Uru siti be Babela amo ia daudau lasi, unai gabu ai taunimanima be Iehova idia tomadiho henia lasi, to dirava idauidau idia tomadiho henia. To Uru ai, Iehova ia tomadiho henia tauna ta ia noho. Iena ladana be Aberahamo.

Iehova ese Aberahamo ia hamaoroa: ‘Emu tano bona varavara oi rakatania, bona oi dekenai do lau hahedinaraia tanona dekenai oi lao.’ Bena Dirava ia gwauhamata: ‘Oi be bese badana ai do oi lao, bona oi dainai tanobada besedia ibounai be hahenamo do idia abia.’

Aberahamo ia diba lasi Iehova ese edeseniai ia do ia siaia, to Iehova ia abidadama henia. Unai dainai Aberahamo, ena adavana Sara, ena tamana Tera, bona nefiu Lota be edia kohu idia haboua bona edia laolao idia hamatamaia.

Aberahamo be ena famili ida Iehova ese ia gwauraia tanona Kanana dekenai idia ginidae neganai, ena mauri lagani be 75. Unuseniai Dirava ese Aberahamo ida gwaubou ia karaia, ia gwau: ‘Oi itaia tano ibounai be emu natudia dekenai do lau henia.’ To Aberahamo bona Sara be idia buruka bona natudia be lasi. Unai dainai edena bamona Iehova ena gwauhamata do ia guguru?

Aberahamo bona Sara edia headava laganidia be ia momo vadaeni. Uru ai edia ruma namona idia rakatania bona palai ruma ai idia noho. To Sara ia maumau lasi, badina Iehova ia abidadama henia.

Sara be natuna ta ia ura dainai Aberahamo ia hamaoroa: ‘Bema egu hesiai hahine Hagara ese natuna ta ia havaraia, ia be egu natuna ai do ia lao.’ Gabeai Hagara be natuna mero ta ia havaraia. Iena ladana be Isamaela.

Lagani momo murinai, Aberahamo ena mauri lagani be 99 bona Sara ena mauri lagani be 89 neganai, vadivadi taudia toi idia mai. Aberahamo ese idia ia hamaoroa au henunai do idia helai bona aniani. Unai vadivadi taudia oi diba, a? Idia be aneru! Aberahamo idia hamaoroa: ‘Vaira lagani ai inai nega hegeregerena, oi bona emu adavana be natuna ta do umui abia.’ Sara be palai ruma lalonai ia kamonai noho. Sara be sibona dekenai ia kiri bona ia laloa: ‘Momokani, natuna ta do lau havaraia, a? Lau be lau buruka vadaeni.’

Lagani ta murinai, Sara be natuna mero ta ia havaraia, Iehova ena aneru ia gwauhamata hegeregerena. Aberahamo ese ena ladana ia hatoa Isako, anina be “Kiri.”

Isako ena mauri lagani be 5 neganai, Sara ia itaia Isamaela ese Isako ia kirikirilaia. Sara ia ura ena natuna ia gimaia dainai, Aberahamo ia hamaoroa Hagara bona Isamaela ia siaia lao totona. Matamanai, Aberahamo ia ura lasi. To Iehova ese Aberahamo ia hamaoroa: ‘Sara oi kamonai henia. Lau ese Isamaela do lau naria. Badina lau gwauhamata gauna be Isako amo do ia mai.’