Karoa 18

Iehova Ia Gwau Daniela ese Davana Namona Do Ia Abia

HEAU helulu tauna be dokona ia heau henia. Ia hesiku bada, to dokona be kahirakahira momokani dainai, ena goada orena ibounai ia gaukaralaia. Ena tauanina ena masolo ibounai ia gaukaralaia, bena ia kwalimu! Ena vairana ai moale bada toana ia hedinarai. Ia haheauka ela bona dokona bona davana namona ia abia.

² Daniela karoa 12 ena dokona ai, ita itaia lalokau peroveta tauna be ena “heau helulu”​—⁠Iehova ia hesiai henia maurina⁠—⁠ena dokona ai ia noho vadaeni. Aposetolo Paulo ese Keriso ia do vara lasi neganai, Iehova ena hesiai taudia idauidau mai edia abidadama ia herevalaia murinai, ia gwau: “Unai dainai, witnes taudia hutuma bada ori ta bamona ese ita idia hagegea dainai, ita idia hametaua gaudia ibounai bona ita ia guia kara dika do ita atoa siri, bena ita vairanai ia noho heau helulu lalonai do ita heau mai eda haheauka ida.” Bona ma ia gwau: “Iseda matana be Iesu dekenai do ita negea lao. Ia ese iseda abidadama ia havaraia, bona ia ese iseda abidadama do ia durua, ela bona dokona. . . . Ia diba guba ena moale be iena vairanai ia noho dainai, ia ese satauro ena hemarai bona ena mase ia laloa lasi. Bona hari ia be Dirava ena helai gabuna badana ena idiba kahanai ia helai noho.”​—⁠Heberu 12:​1, 2; NW.

³ Unai “hutuma bada” taudia ta be Daniela. Ia be ‘mai ena haheauka ida’ ia heau tauna ta, bona Dirava ia lalokau henia bada karana ese ia veria dainai unai bamona ia karaia. Iehova ese Daniela dekenai tanobada ena gavamani idauidau edia vaira negana ia hahedinaraia vadaeni, to hari Ia ese Daniela hagoadaia herevana ia siaia, ia gwau: “To oi, Daniela, oi haheauka noho ela bona oiemu mauri dokona. Do oi laga-ani, to nega dokona dekenai be do oi toreisi, bona oiemu gaukara davana namona do oi abia.” (Daniela 12:13) Iehova ena aneru ese Daniela dekenai gau toi ia gwauraia: (1) namona be Daniela ia ‘haheauka noho ela bona ena mauri dokona,’ (2) do ia “laga-ani,” bona (3) vaira negana ai do ia “toreisi.” Edena dala ai unai hereva ese hari inai negai Keristani taudia idia durua, bena mauri ena heau helulu dekenai do idia haheauka ela bona dokona?

“OI HAHEAUKA NOHO ELA BONA OIEMU MAURI DOKONA”

⁴ Aneru ese Daniela ia hamaoroa, ia gwau: “To oi, Daniela, oi haheauka noho ela bona oiemu mauri dokona.” Daniela ena mauri lagani be kahirakahira 100, bona ena mase be kahirakahira vadaeni.a Aneru ese Daniela ia hagoadaia mai kamonai ida do ia haheauka ela bona ena mase dinana. To unai ia karaia be mai ena hekwarahi. Daniela ena mauri lalonai ia itaia Babulonia idia hadikaia ore bona idia abia mauri Iuda taudia oredia be Iuda bona Ierusalema dekenai idia giroa lao. Unai ese ia buruka vadaeni peroveta tauna ia hamoalea bada. To sivarai ta ese ia hahedinaraia lasi, ia be idia ida ia lao. Reana unai neganai ia buruka bona manoka vadaeni dainai, unai ia karaia diba lasi. Eiava, reana Iehova ena ura be Babulonia dekenai ia noho. Herevana badina be dahaka, to reana Daniela ena bese taudia be Iuda dekenai idia giroa lao neganai ia lalohisihisi sisina.

