Iehova Ena Hereva be Ia Mauri Noho
Iosua Bukana Ena Hereva Badadia
LAGANI 1473 B.C.E. ai, Israela taudia be Moaba ena taora dekenai idia kamepa lalonai, reana inai hereva idia kamonai neganai idia moale bada: “Umui ese emui aniani do umui abia hegaegae, badina be dina toi do idia ore lasi lalonai, inai Ioridane Sinavai be do umui hanaia, Lohiabada, emui Dirava, ese umui ia henia tanona dekenai do umui raka vareai, bona do umui noholaia.” (Iosua 1:11) Lagani 40 tano gagaena dekenai idia loaloa karana be kahirakahira do ia doko.
Lagani 20 bona ma haida murinai, edia gunalaia tauna Iosua be Kanana tanona ena huanai ia gini bona Israela ena tatau badadia dekenai ia gwau: “Umui kamonai namonamo: Do noho idau bese taudia edia tano, bona lau ese lau hadikaia ore bese taudia edia tano be umui dekenai lau henia, Ioridane Sinavai dekena amo ela bona Davara Badana, dina diho kahanai. Lohiabada, emui Dirava, ese unai do noho bese taudia do ia doria lao, bona emui vairana dekena amo do ia luludia ore. Unai neganai edia tano do umui abia, Lohiabada emui Dirava ese umui dekenai ia gwauhamata hegeregerena.”—Iosua 23:4, 5.
Iosua be lagani 1450 B.C.E. ai Iosua bukana ia torea, ia lalonai be lagani 22 lalonai idia vara gaudia ia sivarailaia. Israela taudia be Gwauhamata Tanona kahirakahira ai idia gini bamona, ita danu be gwauhamata tanobada matamatana kahirakahira ita gini. Vadaeni, namona be mai iseda ura bada ida Iosua bukana ita tahua.—Heberu 4:12.
“IERIKO ENA TANO PALAKA DEKENAI”
Iosua be gaukara bada herea ia abia Iehova ese ia dekenai inai hereva ia gwauraia neganai, ia gwau: “Lauegu hesiai tauna Mose be ia mase vadaeni. Unai dainai oi toreisi, inai Ioridane Sinavai do oi hanaia, oi bona Israela taudia, idia dekenai lau ura do lau henia tanona do umui raka vareai.” (Iosua 1:2) Iosua ena gaukara be taunimanima milioni haida be Gwauhamata Tanona lalonai do ia hakaudia vareai. Unai ia hegaegaelaia totona, spai taudia rua be Ieriko dekenai ia siaia lao—Ieriko be do idia halusia hanua ginigunana. Ariara hahinena Rahaba be unai hanua dekenai ia noho, Iehova ese ena taunimanima totona ia karaia siahu karadia edia sivarai be Rahaba ia diba. Ia ese unai spai taudia ia gimaia bona durudia dainai, idia ese ia idia gwauhamata henia ia be do ia mauri.
Spai taudia rua idia giroa lou murinai, Iosua bona Israela taudia idia hegaegae Ioridane sinavai idia hanaia totona. Ena be sinavai ia abata, to unai ese idia ia koua lasi, badina Iehova ese ataiai ia noho sinavai ranu ia haboua bona henunai idia noho ranuna ibounai be Mase Davarana dekenai idia aru lao. Israela taudia be Ioridane idia hanaia murinai, Ieriko kahirakahira ia noho hanuana, Gilegala dekenai idia kamepa. Dina foa murinai, Abib hua ena dina 14 ena adorahi ai, Ieriko ena tano palaka dekenai Pasova idia karaia. (Iosua 5:10) Murina dinana ai, tano ena aniani haida idia ania matamaia bona mana ia ore. Unai nega ai, Iosua ese tano gagaena dekenai idia vara natudia memero ibounai edia kopina ia utua.
Baibel Henanadaidia Edia Haere:
2:4, 5—King ena tatau ese spai taudia idia tahua neganai, dahaka dainai Rahaba ese ia koidia? Ena be Rahaba ese ena mauri ia haboioa diba, to unai spai taudia ia gimaia badina Iehova ia abidadama henia. Unai dainai, Dirava ena taunimanima idia ura hadikaia taudia dekenai, spai taudia idia noho gabuna ia hamaorodia lasi. (Mataio 7:6; 21:23-27; Ioane 7:3-10) Oibe, Rahaba be king ena tatau ia koidia bona ena kara haida dainai, “Dirava ena vairanai ia maoromaoro.”—Iamesi 2:24-26.
