Samuela be Kara Maoromaoro Ia Karaia Noho

Samuela be mero maragi negana amo palai dubu ai ia noho bona ia gaukara. Taunimanima be Iehova tomadiho henia totona unuseni idia lao. Oi diba edena dala ai Samuela be palai dubu dekenai ia lao, a? Mani Samuela ena sinana Hana ita herevalaia.

Lagani momo lalonai, Hana ia ura natuna ta do ia havaraia, to unai ia vara lasi. Unai dainai, heduru totona Iehova dekenai ia guriguri. Hana ia gwauhamata bema natuna mero ta ia havaraia, do ia siaia palai dubu ai ia noho bona ia gaukara. Iehova ese ena guriguri ia haerelaia, bona Hana be natuna mero ta ia havaraia. Iena ladana ia gwauraia, Samuela. Bona Hana be ena gwauhamata hegeregerena, Samuela ena mauri lagani be toi o foa neganai, palai dubu dekenai ia abia lao Dirava ia hesiai henia totona.

Unai palai dubu dekenai Eli be hahelaga tauna badana. Iena natudia memero rua be unuseniai idia gaukara danu. Laloatao, palai dubu be Dirava tomadiho henia rumana, bona unuseniai idia noho taudia ese kara namodia idia karaia be namo. To Eli ena natudia be kara dika idia karaia. Samuela ese idia karaia gaudia ia itaia. Samuela be Eli ena natudia bamona kara dika ia karaia, a?​— Lasi, to kara maoromaoro ia karaia noho, iena tama sina ese idia hadibaia bamona.

Oi laloa Eli ese ena natudia ruaosi dekenai dahaka ia karaia be namo?​— Namona be idia ia panisia. Bona ia koudia Dirava ena ruma ai idia gaukara lasi totona. To, Eli be unai bamona ia karaia lasi, unai dainai Iehova be Eli bona ena natudia rua dekenai ia badu. Iehova ia ura idia do ia panisia.

Hanuaboi ta Samuela be ia mahuta noho lalonai, ia kamonai ta ese ena ladana ia boiboi, ‘Samuela, e!’ Eli dekenai ia heau lao, to Eli ia gwau: ‘Oi lau boiria lasi.’ Nega rua unai ia vara. Nega ihatoina murinai, Eli ese Samuela ia hamaoroa bema unai gadona ia kamonai lou, namona be ia gwau: ‘Iehova e, mani oi hereva, lau kamonai noho.’ Bena Samuela be Eli ena hereva hegeregerena ia karaia. Unai neganai, Iehova be Samuela dekenai ia gwau: ‘Eli oi hamaoroa lau ese iena famili do lau panisia, badina kara dika idia karaia.’ Oi laloa Samuela ese Eli dekenai unai sivarai ia gwauraia be auka lasi, a?​— Lasi, unai bamona ia karaia be auka. Ena be Samuela ia gari, to ia be Iehova ese ia hamaoroa gauna ia karaia. Iehova ena hereva be ia momokani. Eli bona ena natudia rua be idia mase.

Ita dekenai Samuela be haheitalai namona. Ena be ia itaia haida be kara dika idia karaia, to ia be kara maoromaoro ia karaia. Oi be edena bamona? Oi be Samuela bamona kara maoromaoro do oi karaia noho, a? Bema unai bamona oi karaia, oi ese Iehova bona emu tama sina do oi hamoaledia.