⁵ Toana be aneru ena hebogahisi hereva, “oi haheauka noho ela bona oiemu mauri dokona,” ese Daniela ia hagoadaia bada. Reana unai hereva dainai, Iesu Keriso ese lagani 600 bamona gunanai ia gwauraia herevana ita laloa, ia gwau: “To iena lalona do ia goada noho ela bona dokona, unai tauna be do ia mauri.” (Mataio 24:13) Ita diba Daniela be unai bamona ia karaia. Ia haheauka bona mai ena kamonai ida mauri ena heau helulu dekenai ia heau ela bona dokona. Reana unai be badina ta Dirava ena Hereva lalonai ia idia gwauraia namo. (Heberu 11:​32, 33) Dahaka ese Daniela ia durua, do ia haheauka ela bona dokona? Ena mauri sivaraina ese ita ia durua haere ita abia totona.

MAI HAHEAUKA IDA DIRAVA ENA HEREVA IA STADILAIA

⁶ Daniela ia haheauka noho ela bona dokona ena anina be Dirava ena gwauhamata namodia ia stadilaia bona ia lalohadailaia noho. Ita diba Daniela ese Dirava ena Hereva ia stadilaia goadagoada. Bema lasi, edena dala ai ia diba Iehova be Ieremia dekenai ia gwauhamata Babulonia dekenai idia noho negana ena lata be lagani 70? Daniela ia gwau: “Buka Helaga lalonai . . . lau tahua: Unai be ia gwauraia lagani 70.” (Daniela 9:2; Ieremia 25:​11, 12) Oibe, Daniela ese Dirava ena Hereva, unai nega idia noho bukadia lalonai, ia tahua. Daniela ese Mose, Davida, Solomona, Isaia, Ieremia, bona Esekiela edia toretore​—⁠ia dekenai idia noho gaudia ibounai​—⁠dainai nega momo duahiduahi bona laloa dobu karadia ia moalelaia diba.

⁷ Mai eda lalona ibounai ida Dirava ena Hereva ita stadilaia be mai anina bada, hari inai negai eda haheauka karana ita hagoadaia totona. (Roma 15:​4-6; 1 Timoteo 4:15) Bona ita dekenai Baibel ibounai ia noho bona Daniela ese ia gwauraia peroveta herevadia danu, haida be lagani handred momo murinai idia guguru sivaraidia, be unuseniai idia torea. Danu, iseda hahenamo ta be Daniela 12:4 ese ia gwauraia “dokona negana” lalonai ita noho. Hari iseda negai, horoa taudia be lauma dalanai lalo-parara idia abia, bona hari inai dibura tanobadana ai, lamepa bamona, hereva momokani ena diari idia halasia. Unai dainai, Daniela bukana lalonai idia noho peroveta hereva dobudia, ia lalo-pararalaia lasi gaudia danu, be hari inai negai ita lalo-pararalaia namonamo. Unai dainai, namona be dina ta ta ai Dirava ena Hereva ita stadilaia, bona unai gaudia do ita laloa maragi lasi. Unai bamona ita karaia neganai, ita do ia durua ita haheauka totona.

DANIELA IA GURIGURI GOADAGOADA

⁸ Guriguri ese Daniela ia durua danu, ia haheauka ela bona dokona totona. Dina ta ta ai Iehova Dirava dekenai mai abidadama goada ida ia hereva. Ia diba Iehova be ‘guriguri ia kamonai’ Diravana. (Salamo 65:2; mani Heberu 11:6 itaia.) Daniela be Israela ena gwau-edeede karana dainai ia lalohisihisi neganai, ena hemami be Iehova dekenai ia gwauraia hedinarai. (Daniela 9:​4-19) Ena be Dariuse ese taravatu ia atoa, ia gwau dina 30 lalonai ia sibona dekenai idia noinoi diba, to Daniela ese Iehova Dirava guriguri henia karana ia hadokoa lasi. (Daniela 6:10) Unai kamonai tau burukana ia diba laiona edia guri dekenai ia do idia negea, to ia laloa bada guriguri karana ia rakatania lasi. Unai ita laloa neganai iseda kudouna ia hamarerea bada, ani? Ita daradara lasi, Daniela be mai kamonai ida ia noho ela bona dokona, bona dina ta ta ai mai kudouna ibounai ida Iehova ia guriguri henia.

