“Do Idia Diba Lau be Iehova”
“Lauegu ladana helagana do idia hamiroa lou lasi; bona bese idauidau do idia diba, lau be Iehova.”—ESEKIEL 39:7.
1, 2. Edena bamona ita diba taunimanima ese Iehova ena ladana idia hamiroa karana do Ia haheaukalaia hanaihanai lasi?
IDAU negai Israel taudia ese Iehova ena ladana helagana idia hamiroa. Esekiel bukana lalonai unai ia hahedinaraia goevagoeva. Kerisendom lalonai danu taunimanima idia gwau Dirava idia tomadiho henia, to ena ladana idia hamiroa.
2 Guba bona tanobada edia Lohia Badana ese ena ladana idia hamiroa karana do ia haheaukalaia hanaihanai a? Lasi, badina ia gwau: “Lauegu ladana helagana do idia hamiroa lou lasi; bona bese idauidau do idia diba, lau be Iehova.” (Esekiel 39:7; Esekiel 38:23 itaia danu.) Unai ena anina be dahaka? Bona Esekiel bukana ena karoa ginigabedia ese dahaka heduru herevadia ita idia hadibaia?
Peroveta Herevadia Idau Taudia Latadiai
3 Ierusalem idia hadikaia murinai, Amono besena ese Iuda besena ia davaria hisihisina ia moalelaia dainai, bona Moab taudia ese Iuda besena idia gwauraia dika dainai, hahemaoro idia davaria. Edom ese Iuda besena taudia idia dagedage henidia dainai, bona Filistia taudia edia dagedage lalohadaina dainai Dirava ese “mai ena badu danu davadia do ia henidia.” (Esekiel 25:1-17; Hereva Lada-isidia 24:17, 18) Ierusalem ese dika ia davaria neganai idia moale dainai, Turo hanua be do ia moru, Nebukadnesara eiava Nebukadresara (unai tau ena ladana Babulono gadona ai reana inai bamona idia torea) ese ia tuari henia neganai. (Esekiel 26:1-21) Ia be do ia mutu momokani sisimana bamona. (Esekiel 27:1-36) Turo “pavapavana” (edia pavapava iboudiai unai) idia kokia badina ia hekokoroku dainai, Satana ia hekokoroku hegeregerena. (Esekiel 28:1-26) Vadaeni, gau badana be hekokoroku karana dikana ita dadaraia, idau Iehova ena ladana ita hamiroa garina.—Salamo 138:6; Hereva Lada-isidia 21:4.
4. Unai nega murinai dahaka ia vara Aigupito bona Farao dekediai?
4 Aigupito do idia hadikaia bona lagani 40 lalodiai do ia noho dika, Esekiel ese ia perovetalaia. Nebukadnesara ese Dirava ena hahemaoro Turo dekenai ia mailaia dainai, unai hanua ena taga ia abia iena gaukara davana bamona. (Esekiel 29:1-21) Dirava ena siahu dainai Aigupito taudia do idia hakarohodia neganai, ‘do idia diba ia be Iehova.’ (Esekiel 30:1-26) Aigupito ena hekokoroku tauna Farao, ia gwauraia sida auna badana bamona, do idia utua gauna. (Esekiel 31:1-18) Murinai, Esekiel ese Farao bona Aigupito latanai idia vara gau dikadia ia anelaidia, ia gwau mase gabuna dekenai do idia lao.—Esekiel 32:1-32.
Gima Tauna ena Gaukara
5 Esekiel ese sisiba ia abia ena gima gaukarana ena maduna ia laloatao totona. (Esekiel 33:1-7) Momokani, lauma dalanai bema gima tauna ese kara dika taudia ia sisiba henidia gaukarana ia karaia namonamo, unai neganai sibona Dirava ese do ia lalo-namo henia. (Esekiel 33:8, 9 duahia.) Vadaeni, Esekiel bamona, horoa “gima tauna” ena orea ese gari lasi dekenai Dirava ena sisiba taunimanima dekenai idia harorolaia. Dirava be ia moale lasi kara dika taudia idia mase neganai, unai dainai bema sisiba idia abia dae bona ‘mauri ena taravatu idia badinaia,’ guna idia karaia kara dikadia do ia laloaboio. Esekiel ena nega lalonai, unai ena anina be Mose ena Taravatu idia badinaia, to hari, ena anina be Keriso ena rara ia bubua boubou totona ita abia dae bona ia murinai ita raka. (1 Petero 2:21) Dirava ese taunimanima ia hahemaoro henidia eiava ia hanamodia daladia be maoro sibona, bona “hisihisi badana” amo ita roho mauri totona gau badana be iena taravatu ita badinadia.—Esekiel 33:10-20; Mataio 24:21.
