“Tamana Bamona, Ia be mai Ena Bogahisihisi”
“Bogahisihisi kara sibona do umui karaia, emui Tamana bamona, ia be mai ena bogahisihisi.”—LUKA 6:36.
1, 2. Edena dala ai Iesu ena hereva Farisea, taravatu hadibaia taudia bona iena hahediba taudia dekenai ese ia hahedinaraia hebogahisi karana be mai anina bada?
DIRAVA ese Mose dekenai ia henia taravatu ibounai be 600 bamona. Ena be Israela taudia ese Mose ena Taravatu idia badinaia, to hebogahisi do idia hahedinaraia be mai anina bada. Iesu be Farisea taudia, hebogahisi lasi taudia unai, dekenai ia gwauraia herevana mani oi laloa. Unai kara idia hahedinaraia lasi dainai, nega rua Farisea taudia ia sisiba henia, bona Dirava ena hereva ia gwauraia: “Lau be bogahisihisi lau ura, to boubou gauna be lau ura lasi.” (Mataio 9:10-13; 12:1-7; Hosea 6:6) Iesu ena haroro gaukara dokonai, ia gwau: “Taravatu hadibaia taudia bona Farisea taudia, kara koikoi taudia, dika do umui davaria momokani! Badina be aniani edia ava maragimaragi ibounai dekenai umui haria be kahana 10 umui karaia, kahana ta be boubou gauna dekenai umui halaoa. To taravatu ena hereva badadia, kota henia, bona bogahisihisi, bona abidadama, umui negea.”—Mataio 23:23.
2 Iesu ia hahedinaraia hebogahisi karana be mai anina bada. Iena hahediba taudia ia hamaoroa: “Bogahisihisi kara sibona do umui karaia, emui Tamana bamona, ia be mai ena bogahisihisi.” (Luka 6:36) ‘Dirava ena kara bamona ita karaia’ totona, hebogahisi korikorina ena anina ita diba be namo. (Efeso 5:1) Danu, hebogahisi ena namo ita lalopararalaia neganai, unai ese ita do ia durua iseda mauri lalonai hebogahisi ita hahedinaraia totona.
Dabu Taudia Ita Hebogahisi Henia
3. Hebogahisi korikorina ita diba totona, dahaka dainai Iehova ena haheitalai ita tahua be namo?
3 Salamo torea tauna ia gwau: “Lohiabada be mai ena lalokau bona mai ena bogahisihisi. Ia be badu haraga lasi, bona ia ese ita ia lalokau henia nega ibounai. Lohiabada ena kara be namo, taunimanima ibounai dekenai. Ia karaia gaudia ibounai dekenai iena bogahisihisi ia henia.” (Salamo 145:8, 9) Iehova be “iseda Tamana, bona bogahisihisi bona durua ibounai ia henia Diravana.” (2 Korinto 1:3) Hebogahisi tauna ese ma haida ia laloa bada bona ia durudia. Unai be Dirava ena kara badana ta. Iehova ena haheitalai bona ena hahediba herevadia ita dekenai ese hebogahisi korikorina ia hadibaia.
4. Isaia 49:15 be hebogahisi karana dekenai dahaka ia hahedinaraia?
4 Isaia 49:15 ai, Iehova ia gwau: “Be, hahine ta ese iena natuna maragina ia laloaboio diba, a? Iena bogana dekena amo ia havaraia merona, be do ia bogahisihisi henia lasi, a?” Iehova ese ia hahedinaraia hebogahisi hemami be sinana ta ese ena natuna totona ia hahedinaraia hemami hegeregerena. Reana beibi ia hitolo eiava gau ta ia ura neganai, sinana be beibi ia hebogahisi henia dainai, beibi ena ura gauna ia henia. Iehova be ia hebogahisi henia taudia dekenai unai bamona hemami ia abia danu.
