Iosepa be Iakobo ena natuna mero ta. Ena kakadia idia itaia Iosepa be edia tamana ese ia ura henia bada. Oi laloa ena kakadia edia hemami be edena bamona? Iosepa dekenai idia mama bona ia idia inai henia. Nega haida Iosepa ese ena nihi be ena kakadia dekenai ia gwauraia. Idia laloa unai nihi ena anina be dina ta ia dekenai do idia tui diho. Unai dainai ia dekenai idia moale lasi!

Dina ta, Iosepa ena kakadia be Sekema siti kahirakahira dekenai mamoe idia naria. Iakobo ese Iosepa ia siaia ena kakadia ia sekea totona. Daudau amo Iosepa idia itaia bona ta ta dekenai idia gwau: ‘Unai nihi tauna ia mai inai. Ia ita hamasea!’ Ia idia dogoatao bona guri dobu ta lalonai idia negea. To iena kakana Iuda ia gwau: ‘Ia ita hamasea lasi! Igui hesiai tauna bamona ia ita hoihoilaia.’ Unai dainai Aigupito dekenai idia lao noho Midiana hoihoi taudia dekenai 20 siliva amo Iosepa idia hoihoilaia.

Bena Iosepa ena kouti be ena kakadia ese nanigosi ena rara lalonai idia atoa, bena edia tamana dekenai idia siaia lao bona idia gwau: ‘Inai be emu natuna mero ena kouti, a?’ Unai dainai Iakobo ia laloa dagedage animal ta ese Iosepa ia alaia. Bona ia lalohisihisi bada.

Aigupito ai, Iosepa be igui hesiai tauna bamona dagi bada tauna Potifara dekenai idia hoihoilaia. To Iehova be Iosepa ida ia noho. Iosepa be gaukara karaia namonamo tauna dainai Potifara ese ia trast henia. Daudau lasi, Potifara ese Iosepa ia abia hidi ena kohu naria tauna ai ia lao totona.

Potifara ena adavana ia itaia Iosepa be mai ena hairai bona goada tauna. Dina ta ta ai Iosepa ia noia ia ida ia mahuta totona. Iosepa be dahaka ia karaia? Ia gwau: ‘Lasi! Unai be kerere. Emu biaguna ese lau ia trast henia, bona oi be ena adavana. Bema oi ida lau mahuta, Dirava vairanai do lau kara dika!’

Dina ta, Potifara ena adavana ese Iosepa ia doria ia ida ia mahuta totona. Ia ese Iosepa ena dabua ia dogoatao, to Iosepa be ia amo ia heau. Potifara ia giroa mai neganai, ena adavana ia gwau Iosepa ese ia doria ia ida ia mahuta totona. Potifara ena adavana be ia koikoi. Potifara be ia badu dikadika, bona Iosepa be dibura ruma dekenai ia lokaia. To, Iehova ese Iosepa ia laloaboio lasi.

Iosepa be dibura ruma ai ia noho neganai, Aigupito ena king Farao ia nihi, to ta be hegeregere lasi ena nihi edia anina ia gwauraia totona. Farao ena hesiai tauna ta ese ia hamaoroa, Iosepa be nihi ena anina ia gwauraia diba. Maoromaoro Farao ese Iosepa ia boiria mai.

Farao ese ia nanadaia: ‘Egu nihi ena anina oi gwauraia diba, a?’ Iosepa ia gwau: ‘Aigupito be lagani 7 lalonai aniani momo do ia haboua, to lagani ma 7 lalonai doe do ia vara. Aonega tauna ta oi abia hidi aniani haboua gaukarana ia karaia totona, unai amo taunimanima do idia hitolo lasi.’ Farao ia haere: ‘Oi lau abia hidi! Aigupito ai, oi be siahu bada tauna iharuana ai do lau halaoa!’ Edena dala ai Iosepa be Farao ena nihi ena anina ia diba? Iehova ese Iosepa ia durua.

Lagani 7 lalonai Iosepa be aniani ia haboua. Bena tano ibounai ai doe ia vara, Iosepa ena hereva hegeregerena. Taunimanima be gabu idauidau amo Iosepa dekenai idia mai aniani idia hoia totona. Iena tamana Iakobo ia kamonai Aigupito dekenai aniani be momo, unai dainai ena natudia 10 ia siaia aniani haida idia hoia totona.

Iakobo ena natudia memero be Iosepa dekenai idia lao, bona Iosepa ia diba unai be ena kakadia. To iena kakadia idia diba lasi unai be Iosepa. Bona ia dekenai idia tui diho, mero negana ai ia abia nihi hegeregerena. Iosepa ia ura diba bema ena tadikakadia huanai inai heheni karana ia do noho. Unai dainai idia ia hamaoroa: ‘Umui be spai taudia. Umui mai ai gimaia lasi gabudia umui itaia totona.’ Idia gwau: ‘Lasi! Ai be tadikaka 12 bona Kanana tanona amo ai mai. Emai tadikaka ta be ia mase, bona emai tadina be tamana ida ia noho.’ Bena Iosepa ia gwau: ‘Emui tadina umui mailaia, bona do lau diba umui be hereva momokani umui gwauraia.’ Unai dainai edia tamana dekenai idia giroa lou.

Famili edia aniani ia ore neganai, Iakobo ese ena natudia memero be Aigupito dekenai ia siaidia lou. Edia tadina Beniamina be idia ida ia lao. Iosepa be ena kakadia ia tohoa totona, Beniamina ena baege ai siliva kapusi ta ia hunia, bena ia gwau ena kakadia ese idia henaoa. Iosepa ena hesiai taudia ese Beniamina ena baege ai kapusi idia davaria neganai, ena kakadia idia hoa bada. Iosepa idia noia idia do ia panisia, to Beniamina lasi.

Unai amo Iosepa ia diba ena kakadia be edia kara idia haidaua. Iosepa be ena hemami ia biagua be auka. Ia tai bona ia gwau: ‘Lau be emu tadikaka Iosepa. Egu tamana ia mauri noho, a?’ Iena kakadia idia hoa. Iosepa ia gwau: ‘Lau dekenai umui karaia karana dainai umui lalohisihisi lasi. Dirava ese lau ia siaia mai umui lau hamauria totona. Vadaeni umui lao haraga bona egu tamana be iniseni umui mailaia.’

Idia giroa lou edia tamana dekenai, unai sivarai namona idia gwauraia, bona Aigupito dekenai ia do idia abia lao. Lagani momo idia hanaia, bena Iosepa bona ena tamana idia hedavari lou.