Lota be Kanana tanona ai ena vavana Aberahamo ida idia noho. Unai nega ai, Aberahamo bona Lota edia animal be momo dainai, noho gabuna be ia hegeregere lasi idia ibounai totona. Aberahamo be Lota ia hamaoroa: ‘Gabu tamona ai ita noho be hegeregere lasi. Mani oi ura henia tano ena kahana oi abia hidi, bona lau be kahana ma ta do lau abia.’ Unai amo Aberahamo be sibona ena namo laloa lasi karana ia hahedinaraia.

Lota ia itaia Sodoma siti badinai ia noho tano ta be namo herea. Ia be ranu gabuna bona rei ia tubu namonamo. Unai dainai ena famili ida unuseni idia lao.

Sodoma bona Gomora taudia edia kara dika be bada herea. Unai dainai Iehova ia ura unai siti rua do ia hadikaia. To Dirava ia ura Lota bona ena famili ia hamauria dainai, aneru rua ia siaidia idia ia hadibaia totona, ia gwau: ‘Haraga! Inai gabu umui rakatania! Badina Iehova ese inai siti do ia hadikaia.’

Lota ia haraga lasi. Unai dainai aneru ese Lota, ena adavana, bona ena natudia kekeni rua edia imana idia dogoatao bona siti ena murimuri ai idia abidia lao, aneru ta ia gwau: ‘Heau! Umui heau mauri, bona umui giroa lasi. Bema murina kahana umui itaia, do umui mase!’

Soara siti dekenai idia ginidae neganai, Iehova ese Sodoma bona Gomora latanai salipa bona lahi be medu bamona ia hadihoa. Unai siti rua ia hadikaia ore. Lota ena adavana be Iehova ena hereva ia badinaia lasi bona ia giroa neganai, damena nadina ai ia lao! To Lota bona ena natudia kekeni rua be idia mauri badina Iehova idia kamonai henia. Idia lalohisihisi bada badina Lota ena adavana be hereva ia badinaia lasi. To Lota bona ena natudia rua be Iehova ena hereva idia kamonai dainai idia moale.

Aberahamo ese Isako dekenai Iehova lalokau henia bona ena gwauhamata abidadama henia karana ia hadibaia. To Isako ena mauri lagani be 25 bamona neganai, Iehova ese Aberahamo dekenai ia noia gauna be ia auka. Unai be dahaka?

Dirava ese Aberahamo ia hamaoroa: ‘Mani emu natuna mero tamona oi abia bona Moraia ena ororo ta dekenai ia oi bouboulaia.’ Aberahamo ia diba lasi dahaka dainai Iehova ia ura unai do ia karaia. To Iehova ena hereva ia badinaia.

Daba momokani ai, Aberahamo be Isako bona hesiai taudia rua ida Moraia idia lao henia. Dina toi murinai, daudau amo ororo idia itaia diba. Aberahamo ese ena hesiai taudia rua ia hadibaia do idia naria, bona ia be Isako ida boubou karaia totona idia lao. Aberahamo ese Isako dekenai lahi au ia henia, bona Aberahamo be kaia ia abia. Isako ese ena tamana ia nanadaia: ‘Gabua boubou totona animal be edeseni?’ Aberahamo ia haere: ‘Natugu e, Iehova ese do ia henia.’

Ororo dekenai idia ginidae neganai, boubou patana idia karaia. Bena Aberahamo ese Isako ena imana bona aena ia kwatua bona boubou patana latanai ia atoa.

Aberahamo be kaia ia abia neganai, Iehova ena aneru be guba amo ia boiboi, ia gwau: ‘Aberahamo e! Mero oi alaia lasi! Hari lau diba Dirava oi abidadama henia, badina emu natuna mero oi ura bouboulaia.’ Bena Aberahamo be mamoe tau ta ia itaia, ena doana be au rigina ese ia dogoatao. Karaharaga Isako ia ruhaia bona unai mamoe tau ia bouboulaia.

Unai dina amo, Iehova ese Aberahamo ia gwauraia iena turana. Oi diba dahaka dainai? Aberahamo be Iehova ena ura ibounai ia badinaia, ena be nega haida unai ia karaia ena badina ia lalopararalaia lasi.

Iehova ese ena gwauhamata ia herevalaia lou Aberahamo dekenai: ‘Lau ese oi do lau hanamoa, bona emu natudia edia namba do lau habadaia momokani.’ Unai ena anina be Iehova ese Aberahamo ena famili amo kara namo taudia ibounai do ia hanamoa.