5. Edena dala ai Iehova ia hahedinaraia Israela taudia ia ‘bogahisihisi henia bada herea momokani’?
5 Dabu taudia ita hebogahisi henidia diba, to iseda kara amo unai hebogahisi ita hahedinaraia be gau badana. Lagani 3,500 gunanai, Israela taudia be Aigupito dekenai igui hesiai taudia bamona idia noho neganai, Iehova ena hemami be edena bamona. Dirava ese Mose ia hamaoroa: “Momokani, lauegu bese taudia edia hisihisi Aigupito dekenai lau itaia vadaeni. Edia biagudia ese hekwarahi idia henidia noho dainai idia taitai, be lau kamonai vadaeni, badina be edia hisihisi lau diba vadaeni. Lau diho mai inai, Aigupito taudia edia imana dekena amo do lau hamauridia totona. Unai tano dekena amo dohore lau hakaudia, ia lao bona tano namo herea dekenai. Tano badana dekenai dohore idia ginidae. Unai tano be aniani namodia gabuna.” (Esodo 3:7, 8) Iehova ese Israela taudia be Aigupito amo ia ruhaia bena lagani 500 idia hanaia murinai, Iehova ese idia ia hadibaia: “Lau ese Israela besena Aigupito dekena amo lau hakaua mai. Aigupito taudia edia siahu dekena amo, bona umui idia hahisia besedia ibounai dekena amo, umui lau hamauria vadaeni.” (1 Samuela 10:18) Israela taudia be Dirava ena kara maoromaoro taravatudia idia utua dainai, nega momo dika idia davaria. To, Iehova be idia ia hebogahisi henia bona idia ia hamauria loulou. (Gunalaia Taudia 2:11-16; 2 Sivarai 36:15) Unai ese ia hahedinaraia, lalokau Diravana ese hekwakwanai eiava dika idia davaria taudia ia durudia. Iehova ena “bogahisihisi . . . be bada herea momokani.”—Efeso 2:4.
6. Edena dala ai Iesu Keriso be iena Tamana ena hebogahisi karana ia tohotohoa?
6 Iesu Keriso be iena Tamana ena hebogahisi karana ia hahedinaraia goevagoeva. Matakepulu taudia rua be Iesu dekenai idia noinoi neganai, Iesu be dahaka ia karaia? Idia gwau: “Lohiabada e, Davida ena natuna e, oi bogahisihisi ai dekenai.” Idia be Iesu idia noia hoa dalanai edia matana ia hanamoa totona. Iesu ese hoa dalanai edia matana ia hanamoa sibona lasi, to Baibel ia gwau: “Iesu ese idia dekenai ia bogahisihisi, edia matana dekenai iena imana ia atoa, vadaeni nega tamona gau idia itaia diba.” (Mataio 20:30-34) Hebogahisi karana ese Iesu ia doria dainai, matakepulu taudia, lauma dikadia ese idia hadikaia taudia bona lepera taudia ia hanamoa. Danu idia gorere natudia ia hanamodia bona edia tama sina edia lalohekwarahi ia haorea.—Mataio 9:27; 15:22; 17:15; Mareko 5:18, 19; Luka 17:12, 13.
7. Iehova Dirava bona iena Natuna edia hebogahisi karana amo dahaka ita dibaia?
7 Iehova Dirava bona Iesu Keriso edia haheitalai ese ia hahedinaraia hebogahisi be mai ena kahana rua: Dabu taudia oi hebogahisi henidia, bona kara ta oi karaia idia oi durua totona. Hebogahisi oi hahedinaraia totona, unai gau rua be mai anina bada. Baibel lalonai, nega momo inai hereva hebogahisi, ena anina be ta laloa bada eiava durua karana. To, kota karana dekenai hebogahisi karana be edena bamona ita hahedinaraia diba? Bema ta be kerere tauna ia panisia lasi, ita gwau diba unai be hebogahisi karana, a?
Kara Dika Taudia Hebogahisi Henia
8, 9. Iehova ese edena dala ai Davida bona Bataseba ia hebogahisi henia?