5:14, 15—Daika be ‘Iehova ena tuari oreana ia gunalaia tauna’? Gwauhamata Tanona abia totona idia lao neganai, Iosua hagoadaia totona ia mai gunalaia tauna be “Hereva”—Iesu Keriso unai, tanobada dekenai ia do mai lasi neganai. (Ioane 1:1; Daniela 10:13) Hari, Dirava ena taunimanima be lauma dalanai idia tuari noho lalonai, hairai ia abia tauna Iesu Keriso be idia ida ia noho, unai ita diba be hagoadaia gauna momokani!
Ita Dibaia Gaudia:
1:7-9. Lauma gaudia tahua karana dekenai ita kwalimu totona, dina ta ta ai Baibel ita duahia, hanaihanai ena hereva ita lalohadailaia bona ita dibaia gaudia ita badinaia be gau badana.
1:11. Iosua ese Israela taudia ia noia edia aniani do idia abia hegaegae, to Dirava ese idia dekenai aniani ia henia totona idia naria kava lasi. Iesu ena sisiba be, mauri durua gaudia dekenai ita laloa momo lasi, ia gwau “unai gau ibounai danu umui dekenai dohore ia henia,” unai gwauhamata dainai namo lasi ita laloa ita sibona naria totona do ita gaukara lasi.—Mataio 6:25, 33.
2:4-13. Rahaba ese Iehova ia karaia hoa karadia ena sivarai ia kamonai bona ia noho nega ena dika ia lalo-pararalaia murinai, ena lalona ia hadaia Iehova idia tomadiho henia taudia do ia durudia. Bema nega sisina daudau lalonai Baibel oi stadilaia bona oi abia dae ita be “nega ena dokona” ai ita noho, namona be emu lalona oi hadaia Dirava oi hesiai henia totona, ani?—2 Timoteo 3:1.
3:15. Ieriko amo idia giroa lou spai taudia edia ripoti ia namo dainai, Iosua be Ioridane sinavai ena ranu ia diho totona ia naria lasi, to maoromaoro ia lao. Tomadiho momokani karadia dekenai, namona be mai gari lasi ida ita kara, to nega namona ia mai bena ita gaukara totona ita naria lasi.
4:4-8, 20-24. Ioridane sinavai ena ranu ia diho neganai Israela taudia ese nadi 12 idia abia, unai amo ia vara gauna idia laloatao diba. Iehova ese hari ena taunimanima be ena inai taudia amo ia hamauria karana dainai, idia laloatao Iehova be idia danu ia noho.
TANO MA HAIDA HALUSIA TOTONA IDIA LAO
“Ieriko hanua ena magu iduara idia koua momokani, . . . hanua dekenai tau ta ia raka vareai diba lasi, bona tau ia rakatania diba lasi.” (Iosua 6:1) Edena dala ai unai hanua do idia abia? Iehova ese Iosua dekenai Ieriko do idia tuari henia dalana ia hahedinaraia. Daudau lasi murinai magu ia moru bona hanua idia hadikaia. Rahaba bona ena ruma bese taudia sibona idia roho mauri.
Unai murinai idia ese Ai hanuana idia tuari henia. Unai hanua itaia totona idia siaia lao spai taudia idia gwau unai hanua dekenai taunimanima momo idia noho lasi dainai, idia halusia totona tatau haida sibona idia lao be namo. To, unai hanua tuari henia totona idia lao tuari taudia 3,000 be Ai ena hanua taudia amo idia heau. Dahaka dainai? Iehova be Israela taudia danu ia noho lasi. Ieriko hanuana idia hadikaia lalonai, Iuda iduhu tauna Akana be kara dika ia karaia. Iosua ese unai hekwakwanai ia hamaoromaoroa murinai, Ai hanua idia tuari henia lou. Ai ena king be guna Israela taudia ia halusia dainai, mai ena ura ida idia ia tuari henia totona ia mai. To Iosua ia gaukaralaia tuari dalana dainai ena be Ai ena tatau idia laloa idia goada herea, to idia kwalimu lasi.
Gibeona be ‘hanua badana—Ai hanua ia hanaia bona Gibeona hanua taudia ibounai be tuari taudia mai edia goada bada.’ (Iosua 10:2) To, Israela taudia ese Ieriko bona Ai hanua taudia idia halusia ena sivarai idia kamonai neganai, Gibeona taudia be Iosua idia koia, idia ura idia ida maino gwauhamatana idia karaia. Unai dainai idia kahirakahira idia noho besedia idia laloa dika do idia davaria. Hanua faiv edia king be orea tamona ai idia lao bona Gibeona hanua idia tuari henia. Israela taudia ese Gibeona taudia idia durua bona edia inai taudia idia halusia. Iosua ena gunalaia henunai, Israela taudia ese saut bona west kahanai idia noho hanuadia bona orea tamona ai idia haboua not kahana ena king taudia, idia halusidia danu. Ioridane ena west kahana dekenai idia halusia king ibounai be 31.
