Dirava ese Ita Dekenai Iena Lalokau Ia Hahedinaraia
“Hebogahisi hereadaena be king bamona do ia lohia, bona . . . mauri hanaihanai do ia mailaia.”—ROMA 5:21.
1, 2. Taunimanima momo ese edena harihari gauna idia laloa bada? To edena harihari gauna be mai anina bada?
AUSTRALIA ai, Melbourne iunivesiti ena profesa ta ia gwau, “Roma Basileiana ese ia atoa taravatudia be harihari gauna namona bona namo bada ia havaraia.” To, Baibel ese ita ia hadibaia, Dirava be ita dekenai ia henia harihari gauna ena namo ese unai ia hereaia. Unai harihari gauna dainai, Dirava ese ita ia lalonamo henia bona ita ia gwauraia maoromaoro bona ita roho mauri bena mauri hanaihanai ita abia diba.
2 Dirava ese unai harihari gauna ia henia dalana amo ena hahemaoro goevana ia hahedinaraia. Roma karoa 5 ai, aposetolo Paulo ese unai harihari gaudia ia herevalaia neganai, ia ese taravatu maragimaragidia momo ia herevalaia lasi. To inai hagoadaia herevana ia gwauraia: “Iseda abidadama dainai Dirava ese ita ia gwauraia maoromaoro. Namona be iseda Lohiabada Iesu Keriso amo Dirava ida maino ai ita noho.” Dirava ena harihari gauna idia abia taudia ese Ia idia lalokau henia be namo. Paulo be unai bamona ia karaia danu. Ia gwau: “Ita dekenai ia henia lauma helaga amo, Dirava ena lalokau ese iseda kudouna ia hahonua.”—Roma 5:1, 5.
3. Edena henanadai do ita lalodia?
3 Dahaka dainai Dirava ese mai lalokau ida unai harihari gauna ia henia? Bona edena dala ai mai kara maoromaoro ida unai ia henia? Taunimanima be dahaka idia karaia unai harihari gauna idia abia totona? Namona be unai henanadai edia haere ita tahua bona unai haere amo Dirava ena lalokau ia hahedinaraia dalana do ita itaia.
Dirava Ena Lalokau Bona Kara Dika
4, 5. (a) Iehova be edena dala hereadaena ai ena lalokau ia hahedinaraia? (b) Edena sivarai ese ita ia durua Roma 5:12 ena anina ita lalopararalaia totona?
4 Iehova ena lalokau bada dainai, taunimanima durua totona ena Natuna tamona ia siaia. Paulo ese unai ia herevalaia, ia gwau: “Dirava ese ita dekenai iena lalokau ia hahedinaraia dalana be inai: Ita be do kara dika taudia neganai, Keriso be ita totona ia mase.” (Roma 5:8) Unai siri ese ia gwauraia herevana ta mani ita laloa: “Ita be do kara dika taudia.” Ita ibounai be kara dika taudia ai ita lao dalana ita diba be namo.
5 Paulo ese unai ia herevalaia, ia gwau: “Tau tamona dekena amo kara dika be tanobada dekenai ia vareai, bona kara dika ese mase ia mailaia. Bona unai dainai mase be taunimanima ibounai dekenai ia hanaia lao, badina idia ibounai be idia kara dika vadaeni.” (Roma 5:12) Unai ita lalopararalaia diba, badina Dirava ese taunimanima edia mauri ia matamaia sivaraina be Baibel ai ia torea. Iehova ese Adamu bona Heva ia havaraia. Havaraia Tauna ia goevadae dainai, idia ruaosi idia goevadae danu. Dirava ese idia dekenai taravatu ta ia henia bona ia hamaorodia bema idia badinaia lasi, vadaeni do idia mase. (Gen. 2:17) To Dirava ena taravatu idia utua karana amo, Taravatu Henia Tauna bona Siahu Ibounai Diravana idia dadaraia.—Deu. 32:4, 5.