⁹ Guriguri be kara aukana lasi. Nega bona gabu idauidau ai ita guriguri diba, mai eda gado regena ida eiava sibona eda lalona dekenai. To, namona be inai hahenamo badana ita laloa maragi lasi. Baibel ese guriguri karana be haheauka, hesiku lasi, bona lauma dalanai gini goada karadia ida ia hakapua. (Luka 18:1; Roma 12:12; Efeso 6:18; Kolose 4:⁠2) Guba bona tanobada ena Dirava badana ita hereva henia diba be hoa gauna bada hereana, ani? Bona ia be ia kamonai! Daniela ia guriguri, bona Iehova ese aneru ta ia dekenai ia siaia negana mani oi laloa. Aneru be Daniela ia do guriguri noho lalonai ia ginidae! (Daniela 9:​20, 21) Ena be iseda negai aneru be ita idia vadivadi henia lasi, to Iehova ese ena kara ia haidaua lasi. (Malaki 3:⁠6) Daniela ena guriguri ia kamonai hegeregerena, iseda guriguri do ia kamonai danu. Bona ita guriguri neganai, Iehova kahirakahira ita lao, iseda hetura karana ia ida ia goada ia lao bona ita ia durua, Daniela bamona do ita haheauka ela bona dokona.

MAI HAHEAUKA IDA DIRAVA ENA HEREVA IA HADIBAIA

¹⁰ Daniela be dala ma ta ai danu, ia “haheauka noho ela bona” dokona. Mai haheauka ida hereva momokani ia hadibaia be gau badana. Nega ta ia laloaboio lasi ia be Dirava ia abia hidi tauna ta, Baibel ese idia ia herevalaia, ia gwau: “Umui be lauegu hereva hamomokania taudia. Lau ese umui lau abia hidi, egu hesiai gaukara do umui karaia totona.” (Isaia 43:10) Daniela ia gaukara goadagoada unai maduna ia hagugurua totona. Ita laloa diba ena gaukara ta be ena bese taudia, Babulonia dekenai idia abia mauri taudia, ia hadibaia. Iuda taudia ma haida ia kara henia karadia ita diba momo lasi, to iena bamodia toi, idia gwauraia “iena turana toi”​—⁠Hananaia, Misaela, Asaraia​—⁠ia kara henia karadia ita diba. (Daniela 1:7; 2:​13, 17, 18) Edia hetura karana namona ese idia ta ta ia durua idia haheauka totona. (Aonega Herevadia 17:17) Daniela ese Iehova amo lalo-parara ia abia dainai, ena turadia dekenai gau momo ia hadibaia diba. (Daniela 1:17) To ma haida ia hadibaia danu.

¹¹ Daniela ese mai edia dagi bada Idau Bese taudia dekenai ia haroro badabada, peroveta taudia ma haida be unai bamona lasi. Ena be nega momo idia ura henia lasi herevadia ia gwauraia, to unai lohia taudia ia kara henia neganai idia ia gwauraia dika lasi bona ia ese idia ia hereaia bamona ia kara henidia lasi. Mai ena hemataurai ida dala namona ai ia hereva henidia. Unai taudia haida​—⁠ia hadikaia palanina idia karaia bona idia mama opesa taudia hegeregerena⁠—⁠ese Daniela idia hadikaia toho. To, dagi bada taudia ma haida ese ia idia matauraia. Iehova ese Daniela dekenai diba ia henia, bena king taudia bona aonega taudia idia daradaralaia gaudia ia hahedinaraia diba, unai dainai dagi bada ia abia. (Daniela 2:​47, 48; 5:29) Momokani, ia buruka ia lao, bona ia matamata neganai ia karaia gaudia ibounai ia karaia diba lasi. To mai kamonai ida ia noho ela bona dokona bona ia lalokau henia Diravana ena sivarai ia gwauraia daladia ia tahua.