Baibel Henanadaidia Edia Haere:
10:13—Inai hoa karana be edena bamona ia vara diba? Guba bona tanobada ena Havaraia Tauna be ‘hoa kara ia karaia diba lasi, a?’ (Genese 18:14) Bema Iehova ia ura, ia ese tanobada ena hegiro dalana ia biagua diba, unai amo tanobada tauna ena matana dekenai dina bona hua be idia marere lasi bamona. Eiava tanobada bona hua be edia gabu dekenai idia giroagiroa noho, to Iehova ese dina bona hua edia diari be tanobada dekenai ia siaia noho. Herevana dahaka ia vara, to “idaunegai momokani ia mai bona harihari be dina ta inai bamona ia vara lasi!”—Iosua 10:14.
10:13—Iasara bukana be dahaka? Samuela Iharuana 1:18 ese ane ta—King Saulo bona ena natuna Ionatana idia mase neganai idia abia anena unai—ia herevalaia neganai, unai buka ia gwauraia lou. Unai buka lalonai ane bona histori lalonai idia vara gaudia edia sivarai idia noho, bona Heberu taudia momo be unai buka idia diba.
Ita Dibaia Gaudia:
6:26; 9:22, 23. Iosua ese Ieriko idia hadikaia negana ai ia gwauraia hadikaia herevana be lagani 500 murinai ia guguru. (1 King Taudia 16:34) Gibeona taudia be Israela edia hesiai taudia ai idia lao neganai, Noa ese guna ena tubuna Kanana dekenai ia gwauraia hadikaia herevana ia guguru. (Genese 9:25, 26) Iehova ena hereva be hanaihanai ia momokani.
7:20-25. Reana haida idia laloa Akana ena henaohenao karana be kerere maragina sibona, reana idia gwau unai kara ese ma haida ia hahisia lasi. Reana idia laloa Baibel ese ia taravatua henaohenao karana bona kerere maragidia be anina lasi. To namona be Iosua bamona ita kara, iseda lalona ita hadaia momokani taravatu utua karadia eiava matabodaga karadia ita daradara momokani totona.
9:15, 26, 27. Gau badana be ita karaia gwauhamatadia ita makohia lasi bona iseda hereva ita hamomokania.
IOSUA ESE ENA GAUKARA DOKONA BONA BADANA IA HAMATAMAIA
Iosua ia buruka vadaeni—mauri lagani 90 ia lao henia—bona tano haria gaukarana ia hamatamaia. Unai be gaukara badana momokani! Rubena bona Gado bona Manase ena iduhu kahana ese Ioridane ena ist kahanai ia noho tanona be edia ahuna bamona idia abia vadaeni. Gadara ta amo, iduhu orena be west kahanai ia noho tanona be edia ahuna bamona idia abia.
Eparaima tanona ai ia noho gabuna Silo dekenai, dubu idia haginia. Kaleba be Heberona hanuana ia abia, bona Iosua be Timinata Sera ia abia. Levi iduhuna be hanua 48 ia abia, bona heau mauri hanuadia 6 ia abia danu. Rubena, Gado, bona Manase ena iduhu kahana taudia be idia abia tanona Ioridane ena ist kahana dekenai idia giroa lao neganai, edia tuari taudia ese “boubou patana badana ta idia haginia.” (Iosua 22:10) Ioridane ena west kahana ai idia noho iduhu dekenai unai be hereva momokani negea karana, bona kahirakahira idia huanai tuari ia vara, to herevahereva namonamo karana dainai rara bada bubua karana idia koua.
Iosua be Timinata Sera dekenai nega sisina ia noho murinai, ia ese Israela ena tatau badadia, kwarana taudia, diadi bona opesa taudia ia haboua, bona idia ia hagoadaia idia gari lasi bona Iehova idia abidadama henia noho totona. Gabeai, Iosua ese Sekema dekenai Israela ena iduhu ibounai ia haboudia. Unuseniai, ia ese Iehova ena kara idauidau Aberahamo ena nega amo ela bona edia nega ai ia herevalaia lou, bona idia ma ia hagoadaia lou ‘Iehova idia gari henia, iena hesiai gaukara do idia karaia mai momokani bona mai laloa maoromaoro danu.’ Israela taudia idia gwau: “Lohiabada, iseda Dirava, ena hesiai gaukara do ai karaia, bona iena gadona do ai kamonai.” (Iosua 24:14, 15, 24) Unai murinai Iosua ia mase, ena mauri lagani be 110.