6. Esekiel ena negai idia abidia mauri Iuda taudia edia kara bona hari inai nega taudia momo edia kara, edena bamona idia hegeregere?
6 Lagani 607 B.C.E. dokonai, ia heau mauri tauna ta ese Ierusalem idia hadikaia sivaraina ia mailaia, bona unai neganai Esekiel ese Iehova ena hereva ma ia gwauraia hedinarai. (Esekiel 33:21-29) Idia abidia mauri Iuda taudia ese unai hereva be edena bamona idia laloa? (Esekiel 33:30-33 duahia.) Hari inai nega lalonai, taunimanima momo be guna idia abidia mauri Iuda taudia bamona, bona idia laloa Esekiel be ‘lalokau anedia abia’ tauna sibona. Horoa taudia bona idia bamodia taudia be ruma ta ruma ta ai idia lao neganai, taunimanima momo ese Basileia ena sivarai ena regena idia ura kamonai henia, to idia abia dae lasi. Idia dekenai ia be lalokau anena ta bamona, to Iehova dekenai gwauhamata idia karaia lasi, bona “hisihisi badana” amo do idia roho mauri diba lasi.
Iehova ena “Mamoe Naria Tauna Tamona”
7 Ierusalem idia hadikaia murinai, Esekiel ese ma hereva ta Iehova ena amo ia abia, Iehova ese Iena ladana helagana idia hamiroa “Israel naria taudia” ia gwauraidia dika. Ia gwauraia herevadia be Kerisendom biagudia edia kara idia gwauraidia momokani! (Esekiel 34:1-6 duahia.) Kerisendom ena kara be Mamoe Naria Tauna Namona, Iesu Keriso ena kara bamona idia karaia lasi, ena politikol biagudia be “mamoe” edia amo kohu dekenai idia taga. (Ioane 10:9-15) Guna, Iuda besena idia hadikaia neganai, Dirava ese mamoe naria taudia dikadia edia dagi ia kokidia, unai amo ena mamoe bamona taudia ia hamauridia, bona unai hegeregerena, “hisihisi badana” ena nega lalonai, Kerisendom biagudia edia dagi do ia kokia bona ena mamoe bamona taudia do ia hamauridia. (Apokalupo 16:14-16; 19:11-21) Lagani 537 B.C.E. ai, Iehova ese ena lalokau ena mamoe bamona taudia dekenai ia hahedinaraia ia ese Babulono amo ia hamauridia neganai, bona lagani 1919 C.E. ai, Kurese Badana, Iesu Keriso dekena amo, ena lalokau ia hahedinaraia lauma Israel orena taudia be Babulono Badana ena siahu dekena amo ia hakaudia lasi neganai.—Esekiel 34:7-14.
8. Bema ‘mamoe mai digarana’ ta ese ena seri do ia dagedage henia neganai, Iehova ese dahaka do ia karaia, bona mamoe naria Keristen taudia ese mamoe edena bamona do idia kara henidia be namo?
