Dirava Koikoidia Dadaraia Taudia
“Umui be lauegu hereva hamomokania taudia. Lau ese umui lau abia hidi, egu hesiai gaukara do umui karaia totona.”—ISAIA 43:10.
Daika be Dirava momokani? Hari inai negai, unai henanadai badana be taunimanima iboudiai ese idia laloa be namo. Ena be taunimanima ese dirava idauidau momo idia tomadiho henidia, to Dirava tamona mo ese mauri bona helaro namona ita ia henia diba. Dirava tamona mo be inai bamona ita gwauraia diba: “Ia dainai ita mauri, ita marere bona ita noho.” (Kara 17:28) Momokani, Dirava tamona mo be hegeregere taunimanima ese ia do idia tomadiho henia. Unai be Apokalupo bukana lalonai guba oreana edia hereva hegeregerena; idia gwau: “Aiemai Lohiabada, aiemai Dirava e, oi be hegeregere momokani vadaeni, taunimanima ibounai ese hairai bona mataurai, be oi dekenai do idia henia, bona oiemu siahu henunai do idia noho. Badina gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.”—Apokalupo 4:11.
2 Eden umana lalonai Satani ese Iehova ia herevalaia koikoi; ena hereva ena mamina be Iehova be hegeregere lasi taunimanima ese idia tomadiho henia. Gaigai ena uduna amo Heva ia hamaoroa, Dirava ena taravatu bema ia dadaraia bona Iehova ese ia taravatua auna ena huahua bema ia ania, ia be Dirava ida do ia hegeregere. Ia gwau: “Dirava be inai bamona ia hereva badina ia diba, umui ania neganai aonega do umui davaria, bona Dirava hegeregere do umui noho, kara namona bona kara dikana do umui diba.” (Genese 3:5) Heva ese gaigai ena hereva ia abia dae bena mai ena taravatu huahuana ia ania.
3 Momokani, Satani ia koikoi. (Ioane 8:44) Heva ia kara dika neganai, “Dirava hegeregere” ai ia lao dalana tamona be inai: Ena be Iehova ena lalohadai ia badinaia be namo, to sibona ena lalona ia hadaia dahaka be maoro bona dahaka be kerere. Bona ena be Satani ia gwau do ia mase lasi, to Heva be gabeai ia mase. Unai dainai Satani sibona mo ese Heva ena kara dika amo namo ia davaria. Momokani, Satani ese Heva ena lalona ia ania do ia kara dika totona, badina be iena palani, ia gwauraia hedinarai lasi gauna, be ia sibona be dirava ta ai do ia lao. Heva ia kara dika neganai, ia be taunimanima ginigunana Satani murinai ia raka, bena nega daudau lasi Adamu ese ia bamoa. Edia natudia momo be “kara dika lalonai” idia vara sibona lasi, to Satani ena siahu henunai idia lao danu, bena nega daudau lasi lalonai, Dirava momokanina ia dadaraia tanobadana be ia vara.—Genese 6:5; Salamo 51:5.
4 Unai tanobada be Abata Badana ese ia hadikaia ore. (2 Petero 3:6) Abata Badana murinai, Iehova ia dadaraia tanobadana ma ta ia vara, bona ia do noho ema bona hari. Baibel ese inai bamona ia gwauraia: “Satani ese tanobada taudia ibounai ia gunalaia noho.” (1 Ioane 5:19) Inai tanobada ese Iehova ena taravatu ena mamina bona ena anina ia dadaraia dainai, Satani ena ura ia karaia. Satani be iena dirava. (2 Korinto 4:4) To, Satani ese taunimanima ia durudia diba lasi. Ia hamoaledia diba lasi bona mauri ia henidia diba lasi; Iehova sibona mo be unai ia karaia diba. Unai dainai, namona be mauri mai anina bona tanobada namona idia tahua taudia be idia diba guna Iehova be Dirava momokanina, bena unai murinai iena ura idia karaia be namo. (Salamo 37:18, 27, 28; Hadibaia Tauna 12:13) Unai dainai, namona be tatau bona hahine mai edia kamonai do idia naria lasi, to harihari Iehova sivaraina momokanina do idia gwauraia hedinarai.
