September amo, Iseda Haroro Bona Mauri Dalana​—Hebou Pepana ai haroro herevadia ena kahana matamata ladana, “Hereva Momokani Hadibaia” do ia noho. Unai kahana ese henanadai bona siri ta amo Baibel ena hereva momokani ita hadibaia dalana do ia hahedinaraia.

Bema kamonai tauna ita davaria, lou henia karaia totona pablikeisen ta ita rakatania o jw.org amo vidio ta ita hahedinaraia diba. Namona be dina ta o rua murinai ita giroa lou unai ita herevalaia totona. Inai kahana matamata bona stiuden edia asainmen be Baibel be Dahaka Ia Hadibaia? buka ena karoa ta ta amo idia abia. Unai buka amo henanadai bona siri haida ita gaukaralaia diba lou henia bona Baibel stadi karaia totona.

Mauri ia lao henia dalana be tamona. (Mt 7:13, 14) Ita be tomadiho bona mauri dala idauidau taudia ita haroro henia dainai, namona be idia laloa bada Baibel ena hereva momokanidia ita herevalaia. (1Ti 2:4) Baibel ena topik idauidau herevalaia karana bona ‘hereva momokani hadibaia maoromaoro’ karana ita manadalaia neganai, iseda moale do ia bada bona ma haida dekenai hereva momokani do ita hadibaia namonamo.​—2Ti 2:15.

Tanobada hegegemadai taunimanima idia ura heduru idia abia. (Had 4:1) September lalonai ita ese spesel Gima Kohorona do ita hariharilaia. Unai magasin ese heduru abia dalana do ia herevalaia. Unai magasin be gabu ibounai dekenai do ita hariharilaia. To, iseda ura gauna be taunimanima ita hereva henia bona hagoadaia dainai, unai magasin be taunimanima idia noho lasi rumadia ai ita rakatania lasi.

HEREVALAIA DALANA

“Nega haida ita ura heduru ita abia, ani? To edeseni amo heduru ita abia diba? [2 Korinto 1:3, 4 duahia.] Inai Gima Kohorona ai Dirava ese ita ia durua daladia ia herevalaia.”

Bema ruma tauna ia kamonai bona magasin ia abia, . . .

DAHAKA DAINAI BAIBEL OI STADILAIA? VIDIO OI HAHEDINARAIA

Bena Baibel stadi dalana oi hahedinaraia.

DALA KARAIA LOU HENIA TOTONA.

Henanadai ta rakatania, hegeregere, Dahaka dainai Dirava ese hisihisi ia koua lasi? Bena gabeai oi giroa neganai unai do oi haerelaia.