8 Dirava ese mai ena hebogahisi danu ena mamoe ia naridia namonamo. (Esekiel 34:15, 16 duahia.) Bema hari inai negai, ‘mamoe mai digarana’ ese Dirava ena seri do ia dagedage henia, Iehova ese hari do ia atoa orea murimurinai bona “hisihisi badana” lalonai do ia hamasea ore. Lagani 1914 C.E. ai Iehova ese “mamoe naria tauna tamona” Iesu Keriso unai, ia atoa horoa orena taudia ia biagudia totona. Lagani 1935 C.E. amo ia ese “mamoe idaudia” edia “hutuma bada herea” gogodia gaukarana ia biagua, unai taudia ese ‘Iehova ena rei mamoedia,’ ena horoa taudia ida, idia gaukara hebou. Dirava bona Keriso hegeregeredia, mamoe naria Keristen taudia be mai hebogahisi karana amo mamoe iboudiai do idia naridia be gau badana.—Esekiel 34:17-31; Apokalupo 7:9; Ioane 10:16; Salamo 23:1-4; Kara 20:28-30.
“Eden Umana” Hegeregerena!
9 Iuda bona Israel edia noho dika tanona ma ita laloa lou. Dirava ia gwau lagani 70 lalodiai tano do ia laga-ani, taunimanima do idia noholaia lasi, unai dainai kara ta ia karaia Edom bona bese idaudia do idia noholaia lasi totona. (2 Sisiga 36:19-21; Daniel 9:2) Peroveta herevana hegeregerena, lagani 602-601 B.C.E. ai, Babulono ese Edom bona Seiri ororona ia hadikadia, bona ia lohiadia.—Esekiel 35:1––36:5; Ieremia 25:15-26.
10. Lagani 537 B.C.E. ai, orena taudia idia giroa lao Iuda dekenai, unai ese dahaka gaudia ia laulaulaidia hari inai nega lalonai?
10 Lagani 537 B.C.E. ai, orena taudia idia giroa lao Iuda dekenai, bona unai ese iseda nega lalonai idia vara moale gaudia ia laulaulaidia. Lagani 1919 C.E. ai “Israel ororodia,” Iehova ena horoa witness orena taudia unai, be lauma dalanai idia goada lou bona edia noho gabuna lauma dalanai idia noholaia lou. (Esekiel 36:6-15) Dirava ese tomadiho koikoi ena miro amo ia hagoevadia bona idia lalodiai “lauma matamatana” ia atoa, bena unai neganai idia ese ena lauma helaga ena huahua idia hahedinaraia diba. (Galatia 5:22, 23) Ena be Iehova ese ena taunimanima ia sisiba henidia, to tanobada taudia ese iena ladana idia hamiroa lasi totona, Iehova ese orena taudia ia hanamodia bada danu.—Esekiel 36:16-32.
11. Esekiel 36:33-36 ena hereva hegeregerena, Dirava ese dahaka ia karaia horoa orena taudia edia lauma dalanai idia noholaia gabuna dekenai?
11 Orena taudia be Iuda dekenai idia giroa lao murinai, ia noho dika tanona be aniani bada ia havaraia “Eden umana” hegeregerena ai idia halaoa. (Esekiel 36:33-36 duahia.) Unai hegeregerena, lagani 1919 C.E. amo Iehova ese ena horoa orena taudia edia noho dikana, lauma huahua paradaiso gabunai ia halaoa, bona “hutuma bada herea” taudia idia vareai danu. Unai lauma paradaiso idia noholaia taudia be helaga taudia dainai, namona be idia gwauhamata Keristen taudia iboudiai idia goada karaia ia goeva noho totona.—Esekiel 36:37, 38.