5 Matamana negana amo, unai bamona kamonai taudia be tanobada ai idia hedinarai. Heberu karoa 11 ai, aposetolo Paulo ese idia momo edia ladadia ia torea bona “witness taudia hutuma bada ori ta bamona” ia gwauraidia. (Heberu 12:1, NW) Adamu bona Heva edia natuna iharuana, Abela, be Paulo ese ia gwauraia guna. Abata Badana ia do vara lasi neganai idia noho taudia, Enoka bona Noa, danu ia gwauraia. (Heberu 11:4, 5, 7) Iuda besena ena tubuna, Aberahamo, ia gwauraia momo. Aberahamo, “Dirava ena turana” idia gwauraia tauna, be “Dirava ena hereva ia gwauraia maoromaoro tauna,” Iesu, ena tubuna.—Iamesi 2:23; Apokalupo 3:14.
Aberahamo ese Hereva Momokani Ia Hahedinaraia
6 Edena dala amo Aberahamo be witness tauna ai ia lao? Iehova ia abidadama henia goadagoada bona ia kamonai henia momokani dalana amo. Iehova ese ia hagania iena hanua badana, Uru, do ia rakatania bena ena mauri dinadia oredia lalonai tano daudauna ai do ia noho, bena Aberahamo ese ia kamonai henia. (Genese 15:7; Kara 7:2-4) Noho loaloa taudia momo ese edia loaloa idia hadokoa, hanua badadia ai do idia noho namo totona. Unai dainai, Aberahamo ese hanua badana ta ia rakatania palai rumadia lalonai ia noho totona neganai, ia hahedinaraia goevagoeva Iehova Dirava ia abidadama henia. Ena kamonai be toa ta iena kara idia itaia taudia dekenai. Iehova ese Aberahamo ia hanamoa bada, iena abidadama dainai. Ena be Aberahamo be palai rumadia lalonai ia noho, to iena kohu be momo. Haida ese Lota bona ena famili idia abia mauri bena idia hakaudia oho neganai, Aberahamo ese ia tahudia lao lalonai Iehova ese ia durua dainai, ia hamauridia diba. Aberahamo ena adavana ia buruka neganai mero ta ia havaraia; unai amo Iehova ese ena gwauhamata, Aberahamo ese natuna ta do ia havaraia gwauhamatana, be ia hamomokania. Aberahamo dainai, taunimanima idia itaia Iehova be mauri Diravana, ena gwauhamata ia hamomokanidia Diravana.—Genese 12:1-3; 14:14-16; 21:1-7.
7 Aberahamo be Lota hamauria amo ia lou neganai, Salema (gabeai ena ladana idia hatoa Ierusalema) ena king, Melekisedeka, ese ia hedavari henia, bena ia hereva henia, ia gwau: “Ataiai Momokani Dirava . . . ese, Aberamo ia hanamoa be namo.” Sodoma ena king danu ese ia hedavari henia bona ia ura harihari gaudia do ia henia. To Aberahamo ia ura lasi. Badina be dahaka? Ia ura iboudiai do idia diba goevagoeva ia abia hahenamodia be Dirava ena amo. Ia gwau: “Lau ese Lohiabada, Ataiai Momokani Dirava, guba bona tanobada ia karaia Diravana ena vairanai hari lau gwauhamata metau henia, lau gwau, oiemu kohu ta do lau abia lasi, tamaka varo danu do lau abia lasi. Gabeai do oi gwau, ‘Aberamo ena kohu momo ese lau dekena amo ia abia’ garina.” (Genese 14:17-24) Aberahamo be witness tauna ta, hereva hamomokania tauna namona!
Hereva Hamomokania Besena
8 Mose, Aberahamo ena tubuna ta, be Paulo ese ia gwauraia witness taudia ta. Mose ese Aigupito ena taga ia dadaraia bena gabeai unai tano ena basileia mai ena siahu bada ena pavapava vairanai ia gini mai ena boga auka ida, badina be ia ura Israela taudia do ia ruhaia bona unai tano amo do ia hakaudia oho. Boga auka be edeseni amo ia abia? Ena abidadama amo. Paulo ia gwau: “Mose ena lalona ia goada noho, ita itaia diba lasi Diravana, be Mose ese matana dekenai ia itaia bamona.” (Heberu 11:27) Aigupito ena dirava be taunimanima ese idia itaia diba bona idia dogoatao diba. Hari inai negai danu, edia kaivakuku be taunimanima ese idia hoalaidia. To, ena be Mose ese Iehova ia itaia diba lasi, to ia diba ia be Dirava korikorina bona unai dirava koikoidia iboudiai ia hereaia. Mose ia daradara lasi, ia diba momokani Iehova ia mauri noho bona Ia idia tomadiho henia taudia be davana namona do ia henidia. (Heberu 11:6) Vadaeni, Mose be witness tauna badana ta ai ia lao.
