Hahine idia hoa bada badina idia itaia guria gabuna lalonai ta ia noho lasi! Maria Magadala be “Simona Petero bona hahediba tauna ma ta, Iesu ese ia lalokau henia tauna,” aposetolo Ioane, dekenai ia heau lao. (Ioane 20:2) To, idia noho hahinedia ese aneru idia itaia. Bona guria gabuna lalonai aneru ma ta danu idia itaia, ia be “dabua kurokuro” ia karaia.​—Mareko 16:5.   

Unai aneru ta ese idia ia hamaoroa: “Umui gari lasi badina lau diba umui be au dekenai idia kokoa kau tauna, Iesu, umui tahua noho. Ia be iniseniai lasi, badina ena hereva hegeregerena, ia be ia toreisi lou vadaeni. Umui mai, ena hekure gabuna umui itaia. Umui lao haraga bona iena hahediba taudia umui hamaoroa ia be mase amo ia toreisi lou vadaeni. Bona ia be Galilea dekenai ia lao noho.” (Mataio 28:5-7) Unai dainai hahine idia ‘hoa bada bona idia heudeheude,’ bena idia heau lao hahediba taudia hadibaia totona.​—Mareko 16:8.

Maria ese Petero bona Ioane ia davaria vadaeni. Mai laga tuna danu ia hamaorodia, ia gwau: “Idia ese guria gabuna amo Lohiabada idia abia siri vadaeni, bona ai diba lasi edeseniai idia atoa.” (Ioane 20:2) Petero bona Ioane idia heau lao. Ioane ia heau haraga dainai guria gabunai ia ginidae guna. Guria gabuna lalonai ia roha vareai bona dabua ia itaia, to ia vareai lasi.

Petero ia ginidae bena maoromaoro ia vareai. Ia ese Iesu idia kumia dabua bona ena kwarana idia kumia dabua ia itaia. Ioane danu ia vareai, bona Maria ena hereva ia hamomokania. Ena be Iesu ese guna unai ia herevalaia, to idia ta ia laloparara lasi ia toreisi lou vadaeni. (Mataio 16:21) Mai daradara ida edia ruma dekenai idia lao, to Maria be guria gabuna dekenai ia giroa mai, bona unuseni ia noho.

Unai ia vara lalonai, hahine ma haida be idia lao hahediba taudia idia hamaoroa Iesu ia toreisi lou vadaeni. Idia heau lao lalonai, Iesu be idia ida ia hedavari bona ia gwau: “Dina namona!” Ena aena badinai idia tui diho bona “hemataurai karana idia hahedinaraia.” Bena Iesu ese idia ia hamaoroa: “Umui gari lasi! Umui lao egu tadikaka umui hadibaia, unai amo Galilea dekenai do idia lao, bona unuseniai lau do idia itaia.”​—Mataio 28:9, 10.

Guna, tano ia marere bona aneru idia hedinarai neganai, guria gabuna idia gimaia taudia idia “gari dainai idia heudeheude bona edia tauanina ia mase bamona.” Gabeai, hanua dekenai idia lao bona “idia vara gaudia ibounai be dubu biagudia dekenai idia gwauraia.” Bena hahelaga taudia be Iuda tau badadia ida idia herevahereva. Edia lalona idia hadaia, gima taudia dekenai moni do idia henia, bona ia vara gauna do idia hunia bona do idia gwau: “Hanuaboi ai, ai mahuta noho lalonai, ena hahediba taudia idia mai bona ena tauanina idia henaoa.”​—Mataio 28:4, 11, 13.

Bema Roma tuari taudia be edia gima negana lalonai idia mahuta, edia davana be mase, unai dainai hahelaga taudia idia gwauhamata, idia gwau: “Bema gavana be unai ia kamonai, umui laloa momo lasi, ai ese ia do ai hereva henia.” (Mataio 28:14) Unai dainai, moni idia abia bona hahelaga taudia edia hereva hegeregerena idia karaia. Unai sivarai koikoina, Iesu ena tauanina idia henaoa, be Iuda taudia ibounai huanai idia herevalaia.