Lalo-Tamona Abia Lou
12 Babulono lalonai Iuda taudia idia guidia neganai, Iuda besena be kahirakahira idia mase bamona, idia be tano dekenai idia noho turia kakorodia bamona. (Esekiel 37:1-4) To Esekiel ese ma dahaka ia itaia? (Esekiel 37:5-10 duahia.) Unai turia kakorodia latanai Dirava ese varovaro, hidio, bona kopina ia atodia, bena idia gaukara lou mauri lagana ena siahu amo. (Esekiel 37:11-14) Mai goadadia ida, Israel iduhudia iboudiai amo Iuda taudia 42,360 bona bese idaudia amo taunimanima 7,500 bamona idia giroa lao Iuda tanona idia noholaia totona, bona Ierusalem bona ena dubu idia haginidia lou, bona edia tano lalonai tomadiho momokanina idia haginia lou totona. Unai neganai Dirava ese Iuda besena ia hatoreaisi lou. (Esera 1:1-4; 2:64, 65) Unai hegeregerena, lagani 1918 C.E. lalonai idia dagedage henidia lauma Israel orena taudia be unai turia kakorodia bamona—idia mase bamona, haroro gaukara idia karaia lasi dainai. To lagani 1919 C.E. ai, Iehova ese ia hamauridia lou Basileia sivaraina harorolaia taudia ai idia lao totona. (Apokalupo 11:7-12) Unai hahegeregere herevana amo goada ita abia, badina ita diba momokani, inai horoa taudia bona idia bamodia taudia be Dirava ena tanobada oreana ai idia lao, bona harihari Iehova ese unai orea ia gaukaralaia.—1975 Yearbook of Jehovah’s Witnesses, rau 87-125 itaia.
13. Esekiel 37:15-20 lalonai, Iehova ena idau negai taudia edia orea ena lalo-tamona haginia lou karana idia abia lou edena bamona ia haheitalaia, bona unai haheitalai ese dahaka ia laulaulaia?
13 Idau negai, Iehova ena taunimanima edia orea dekenai lalo-tamona be edena bamona ia haheitalaia? (Esekiel 37:15-20 duahia.) Au rua idia siriudia (ta be Iuda ena iduhu rua basileiana ena maka ia abia, ta be Israel ena iduhu 10 basileiana ena maka ia abia) unai; be mai anina hari inai nega lalonai. Tanobada Ibounai Tuari Ginigunana lalonai, dagi bada ura henia taudia haida ese Dirava ena hesiai taudia edia lalo-tamona karana idia hadikaia toho, to lagani 1919 C.E. ai, mai edia abidadama horoa taudia be Keriso, edia “pavapava tamona” bona “naria tauna tamona” ena henunai idia lalo-tamona lou. Danu, Iuda dekenai idia giroa lao idau bese taudia 7,500 hegeregeredia, harihari “hutuma bada herea” be horoa orena taudia danu idia lalo-tamona. Lauma paradaiso dekenai lalo-tamona ai iseda “pavapava tamona” henunai Iehova ena hesiai gaukara ita karaia be moale gauna momokanina!—Esekiel 37:21-28.
Gog Ia Tuari Hamatamaia!
14 Murinai, hoa karana ta ia perovetalaia. Gog, Magog tanona amo ese Dirava ena ladana do ia hamiroa toho totona bona Dirava ena orea taudia do ia haoredia toho totona, ia ese lauma Israel orena taudia, Iehova ena “hahine” eiava ena guba oreana ia laulaulaia taudia unai, do ia tuari henidia. (Apokalupo 12:1-17) Gog be Satana Diabolo, “inai tanobada ena lohia” tauna. Ia ese unai ladana Gog ia abia guba amo idia lulua lasi neganai; unai be Basileia ia vara neganai, bona lagani 1914 C.E. murinai. (Ioane 12:31) “Magog tanona” be tanobada kahirakahira dekenai, Gog bona ena demoni be unuseniai idia koudia. Tomadiho karana idia dadaraia oreadia ese Kerisendom bona Babulono Badana ibounai do idia haoredia murinai, Iehova ese Gog do ia veria, heduru davaria lasi bamona lauma Israel orena taudia bona idia bamoa gwauhamata taudia dekenai, ia tuari henidia totona.—Esekiel 38:1-17; Apokalupo 17:12-14.
15. Dahaka do ia vara Gog ese Iehova ena Witness taudia do ia tuari henidia neganai?
15 Dahaka do ia vara Gog ese Iehova ena Witness taudia do ia tuari henidia neganai? (Esekiel 38:18-23 duahia.) Iehova ese ena taunimanima do ia hamauridia! Do ia gaukaralaidia tuari gaudia be inai: medu bada hereadia, medu mai ena aisi nadidia badadia, lahi badana, bona daihanai gorere dikana. Daradara bada herea lalonai, Gog ena tuari taudia ese sibodia do idia ala-ala heheni. To Dirava ia do haoredia lasi neganai, ‘do idia diba ia be Iehova.’
