“Abidadama Lasi Taudia Danu Do Umui Hakapua Tamona Lasi”
INAI rau dekenai oi itaia kamelo bona boromakau be tano makohia gauna idia veria hebou, to edia toana be hisihisi idia mamia bamona. Idia huaia auna ese idia ruaosi ia veria hebou—unai amo edia bada bona edia goada be hegeregere animal rua—be idia hisihisi hebou diba. Dirava ese unai bamona animal edia namo ia laloa bada dainai Israela taudia ia hamaorodia, ia gwau: “Emui tano geia totona, boromakau bona doniki ruaosi ese tano geia aurina do idia veria hebou lasi.” (Deuteronomi 22:10) Unai hakaua herevana be ia idau lasi, boromakau ta eiava kamelo ta dekenai.
Nega momo, biru tauna ese iena animal dekenai unai bamona metau do ia atoa lasi. To bema boromakau rua be lasi, reana ia dekenai idia noho animal rua edia aiona dekenai au metauna ia atoa, unai amo tano makohia gauna idia veria diba. Toana be, lagani 1800 lalonai ia noho biru tauna, haheitalai ese ia gwauraia tauna unai, be unai bamona ia karaia. Animal edia bada bona metau be idauidau dainai, ia goada lasi animal be do ia hekwarahi ia raka haraga totona bona animal goadana be maduna metauna momokani do ia huaia.
Aposetolo Paulo ese idia hakapua hebou lasi gaudia edia haheitalai ta ia gaukaralaia, ita dekenai mai anina bada gauna ta ia hadibaia. Ia gwau: “Dirava idia abidadama henia lasi taudia danu do umui hakapua tamona lasi. Badina be edena bamona kara maoromaoro bona kara kerere idia turana diba? Edena bamona diari bona dibura idia noho hebou diba?” (2 Korinto 6:14) Keristani ta be edena dala ai ta ida do ia hakapua tamona diba?
Dala ta be bema Keristani ta ese iena abidadama ia abia dae lasi kekenina eiava merona be ena adavana totona ia abia hidi. Edia headava ese idia ruaosi dekenai moale do ia mailaia lasi, mai anina bada gaudia momo dekenai do idia lalo-tamona lasi.
Iehova ese headava ginigunana ia karaia neganai, hahine dekenai ia henia maduna be, ia be “durua tauna.” (Genese 2:18) Unai hegeregerena, Dirava ese peroveta tauna Malaki amo, hahine ia gwauraia ta ena adavana eiava “bamona.” (Malaki 2:14, NW ) Iseda Havaraia Tauna ia ura headava tau bona hahine be lauma dalanai idia gaukara hebou, maduna idia huaia hebou bona hahenamo idia abia hebou.
Keristani merona eiava kekenina ese ‘Keristani tauna sibona ia adavaia’ neganai, ia hahedinaraia ia ese iseda guba Tamana ena sisiba ia matauraia. (1 Korinto 7:39) Idia lalo-tamona headava taudia be badina goadana latanai edia headava idia haginia, bona dala namona ai idia be ‘durua taudia namodia’ bamona ta ta ida idia gaukara hebou lalonai, Dirava dekenai hanamoa bona hemataurai idia mailaia diba.—Filipi 4:3.
[Picture Credit Line on page 32]
Camel and ox: From the book La Tierra Santa, Volume 1, 1830