bona edia noinoi dainai Iehova be idia ia durua totona dahaka ia karaia?
21 Edena dala ai Iehova, tamana mai ena lalokau bamona, ese hebogahisi ia hahedinaraia? Idaunegai Israela taudia ia kara henia dalana amo ena hebogahisi ita itaia goevagoeva diba. Lagani 1500 B.C.E. be kahirakahira neganai, Israela taudia milioni momo be Aigupito dekenai igui hesiai gaukarana idia karaia, unuseniai edia gaukara biagudia ese idia dagedage henidia bada. (Esodo 1:11, 14) Mai lalo-hisihisi ida Iehova dekenai idia noinoi. Hebogahisi Diravana be dahaka ia karaia?
22 Unai ese Iehova ena kudouna ia hamarerea. Ia gwau: “Lauegu bese taudia edia hisihisi Aigupito dekenai lau itaia vadaeni. Edia . . . taitai, be lau kamonai vadaeni, badina be edia hisihisi lau diba vadaeni.” (Esodo 3:7) Iehova ese edia hisihisi ia itaia bona edia noinoi ia kamonai neganai, idia mamia hisihisina ia mamia. Iehova be ma haida edia hemami ia laloa Diravana. Bona ma haida edia hemami laloa karana—ma haida edia hisihisi mamia karana—be hebogahisi karana bamona. To, Iehova be ena bese taudia edia hisihisi ia mamia sibona lasi, to idia ia durua totona kara ta ia karaia. Isaia 63:9 ia gwau: “Iena lalokau bona iena bogahisihisi dainai idia ia hamauria.” Iena “goada” imana amo Israela taudia be Aigupito amo ia hamauria. (Deuteronomi 4:34) Unai murinai, hoa dalanai aniani ia henidia bona sibodia edia tano namona dekenai ia hakaudia.
23. (a) Salamo torea tauna ena hereva ese edena bamona ia hahedinaraia Iehova be ita ta ta ia laloa bada? (b) Edena dala ai Iehova ese ita ia durua?
23 Iehova ese ena bese taudia be orea ta bamona ia hebogahisi henia lasi. Iseda lalokau Diravana be ita ta ta ia laloa bada. Ita mamia hisihisi ibounai ia diba. Salamo torea tauna ia gwau: “Lohiabada ese kara maoromaoro taudia ia naria noho. Edia taitai be ia ese ia kamonai henia noho. Lohiabada be lalohisihisi taudia kahirakahira ia noho, bona ia ese edia lalona ia ore taudia ia hamauria noho.” (Salamo 34:15, 18) Edena dala ai Iehova ese ita ta ta ia durua? Ita mamia hisihisi ena badina ia kokia lasi. To heduru totona ia dekenai idia boiboi taudia dekenai gau momo ia henia. Iena Hereva amo sisiba namodia ita abia unai ese namo bada ia havaraia diba. Kongregesen dekenai, Iehova ese lauma dalanai idia goada naria taudia ia henia, bona ena hebogahisi idia hahedinaraia totona idia hekwarahi ma haida idia durudia. (Iamesi 5:14, 15) Iehova be ‘guriguri ia kamonai’ tauna dainai, “Lauma Helaga be idia noinoi taudia dekenai do ia henidia.” (Salamo 65:2; Luka 11:13) Ita durua totona unai gaudia ibounai ese “iseda Dirava ena bogahisihisi” bada ia hahedinaraia.—Luka 1:78.
24. Iehova ena lalokau dainai dahaka do oi karaia?
24 Iseda guba Tamana ena lalokau ita laloa neganai, ita moale bada, ani? Stadi hereva ginigunana ese ita ia hadibaia lou Iehova be ena siahu, hahemaoro maoromaoro, bona aonega be lalokau dalanai ia gaukaralaia iseda namo totona. Bona inai stadi hereva dekenai ita itaia Iehova ese taunimanima ibounai—bona ita ta ta—totona hoa dalanai ena lalokau ia hahedinaraia. Vadaeni sibona dekenai inai henanadai ita henia be namo, ‘Iehova ena lalokau dainai dahaka do lau karaia?’ Namona be ia oi lalokau henia mai emu kudouna ibounai, lalona ibounai, lauma ibounai, bona goada ibounai ida. (Mareko 12:29, 30) Namona be dina ta ta ai oi karaia gaudia ese idia hahedinaraia oi ura bada Iehova kahirakahira oi lao. Bona Iehova, lalokau Diravana, be oi kahirakahira ia mai diba—ela bona hanaihanai!—Iamesi 4:8.
Oi Laloatao, A?
• Edena bamona ita diba lalokau be Iehova ena kara badana?
• Dahaka dainai ita gwau diba Iehova ese iena Natuna ia siaia ita dainai ia hisihisi bona ia mase totona be lalokau karana hereadaena?
• Edena dala ai Iehova ia hahedinaraia ita ta ta ia lalokau henia?
• Edena dala idauidau ai Baibel ese Iehova ena dika gwauatao karana ia herevalaia?
[Picture on page 23]
“Dirava ese . . . iena Natuna tamona sibona ia vara, ia henia”
[Picture on page 24, 25]
“Umui ese manu maragi momo umui hereaia”
[Credit Line]
© J. Heidecker/VIREO
[Picture on page 26]
Sinana ese ia hahedinaraia hemamina ena natuna dekenai ese Iehova ena hebogahisi ita dekenai, ia hadibaia