Umui Aonega​—⁠Dirava Umui Gari Henia!

“Lohiabada gari henia kara be aonega ena hamatamaia dalana.”​—⁠AONEGA HEREVADIA 9:⁠10.

1. Dahaka dainai momo be Dirava gari henia karana idia daradaralaia?

GUNAGUNA, bema oi gwau tau ta be Dirava gari henia tauna, unai be hanamoa herevana. To hari, taunimanima momo idia laloa Dirava gari henia karana be idaunegai lalohadaina ta, bona iena anina idia lalopararalaia lasi. Idia daradara, ‘Bema Dirava be lalokau, dahaka dainai do lau gari henia?’ Idia laloa, gari be hemami dikana ta, hegeregere ta ese oi ia ura hadikaia neganai oi mamia garina. To, inai stadi lalonai do ita itaia, Dirava gari henia karana ena anina be momo.

2, 3. Dirava gari henia karana ena anina be dahaka?

² Baibel ese Dirava gari henia karana ia herevalaia neganai, ia be kara namona ia gwauraia. (Isaia 11:​3, NW ) Unai gari karana ena anina be Dirava ita imodaia bona matauraia, bona ita ura lasi Dirava ese ia inai henia karana ta ita karaia. (Salamo 115:11) Anina ma ta be iseda mauri lalonai, Dirava ena taravatu goevadaedia ita badinaia bona Dirava ese ia gwauraia maoro gaudia ita abia dae bona kerere gaudia ita dadaraia. Buka ta ia gwau, “Dirava gari henia be mai anina bada karana, badina unai ese ta ia durua ia aonega bona kara dika ia dadaraia totona.” Unai hegeregerena, Dirava ena Hereva ia gwau: “Lohiabada gari henia kara be aonega ena hamatamaia dalana.”​—⁠Aonega Herevadia 9:⁠10.

³ Momokani, taunimanima edia mauri ena kahana ibounai lalonai Dirava gari henia karana be mai anina bada. Ta be Dirava ia gari henia neganai ia aonega sibona lasi, to ena mauri lalonai ia moale, mai ena maino, ia noho namo, ia mauri daudau, mai ena helaro, bona ena abidadama ia goada danu. (Aonega Herevadia 1:7; 10:27; 14:26; 22:4; 23: 17, 18, BHğ; 28:14; Kara 9:31) Baibel lalonai Dirava gari henia karana be lalokau bona abidadama ida ia gwauraia hebou. Momokani, Dirava tomadiho henia bona taunimanima kara henia dalana dekenai, Dirava gari henia karana be mai anina bada. (Deuteronomi 10:12; Iobu 6:14) Dirava gari henia karana ena anina ma ta be, ita abia dae momokani iseda guba Tamana be ita ta ta ia laloa bada bona ia hegaegae iseda kara dika ia gwauatao totona. (Salamo 130:⁠4) Idia helalo-kerehai lasi kara dika taudia sibodia be mai heudeheude ida Dirava do idia gari henia, badina dika do idia davaria.a​​—⁠Heberu 10:​26-31.

Iehova Gari Henia Karana Dibaia

4. Edena dala ai Dirava gari henia karana ita dibaia diba?

⁴ Abia hidi maorodia ita karaia bona Iehova ena hahenamo ita abia totona, Dirava gari henia karana be mai anina bada. Vadaeni, Dirava gari henia eiava matauraia dalana maorona be edena dala ai ita dibaia diba? (Deuteronomi 17:19) Baibel lalonai, Dirava idia gari henia tatau bona hahine momo edia sivarai idia torea ita idia hadibaia totona. (Roma 15:⁠4) Dirava gari henia karana ita diba namonamo totona, namona be Israela besena ena King Davida ena haheitalai mani ita itaia.