8 Israela ena King Davida be Bataseba ida ia heudahanai dainai, peroveta tauna Natana ese Davida ia sisiba henia, bona unai murinai ia vara gauna mani ita laloa. Davida ia helalo-kerehai bona ia guriguri: “Dirava e, mani oi bogahisihisi lau dekenai. Oiemu lalokau badana dainai, bona oiemu bogahisihisi bada herea dainai, egu kara dika do oi kokia ore. Egu dika mani do oi huria ore, bona egu kerere dekena amo lau do oi hagoevaia. Badina be egu kara dika be lau diba momokani. Lauegu kerere be egu vairana dekenai ia noho nega ibounai. Lau ese oi sibona dekenai lau kara dika vadaeni. Lau be oiemu vairana dekenai kerere lau karaia.”—Salamo 51:1-4.
9 Davida be ena kara dika dainai ia lalohisihisi bada. Iehova ese Davida ena kara dika ia gwauatao bona Davida bona Bataseba ia hamasea lasi. To Mose ena Taravatu hegeregerena, Davida bona Bataseba idia hamasedia be maoro. (Deuteronomi 22:22) Ena be edia kara dika dainai hekwakwanai momo idia davaria, to Dirava ese ia hamasedia lasi. (2 Samuela 12:13) Iehova be hebogahisi Diravana dainai, kara dika ia gwauatao, to bema ta ia kerere neganai, Iehova ese unai kara dika tauna ia panisia.
10. Ena be Iehova be hebogahisi Diravana, to dahaka dainai kara dika ita karaia loulou bona Iehova ese ita do ia hebogahisi henia loulou lalohadaina be kerere?
10 “Tau tamona [Adamu] dekena amo kara dika ia vareai mai tanobada dekenai” bona “kara dika ena davana be mase” dainai, taunimanima ibounai be do idia mase. (Roma 5:12; 6:23) Ita moale badina Iehova be ena kota maoromaoro ia karaia neganai, hebogahisi ia hahedinaraia danu! To, namo lasi kara dika ita karaia loulou bona ita laloa Dirava ese ita do ia hebogahisi henia loulou. Unai be lalohadai kererena. Deuteronomi 32:4 ia gwau, Iehova ena “dala ibounai be maoro, bona iena kota be momokani.” Dirava be hebogahisi karana ia hahedinaraia, to unai ese ena kota maoromaoro karana ia hadikaia lasi.
11. Edena dala ai Iehova be kota maoromaoro dalana ia hahedinaraia Davida bona Bataseba dekenai?
11 Iehova ese Davida bona Bataseba edia dika ia gwauatao guna, bena gabeai mai hebogahisi ida idia ia kota henia bona edia dika ena davana korikorina, mase ia henidia lasi. Iehova ese Israela ena diadi taudia dekenai gwaumaoro ia henia lasi edia dika idia gwauatao totona. Badina bema idia ese kota idia karaia, Davida bona Bataseba do idia hamasedia. Unai be Taravatu hegeregerena. To, Iehova be Davida ida ia karaia gwauhamatana dainai, Ia ura ia itaia bema Davida be ia helalo-kerehai bona unai amo ena dika ia gwauatao diba. (2 Samuela 7:12-16) Oibe, Iehova Dirava, “tanobada ibounai ena kota biaguna,” be kudouna ia itaia diba bona ia ese Davida ia kota henia. (Genese 18:25; 1 Sivarai 29:17) Dirava be Davida ena kudouna ia diba namonamo, Davida ena helalo-kerehai toana momokani ia diba, bona ena dika ia gwauatao.
12. Kara dika taudia be edena dala ai Dirava ena hebogahisi idia abia diba?
12 Iehova ese kara dika dainai ita davaria mase amo ita ia ruhaia karana amo hebogahisi ia hahedinaraia, bona unai be iena kota maoromaoro karana ida ia hegeregere. Iehova be ena kota maoromaoro hegeregerena iseda dika ia gwauatao totona, iena natuna Iesu Keriso ena mauri ia bouboulaia. Unai be hebogahisi karana hereadaena. (Mataio 20:28; Roma 6:22, 23) Dirava be ita ia hebogahisi henia totona, namona be iena ‘Natuna ita abidadama henia’ bona unai amo mauri hanaihanai ita davaria diba.—Ioane 3:16, 36.