¹² Hari inai negai Keristani kongregesen lalonai, ita ese turadia mai edia kamonai ita davaria diba bona heduru idia henia ita haheauka totona, Daniela bona ena bamodia toi idia durua heheni bamona. Ita ta ta ita hadibaia danu, bona ‘edia abidadama ese ita idia durua, bona eda abidadama ese idia ia durua.’ (Roma 1:​11, 12) Daniela bamona, hahegani ita abia abidadama lasi taudia ita haroro henia. (Mataio 24:14; 28:​19, 20) Unai dainai iseda diba ita habadaia be namo, taunimanima dekenai Iehova ita herevalaia neganai, ‘hereva momokani ita hadibaia maoromaoro’ totona. (2 Timoteo 2:15) Bona bema aposetolo Paulo ena sisiba ita kamonai henia heduru do ita abia, ia gwau: “Keriso idia do abidadama henia lasi taudia edia vairana dekenai, kara namodia mai aonega danu do umui karaia.” (Kolose 4:⁠5) Unai bamona aonega dainai ita abidadama henia gaudia idia do abia dae lasi taudia be dala maorona ai do ita lalodia. Unai bamona taudia ita laloa maragi lasi, ita laloa lasi ita ese idia ita hereaia. (1 Petero 3:15) To, ita ura hereva momokani dekenai edia lalona ita veria dainai, Dirava ena Hereva be dala namona ai ita gaukaralaia namonamo, edia kudouna ia hamarerea totona. Ta ena lalona ita veria neganai, ita moale bada! Unai bamona moale ese ita ia durua, bena Daniela bamona do ita haheauka ela bona dokona.

“DO OI LAGA-ANI”

¹³ Aneru ese Daniela ia hamaoroa: “Do oi laga-ani.” (Daniela 12:13) Unai hereva ena anina be dahaka? Daniela ia diba do ia mase. Adamu ena nega amo ema bona iseda nega, taunimanima ese mase idia koua diba lasi. Baibel ia gwau mase be iseda “inai tauna.” (1 Korinto 15:​26, NW ) To, Daniela dekenai mase ena anina be ia kahirakahira idia noho Babulonia taudia idia laloa bamona lasi. Unai dirava koikoi 4,000 bamona idia tomadiho henia taudia dekenai mase be gari bada ia havaraia gauna. Idia abia dae edia mauri negana lalonai idia moale lasi eiava ta ese ia alaia mase taudia be mase murinai, lauma dikadia ai idia lao bona mauri taudia dekenai davana dikana idia henia. Danu, Babulonia taudia idia laloa mase taudia be mai edia noho gabuna mai garina, ia lalonai dagedage gaudia idauidau idia noho, edia toana be taunimanima eiava animal bamona.

¹⁴ To Daniela dekenai mase ena anina be unai bamona lasi. Lagani handred momo gunanai, Daniela ia do vara lasi neganai, King Solomona be lauma helaga ena hakaua henunai ia gwau: “Mase taudia be gau ta idia diba lasi.” (Hadibaia Tauna 9:⁠5) Bona salamo torea tauna ese idia mase taudia ia herevalaia neganai, ia gwau: “Tano ena kahu dekenai idia giroa lou. Edia mase dina dekenai, idia ura do idia karaia gaudia be do idia doko.” (Salamo 146:⁠4) Unai dainai Daniela ia diba aneru ese ia dekenai ia gwauraia herevana be do ia momokani. Mase ena anina be laga-ani. Lalohadai be lasi, lalona ena mamina dikana be lasi, hisihisi be lasi​—⁠bona dagedage gaudia be lasi. Lasaro ia mase neganai, Iesu Keriso ese unai bamona lalohadai ia gwauraia danu. Ia gwau: “Iseda turana Lasaro be ia mahuta noho.”​—⁠Ioane 11:⁠11.

¹⁵ Daniela be mase dainai ia gari lasi ena badina ma ta mani oi laloa. Dirava ena Hereva ia gwau: “Tau ta ena ladana namona ese davana bada muramura mai bonana namo ia hereaia noho. Bona tau ena mase dinana ese iena vara dinana ia hereaia noho.” (Hadibaia Tauna 7:⁠1) Edena dala ai mase dinana, lalohisihisi bada negana, ese ta ena vara dinana mai ena moale ia hereaia diba? Iena “ladana” dainai. “Muramura mai bonana namo” ena davana be bada herea. Nega ta, Lasaro ena taihuna Maria ese dehoro mai bonana namo be Iesu ena aena dekenai ia bubua, bona ena davana be lagani ta ena gaukara davana bamona! (Ioane 12:​1-7) Edena dala ai ladana namona be unai davana bada gauna bamona? Ladana sibona lasi to ia laulaulaia gauna ena davana be bada. Ta ia vara bona ladana idia henia neganai, idia diba lasi ia be edena bamona tauna, ena kara namodia edia sivarai be lasi, ia hahedinaraia karadia idia laloa diba lasi. To ena mauri ena dokona dekenai, iena ladana be unai gaudia ibounai ia laulaulaia. Bona bema Dirava ena vairanai ena ladana be ladana namona, unai ese kohu ibounai ia hereaia.