5. Mamoe naria gaukarana ese edena dala ai Davida ia durua Iehova gari henia karana ia dibaia totona?

⁵ Iehova ese Israela besena ena king ginigunana, Saulo ia dadaraia, badina Saulo ese taunimanima ia gari henidia to Dirava ia gari henia lasi. (1 Samuela 15:​24-26) To, Davida be Iehova ia tura henia bona iena mauri dalana amo, ia hahedinaraia ia be Dirava gari henia tauna. Davida be mero matamatana negana amo, ia ese iena tamana ena mamoe ia naria. (1 Samuela 16:11) Hanuaboi ena hisiu henunai Davida be mamoe ia naria neganai, unai ese Davida ia durua Dirava gari henia karana ia dibaia. Ena be guba ena hisiu haida sibona ia itaia, to Davida ese lalohadai maorona ia abia​—⁠ia laloparara taunimanima ese Dirava idia matauraia bona imodaia be gau badana. Gabeai, ia gwau: “Oiemu guba lau itaia, oi ese oiemu imana dekenai oi karaia. Hua bona hisiu danu be oi ese oi atoa. Taunimanima be dahaka, oi ese idia oi laloa noho? Taunimanima be maragi herea, dahaka dainai oi ese oi naridia noho?”​—⁠Salamo 8:​3, 4.

6. Davida be Dirava ia karaia gaudia ia itaia neganai, dahaka ia hereva?

⁶ Oibe, Davida ia hoa badina ia be maragi momokani to guba ena hisiu be momo herea. Unai gaudia dainai ia gari lasi, to ia ura Iehova do ia hanamoa, ia gwau: “Guba ese Dirava ena hairaina ia hedinaraia, bona guba dekenai noho gaudia ese, Dirava ia karaia gaudia idia hedinaraia noho.” (Salamo 19:⁠1) Unai gari karana dainai Davida ese Dirava ia matauraia bada, bona unai ese ia veria lao Dirava kahirakahira dekenai. Davida ia ura Iehova ena dala goevadaena ia dibaia bona ia badinaia. Davida be inai ane ia abia neganai ena lalohadai Iehova dekenai mani oi laloa: “Oi be bada, bona oi ese hoa karadia oi karaia noho. Oi sibona be Dirava. Lohiabada e, oiemu dala lau dekenai do oi hadibaia, bona lau be oiemu momokani lalonai do lau raka. Lauegu lalona do oi hatamonaia momokani, vadaeni lau ese oiemu ladana do lau matauraia bona gari henia.”​—⁠Salamo 86:​10, 11.

7. Davida be Dirava ia gari henia dainai, edena bamona unai ese ia durua Goliata ia tuari henia totona?

⁷ Pilistia ena tuari taudia be Israela taudia idia tuari henidia neganai, edia tuari tauna badana Goliata​—⁠ena lata be mita 3 bamona​—⁠ese Israela taudia ia hevasehalaia, reana ia gwau: ‘Emui tuari tauna tamona umui siaia mai lau danu do ia tuari! Bema ia kwalimu, ai be emui hesiai taudia ai do ai lao.’ (1 Samuela 17:​4-10) Saulo bona ena tuari taudia ibounai be idia gari, to Davida be ia gari lasi. Ia diba Iehova sibona ia gari henia be maoro​—⁠to taunimanima ia gari henia be maoro lasi ena be idia be mai edia siahu. Davida ese Goliata ia hamaoroa: “Lau be Lohiabada Dirava ena ladana dainai oi dekenai lau raka mai inai. . . . Iniseni idia haboua noho taudia ibounai danu do idia diba Lohiabada be tuari kaia lasi, bona io lasi dekena amo hamauria kara ia karaia. Badina tuari be Lohiabada ena.” Davida be vilipopo bona nadi tamona sibona ia abia, to Iehova ena heduru amo, ia ese Goliata ia hamasea.​—⁠1 Samuela 17:​45-47.

8. Dirava idia gari henia taudia edia haheitalai ese dahaka idia hadibaia ita dekenai?

⁸ Davida bamona, reana ita danu be mai iseda hekwakwanai eiava haida ese ita idia dagedage henia. Dahaka do ita karaia? Davida bona idaunegai abidadama taudia edia haheitalai do ita tohotohoa​—⁠Dirava idia gari henia dainai edia hekwakwanai idia hanaia diba. Dirava gari henia karana ese taunimanima gari henia karana ia kokia diba. Dagedage taudia ese Israela taudia idia hagaridia neganai, Dirava ia abidadama henia tauna Nehemia ese ia hagoadadia, ia gwau: “Ita idia tuari henia gwauraia taudia dekenai umui gari lasi. Lohiabada umui laloa noho. Ia be mai siahu bada bona mai garina.” (Nehemia 4:14) Iehova ese ia durudia dainai, Davida, Nehemia, bona abidadama hesiai taudia ma haida be edia hesiai gaukara idia karaia guguru diba. Dirava ita gari henia neganai, ita danu be unai bamona ita karaia diba.