9 Israela taudia, Aberahamo ena bese taudia Iakobo ena amo idia vara, be Mose ese ia ruhaia bona ia hakaua oho murinai, iena amo Iehova be idia ida idia gwauhamata heheni. Unai dainai, Israela besena be Iehova ena bese korikorina ai ia lao. (Esodo 19:5, 6) Unai be nega ginigunana, bese ta be iena witness ai ia lao bona hereva ia hamomokania. Unai bese ena matamana amo, Iehova ese lagani 800 bamona murinai Isaia ena amo ia gwauraia herevana be mai anina ia dekenai; ena hereva be inai: “Israela taudia e, umui be lauegu hereva hamomokania taudia. Lau ese umui lau abia hidi, egu hesiai gaukara do umui karaia totona, bona lau do umui diba, bona lau do umui abidadama henia totona. Bona do umui diba lau sibona be Dirava.” (Isaia 43:10) Edena dala amo unai bese matamatana be Iehova ena witness taudia, iena hereva hamomokania taudia, ai idia lao? Edia abidadama bona edia kamonai amo bona idia dainai Iehova ese ia karaia karadia amo.
10 Israela besena ia matamaia bena lagani 40 bamona murinai Gwauhamata Tanona ia abia gwauraia. Hasinadoa taudia idia lao, Ieriko hanuana itaia namonamo totona, bena hanua hahinena ta ladana Rahaba ese ia gimadia. Badina be dahaka? Ia gwau: “Badina be ai kamonai Lohiabada ese Davara Kakakaka be umui emui vairanai ia hakaukaua, Aigupito tano dekena amo umui raka mai neganai. Ai kamonai vadaeni danu Amoro ena king ruaosi, Sihona bona Oga be umui aladia mase, Ioridane Sinavai unai kahana dekenai. Unai sivarai ai kamonai neganai, aiemai kudouna idia gari bada, bona ta ena lalona ia goada lasi umui dainai. Badina Lohiabada emui Dirava be guba dekenai ia noho, bona inai tanobada dekenai ia noho danu.” (Iosua 2:10, 11) Iehova ena siahu karadia sivaraina dainai, Rahaba bona ena famili ese Ieriko bona ena dirava koikoidia idia rakatania bena Israela taudia ida Iehova idia tomadiho henia. Ia hedinarai goevagoeva, Iehova ese ena hereva be Israela ena amo ia hamomokania mai ena siahu ida.—Iosua 6:25.
11 Guna, Israela taudia be Aigupito ai idia do noho neganai, Iehova ese Mose ia siaia lao Farao dekenai, ma ia gwau: “Farao dekenai do oi raka vareai, badina be iena lalona bona iena hesiai taudia edia lalona danu lau ha-aukaia vadaeni. Inai bamona lau karaia badina be, idia huana dekenai lauegu siahu do lau hedinaraia totona. Vadaeni umui emui natudia bona emui tubudia dohore umui hadibaia diba, dahaka hoa kara badadia lau karaia Aigupito dekenai, bona edena bamona Aigupito taudia lau hakavakavadia lauegu toa karadia dekena amo, vadaeni umui ibounai do umui diba lau inai [Iehova].” (Esodo 10:1, 2) Israela taudia mai edia kamonai ese Iehova ena kara badadia be edia natudia do idia hamaorolaia. Bena edia natudia ese sibodia edia natudia do idia hamaorolaia, bena uru ta ta iboudiai be unai bamona do idia karaia. Unai dala amo, Iehova ena siahu karadia do idia laloatao. Unai hegeregerena, hari inai negai danu, tama sina edia maduna ta be Dirava ena hereva idia gwauraia hedinarai edia natudia dekenai.—Deuteronomi 6:4-7; Aonega Herevadia 22:6.