Hebogahisi Bona Kota Maoromaoro Diravana
13, 14. Dirava ena hebogahisi karana ese iena kota maoromaoro karana ia haidaua, a? Gwauraia hedinarai.
13 Iehova ena hebogahisi karana ese ena kota maoromaoro taravatudia ia hadikaia, a? Hebogahisi karana ese Iehova ena kota maoromaoro karana ia haidaua, a? Lasi, ia haidaua bona ia hadikaia lasi.
14 Iehova be Hosea amo Israela taudia ia hamaoroa: “Lau ese, egu adavana oi do lau halaoa. Lau be do lau kara maoromaoro bona momokani. Lau ese nega ibounai oi do lau lalokau henia, bona oi do lau bogahisihisi henia.” (Hosea 2:19) Unai siri ese ia hahedinaraia Iehova ese hanaihanai hebogahisi karana ia hahedinaraia neganai, unai be ena kara ma haida ida, kota maoromaoro karana danu, ia hegeregere. Iehova be ‘bogahisihisi bona hariharibada Diravana. . . . Kara dika, bona kara kerere idauidau ia gwauatao noho. To kerere momokani taudia do ia panisia.’ (Esodo 34:6, 7) Iehova be hebogahisi bona kota maoromaoro Diravana. Baibel ese Dirava be inai bamona ia gwauraia: “Ia be Nadi Badana, iena gaukara be namo momokani. Iena dala ibounai be maoro, bona iena kota be momokani.” (Deuteronomi 32:4) Dirava ena kota maoromaoro bona iena hebogahisi karana be goevadae. Idia ruaosi be hegeregere, ta ese ta ia hereaia lasi. Idia ruaosi be idia gaukara hebou namo herea.
15, 16. (a) Dahaka ese ia hahedinaraia kota maoromaoro be kara aukana lasi? (b) Iehova be inai tanobada dikana ia hadikaia neganai, ita be dahaka ita diba momokani?
15 Iehova ena kota maoromaoro karana be kara aukana lasi. Kota karadia be mai edia taravatu idauidau, bona nega momo kerere ia karaia tauna be panisi ia abia. To, Dirava ena kota maoromaoro karana ese kara namo taudia ia hamauria diba. Hegeregere, Sodoma bona Gomora edia kara dika bada dainai Dirava ese ia hadikaia neganai, Lota bona iena natuna kekeni rua be Iehova ese ia hamauridia.—Genese 19:12-26.
16 Ita diba momokani Iehova ese inai tanobada dikana ia hadikaia neganai, “hutuma bada” tomadiho momokani taudia be do idia roho mauri. Unai taudia be “edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro bona goeva momokani.” Unai dainai, idia be hisihisi badana amo do idia roho mauri.—Apokalupo 7:9-14; NW.
Dahaka Dainai Hebogahisi Karana Ita Hahedinaraia be Namo?
17. Hebogahisi karana ita hahedinaraia ena badina badana be dahaka?
17 Iehova bona Iesu Keriso edia haheitalai amo hebogahisi korikorina ita dibaia. Hebogahisi ita hahedinaraia ena badina badana be Aonega Herevadia 19:17 ese ia gwauraia: “Bema ogogami taudia dekenai oi bogahisihisi henia neganai, oi ese Lohiabada dekenai oi heniatorehai noho. Lohiabada ese unai davana oi dekenai do ia henia lou.” Iehova bona iena Natuna edia kara ita tohotohoa bona ta ta dekenai hebogahisi ita hahedinaraia neganai, Iehova ia moale. (1 Korinto 11:1) Bona edia haheitalai ese ma haida ia hagoadaia hebogahisi karana idia hahedinaraia totona, badina ma haida dekenai hebogahisi ita hahedinaraia neganai, idia be ita dekenai hebogahisi karana do idia hahedinaraia danu.—Luka 6:38.