16. (a) Dahaka do ia vara “Magog tanona” dekenai? (b) Peroveta herevadia Gog dekenai edia anina ita diba neganai, edena bamona ita lalodia be namo?
16 Satana bona ena demoni be guri dobu masemasena dekenai idia negea neganai, tanobada kahirakahira dekenai idia noho gabuna dikana, “Magog tanona” unai, be do ia ore ela bona hanaihanai. (Apokalupo 20:1-3) Gog ena tuari kohudia be momo herea dainai do idia kokia haorea haraga lasi. Gog ena taunimanima do idia guridia lasi, to manu bona animal idauidau ese edia mase tauanidia do idia ania bona do idia boga kunu momokani. Unai ita diba neganai edena bamona ita laloa be namo? Gog be kahirakahira ia tuari hamatamaia, to Iehova ese ena taunimanima do ia hamauridia; unai ita diba dainai iseda abidadama ia habadaia, bona ita moale badina ena be nega daudau herea Dirava ena ladana idia hamiroa, to do ia vara karana amo Dirava ena ladana do ia hanamoa!—Esekiel 39:1-29.
Iehova ena Gabu Helagana Itaia!
17 Ierusalem ena dubu idia hadikaia lagani 14 murinai, lagani 593 B.C.E. ai, Esekiel ese matahanai amo gabu helagana matamatana ta ia itaia; unuseniai Iehova do idia tomadiho henia. Peroveta tauna ia hakaua aneruna ese unai dubu ena hetoana ia gwauraia hedinarai, ia be bada herea momokani. (Esekiel 40:1–48:35) Unai dubu ese “Helaga Momokani Gabuna . . . Lohiabada sibona ese ia haginia” gauna ia laulaulaia, bona “idia be guba gaudia edia laulau sibona.” Lagani 33 C.E. ai, ena boubou gauna Dirava vairanai ia atoa totona, Iesu Keriso be unai dubu ena Helaga Herea daiutuna, “guba dekenai” ia vareai. (Heberu 8:2; 9:23, 24) Matahanai amo unai dubu ia itaia, bona unai anina be tomadiho momokanina be do ia gini noho Gog ese do ia tuari henia neganai. Unai ese Iehova ena ladana idia lalokau henia taudia ia hamoaledia!
18. Matahanai dekenai ia itaia dubuna lalonai dahaka gaudia idia noho?
18 Dubu ena gau idauidau be momo. Haida be inai: ena murina bona lalona magudia dekenai ikoukou be 6. (Esekiel 40:6-35) Aniani daiutudia 30 (reana taunimanima ese maino karaia bouboudia be unuseniai idia ania) be murimuri kahana maguna ena ariara lalonai idia noho. (Esekiel 40:17) Lahi ese ia araia boubouna ena pata be lalona kahana ariarana lalonai ia noho. (Esekiel 43:13-17) Au amo idia karaia boubou patana, reana ia dekenai muramura mai bonana idia gabua, be dubu ena daiutu ginigunana lalonai ia noho. (Esekiel 41:21, 22) Helaga Herea daiutuna ena lata bona ena lababa be mita 10 bamona, bona dubu ia gegea ahu maguna ena lata be mita 1,600. Unai be ruma hereadaena, Dirava ena hairai ese ia hahonua rumana!—Esekiel 41:4; 42:16-20; 43:1-7.
19. Dubu lalonai idia noho gaudia dainai, bona dubu dekenai idia gaukara taudia ese Dirava ena taravatu idia badinaia dainai, edena bamona do ita lalodia be namo?
19 Unai dubu ena gau idauidau edia oromana, idia bouboulaia gaudia, idia henia gaudia, bona edia aria dinadia ese ita idia hagoadaia Dirava ena orea amo ita abia hahegani herevadia ita badinadia namonamo totona, badina ita diba namona be ita hekwarahi Iehova bona ena tomadiho ita hahairaia totona. (Esekiel 45:13-25; 46:12-20) Dubu lalonai idia gaukara taudia ese Dirava ia gwauraia taravatudia idia badinadia be gau badana, bona edia maduna be taunimanima do idia hadibadia ‘dahaka be helaga gaudia bona dahaka be helaga lasi gaudia.’ (Esekiel 44:15, 16, 23) Namona be unai ese ita ia doria helaga karadia ita karaia noho totona, badina ita be Iehova ena taunimanima dainai.—Efeso 1:3, 4.