12 Israela besena ese Iehova ia kamonai henia neganai, Iehova ese ia hanamoa bada; unai be toa ta idia badibadinai idia noho besedia dekenai. Iehova ese ia gwauhamatalaia hahenamodia be Mose ese ia gwauraia lou murinai, ma ia gwau: “Tanobada taudia ibounai ese do idia itaia, Lohiabada ese umui ia abia hidi vadaeni, iena bese korikori do umui lao, vadaeni umui dekenai do idia gari.” (Deuteronomi 28:10) Solomona ena abidadama dainai, Iehova ese aonega bona taga ia henia. Ena lohia siahuna henunai bese ena namo ia bada bona nega daudau ia maino. Baibel ese unai nega be inai bamona ia gwauraia: “Bese ibounai dekena amo taunimanima be Solomona ena aonega kamonai totona idia mai, bona king taudia ese edia hesiai taudia Solomona dekenai idia siaia, iena sisiba do idia kamonai totona.” (1 King Taudia 4:25, 29, 30, 34) Solomona idia vadivadi henia taudia badana ta be Sieba ena kwini. Israela besena bona ena pavapava be Iehova ena amo idia abia hahenamodia ia itaia murinai, kwini ia gwau: “[Iehova], oiemu Dirava ita hanamoa be namo! Oi dekenai ia laloa dainai, ia ese Israela ena king oi ia halaoa vadaeni. [Iehova] ese Israela taudia ia ura henia, bona ia ura idia noho hanaihanai dainai, ia ese edia king oi ia halaoa vadaeni, oi ese iena Ladana dainai taravatu bona kota maoromaoro do oi haginia goada totona.”—2 Sivarai 9:8.
13 Israela besena ese Dirava ena hereva ia gwauraia hedinarai dalana badana ta, anina bada ia havaraia dalana, be aposetolo Paulo ese ia gwauraia. Keristani ekalesiana Roma dekenai ia tore henia neganai, Israela besena ia herevalaia, ia gwau: “Dirava ese Iuda taudia dekenai iena hereva ia henia, idia naria namonamo totona.” (Roma 3:1, 2) Iehova ese Mose bena Israela taudia ma haida mai edia kamonai be ena lauma amo ia hasiahua, Ia ese Israela dekenai ia karaia karadia sivaraidia, bona ena sisiba, ena taravatu, bona ena peroveta herevadia do idia torea totona. Unai revareva amo unai toretore taudia gunadia ese idia murinai idia vara urudia iboudiai—iseda danu hari inai negai—be idia hadibaia, Dirava be tamona mo, bona ena ladana be Iehova.—Daniela 12:9; 1 Petero 1:10-12.
14 Madi, nega momo Israela besena ese Iehova ia abidadama henia lasi dainai, Iehova ese witness taudia be sibona ena bese dekenai ia siaidia. Momo ese dagedage idia davaria. Paulo ia gwau: “Haida be idia dagedage henidia taudia ese idia kirikirilaidia, idia kwadidia, auri dekenai idia guidia, bona dibura ruma lalonai idia koudia.” (Heberu 11:36) Momokani, idia be witness taudia mai edia kamonai! Madi, nega momo unai dagedage be sibodia edia bese taudia, Iehova ena abia hidi taudia, ese idia havaraia! (Mataio 23:31, 37) Unai bese ena dika ia bada ia lao momokani dainai, lagani 607 B.C.E. ai, Iehova ese Babulonia taudia ia hakaua mai, Ierusalema bona ena dubu helaga do idia hadikaia bena idia roho mauri taudia momo do idia laohaia Babulonia dekenai. (Ieremia 20:4; 21:10) Unai dainai bese ta ese Iehova ena ladana ia gwauraia hedinarai karana be ia doko unai, a? Lasi.
Dirava Idaudia Ia Tohoa
15 Babulonia ai idia noho neganai danu, Israela taudia mai edia kamonai ese Iehova ena Dirava dagina bona ena siahu idia gwauraia hedinarai noho. Hegeregere, Daniela ese Nebukanesa ena nihi edia anina ia gwauraia hedinarai mai ena gari lasi, haba ai idia hedinarai revarevadia edia anina be Belesasa ia hadibaia, bona ena be Dariuse ese guriguri ia taravatua to Daniela ese ena guriguri karana ia hadokoa lasi. Heberu uhaudia toiosi ese kaivakuku idia tomadiho henia lasi neganai, Nebukanesa vairanai Iehova ena siahu idia gwauraia hedinarai namo herea.—Daniela 3:13-18; 5:13-29; 6:4-27.