Hekwakwanai Negadiai Dirava Gari Henia

9. Davida be dahaka hekwakwanai ia davaria, to Dirava ia gari henia noho?

⁹ Davida ese Goliata ia hamasea murinai, Iehova ese Davida ia durua bona tuari momo lalodiai ia kwalimu. Saulo be Davida ia mama henia bona ia ura Davida ia alaia mase​—⁠hegeregere nega ginigunana be, ia sibona ia toreisi Davida ia alaia gwauraia; nega iharuana be, koikoi dalanai palani ia karaia Davida ia alaia gwauraia; nega ihatoina be, tuari taudia ia gaukaralaia Davida ia hamasea totona​—⁠to ia kwalimu lasi. Ena be Iehova ia gwau Davida be king ai do ia lao, to lagani momo lalodiai, Davida be ena mauri totona ia heau, ia tuari, bona Iehova ia naria, nega korikorina ai king ai ia halaoa totona. Unai hekwakwanai negadia ai, Davida ia hahedinaraia ia be Dirava momokanina ia gari henia.​—⁠1 Samuela 18:​9, 11, 17; 24:⁠2.

10. Davida be dika ia davaria neganai, edena bamona ia hahedinaraia ia be Dirava gari henia tauna?

¹⁰ Nega ta Davida be Pilistia hanua ta ladana Gata dekenai ia lao, King Akisi dekenai heduru ia tahua totona. Gata be Goliata ena hanua. (1 Samuela 21:​10-15) To, King ena hesiai taudia idia gwau Davida be Pilistia taudia edia inai tauna. Davida be unai nega dikana ai dahaka ia karaia? Iehova dekenai iena hekwakwanai ia gurigurilaia. (Salamo 56:​1-4, 11-13) Ena be Davida ia heau mauri totona, ia ese kavakava tauna ena kara ia tohotohoa, to ia diba unai be Iehova ese ia hamauria. Davida be mai ena lalona ibounai ida Iehova dekenai ia tabekau bona ia abidadama henia dainai, ia hahedinaraia Davida be Dirava ia gari henia tauna momokani.​—⁠Salamo 34:​4-6, 9-11.

11. Davida hegeregerena hekwakwanai ita davaria neganai, edena dala ai Dirava ita gari henia noho diba?

¹¹ Davida hegeregerena, iseda hekwakwanai ita haheaukalaia totona, Dirava ita gari henia bona iena gwauhamata ita abidadama henidia be namo. Davida ia gwau: “Oiemu mauri be Lohiabada ena imana dekenai do oi atoa. Ia dekenai do oi abidadama, vadaeni ia ese oi do ia durua.” (Salamo 37:⁠5) To, namo lasi iseda hekwakwanai be Iehova ena imana dekenai ita atoa sibona bena ita be gau ta ita karaia lasi. Davida be heduru totona Iehova ia guriguri henia sibona lasi, to kara ta ia karaia danu. Davida ia diba ia sibona ena goada amo ia kwalimu diba lasi. To, ia be Iehova ese ia henia goada bona diba ia gaukaralaia, ia davaria hekwakwanai ia hanaia totona. Ita ese unai ita laloatao danu be gau badana. Namona be iseda diba bona goada ibounai ita gaukaralaia guna, bena Iehova ena heduru ita tahua. Momokani, nega haida dala ta be lasi dainai, Iehova sibona dekenai do ita tabekau. Unai ese ia hahedinaraia ita be Dirava ita gari henia. Davida ena Hereva amo goada ita abia diba, ia gwau: “Lohiabada idia gari henia taudia, be Lohiabada ese idia dekenai, iena hunia gaudia ia hadibaia noho.”​—⁠Salamo 25:⁠14.

12. Dahaka dainai guriguri be gau badana, bona edena lalohadai ita dadaraia be namo?

¹² Unai dainai, ita ese Dirava guriguri henia bona tura henia karana ita laloa bada be gau badana. Iehova ita guriguri henia neganai, namona be ita abidadama momokani “Dirava be ia mauri noho” bona “Dirava idia tahua taudia ibounai, be davana namona Dirava ese do ia henidia.” (Heberu 11:6; Iamesi 1:​5-8) Aposetolo Paulo ena sisiba hegeregerena, Iehova ese ita ia durua neganai, Ia ita “tanikiu henia” be namo. (Kolose 3:​15, 17) Namo lasi ita be horoa Keristani tadikaka ese ia gwauraia taudia bamona. Ia gwau, taunimanima haida idia laloa Dirava be hesiai tauna ta bamona. Gau ta idia ura neganai, ia idia boiria unai gauna ia karaia totona. Bena edia ura gauna idia abia murinai, hesiai tauna idia hamaoroa do ia lao. Unai bamona taudia be Dirava idia gari henia lasi.