6. (a) Dahaka dainai Adamu ena natudia idia mase? (b) Tama sina amo ita abia hanai gorerena be dahaka ida ita hahegeregerea diba?
6 Adamu ia karaia dika murinai natudia ia havaraia, unai amo idia ibounai dekenai kara dika ia henia hanai. To, idia be Adamu amo idia idau, badina Dirava ena taravatu idia utua lasi, bona unai kara dika dainai davana idia abia lasi. Bona danu, unai negai Mose ena Taravatu ia noho lasi. (Gen. 2:17) To, idia ibounai be Adamu ena natudia dainai, idia be mai edia kara dika. Unai dainai kara dika bona mase ia noho ela bona Dirava ese Israela taudia dekenai Taravatu ia henia, bona unai ese ia hahedinaraia idia be mai edia kara dika. (Roma 5:13, 14 duahia.) Adamu amo ita abia hanai kara dika be iseda tama sina amo ita abia hanai gorerena ida ita hahegeregerea diba. Ena be ruma bese lalonai natudia haida be tama sina amo unai gorere idia abia hanai, to natudia haida be unai gorere idia abia hanai lasi. To kara dika be unai bamona lasi. Ita ibounai be Adamu amo kara dika ita abia hanai dainai, do ita mase. To unai ita hanaia dalana ta ia noho, a?
Dirava ese Iesu Keriso amo Ia Henia Gauna
7, 8. Tatau goevadaedia rua amo idia vara gaudia be hegeregere, a? Gwauraia hedinarai.
7 Iehova be mai lalokau ida dala ia karaia kara dika amo ita ia ruhaia totona. Paulo ia hahedinaraia, Dirava ese goevadae tauna ma ta—Adamu iharuana—amo unai dala ia karaia. (1 Kor. 15:45) To unai tatau goevadaedia rua amo idia vara gaudia be idauidau. Edena dala ai?—Roma 5:15, 16 duahia.
8 Paulo ia gwau: “Harihari gauna ese ia havaraia gauna bona kara dika ese ia havaraia gauna be idia hegeregere lasi.” Adamu be ia kara dika dainai ia kerere, bona ia mase be maoro. To, ia sibona ia mase lasi. Baibel ia gwau: “Tau tamona ena kara dika dainai momo idia mase.” Dirava ena hahemaoro goevana hegeregerena, Adamu ena goevadae lasi natudia ibounai idia mase be maoro. To ita moale badina goevadae tauna, Iesu, ese hahenamo ia mailaia diba. Unai dainai dahaka namo do ita abia? Unai henanadai ena haere be Paulo ena hereva amo ita itaia, ia gwau: “Dirava ese taunimanima idauidau ibounai ia gwauraidia maoromaoro, mauri do idia abia totona.”—Roma 5:18.
9. Roma 5:18 ena hereva bamona, Dirava ese taunimanima ia gwauraia maoromaoro ena anina be dahaka?
9 Inai hereva “ia gwauraidia maoromaoro” ena anina be dahaka? Baibel hahanaia tauna ta ese unai ia herevalaia, ia gwau: “Unai hereva be kota taudia ese idia gaukaralaia herevana ta lasi. To ia hahedinaraia, Dirava ena lalohadai kara dika tauna dekenai ia idau, to unai tauna ena kara be ia idau lasi . . . Unai be hegeregere, Dirava be diadi tauna bona kara dika ia karaia tauna be Iena vairanai ia gini, ia hahemaoro henia totona. To Dirava ese unai kara dika tauna ena dika ia gwauatao.”