Maria Magadala be guria gabuna ai ia do taitai noho. Gara gabuna ena iduara ai ena kwarana ia atoa vareai neganai, dabua kurokuro idia karaia aneru rua ia itaia! Ta be kwarana kahanai bona ma ta be aena kahanai idia helai noho. Idia henanadai: “Hahine e, dahaka dainai oi taitai?” Maria ia gwau: “Lauegu Lohiabada idia abia lao vadaeni, bona lau diba lasi edeseniai idia atoa.” Maria ia giroa neganai, tau ta ia itaia. Unai tauna ese aneru edia henanadai ia gwauraia lou: “Daika oi tahua noho?” Maria ia laloa ia be uma gabu naria tauna, bona ia gwau: “Tau badana e, bema oi ese ia oi abia lao, mani lau oi hamaoroa edeseniai oi atoa, bena ia do lau abia lao.”​—Ioane 20:13-15.

To Maria be ia toreisi lou tauna Iesu, ia hereva henia, to ena toana ia reaia. Bena ia gwau, “Maria e!” neganai, ena hereva dalana amo Maria ia laloparara, unai be Iesu. Maria be mai moale bada ida ia gwau: “Raboni!” (anina be, “Hadibaia Tauna!”) Ia ura lasi Iesu be maoromaoro guba dekenai ia daekau dainai Iesu ia dogoatao. To Iesu ese ia hamaoroa: “Lau oi dogoatao lasi. Badina lau be Tamana dekenai lau do lao lasi. To egu tadikaka dekenai oi lao bona idia dekenai oi gwau, ‘Lau be egu Tamana bona emui Tamana bona egu Dirava bona emui Dirava dekenai do lau lao.’”​—Ioane 20:16, 17.

Maria be aposetolo bona hahediba taudia idia hebou gabuna dekenai ia heau lao. Ia hamaorodia: “Lohiabada lau itaia vadaeni!” ena be ia bona hahine ma haida edia hereva idia kamonai. (Ioane 20:18) To, “edia hereva idia abia dae lasi. Idia laloa idia kavakava.”​—Luka 24:11.

Sunday, Nisan 16, hahediba taudia be idia lalohisihisi noho. Idia do laloparara lasi dahaka dainai guria gabu ai ta ia noho lasi. (Mataio 28:9, 10; Luka 24: 11) Unai dina lalonai, Kleopa bona hahediba taudia ma haida be Ierusalema amo idia lao Emausa dekenai, ena daudau be kilomita 11 bamona.

Idia raka lao lalonai, idia vara gaudia idia herevalaia. Bena tau ta be idia ida ia raka. Ia henanadai: “Umui raka noho lalonai umui ruaosi be dahaka gaudia umui herevalaia?” Kleopa ia haere: “Oi be Ierusalema dekenai oi noho, to edena bamona unuseniai idia vara gaudia oi diba lasi?” Unai tauna ia henanadai: “Dahaka ia vara?”​—Luka 24:17-19.

Idia gwau, “Nasareta tauna Iesu dekenai idia vara gaudia oi diba lasi, a? . . . Emai lalohadai be inai tauna ese Israela do ia hamauria.”​—Luka 24:19-21.

Kleopa bona ena turana ese unai dina ai idia vara gaudia idia gwauraia. Idia gwau hahine haida be Iesu idia guria gabuna dekenai idia lao, to ia noho lasi. Bena aneru rua idia itaia, bona aneru ese ia hamaorodia Iesu ia toreisi lou. Danu, idia gwau haida be guria gabuna idia lao bona “hahine edia hereva be momokani.”​—Luka 24:24.

Kleopa bona ena turana be idia vara gaudia idia do lalopararalaia lasi. Unai dainai idia ida ia raka tauna ese edia lalohadai kererena ia hamaoromaoroa, mai siahu ida ia gwau: “Umui be kavakava bona emui lalona be ia kehoa lasi, peroveta taudia ese idia gwauraia gaudia ibounai umui abia dae totona! Keriso be ena hairai ia abia totona, inai dala ai hisihisi ia abia be maoro, ani?” (Luka 24:25, 26) Idia dekenai Toretore Helagana ai Keriso ena sivarai ibounai edia anina ia hadibaia.

Emausa kahirakahira idia ginidae. Idia ura unai tauna amo hereva ma haida idia kamonai dainai, ia dekenai idia gwau: “Ai danu oi noho, badina gabu be kahirakahira ia dibura.” Bena idia ida ia noho. Bona aniani totona ia guriguri, paraoa ia makohia, bona ia henidia neganai, idia laloparara ia be Iesu, to edia huanai ia boio. (Luka 24:29-31) Hari idia diba momokani Iesu ia mauri lou!