Dirava Ita Gari Henia Lasi Neganai

13. Edena nega ai Davida be Dirava ena Taravatu ia matauraia lasi?

¹³ Davida be nega dikadia ai, Iehova amo heduru ia abia dainai, ia be Dirava ia gari henia bada bona ena abidadama ia goada. (Salamo 31:​22-24) To, Davida be nega idaudia toi ai Dirava ia gari henia lasi bona ia moru. Nega ginigunana be, Davida ia ura Iehova ena Taravatu Mauana be treila dekenai idia abia lao Ierusalema dekenai. To Taravatu ia gwau Taravatu Mauana be Levi taudia edia pagana dekenai idia huaia be namo. Usa be treila vairanai ia raka bona Maua ia moru lasi totona ia dogoatao neganai, maoromaoro Iehova ese ia hamasea badina ia hemataurai lasi. Oibe, ena be Usa ia kerere, to unai dika ia vara badina badana be, Davida ese Dirava ena taravatu ia matauraia lasi. Dirava gari henia karana anina be, Iehova ena taravatu hegeregerena gau ibounai do ita karaia.​—⁠2 Samuela 6:​2-9; Numera 4:15; 7:⁠9.

14. Davida ese Israela tuari taudia ia duahia dainai, dahaka ia vara?

¹⁴ Gabeai, Davida be Satani ese ia koia dainai, Israela ena tuari taudia ia duahia. (1 Sivarai 21:⁠1) Unai ia karaia neganai, Davida be Dirava ia gari henia lasi, unai dainai Israela taudia 70,000 idia mase. Ena be Iehova vairanai Davida ia helalo-kerehai, to Davida bona Israela taudia be hisihisi bada idia davaria.​—⁠2 Samuela 24:​1-16.

15. Dahaka dainai Davida be heudahanai karana ia karaia?

¹⁵ Davida be Dirava ia gari henia lasi negana ma ta be Uria ena adavana, Bataseba, ida ia heudahanai negana. Davida ia diba heudahanai karana eiava ma ta ena adavana ura henia karana be kerere. (Esodo 20:​14, 17) Bataseba ia digu lalonai Davida be ia itaia noho dainai, hekwakwanai ia vara. Bema Davida be Iehova ia gari henia bada, iena matana be gabu ta ia itaia bona iena lalohadai ia haidaua be namo. To, Davida ese Bataseba ia “itaia noho” ela bona ena ura kererena ese Dirava gari henia karana ia hamanokaia. (Mataio 5:28; 2 Samuela 11:​1-4) Davida ia laloaboio gauna be, iena mauri ibounai lalonai ena hetura karana Iehova ida be mai anina bada.​—⁠Salamo 139:​1-7.

16. Davida ia kara dika dainai, dahaka dika ia davaria?

¹⁶ Davida bona Bataseba edia heudahanai karana amo natuna mero ta ia vara. Gabeai, Iehova ese peroveta tauna Natana ia siaia lao Davida ena kerere ia gwauraia hedinarai totona. Davida ia laloparara murinai, Dirava ia gari henia lou bona ia helalo-kerehai. Davida ese Iehova ia noia Ena lauma helaga do ia kokia lasi eiava do ia lulua lasi. (Salamo 51:​7, 11) Iehova ese Davida ia gwauatao bona ena kara dika ena davana korikorina ia henia lasi, to iena kerere dainai idia vara dika be Iehova ese ia koua lasi. Unai nega amo, Davida ena natuna mero ia mase bena ena ruma bese be lalohisihisi bona dika bada idia davaria. Oibe, Dirava ia gari henia lasi dainai, dika bada ia davaria!​—⁠2 Samuela 12:​10-14; 13:​10-14; 15:⁠14.