16 To, Iehova ena ura be Israela tanona ai iena bese ese ia do idia gwauraia hedinarai lou. Esekiela, Babulonia ai idia noho Iuda taudia bogaragidiai ia peroveta tauna, ese Iehova ena lalohadai ia dika vadaeni tanona dekenai be inai bamona ia gwauraia: “Lau ese emui bese do lau habadaia, do umui momo herea. Umui ese emui hanua do umui haginia lou, guna idia hadikaia gabudia ibounai be do umui haginia lou, bona unuseni do umui noho.” (Esekiela 36:10) Dahaka dainai Iehova be unai bamona do ia karaia? Badina badana be, sibona ena ladana do ia gwauraia hedinarai totona. Esekiela ena amo ia gwau: “Israela besena e, . . . egu ladana helagana be umui ese umui hamiroa bona hadikaia vadaeni. Unai dainai inai kara haida do lau karaia, be umui do lau hanamoa totona lasi, to lauegu ladana helagana do lau hanamoa totona.”—Esekiela 36:22; Ieremia 50:28.
17 Dirava ena lauma ese ia hasiahua hegeregerena, peroveta tauna Isaia ese Israela taudia be Babulonia amo edia tano do idia lou henia karana ia perovetalaia neganai, Isaia 43:10 ena hereva ia torea, ia gwau Israela be Iehova ena witness tauna, iena hesiai tauna. Isaia 43 bona 44 lalonai, ia gwau Iehova be Israela ia havaraia Diravana, ia karaia Diravana, ena Dirava, ena Dirava Helagana, ia hamauria Diravana, bona ena King. (Isaia 43:3, 14, 15; 44:2) Nega momo Israela besena ese Iehova idia hanamoa lasi dainai, haida ese idau tanona dekenai idia laohaidia neganai, ia koudia lasi. To, idia be do iena bese taudia. Iehova ese ia hamaorodia vadaeni, ia gwau: “Do umui gari lasi, lau ese umui do lau hamauria. Lau ese umui emui ladana lau atoa vadaeni, umui be lauegu.” (Isaia 43:1) Israela ena noho Babulonia ai be do ia doko.
18 Momokani, Iehova ese Israela besena be Babulonia amo ruhaia karana be dirava idaudia tohoa karana ai ia halaoa. Ia ese idau bese taudia edia dirava koikoidia ia hamaoroa edia witness taudia do idia mailaia, ma ia gwau Israela be iena hereva hamomokania besena. (Isaia 43:9, 12) Israela taudia ia ruhaia neganai, ia hamomokania Babulonia ena dirava be dirava korikoridia lasi bona ia mo sibona be Dirava momokanina. (Isaia 43:14, 15) Lagani 200 bamona idia do noho ela bona unai nega, ia ese Kurese, Parasa tauna, be iena hesiai tauna ia gwauraia, ia gwau ia ese Iuda taudia do ia ruhaia; unai amo iena Dirava dagina be ma ia hamomokania. (Isaia 44:28) Badina be dahaka Israela do ia ruhaia? Iehova ia gwau: “[Israela] ese . . . egu ladana do idia hanamoa” totona. (Isaia 43:21) Unai amo dala do ia kehoa Dirava do idia gwauraia hedinarai lou totona.
19 Nega ia ginidae neganai, Kurese, Parasa tauna, ese Babulonia ia hadarerea, Isaia ia peroveta hegeregerena. Ena be Kurese be dirava idaudia tomadiho henia tauna, to Iehova ena Dirava dagina ia gwauraia, Babulonia ai idia noho Iuda taudia be inai bamona ia hereva henidia neganai: “Lau ura Dirava ese umui, iena bese taudia ta ta ibounai dekenai do ia noho. Umui be Ierusalema, Iuda tano dekenai do umui lao, unuseni [Iehova], Israela ena Dirava, ena Dubu Helaga do umui haginia lou. Dirava be Ierusalema dekenai ia noho.” (Esera 1:3) Iuda taudia momo be unai hegeregerena idia karaia. Gwauhamata Tanona idia lou henia, bena dubu helaga gunana ena gabu ai boubou patana ta idia haginia. Ena be haida ese edia lalona idia ania bona edia gaukara idia koua toho goadagoada, to dubu helaga bona Ierusalema hanuana idia haginia lou. Iehova sibona ia gwau unai ibounai ia vara, “goada dekena amo lasi, bona siahu dekena amo lasi, to [iena] Lauma dekena amo.” (Sekaraia 4:6) Unai kara ese idia hamomokania lou Iehova be Dirava momokanina.