10. Iesu be dahaka ia karaia, unai amo Dirava ese taunimanima ia gwauraidia maoromaoro?
10 “Tanobada ibounai ena kota biaguna” ese edena dala ai kara maoromaoro lasi tauna ena dika ia gwauatao diba? (Gen. 18:25) Unai ia karaia totona, Dirava ese ena Natuna tamona sibona be tanobada dekenai ia siaia mai. Ena be Iesu ese hahetoho ia davaria, ia idia kirikirilaia bona dagedage henia danu, to ena Tamana ena ura ia karaia guguru. Dirava ia badinaia ela bona hisihisi auna dekenai ia mase. (Heb. 2:10) Iesu ena mauri goevadaena be boubou gauna bamona ia henia neganai, Adamu ena natudia be kara dika bona mase amo ia ruhaia.—Mat. 20:28; Roma 5:6-8.
11. Mauri davana ida ia hegeregere gauna be dahaka?
11 Siri ma ta ai Paulo ese inai hereva ‘mauri davana hegeregerena’ ia herevalaia. (1 Tim. 2:6) Unai mauri davana ida ia hegeregere gauna be dahaka? Adamu ese taunimanima bilioni momo dekenai kara dika bona mase ia mailaia. Momokani, goevadae tauna Iesu ese goevadae natudia bilioni momo ia havaraia diba.a Unai dainai, Iesu ena mauri bona ia havaraia diba goevadae natudia edia mauri ese Adamu bona ena goevadae lasi natudia edia kara dika davana ia karaia diba. To, Baibel ia gwau lasi Iesu ese ia havaraia diba natudia be unai mauri davana idia henia diba. Roma 5:15-19 ia hahedinaraia, “tau tamona” ena mase ese kara dika amo ita ia ruhaia. Oibe, Iesu ena mauri goevadaena bona Adamu ena mauri goevadaena be idia hegeregere. To Iesu Keriso sibona ena mauri ita laloa. Badina ia “kara maoromaoro” bona Dirava ia kamonai henia ela bona ia mase, unai ese dala ia kehoa taunimanima ibounai be davana lasi harihari gauna bona mauri idia abia. (2 Kor. 5:14, 15; 1 Pet. 3:18) Unai be edena bamona ia vara?
Mauri Davana amo Kerere Ia Kokia
12, 13. Dahaka dainai Dirava ese mauri davana amo taunimanima ia gwauraia maoromaoro?
12 Iehova Dirava be ena Natuna ese ia henia mauri davalaia boubouna ia abia dae. (Heb. 9:24; 10:10, 12) Tanobada ai Iesu ena hahediba taudia bona ena abidadama aposetolo taudia danu be idia goevadae lasi. Ena be idia hekwarahi kara dika idia dadaraia totona, to nega momo idia moru. Dahaka dainai? Badina ibounai be Adamu amo kara dika idia abia hanai. (Roma 7:18-20) To, Dirava be gau ta ia karaia idia ia durua totona. Ia ese unai ‘mauri davana hegeregerena’ ia abia dae bona mai ena ura ida unai ia gaukaralaia Iena hesiai taudia ia gwauraia maoromaoro totona.
13 Ita gwau lasi aposetolo taudia bona ma haida edia kara namodia dainai, Dirava ese mauri davana amo idia ia gwauraia maoromaoro. Lasi, to Iena hebogahisi bona lalokau bada dainai, unai bamona ia karaia. Dirava ese aposetolo taudia bona ma haida edia kerere ia kokia, bona ia laloa lou lasi. Paulo ese unai ia hahedinaraia goevagoeva, ia gwau: “Unai hebogahisi hereadaena dainai, umui be abidadama amo hahemauri umui abia, bona unai be umui emui hekwarahi dainai lasi. To inai be Dirava ena harihari gauna.”—Efe. 2:8.
14, 15. Dirava ese ia gwauraidia maoromaoro taudia be dahaka hahenamo do idia abia? To dahaka idia karaia noho be namo?