¹⁶ Daniela ena mauri ibounai lalonai, ia hekwarahi, Dirava ena vairanai ena ladana ia namo totona, bona Iehova ese unai kara ibounai ia laloatao. Ia ese Daniela ia itaia bona ena kudouna ia tahua. Dirava be unai bamona King Davida ia kara henia danu, ia gwau: “Lohiabada e, oi ese egu lalona oi tahua vadaeni, lau oi diba momokani vadaeni. Egu kara ibounai oi diba vadaeni. Oi be daudau herea dekena amo egu laloa ibounai oi diba.” (Salamo 139:​1, 2) Momokani, Daniela ia goevadae lasi. Ia be kara dika tauna Adamu ena tubuna ta bona kara dika besena tauna ta. (Roma 3:23) To Daniela ese ena kara dika dainai ia helalo-kerehai bona ia hekwarahi mai kara maoromaoro ida iena Dirava danu ia raka totona. Unai dainai, unai kamonai peroveta tauna ia diba momokani Iehova ese ena kara dika do ia gwauatao bona idia dainai davana dikana do ia henia lasi. (Salamo 103:​10-14; Isaia 1:18) Iehova ia ura ena kamonai hesiai taudia edia kara namodia ia laloatao. (Heberu 6:10) Unai dainai, nega rua Iehova ena aneru ese Daniela ia gwauraia “Dirava ia lalokau henia bada” tauna. (Daniela 10:​11, 19) Unai ena anina be Dirava ese Daniela ia ura henia. Daniela be mai lalo-moale ida do ia laga-ani diba, badina ia diba Iehova ena vairanai ena ladana ia namo.

¹⁷ Ita ibounai ita henanadai diba, ‘Iehova ena vairanai lauegu ladana ia namo, a?’ Ita be nega dikana lalonai ita noho. Namona be ita abia dae mase be ita diba lasi negana ta ai ita dekenai ia vara diba bona unai be lalohadai kererena lasi. (Hadibaia Tauna 9:11) Unai dainai, gau badana be ita ibounai ita naria lasi to ita gaukara goada, harihari Dirava ena vairanai eda ladana ia namo totona. Bema unai bamona ita karaia, mase dainai ita gari be badina lasi. Ia be laga-ani sibona​—⁠mahuta bamona. Bona mahuta amo ita noga hegeregerena, mase amo do ita toreisi lou!

“DO OI TOREISI”

¹⁸ Daniela bukana ena hereva ginigabena be Dirava ese taunimanima dekenai ia henia gwauhamatana hereadaena. Iehova ena aneru be Daniela ia hamaoroa: “Nega dokona dekenai be do oi toreisi, bona oiemu gaukara davana namona do oi abia.” Aneru ena hereva ena anina be dahaka? Ia gwauraia vadaeni “laga-ani” be mase dainai, gabeai Daniela do ia “toreisi” gwauhamatana ena anina be tamona sibona​—⁠toreisi lou!b Momokani, diba bada taudia haida idia gwau Heberu Revarevadia lalonai Daniela karoa 12 ese nega ginigunana toreisi lou ia herevalaia. (Daniela 12:⁠2) To unai be momokani lasi. Daniela be toreisi lou helarona ia diba namonamo.