Idia rua be mai moale ida idia gwau: “Dala ai ita ia hereva henia bona Toretore Helagadia edia anina ia gwauraia hedinarai neganai, iseda kudouna ia hamarerea momokani, ani?” (Luka 24:32) Karaharaga Ierusalema dekenai idia giroa lou, unuseniai idia be aposetolo bona ma haida idia davaria. Kleopa bona ena turana be unai sivarai idia do gwauraia lasi neganai, idia kamonai haida idia gwau: “Momokani, Lohiabada be ia toreisi lou vadaeni bona Simona dekenai ia hedinarai!” (Luka 24:34) Bena Iesu be idia rua dekenai ia hedinarai sivaraina idia gwauraia. Idia danu be Iesu ena toreisi lou idia hamomokania.

Iesu be daiutu ai ia hedinarai neganai, Idia ibounai idia hoa bada! Badina Iuda taudia idia gari henia dainai daiutu idia lokaia. To, Iesu be edia huanai ia gini. Bena ia gwau: “Maino umui abia.” To idia gari. Idia laloa, “lauma ta idia itaia” guna bamona.​—Luka 24:36, 37; Mataio 14:25-27.

Iesu ia ura hamomokania ia be tauanina korikorina ai ia hedinarai, idia dekenai ena imana bona aena ia hahedinaraia, ia gwau: “Dahaka dainai umui lalohekwarahi, bona umui laloa daradara? Lauegu imana bona aena umui itaia, inai be lau. Lau umui dogoatao bona do umui itaia, lau be mai egu hidio bona turia, to lauma be unai bamona lasi.” (Luka 24:36-39) Ena be idia moale bada, to idia do abia dae lasi.

Iena hereva idia abia dae momokani totona, ia henanadai: “Umui dekenai aniani gauna ta ia noho, a?” Idia nadua gwarume ta idia henia bona ia ania. Bena ia gwau: “Umui ida lau do noho neganai, umui dekenai lau gwauraia herevana be inai, Mose ena Taravatu, Peroveta Taudia bona Salamo ai lau totona idia torea herevadia ibounai be do idia guguru.”​—Luka 24:41-44.

Iesu ese Kleopa bona ena turana ia durua Toretore Helagadia idia lalopararalaia bamona, ia ese idia noho taudia ibounai dekenai ia gwau: “Toretore Helagadia ia gwau: Keriso be hisihisi do ia abia bona dina ihatoina ai mase amo do ia toreisi lou. Bona iena ladana ai Dirava ese idia helalo-kerehai taudia ibounai edia kara dika do ia gwauatao karana be bese ibounai huanai do idia harorolaia. Unai be Ierusalema amo do idia hamatamaia. Umui ese unai gaudia ibounai do umui itaia.”​—Luka 24:46-48.

To unai nega ai Toma be ia noho lasi. Dina haida murinai haida be mai moale ida ia idia hamaoroa: “Ai be Lohiabada ai itaia!” To Toma ia gwau: “Bema ena imana rua dekenai ikoko ena maka lau itaia, bona unai maka dekenai egu ima kwakikwaki lau atoa, bona ena ohena dekenai egu imana lau atoa, do lau abia dae.”​—Ioane 20:25.

Dina 8 murinai, hahediba taudia be idia lokaia ruma lalonai ma idia hebou lou, bona hari Toma be danu ia noho. Iesu be edia huanai ia hedinarai bona idia ia hanamoa, ia gwau: “Maino umui abia.” Bena Toma dekenai ia gwau: “Emu ima kwakikwaki be egu imana dekenai oi atoa, bona emu imana be egu ohena dekenai oi atoa, bona oi daradara lasi to oi abidadama.” Toma ia gwau: “Egu Lohiabada bona egu dirava!” (Ioane 20:26-28) Oibe, hari ia daradara lasi Iesu be ia mauri noho, bona ia be helaga tauna ta, Iehova Dirava ena gwaukau tauna.

Iesu ia gwau: “Lau oi itaia dainai oi abidadama, a? Idia itaia lasi to idia abidadama taudia be idia moale.”​—Ioane 20:29.