20. (a) Matahanai dubuna amo ia aru lasi ranuna ese dahaka ia laulaulaia? (b) Unai ranu ese ia haheitalaia gauna ese dahaka do ia havaraia?
20 Dubu amo ia aru lao sinavaina be Tadi Gohuna lalonai ia aru vareai neganai, ia ese unai tadi ranuna ia hanegaria, bena gwarume momo herea be unuseniai idia mauri noho. (Esekiel 47:1-11) Unai ranu ese Dirava ia karaia mauri hanaihanai dalana Iesu ena boubou karana amo ia laulaulaia. Unai dala amo Gog ena tuari amo do idia roho mauri taudia, bona ma haida, do idia toreisi lou taudia danu, do idia mauri diba. (Ioane 5:28, 29; 1 Ioane 2:2; Apokalupo 22:1, 2) Unai Tadi Gohuna ese taunimanima edia noho ia laulaulaia—hegeregere kara dika bona mase be idia dekenai ia hanai, bona Satana ese ia lohiadia. Gwarume momo be Tadi Gohuna ena negari lou ranuna lalonai idia mauri noho bamona, Mesia ena lohia negana lalonai ia hoidia taudia edia mauri do idia namo herea.
21. Esekiel 47:12 dekenai, ia hahedinarai mai edia kamonai taudia ese tanobada matamatana lalonai dahaka do idia moalelaia?
21 Matahanai dekenai Esekiel ese sinavai ia itaia, bona sinavai isenai au idia tubu, bona idia ese taunimanima edia gorere idia hanamoa diba. (Esekiel 47:12 duahia.) Tanobada matamatana lalonai, mai edia kamonai taunimanimadia be tauanina ai bona lauma dalanai do idia goevadae. Dahaka dainai gau ta ese unai ia koua lasi? Badina matahanai dekenai unai huahua audia edia raudia dekenai taunimanima hanamodia loulou muramurana ia noho. Iehova idia diba bona ena hesiai gaukara idia karaia taudia ese hahenamo momo do idia davaridia!
Do Idia Diba!
22 Bema harihari Dirava ena orea ena taravatu ita badinaia, tanobada Paradaisona lalonai Dirava ese ena ura gabudia ai taunimanima do ia atodia neganai, do ita gwau-edeede lasi. Ita diba, unai bamona Dirava ese taunimanima do ia atodia, badina Israel ena iduhu edia tano idia henidia neganai, Esekiel ena matahanai lalonai ia itaia tanona ena mirigini kahana ataina ai, bona ena diho kahana henunai, tano idia henidia. Esekiel ese ia itaia tanona be naria taudia edia tano. Unai kahana toi “gwauraia hidi” tanona lalonai, ena kahana ta be dubu dekenai idia gaukara lasi Levi taudia edia, bona ena kahana ta be Levi ena dubu hahelaga taudia edia, mai ena haheitalai lauma dubuna danu. Unai tano ena diho kahana ena bogaraginai hanua ta ia noho, iduhu ta ta iboudiai amo gaukara taudia be unuseniai idia gaukara, “hanua pavapavana” henunai. Unai “hanua pavapavana” be tau tamona lasi, to ia be Mesia ena “tanobada matamatana” taudia edia lohia oreana.—Esekiel 47:13–48:34; 2 Petero 3:13; Salamo 45:16.