18. Dahaka dainai hebogahisi karana ita hahedinaraia be gau badana?
18 Hebogahisi be kara namodia idauidau ia hahedinaraia. Hegeregere manau, lalokau, ma haida durua karana, bona kara namodia ma haida. Haida ita hebogahisi henia dainai, kara namodia ita karaia idia ita durudia totona. Dirava ena hebogahisi karana ese ena kota maoromaoro karana ia hadikaia lasi. Iehova be ia badu haraga lasi dainai, kara dika taudia dekenai nega ia henia idia helalo-kerehai totona. (2 Petero 3:9, 10) Hebogahisi ita hahedinaraia totona, haheauka karana ita hahedinaraia danu be namo. Hebogahisi karana ita hahedinaraia neganai, kara namodia idauidau, hegeregere Dirava ena lauma helaga ena huahua ita hahedinaraia danu. (Galatia 5:22, 23) Unai dainai hebogahisi karana ita hahedinaraia be mai anina bada!
“Hebogahisi Taudia be Idia Moale”
19, 20. Edena dala ai hebogahisi karana ese kota maoromaoro karana ia hereaia?
19 Iamesi ese ita ia hamaoroa dahaka dainai ma haida ita hebogahisi henidia be mai anina bada. Ia gwau: “Bogahisihisi ia henia tauna ese Kota Biaguna ena bogahisihisi do ia davaria.” (Iamesi 2:13b) Iamesi be Iehova ia tomadiho henia tauna ese ma haida dekenai ia hahedinaraia hebogahisi karana ia herevalaia. Unai tauna be Dirava ena vairanai ia gini neganai, ia ese ma haida dekenai ia hahedinaraia hebogahisi karana be Iehova ese do ia laloatao bona Iesu ena boubou gauna amo Dirava ese ena kara dika do ia gwauatao. (Roma 14:12) Dirava ese Davida bona Bataseba ia hebogahisi henia ena badina ta be, Davida be ma haida dekenai hebogahisi ia hahedinaraia. (1 Samuela 24:4-7) To, “bogahisihisi ia henia lasi tauna ese Dirava dekena amo bogahisihisi do ia davaria lasi.” (Iamesi 2:13a) Unai dainai “taunimanima dekenai idia bogahisihisi lasi” taudia be Dirava ia gwau “do idia mase”!—Roma 1:31, 32.
20 Iesu ena Ororo Harorona ai ia gwau: “Hebogahisi taudia be idia moale, badina Dirava ese do ia hebogahisi henidia.” (Mataio 5:7, NW ) Unai siri ese ia hahedinaraia Dirava ena hebogahisi idia ura abia taudia be ma haida dekenai hebogahisi idia hahedinaraia be namo! Stadi gabena ai iseda mauri lalonai hebogahisi karana ita hahedinaraia dalana do ita herevalaia.
Dahaka Oi Dibaia?
• Hebogahisi karana be dahaka?
• Edena dala ai hebogahisi karana ita hahedinaraia diba?
• Edena dala ai Iehova be hebogahisi bona kota maoromaoro Diravana?
• Dahaka dainai hebogahisi karana ita hahedinaraia be namo?
[Picture on page 3]
Iehova ena hebogahisi karana dabu taudia dekenai be hegeregere sinana ese ena beibi dekenai ia hahedinaraia hebogahisi karana bamona
[Picture on page 5]
Edena dala ai Iesu ena hoa karadia amo hebogahisi karana ita dibaia?
[Picture on page 6]
Iehova be Davida dekenai hebogahisi karana ia hahedinaraia dainai, ena kota maoromaoro karana ia hadikaia, a?
[Picture on page 7]
Dirava ese kara dika taudia dekenai ia hahedinaraia hebogahisi karana be Iena kota maoromaoro karana ida ia hegeregere