¹⁹ Hegeregere, Isaia ese lagani 200 bamona gunanai ia torea herevana be Daniela ia diba, ia gwau: “Aiemai mase taudia be do idia mauri lou, edia tauanidia be do idia toreisi lou. Guria gabudia dekenai idia mahuta noho taudia, be do idia noga, bona mai moale danu ane do idia abia. Badina . . . Lohiabada ese mase vadaeni taudia do ia hamauria lou.” (Isaia 26:19) Isaia ese unai ia do torea lasi neganai, Iehova ese Elia bona Elisaia dekenai goada ia henia, haida idia hatoreaisi lou totona. (1 King Taudia 17:​17-24; 2 King Taudia 4:​32-37) Bona unai nega vairanai danu, peroveta tauna Samuela ena sinana, Hana, ia abia dae Iehova ese mase taudia edia gabu, Sheol, amo idia ia hatorea isi diba. (1 Samuela 2:​6) Bona gunaguna momokani, kamonai tauna Iobu ese sibona ena helaro be inai hereva amo ia gwauraia: “Bema tau ta ia mase, ia be do ia mauri lou, a? To lau ese nega namodia totona do lau naria noho.” Bona ma ia gwau: “Do oi boiboi, bena oi dekenai lau sibona do lau haere. Oiemu imana edia gaukara do oi ura dikadika.”​—⁠Iobu 14:​14, 15; NW.

²⁰ Iobu bamona, Daniela be badina namona dainai ia abia dae momokani, Iehova ia ura dikadika dina ta ai ia do ia hamauria lou. Danu, lauma goadana ta amo unai helaro hamomokania herevana ia kamonai ese Daniela ena lalona ia hagoadaia bada. Oibe, Keriso ena Lagani 1,000 Lohia Negana lalonai, ‘kara maoromaoro taudia do idia toreisi lou neganai’ Daniela be do ia toreisi. (Luka 14:14) Daniela dekenai unai nega be edena bamona? Dirava ena Hereva ese unai ia hahedinaraia goevagoeva.

²¹ ‘Iehova ia ura lasi heai, ia be maino Diravana.’ (1 Korinto 14:33) Unai dainai, ia hedinarai Paradaiso dekenai toreisi lou karana be dala namona ai do ia vara. Reana Aramagedono ia vara bena lagani haida idia lao murinai do ia vara. (Apokalupo 16:​14, 16) Tanobada ena oromana gunana ena gau iboudiai idia kokia vadaeni, bona reana mase taudia do idia mai totona gau haida idia hegaegaelaia vadaeni. Mase taudia do idia toreisi lou negana be Baibel ia gwauraia, ia gwau: “Ta ta edia nega, edia nega dekenai.” (1 Korinto 15:23) Toana be ‘kara maoromaoro taudia bona kara maoromaoro lasi taudia edia toreisi lou’ ia vara neganai, kara maoromaoro taudia be do idia toreisi lou guna. (Kara 24:15) Unai dala ai, Daniela bamona idaunegai abidadama taudia ese tanobada dekenai idia vara gaudia naria gaukarana idia durua diba, toreisi lou do idia abia “kara maoromaoro lasi taudia” bilioni momo do idia hadibaia danu.​—⁠Salamo 45:⁠16.

²² Daniela ese unai bamona maduna ia do huaia lasi neganai, toana be henanadai haida do ia henia. Badina be ia abia peroveta herevadia mai edia dobu ia herevalaia neganai, ia gwau: “Lau kamonai, to unai hereva ena anina be lau diba lasi.” (Daniela 12:⁠8) Unai Dirava amo idia mai hehuni herevadia ia lalo-pararalaia neganai do ia moale bada herea! Ita diba do ia ura bada Mesia ena sivarai ibounai ia kamonai. Daniela be mai moale bada ida iena nega amo ema bona iseda nega ai tanobada ena basileia badadia idia toreisi bona idia moru daladia, “dokona negana” lalonai dagedage idia davaria to idia gini goada “Ataiai Momokani Dirava ena helaga taudia” edia sivarai, bona Dirava ena Mesia Basileiana ese taunimanima edia basileia ibounai ia hadikaia ore sivaraidia do ia kamonai.​—⁠Daniela 2:44; 7:22; 12:⁠4.

DANIELA ENA BONA OIEMU DAVANA PARADAISO LALONAI

²³ Daniela do ia ura bada, do ia noholaia tanobadana ia diba namonamo​—⁠badina guna ia noholaia tanobadana amo ia idau vaitani. Guna ia diba tanobadana idia hadikaia tuari bona dagedage karadia idia ore vaitani. Lalohisihisi, gorere, bona mase be lasi. (Isaia 25:8; 33:24) To aniani bona noho gabudia be momo, bona iboudiai ese anina bona moale idia havaraia gaukara idia abia. (Salamo 72:16; Isaia 65:​21, 22) Tanobada taudia ibounai be mai lalo-tamona ida idia noho ruma besena ta.