20 Unai hegeregerena, ena be Israela besena taudia idia goevadae lasi bona nega haida idia gwau-edeede, to Iehova ese unai bese ia gaukaralaia noho, iena hereva do ia hamomokania totona. Iesu ese Keristani dalana ia do haginia lasi neganai, unai bese, mai ena dubu helaga bona mai ena hahelaga taudia oreana, be tomadiho momokani ena badina ena toana, tanobada ibounai lalonai. Iehova ese Israela dekenai ia karaia karadia sivaraidia Heberu Revarevadia lalonai ia duahia tauna be ia daradara lasi, to ia diba vaitani Dirava momokanina be tamona mo, bona iena ladana be Iehova. (Deuteronomi 6:4; Sekaraia 14:9) To, Iehova ena ladana gwauraia hedinarai gaukarana, Israela taudia ese idia karaia gaukarana ena bada ia hereaia gaukarana, be gabeai haida ese idia karaia, bona hereva gabena lalonai unai do ita herevalaia.
Oi Laloatao A?
◻ Edena dala amo Aberahamo ia hamomokania Iehova be Dirava momokanina?
◻ Mose ena kara namona badana be dahaka, ia dainai ia be witness tauna mai ena kamonai ai ia lao?
◻ Edena dala idauidau amo Israela besena ese Iehova ia gwauraia hedinarai?
◻ Iehova ese Israela be Babulonia amo ia ruhaia neganai, unai ese edena bamona ia hamomokania ia mo sibona be Dirava momokanina?
[Study Questions]
1. Daika be Dirava momokanina, bona edena dala ai ia ese hari inai negai idia tomadiho henidia diravadia hutuma ia hereadia?
2, 3. (a) Edena dala ai Satani ese ena hereva koikoi amo ia hahedinaraia Iehova be hegeregere lasi taunimanima ese do idia tomadiho henia? (b) Heva ena kara dika dainai dahaka ia vara, ia bona ena natuna dekenai, bona dahaka ia vara Satani dekenai?
4. (a) Inai tanobada ena dirava be daika? (b) Namona be harihari taunimanima ese dahaka do idia karaia?
5. Paulo ese daidia be “witness taudia hutuma bada ori ta bamona” ia gwauraia? Idia haida edia ladadia mani oi gwauraia.
6, 7. Edena dala idauidau ai Aberahamo ena mauri bona ena kara ese idia hamomokania Iehova be Dirava momokanina?
8. Edena dala amo Mose ese ia hahedinaraia Iehova ia abidadama henia bada?
9. Edena dala amo Israela besena be Iehova ena hesiai ia lao henia?
10. Israela besena dainai Iehova ese ia karaia siahu karadia ese dahaka idia hamomokania, bona idia dainai dahaka ia vara?
11. Iehova ese Israela taudia ia hagania, edia natudia be dahaka do idia hamaorolaia?
12. Iehova ese Solomona bona Israela besena ia hanamoa neganai, unai ese dahaka ia hamomokania?
13. Israela ese Dirava ena hereva ia gwauraia hedinarai dalana badana ta be dahaka, bona unai ena anina namona ita dekenai be dahaka?
14. Dahaka dainai Iehova ena witness taudia haida ese dagedage idia davaria?
15. Babulonia ai idia noho neganai danu, Dirava ena siahu be edena bamona idia gwauraia hedinarai?
16. Iehova ese edena bamona ia peroveta Israela taudia be edia tano do idia lou henia, bona dahaka totona do idia lou lao?
17. Isaia ese dahaka ia perovetalaia neganai, Isaia 43:10 ena hereva ia gwauraia?
18. Iehova ese Israela be Babulonia amo ia ruhaia neganai, unai ese edena bamona ia hamomokania ia mo sibona be Dirava momokanina?
19. Kurese ese Israela taudia ia boiria Ierusalema do idia lou henia; unai boiboi bona idia lou lao murinai Iuda taudia mai edia kamonai ese idia karaia karadia danu ese dahaka idia hamomokania?
20. Ena be Israela besena be mai ena manoka idauidau, to Iehova ena ladana be idaunegai tanobadana lalonai idia gwauraia hedinarai karana be edena bamona ita gwauraia diba?
[Picture on page 10]
Ena abidadama bona ena kamonai amo, Aberahamo ese Iehova ena Dirava dagina ia hamomokania