14 Ta ena kara dika bona ena kara kereredia be Siahu Ibounai Diravana ese ia gwauatao be harihari gauna hereadaena! Taunimanima be Keristani taudia ai idia do lao lasi neganai, kara dikadia momo idia karaia, to mauri davalaia boubouna amo Dirava ese edia kara dika ia gwauatao. Paulo ia gwau: “Dirava ese unai harihari gauna ia henia, unai amo [Ia] ese taunimanima ia gwauraia maoromaoro.” (Roma 5:16) Dirava momokanina ese aposetolo taudia bona ma haida dekenai unai harihari gauna (ia gwauraidia maoromaoro) ia henia dainai, mai abidadama ida Ia idia tomadiho henia noho be namo. Bona vaira negana ai dahaka hahenamo do idia abia? “Hebogahisi hereadaena bona kara maoromaoro ena davana lasi harihari gauna be ia bada herea momokani. Unai gaudia idia abia taudia be do idia mauri bona king bamona do idia lohia, unai tau tamona Iesu Keriso amo.” Momokani, kara maoromaoro ena harihari gauna be Adamu ena kara dika ese ia mailaia gauna amo ia idau. Unai harihari gauna be mauri.—Roma 5:17; Luka 22:28-30 duahia.
15 Unai harihari gauna idia abia taudia be Dirava ese ia gwauraidia maoromaoro dainai, idia be Iena lauma natudia ai idia lao. Bona idia be lauma taudia bamona guba dekenai idia toreisi lou bona Iesu Keriso ida “king bamona do idia lohia.”—Roma 8:15-17, 23 duahia.
Dirava Ena Lalokau Ma Haida Dekenai
16. Tanobada helarona idia abia taudia be Dirava ese ia gwauraidia maoromaoro, a?
16 Dirava idia abidadama bona hesiai henia Keristani taudia ibounai be Iesu ida guba dekenai “king bamona” do idia lohia lasi. Unai taudia momo bona Keriso ia do vara lasi neganai idia noho abidadama taudia momo edia helaro be tamona. Idia be tanobada paradaisona ai mauri hanaihanai do idia abia. Hari danu Dirava ese idia ia gwauraia maoromaoro bona vaira negai mauri do idia abia, a? Paulo ese Roma taudia ia tore henia herevadia amo ita diba, unai henanadai ena haere be, oibe!
17, 18. (a) Aberahamo ena abidadama dainai, Dirava ese ia be edena bamona ia laloa? (b) Aberahamo ena kara maoromaoro be Iehova ese edena bamona ia laloa?
17 Paulo ese Aberahamo, haheitalai namo hereana ia hahedinaraia tauna, ia herevalaia. Iehova ese Israela taudia dekenai taravatu ia do henia lasi bona Iesu be guba maurina ena dala ia do kehoa lasi neganai Aberahamo ia noho, ia be abidadama tauna. (Heb. 10:19, 20) Paulo ia gwau: “Aberahamo eiava ena garana ese taravatu badinaia karana amo, tanobada matamata do idia abia gwauhamatana idia abia lasi, to Aberahamo ia abidadama bona Dirava ese ia gwauraia maoromaoro dainai, unai gwauhamata ia abia.” (Roma 4:13; Iam. 2:23, 24) Oibe, Dirava ese abidadama tauna, Aberahamo ia gwauraia maoromaoro.—Roma 4:20-22 duahia.
18 To unai ese ia hahedinaraia lasi Aberahamo be Iehova ia hesiai henia laganidia lalonai ia kara maoromaoro. Lasi, ia kara dika danu. (Roma 3:10, 23) To, Iehova ena aonega be bada herea dainai, Aberahamo ena abidadama bona ena kara namodia ia laloa bada. Danu, Aberahamo ia abia dae momokani gwauhamata garana be ena bese amo do ia vara. Unai Garana be Mesia o Keriso. (Gen. 15:6; 22:15-18) “Keriso Iesu ia henia mauri davana” amo, Hahemaoro Diravana ese guna idia karaia kara dikadia ia gwauatao. Unai dainai, Aberahamo bona abidadama taudia ma haida—Keriso ia do vara lasi neganai idia noho taudia unai—be do idia toreisi lou.—Roma 3:24, 25 duahia; Sal. 32:1, 2.