23. Iesu ese ia hoidia lou taudia ida Paradaiso dekenai do ita noho totona, namona be dahaka do ita karaia hari?
23 Dirava be ena terona dekenai, ena gabu helagana guba lalonai ia helai, bona matahanai dekenai Esekiel ese ia itaia sitina ia hanamoa. (Esekiel 48:35 duahia.) Iehova ese unai siti mai ena tanobada naria oreana dekenai ladana ia henia, ia be Iehova-Sama, o “Iehova ena Noho Gabuna.” Bema Iehova lalokau henia karana oi hahedinaraia noho, Iesu ia hoidia taudia danu Paradaiso lalonai do umui noho diba; unai neganai taunimanima iboudiai be lauma diburana dekenai do idia noho lasi, to iboudiai do idia diba, Iehova sibona be ia mauri noho Diravana momokanina. (Habakuku 2:14) Namo lasi taunimanima dikadia ia hamasedia neganai, bona oi ura lasi neganai, Dirava ese oi do ia doria ena ladana ena siahu do oi diba totona. Abidadama oi hahedinaraia, badina oiemu helaro be do oi roho mauri Dirava ese inai hereva do ia hagugurua neganai, ia gwau: “Bese idauidau do idia diba lau be Iehova.”—Esekiel 36:23.
Edena Bamona Do Oi Haere?
◻ Lauma gima tauna ese edena kara ia karaia neganai sibona Dirava ese do ia lalo-namo henia?
◻ Iehova ese ena mamoe be edena bamona ia kara henidia, bona mamoe naria Keristen taudia ese edena bamona do idia kara henidia be namo?
◻ Iuda besena ena goada lou ia haheitalaia totona dahaka ia karaia? (Esekiel 37:1-14) Hari inai negai unai ese dahaka ia laulaulaia?
◻ Gog, Magog tanona amo, be daika, bona dahaka do ia vara Iehova ena Witness taudia do ia tuari henidia neganai?
◻ Matahanai lalonai ia itaia dubuna amo ia aru lao ranuna ese dahaka ia laulaulaia?
3. (a) Iuda ese hisihisi ia ania neganai, bese idaudia edia kara be dahaka? (b) Dahaka lalohadai ia karaia dainai Turo “pavapavana” idia kokia, bona unai dainai dahaka ita karaia be namo?
5. (a) Lauma gima tauna ese edena kara ia karaia neganai sibona Dirava ese do ia lalo-namo henia? (b) ‘Mauri ena taravatu’ ita badinaia ena anina be dahaka?
7. Esekiel ena negai Iehova ena kara ena mamoe dekenai, bona hari inai negai ena kara ena mamoe dekenai be edena bamona idia hegeregere?
9. Iehova ia gwau Iuda bona Israel edia tano do ia laga-ani, unai dainai dahaka ia karaia?
12. Esekiel 37:1-14 lalonai, edena bamona idau negai Iuda besena ia goada lou karana ia haheitalaia, bona hari inai negai dahaka ia laulaulaia?
14. Gog, Magog tanona amo be daika, bona dahaka do ia karaia? (Esekiel 38:1-17)
17. (a) Lagani 593 B.C.E. ai, Esekiel ese dahaka matahanai ia abia? (b) Matahanai dekenai dubu ia itaia dainai, unai ese dahaka ia hamomokania?
22. Dahaka dainai ita diba, Paradaiso dekenai Dirava ese ena ura hegeregerena taunimanima be edia gabu idauidau ai do ia atodia?
[Map/Picture on page 22]
(For fully formatted text, see publication)
Idia gwauraia hidi tano helagana bona iduhu ta ta edia tano
DAVARA BADANA
HAMAT ENA RAKA VAREAI DALANA
DAN
ASERE
NAPATALAI
MANASE
EFRAIM
RUBEN
IUDA
HANUA PAVAPAVANA
Tano Helagana
En-eglaimi
BENIAMINA
SIMEON
En-gedi
ISAKARA
SEBULUN
Tamara
GAD
Meribata-kade
Tadi Gohuna
Ioridane Sinavaina
Galilea Gohuna
[Picture on page 20]
Iehova be mai ena hebogahisi danu ena mamoe ia naridia namonamo, idau negai mamoe naria taudia idia karaia hegeregerena. Unai dainai namona be mamoe naria Keristen taudia ese Dirava ena seri be mai edia hebogahisi danu do idia naria