Usu tanona ai, Iehova ia tomadiho henia tauna ta ia noho. Iena ladana be Iobu. Ia be taga tauna bona mai ena famili badana. Ia be kara namo tauna, bona ogogami taudia, vabu bona tama sina lasi natudia ia durua. To ena kara namo dainai hahetoho do ia davaria lasi, a?

Iobu ia diba lasi Satani Diabolo be ia itaia noho. Iehova ese Satani ia hamaoroa: ‘Egu hesiai tauna Iobu oi itaia, a? Tanobada ai tau ta be ia bamona lasi. Egu hereva ia kamonai bona kara maorona ia karaia.’ Satani ia haere: ‘Oibe, Iobu be oi ia badinaia. Badina oi ese ia oi gimaia bona hanamoa. Ia dekenai tano bona animal oi henia. To bema ia amo kohu ibounai oi kokia, oi tomadiho henia karana do ia hadokoa.’ Iehova ia gwau: ‘Iobu oi tohoa diba. To ia oi hamasea lasi.’ Dahaka dainai Iehova be unai bamona ia hereva? Iehova ia diba Iobu be ia do ia badinaia noho.

Satani ese dika idauidau amo Iobu ia tohoa. Ginigunana be, Sabea taudia ia siaia Iobu ena boromakau bona doniki idia henaoa totona. Bena lahi ese Iobu ena mamoe orea ia hadikaia ore. Bona Kaledea taudia ese ena kamelo idia henaoa, bona animal idia naria noho hesiai taudia idia hamasedia. Gabeai, dika badana ta ia vara. Iobu ena natudia ibounai be aria idia karaia lalonai, ruma be idia latanai ia moru bona idia mase. Iobu ia lalohisihisi bada, to Iehova tomadiho henia karana ia hadokoa lasi.

Satani ia ura Iobu do ia hahisia noho dainai, ena tauanina ibounai ai toto ia havaraia. Iobu be hisihisi bada ia abia. Unai gaudia idia vara noho ena badina ia diba lasi. To, Iobu be Iehova ia do tomadiho henia noho. Dirava ese unai ibounai ia itaia, bona Iobu dekenai ia moale bada.

Satani ese tatau toi ia siaia Iobu idia tohoa totona. Ia dekenai idia gwau: ‘Oi be kara dika oi karaia bona oi hunia noho. Unai dainai Dirava ese oi ia panisia noho.’ Iobu ia gwau: ‘Lau be kerere ta lau karaia lasi.’ To ia laloa Iehova ese unai hekwakwanai ia havaraia, bona ia gwau Dirava ese ia kara namo henia lasi.

Tau matamata ta Elihu be edia hereva ia kamonai noho. Bena ia gwau: ‘Umui herevalaia gaudia be kerere. Iehova be iseda laloparara ia hereaia. Dika ta do ia havaraia lasi. Ia ese gau ibounai ia itaia bona hekwakwanai idia davaria taudia ia durua.’

Bena Iehova be Iobu dekenai ia gwau: ‘Tanobada bona guba lau karaia neganai, oi be edeseni? Dahaka dainai oi gwau egu kara be namo lasi? Ena be oi hereva, to oi diba lasi dahaka dainai unai bamona gaudia idia vara.’ Iobu ia gwau: ‘Lau kerere. Emu sivarai lau kamonai, to hari oi lau itaia. Gau ta ese oi karaia gaudia ia koua diba lasi. Lau hereva gauna dainai lau sori.’

Hahetoho ia ore neganai, Iehova ese Iobu ena gorere ia hanamoa bona gau momo herea ia henia. Iobu ia mauri daudau bona ia moale. Iehova ese Iobu ia hanamoa badina ena hereva ia badinaia ena be ia auka. Iobu bamona Iehova do oi tomadiho henia noho, a?

Aigupito ai, Iakobo ena famili idia gwauraia Israela besena. Iakobo bona Iosepa idia mase murinai, Farao matamata ia lohia matamaia. Ia gari badina Israela taudia be idia hutuma idia lao, Aigupito taudia edia namba ia hereaia. Unai dainai Farao ese Israela taudia be igui hesiai taudia ai ia halaoa. Idia ia doria biriki idia karaia bona uma gabu ai idia gaukara totona. Ena be Aigupito taudia ese Israela taudia dekenai gaukara metaudia idia henia, to edia namba ia bada daekau noho. Unai dainai Farao ia moale lasi bona oda ia henia Israela beibi memero idia vara neganai, do idia hamasea. Mani Israela taudia edia hemami oi laloa.

Israela hahine ladana Iokebeda be beibi mero hairaina ta ia havaraia. Beibi ia gimaia totona, bosea lalonai ia udaia bena Naila Sinavai badinai ia tubu siriho huanai ia atoa. Beibi ena taihuna Miriama be daudau ai ia gini beibi dekenai do ia vara gauna ia itaia totona.

Farao ena natuna kekeni be digu totona sinavai dekenai ia lao neganai, bosea ia itaia. Unai bosea lalonai beibi ta ia davaria, ia tai noho, bona ia hebogahisi henia. Miriama ia henanadai: ‘Ia namo lau lao bona hahine ta lau hakaua mai oi totona inai beibi ia naria, a?’ Farao ena natuna kekeni be gwaumaoro ia henia neganai, Miriama be ena sinana Iokebeda ida ia mai. Farao ena natuna kekeni ia gwau: ‘Inai beibi oi abia, bona lau totona oi naria, bona emu gaukara davana do lau henia.’

Unai natuna ia bada neganai, Iokebeda ese Farao ena natuna kekeni dekenai ia abia mai, bona ena ladana ia hatoa Mose, bona ena natuna bamona ia naria. Mose be king ena natuna dainai ia ura gaudia be ia abia diba. To Mose ese Iehova ia laloaboio lasi. Ia diba ia be Israela tauna, Aigupito tauna lasi. Bona ia ura Iehova do ia hesiai henia.

Mose ena mauri lagani be 40 neganai, ena lalona ia hadaia ena taunimanima ia durua totona. Ia itaia Aigupito tauna ese Israela igui hesiai tauna ia botaia noho neganai, ia ese mai goada ida unai Aigupito tauna ia botaia dainai, ia mase. Bona tauanina be miri lalonai ia hunia. Farao be unai ia diba neganai, ia ura Mose ia hamasea. To Mose ia heau lao Midiana tanona dekenai. Unuseniai Iehova ese ia naria.