17. Ta ena kerere dainai ia vara lalohisihisina mani oi herevalaia.

¹⁷ Hari inai negai danu, bema Dirava ita gari henia lasi bona matabodaga karadia ita karaia, dika bada do ita davaria bona nega daudau lalonai ita lalohisihisi diba. Mani, inai headava hahine matamatana ena hemami oi laloa. Ia kamonai iena tau be tano ma ta dekenai gaukara totona ia lao neganai, unuseniai ma ta ida ia heudahanai. Taihu ia hoa bada bona mai lalohisihisi ida ia tai dikadika. Taihu be ena tau do ia abidadama henia bona matauraia lou haraga diba, a? Dirava ita gari henia momokani neganai, unai bamona lalohisihisi do ita davaria lasi.​—⁠1 Korinto 6:⁠18.

Dirava Ita Gari Henia Dainai, Kara Dika Ita Dadaraia

18. Satani ena ura be dahaka, bona unai ia hagugurua totona dahaka gaudia ia gaukaralaia?

¹⁸ Satani be tanobada dekenai matabodaga karadia ia habadaia noho, bona ia ura dikadika Keristani taudia momokanidia ia hamorua. Satani ese iseda matana idia itaia gaudia bona taiana idia kamonai gaudia ia gaukaralaia, iseda kudouna bona lalona ia veria totona. (Efeso 4:​17-19) Bema matabodaga laulaudia o herevadia eiava lebulebu taudia idia hedinarai haraga, dahaka do oi karaia?

19. Dirava gari henia karana ese edena dala ai Keristani tauna ta ia durua kara dika ia dadaraia totona?

¹⁹ Mani, Europe dekenai headava Keristani elda tauna ena ladana André,b ena haheitalai ita laloa, ia be doketa tauna ta bona mai ena natudia danu. André be hospital dekenai hanuaboi ta ibounai lalonai ia gaukara neganai, ia ida idia gaukara hebou hahine ese hanaihanai iena pilo dekenai revareva idia atoa. Unai revareva ai idia ese André idia boiria idia ida idia sihari kava totona. To André be mai lalogoada ida idia ia dadaraia. Danu, ia ese moni gaukara ma ta ia abia, bona unai gabu dikana ia rakatania. André be ia aonega dainai, Dirava ia gari henia bona unai ese hahenamo ia mailaia. Hari, André be Iehova ena Witnes taudia edia brens opesi dekenai pat-taim gaukara ia karaia noho.

20, 21. (a) Dirava gari henia karana ese edena bamona ita ia durua hedibagani ita hanaia totona? (b) Stadi gabena dekenai dahaka do ita herevalaia?

²⁰ Bema tau ta ese lalohadai dikadia ia laloa momo neganai, iena hetura karana namona Iehova ida do ia rakatania bona kara kererena ta ia karaia diba. (Iamesi 1:​14, 15) To, bema Iehova ita gari henia, iseda kara goeva idia hadikaia diba taudia, bona moale karadia bona gabudia amo do ita raka siri. (Aonega Herevadia 22:⁠3) Herevana, haida ese ita do idia kirikirilaia eiava reana gau ta do ita reaia diba, to idia be anina lasi badina Dirava ese ita ia lalonamo henia be mai anina bada. (Mataio 5:​29, 30) Dirava ita gari henia anina be, iseda matana do ita biagua namonamo, bona anina lasi matabodaga gaudia, hegeregere laulau eiava buka dikadia ‘do ita tahua lasi.’ Bema unai ita karaia, ita diba “Lohiabada ese ita ia gimaia noho” bona ita dabu gaudia ibounai do ia henia.​—⁠Salamo 84:11; 119:⁠37.

²¹ Oibe, Dirava oi gari henia momokani karana be aonega karana. Danu, ia be moale korikorina ena badina. (Salamo 34:⁠9) Stadi gabena dekenai unai do ita herevalaia.

[Footnotes]

Anina Oi Gwauraia Diba, A?

• Dirava ia gari henia tauna ese edena Keristani kara namodia ia hahedinaraia danu?

• Edena dala ai Dirava gari henia karana ese taunimanima gari henia karana ia koua diba?

• Edena dala ai ita hahedinaraia diba ita be guriguri karana ita laloa bada?

• Edena dala ai Dirava gari henia karana ese ita ia hagoadaia kara dika ita dadaraia totona?

[Picture on page 25]

Davida ese Dirava ia havaraia gaudia ia stadilaia neganai, Dirava gari henia karana ia dibaia

[Pictures on page 26]

Bema dibagani ta oi davaria, dahaka do oi karaia?