²⁴ Daniela be unai tanobada dekenai do ia noho momokani. Aneru ese ia hamaoroa: “Oiemu gaukara davana namona do oi abia.” Heberu herevana ta, unai siri ai idia hahanaia “davana,” be tano ena kahana ta ta idia herevalaia neganai idia gaukaralaia danu.c Reana Daniela be Esekiela ena peroveta herevana, idia abia lou Israela tanona idia haria peroveta herevana, ia diba. (Esekiela 47:13–48:35) Paradaiso ai Esekiela ena peroveta herevana ia guguru ena anina be dahaka? Ena anina be Dirava ena taunimanima iboudiai ese Paradaiso dekenai gabu do idia abia, tano be dala namona bona maorona ai do idia haria. To momokani, Daniela ena davana Paradaiso lalonai be tano ena kahana ta sibona lasi. Ena davana be iena gabu Dirava ena ura lalonai. Daniela ia abia gwauhamatana be do ia guguru momokani.

²⁵ To, oiemu davana be edena bamona? Unai gwauhamata be oi dekenai do idia guguru diba danu. Iehova ia ura kamonai taudia be do idia “toreisi,” Paradaiso lalonai davana do idia abia. Mani oi laloa, Daniela bona Baibel negadiai idia mauri kamonai tatau bona hahine ma haida do ita davaria be moale gauna badana! Bona taunimanima momo herea mase amo do idia toreisi lou danu, bona idia ita hadibaia be namo, Iehova Dirava idia diba bona idia lalokau henia totona. Mani oi laloa, oi ese iseda noho gabuna tanobada do oi naria bona paradaiso namona mai ena hairai ai ita halaoa gaukarana do oi durua. Mani oi laloa danu, Iehova ese oi do ia hadibaia, bona ena ura ginigunana hegeregerena do ita mauri dalana do oi dibaia. (Isaia 11:9; Ioane 6:45) Oibe, Paradaiso lalonai oi ese gabu do oi abia. Ena be hari inai negai haida ese Paradaiso idia laloa be auka, to mani oi laloatao Iehova ena ura ginigunana taunimanima totona be unai bamona gabu dekenai do idia mauri. (Genese 2:​7-9) Unai dainai, Paradaiso be tanobada ena taunimanima bilioni momo edia noho gabuna korikorina. Unuseniai idia noho be maoro. Paradaiso dekenai do ita noho be hegeregere eda noho gabu korikorina dekenai ita giroa lou.

²⁶ Unai gaudia ita laloa neganai eda lalona ia moale dikadika, ani? Oi danu oi ura dikadika unuseniai do oi noho, ani? Unai dainai, ita hoa lasi Iehova ena Witnes taudia idia ura bada inai tanobada ena oromana ena dokona negana idia diba! Ita naria noho be mai ena hekwarahi. Iehova be unai ia diba, unai dainai ita ia hagoadaia dokona negana ita “naria noho” ena be “ia mai metairametaira.” Anina be, reana ita laloa ia mai metairametaira, badina unai siri tamona lalonai ita ia hamaoroa: “Do ia leiti lasi.” (Habakuku 2:​3, NW; mani Aonega Herevadia 13:12 itaia.) Momokani, dokona be ena nega korikori ai do ia mai.

²⁷ Dokona be kahirakahira ia mai lalonai, dahaka oi karaia be namo? Iehova ia lalokau henia peroveta tauna Daniela bamona, namona be mai kamonai ida oi haheauka. Dirava ena Hereva oi stadilaia goadagoada. Mai emu kudouna ibounai ida oi guriguri. Lalokau dalanai abidadama tamona taudia oi bamoa. Mai lalo-goada ida ma haida dekenai hereva momokani oi hadibaia. Dina ta ta idia hanaia lalonai inai tanobada dikana ena oromana ena dokona ia kahirakahira, unai dainai namona be emu lalona oi hadaia Ataiai Momokani Diravana do oi badinaia bona ena Hereva do oi harorolaia. Danu, namona be Daniela ena peroveta herevana oi laloa namonamo! Bona emai ura be Siahu Ibounai Lohiabadana ese oi do ia hanamoa bona mai moale ida iena vairanai do oi gini ela bona hanaihanai!