Baibel Henanadaidia Edia Haere:
13:1—Iosua 13:1 ena hereva ese Iosua 11:23 ena hereva ia hakoikoia, a? Lasi, Gwauhamata Tanona idia abia totona gau rua idia karaia: Israela taudia ese Kanana taudia edia king 31 idia halusidia bona unai kara dainai Kanana taudia edia siahu ia ore. Gau iharuana be iduhu bona taunimanima ta ta edia goada amo idia tuari bona tano idia abia. (Iosua 17:14-18; 18:3) Ena be Israela taudia ese Kanana taudia ibounai idia luludia siri lasi, to idia roho mauri taudia ese Israela taudia edia noho namo idia hadikaia lasi. (Iosua 16:10; 17:12) Iosua 21:44 ia gwau: “Lohiabada ese maino mai laga-ani danu idia dekenai ia henia.”
24:2—Aberahamo ena tamana, Tera, be kaivakuku tomadiho henia tauna, a? Guna, Tera be Iehova Dirava ia tomadiho henia lasi. Ia be hua diravana Sin—Uru hanua lalonai momo ese idia tomadiho henia diravana unai—ia tomadiho henia. Iuda taudia edia kastom hegeregerena, reana Tera be kaivakuku ia karaia danu. To, Dirava ena oda dainai Aberahamo be Uru ia rakatania neganai, Tera be ia danu Harana dekenai idia lao.—Genese 11:31.
Ita Dibaia Gaudia:
14:10-13. Ena be Kaleba ena mauri lagani be 85, to gaukara aukana ia noia, Heberona taudia ia luludia siri totona. Unai tano be Anakima tatau badadia ese idia noholaia. Iehova ena heduru dainai, unai tuari ia diba momo tauna ia kwalimu bona Heberona be heau mauri hanuana ai ia lao. (Iosua 15:13-19; 21:11-13) Kaleba ena haheitalai ese ita ia hagoadaia, tiokratik gaukara aukadia ita dadaraia lasi.
22:9-12, 21-33. Namona be ita naria namonamo, haida edia lalohadai ita gwauraia kerere lasi.
‘Hereva Ibounai Idia Vara Momokani’
Iosua ia buruka momokani neganai, ia ese Israela ai maduna idia huaia taudia dekenai ia gwau: “Lohiabada, emui Dirava, ese iena gwauhamata namodia ibounai umui dekenai ia hamomokania vadaeni, idia ta ia reaia lasi. Ibounai idia vara momokani, ta ia moru lasi.” (Iosua 23:14) Iosua bukana ese unai idaunegai ia vara sivaraina ia hahedinaraia goevagoeva!
Aposetolo Paulo ia gwau: “Buka Helaga dekenai idia torea hereva be ita dekenai hadibaia totona idia torea, vadaeni do ita gini goada, bona Dirava ena namo dekenai do ita naria, mai haheauka danu.” (Roma 15:4) Namona be ita diba iseda abidadama Dirava ena gwauhamata dekenai be abidadama kava lasi. Gwauhamata ta do ia moru lasi; idia ibounai do idia vara momokani.
[Map on page 28]
(For fully formatted text, see publication)
Iosua ena gunalaia henunai idia abia tanodia
BASANA
GILEADA
ARABA
NEGEBE
Ioridane Sinavaina
Mase Davarana
Iaboka Kourana
Aranona Kourana
Hasoro
Madona
Lasarono
Simarona
Iokoneama
Doro
Megido
Kadesi
Tanaka
Hepere
Tirisa
Apeka
Tapua
Betele
Ai
Gilegala
Ieriko
Gesere
Ierusalema
Makeda
Iaramutu
Adulama
Libina
Lakisi
Egalona
Heberona
Debiri
Arada
[Picture on page 27]
Dirava ese ariara hahinena Rahaba ia gwauraia kara maoromaoro ena badina oi diba, a?
[Picture on page 28]
Iosua ese Israela taudia ia hagoadaia ‘Lohiabada do idia gari henia, bona iena hesiai gaukara do idia karaia’
[Picture on page 30]
Akana ena henaohenao karana be kerere maragina lasi; unai kerere dainai dika badana ia davaria
[Picture on page 30]
“Dirava idia abidadama henia dainai, Ieriko hanua ena magu ia moru.”—Heberu 11:30