Hari Dirava ese Ita Ia Gwauraia Maoromaoro
19. Dahaka dainai Dirava ese Aberahamo ia gwauraia maoromaoro karana ese ita ia hagoadaia?
19 Lalokau Diravana ese Aberahamo ia gwauraia maoromaoro, unai ese hari inai negai Keristani taudia momokanidia ia hagoadaia. To, Iehova ese Aberahamo ia gwauraia maoromaoro karana bona ‘Keriso ida ahuna do idia abia hebou’ taudia ia gwauraia maoromaoro karana be idia idau. Unai abia hidi taudia “ia boiria helaga taudia” bona idia ia abia dae Iena “natudia.” (Roma 1:7; 8:14, 17, 33) To, Aberahamo be Iehova ese ia gwauraia “ena turana.” Ia be Iesu ese mauri davalaia boubouna ia do henia lasi neganai ia noho. (Iam. 2:23; Isa. 41:8) Tanobada Paradaisona ai do idia noho Keristani taudia momokanidia be edena bamona?
20. Dirava ese Aberahamo ia gwauraia maoromaoro bamona, hari ia gwauraidia maoromaoro taudia be dahaka idia karaia be namo?
20 Tanobada helarona idia abia taudia be “Keriso Iesu ia henia mauri davana amo idia ia ruhaia,” to idia be “kara maoromaoro ena davana lasi harihari gauna”—guba maurina unai—idia abia lasi. (Roma 3:24; 5:15, 17) To, idia ese Dirava bona ia henia mauri davana idia abidadama henia goada, bona kara namodia amo edia abidadama idia hahedinaraia. Unai kara namona ta be inai: Idia ese “Dirava ena Basileia . . . bona . . . Lohiabada Iesu Keriso ena sivarai” idia harorolaia. (Kara 28:31) Unai dainai, Iehova ese ia gwauraidia maoromaoro, Aberahamo bamona. Tanobada helarona idia abia taudia ese idia abia harihari gauna—Dirava ena turana ai idia lao—be horoa taudia ese idia abia “davana lasi harihari gauna” amo ia idau. To, tanobada helarona idia abia taudia be unai harihari gauna idia laloa bada.
21. Iehova ena lalokau bona hahemaoro goeva karana dainai, dahaka hahenamo ita abia?
21 Bema oi ura tanobada ai mauri hanaihanai oi moalelaia, namona be oi laloparara, tanobada ena lohia tauna ta ese dala ia kehoa lasi unai hahenamo oi abia totona. To, unai be Guba bona Tanobada edia Lohia Badana ena ura ia hahedinaraia. Iehova be dala haida ia karaia, Iena ura ia hagugurua totona. Bona Iena hahemaoro goeva karana ia badinaia, unai ia karaia totona. Danu, unai ese Dirava ena lalokau bada ia hahedinaraia. Unai dainai Paulo ia gwau: “Dirava ese ita dekenai iena lalokau ia hahedinaraia dalana be inai: Ita be do kara dika taudia neganai, Keriso be ita totona ia mase.”—Roma 5:8.
[Footnote]
a Unai lalohadai be Insight on the Scriptures, Volium 2, rau 736, paragraf 4 bona 5 ai ia noho.
Oi Laloatao, A?
• Adamu ena natudia be ia amo dahaka idia abia, bona unai ese dahaka ia havaraia?
• Edena dala ai Iehova ese ‘mauri davana hegeregerena’ ia henia?
• Dirava ese oi ia gwauraia maoromaoro dainai, dahaka hahenamo oi abia?
[Picture on page 13]
Goevadae tauna Adamu ia kara dika. Goevadae tauna Iesu ese ‘mauri davana hegeregerena’ ia henia
[Picture on page 15]
Iesu amo Dirava ese ita ia gwauraia maoromaoro, unai be sivarai namona