[Footnotes]

DAHAKA OI DIBAIA?

• Dahaka ese Daniela ia durua bena ia haheauka ela bona dokona?

• Dahaka dainai Daniela be mase dainai ia gari lasi?

• Aneru ena gwauhamata, Daniela be ‘do ia toreisi bona davana namona do ia abia’ gwauhamatana, be edena bamona do ia guguru?

• Oi ese Daniela ena peroveta herevana oi laloa namonamo dainai dahaka namo oi abia?

[Study Questions]

1, 2. (a) Heau helulu tauna ia kwalimu totona dahaka kara ia hahedinaraia be gau badana? (b) Edena dala ai aposetolo Paulo ese mai abidadama ida Iehova hesiai henia karana bona heau helulu karana ia hahegeregerea?

3. (a) Dahaka ese Daniela ia veria dainai ‘mai ena haheauka ida’ ia heau? (b) Iehova ena aneru ese Daniela dekenai ia gwauraia gau toi be dahaka dahaka?

4. Iehova ena aneru ia gwau Daniela be dahaka do ia karaia bona reana dahaka dainai unai be mai ena hekwarahi?

5. Dahaka ese ia hahedinaraia Daniela ia haheauka ela bona dokona?

6. Edena bamona ita diba Daniela ese Dirava ena Hereva ia stadilaia goadagoada?

7. Iseda nega be Daniela ena nega ida ita hahegeregerea neganai, Dirava ena Hereva stadilaia totona dahaka gau namodia ita abia?

8. Daniela ena haheitalai guriguri karana dekenai be edena bamona?

9. Dahaka dainai guriguri ena hahenamo badana do ita laloa maragi lasi be namo?

10. Dahaka dainai Daniela ese Dirava ena Hereva amo hereva momokani ia hadibaia be gau badana?

11. (a) Dahaka dainai Daniela ena gaukara be idau? (b) Daniela ese ena gaukara idauna ia karaia lalonai ia kwalimu, a?

12. (a) Hari inai negai ita Keristani taudia eda hadibaia gaukara be dahaka dahaka? (b) Edena dala ai Paulo ena sisiba ita badinaia diba bena ‘abidadama lasi taudia be mai aonega danu do ita kara henia’?

13, 14. Dahaka dainai Babulonia taudia momo be mase dainai idia gari, bona edena dala ai Daniela ena lalohadai be idau?

15. Edena dala ai mase dinana ese vara dinana ia hereaia?

16. (a) Edena dala ai Daniela ia hekwarahi Dirava ena vairanai ena ladana ia namo totona? (b) Dahaka dainai Daniela ia diba namonamo ia kwalimu bona Iehova ena vairanai ena ladana be namo?

17. Dahaka dainai harihari Iehova ena vairanai iseda ladana ia namo be gau badana?

18, 19. (a) Aneru ia gwau vaira negana ai Daniela do ia “toreisi” ena anina be dahaka? (b) Dahaka dainai Daniela be toreisi lou helarona ia diba?

20, 21. (a) Edena bamona taudia idia toreisi lou neganai Daniela do ia toreisi? (b) Toreisi lou Paradaiso dekenai be edena dala ai do ia vara?

22. Daniela ese edena henanadai edia haere do ia ura abia?

23, 24. (a) Edena dala ai Daniela do ia toreisi lou tanobadana be guna ia diba tanobadana amo ia idau? (b) Daniela ese Paradaiso dekenai gabu do ia abia, a? edena bamona unai ita diba?

25. (a) Paradaiso maurina oi laloa neganai, dahaka oi ura henia bada? (b) Dahaka dainai ita gwau diba taunimanima be Paradaiso dekenai idia noho be maoro?

26. Edena dala ai Iehova ese ia hahedinaraia ia diba inai tanobada ena oromana ena dokona ita naria be mai ena hekwarahi?

27. Dahaka oi karaia be namo, Dirava ena vairanai do oi gini ela bona hanaihanai totona?

[Full-page picture on page 307]

[Picture on page 318]

Daniela bamona, Dirava ena peroveta herevana oi laloa namonamo, a?