Mose be lagani 40 lalonai Midiana tanona dekenai ia noho. Ia headava bona natudia idia havaraia. Dina ta Sinai Ororona badinai ena mamoe ia naria noho lalonai, gau ta ia itaia. Au ginigini ta be lahi ese ia araia noho, to ia gabua lasi! Mose be unai itaia totona ia raka lao kahirakahira neganai, gadona ta ia kamonai, ia gwau: ‘Mose e! Oi mai kahirakahira lasi. Emu sandolo oi kokia badina oi gini tano be helaga.’ Iehova be aneru ta amo ia hereva noho.

Mose ia gari dainai, ena vairana ia hunia. Aneru ma ia gwau: ‘Lau ese Israela taudia edia hisihisi lau itaia. Lau ese Aigupito taudia amo idia do lau hamauria bona tano namona dekenai do lau abia mai. Oi ese egu taunimanima be Aigupito amo do oi hakaua raka-lasi.’ Mose be unai hereva dekenai ia hoa, a?

Mose ia henanadai: ‘Dahaka do lau hereva bema taunimanima idia gwau daika ese lau ia siaia?’ Dirava ia gwau: ‘Idia oi hamaoroa Iehova, Aberahamo ena Dirava, Isako ena Dirava, bona Iakobo ena Dirava ese oi ia siaia.’ Bena Mose ia gwau: ‘Bema taunimanima ese lau idia kamonai lasi be edena bamona?’ Iehova ese Mose dekenai ia hamomokania ia do ia durua. Mose ia hamaoroa ena itotohi be tano dekenai do ia negea. Bena itotohi be gaigai ai ia lao! Mose ese gaigai ena iuna ia dogoatao neganai gaigai be itotohi ai ia lao. Iehova ia gwau: ‘Unai toa oi karaia neganai, do idia abia dae lau ese oi lau siaia.’

Mose ia gwau: ‘Lau be hereva namonamo tauna lasi.’ Iehova ia gwauhamata: ‘Oi gwauraia herevadia be oi dekenai do lau hadibaia, bona emu tadikaka Arona lau siaia oi ia durua totona.’ Mose ia diba Iehova be ia ida, unai dainai ena adavana bona natuna mero ida Aigupito dekenai idia giroa lou.

Israela taudia idia doria igui hesiai gaukara idia karaia totona. Mose bona Arona be Farao dekenai idia lao bona Iehova ena hereva idia gwauraia: ‘Egu taunimanima oi siaia lao, unai amo taunimanima lasi gabuna ai lau do idia tomadiho henia.’ Farao be mai hekokoroku ida ia gwau: ‘Iehova ena hereva be gau badana lasi bona Israela taudia do lau siaia lasi.’ Bena Farao ese Israela taudia ia doria gaukara momo idia karaia totona. Unai dainai Iehova ese Farao dekenai gau ta do ia hadibaia. Oi diba dahaka do ia karaia? Ia ese Aigupito dekenai Hisihisi 10 do ia havaraia. Iehova ese Mose ia hamaoroa: ‘Farao be lau ia kamonai henia lasi. Daba ai, Naila Sinavai dekenai do ia lao. Ia dekenai oi lao bona oi hamaoroa, ia be egu taunimanima ia siaia lasi dainai, Naila Sinavai be rara ai do ia lao.’ Mose ia kamonai bona Farao dekenai ia lao. Farao ia itaia Arona ese Naila Sinavai ia botaia neganai, rara ai ia lao. Sinavai ia bonana matamaia, gwarume idia mase, bona inua ranu idia abia diba lasi. To, Farao ia ura lasi Israela taudia ia siaia lao.

Dina 7 murinai, Iehova ese Mose ia siaia lou Farao dekenai, bona ia hamaoroa: ‘Bema egu taunimanima oi siaia lasi, Aigupito be paroparo amo do ia honu.’ Arona ese ena itotohi ia abia isi bona paroparo be gabu ibounai ia hahonua. Taunimanima edia ruma, bedi bona mereki be paroparo amo idia honu! Bena Farao be Mose bona Arona ia noia Iehova ese paroparo ia kokia totona. Farao ia gwauhamata Israela taudia do ia siaia lao. Unai dainai Iehova ese unai hisihisi ia koua, bona Aigupito taudia ese idia mase paroparo idia haboudia. Bona unai tano ena bonana be ia dika matamaia. To, Farao be Israela taudia ia siaia lasi.

Bena Iehova ese Mose ia hamaoroa: ‘Arona be ena itotohi amo tano do ia botaia, bona kahu be nemo ai idia lao.’ Karaharaga gabu ibounai be nemo amo ia honu. Vadaeni, Farao ena taunimanima haida ese ia idia hamaoroa: ‘Inai be Dirava ena siahu dainai ia vara.’ To, Farao be Israela taudia ia siaia lasi.