Isako ena mauri lagani be 40 neganai, Rebeka ia adavaia bona ia lalokau henia bada. Gabeai, natudia rua idia havaraia—idia be hekapa.

Esau be kakana, bona Iakobo be tadina. Esau be labana tauna namona. Iakobo be ruma dekenai ia noho.

Unai negadia ai, bema tamana ia mase, vara guna natuna mero ese tano bona moni do ia abia. Unai idia gwauraia ahuna. Isako ena famili dekenai unai ahuna ena kahana ta be Iehova ese Aberahamo dekenai ia karaia gwauhamatana. Esau be unai gwauhamata ia laloa bada lasi, to Iakobo ia diba unai be mai anina bada.

Dina ta, Esau be labana amo ia giroa mai dainai ia hesiku bada. Iakobo ese ia nadua aniani namona ia bonaia, bona ia gwau: ‘Lau hitolo bada! Mani lau dekenai supu kakakaka sisina oi henia!’ Iakobo ia gwau: ‘Do lau henia, to lau dekenai oi gwauhamata guna, emu vara guna ahuna do lau abia.’ Esau ia gwau: ‘Egu ahuna lau laloa lasi! Oi abia diba. Lau ura aniani.’ Oi laloa Esau be aonega karana ia karaia, a? Lasi. Esau be supu sibona totona mai anina bada gauna ta ia henia.

Isako ia buruka momokani bona ena vara guna natuna mero do ia hanamoa negana ia ginidae. To, Rebeka ese natuna iharuana Iakobo ia durua unai hahenamo ia abia totona. Esau be unai ia diba neganai ia badu dikadika bona ia ura Iakobo ia hamasea. Isako bona Rebeka idia ura Iakobo idia gimaia dainai, ia idia hamaoroa: ‘Oi lao bona emu sinana ena tadikaka Labana ida oi noho, ela bona Esau ena badu ia ore.’ Iakobo ese ena tama sina edia hereva ia kamonai bona ena mauri totona ia heau.

Iehova ia gwauhamata Iakobo do ia gimaia, Aberahamo bona Isako ia gimaia hegeregerena. Iakobo be Harana dekenai ia noho, unuseniai ia headava, ena famili ia bada bona taga tauna ai ia lao.

Bena Iehova ese Iakobo ia hamaoroa: ‘Emu tano dekenai oi giroa lou.’ Unai dainai Iakobo bona ena famili idia giroa lou matamaia. Dala ai taunimanima haida idia mai bona Iakobo idia hamaoroa: ‘Emu kakana Esau ia mai noho, bona ia ida be tatau 400!’ Iakobo be ia gari, badina Esau be ia bona ena famili do ia hahisia. Iakobo be Iehova dekenai ia guriguri: ‘Mani egu kakana ena imana amo lau oi hamauria.’ Murina dinana ai, Iakobo ese Esau dekenai harihari gaudia hegeregere, mamoe, nanigosi, boromakau, kamelo, bona doniki ia siaidia.

Hanuaboi ai, Iakobo be sibona ia noho neganai aneru ta ia itaia! Iakobo ese aneru ia dogoatao auka, to aneru ia ura Iakobo amo do ia raka siri. Unai bamona idia karaia ela bona daba. Ena be Iakobo ese hisihisi ia mamia, to ia hesiku lasi. Aneru ia gwau: ‘Lau oi rakatania.’ To, Iakobo ia gwau: ‘Lasi, lau oi hanamoa guna.’

Dokonai aneru ese Iakobo ia hanamoa. Hari Iakobo ia diba Iehova ese Esau do ia koua ia ia hahisia lasi totona.

Unai daba ai, Iakobo be daudau amo Esau bona ena tatau 400 ia itaia. Iakobo be ena famili ia rakatania bona ia lao guna, bona ena kakana vairanai nega 7 ia tui diho. Esau be Iakobo dekenai ia heau mai bona Iakobo ia rosia. Unai tadikaka rua idia tai bona maino idia karaia. Iakobo ese hekwakwanai ia hamaoromaoroa dalana dekenai oi laloa Iehova ena hemami be edena bamona?

Gabeai Esau be ena ruma dekenai ia giroa, bona Iakobo be ena laolao ia hamatamaia lou. Iakobo ena natudia memero be 12. Edia ladadia be Rubena, Simeona, Levi, Iuda, Dano, Napatali, Gado, Asere, Isakara, Sebuluno, Iosepa, bona Beniamina. Iosepa be Iehova ese Iena taunimanima ia hamauria totona ia gaukaralaia. Oi diba edena dala ai unai ia karaia? Mani ita itaia.