Mose bona Arona be Farao dekenai idia lao bona Dirava ena hereva idia gwauraia: ‘Bema egu taunimanima oi siaia lasi, emu tano dekenai lao do lau siaia.’ Bena Aigupito ena taga bona ogogami taudia edia ruma lalonai, lao momo herea idia vareai. Tano ibounai be lao amo ia honu. To Israela taudia edia noho gabuna Gosena ai, lao be lasi. Unai hisihisi namba 4 be Aigupito taudia sibona ia hahisia. Farao ia noinoi: ‘Mani Iehova oi noia lao ia kokia totona. Emu taunimanima do lau siaia .’ To Iehova ese lao ia kokia neganai, Farao be ena lalohadai ia haidaua. To Farao be unai gaudia amo diba ia abia, a?

Iehova ia gwau: ‘Bema Farao ese egu taunimanima ia siaia lasi, Aigupito ena animal ibounai be do idia gorere bona mase.’ Murina dinana ai, animal idia mase matamaia. To Israela taudia edia animal be idia mase lasi. To Farao ia do kwara auka noho, bona Israela taudia ia siaia lasi.

Bena Iehova be Mose ia hamaoroa, Farao dekenai do ia giroa lou bona lahi ena kahu do ia negea daekau. Unai lahi ena kahu be pauda ai ia lao bona Aigupito taudia ibounai latanai ia diho. Unai kahu ese Aigupito taudia bona edia animal dekenai toto dikadia ia havaraia. To Farao ia ura lasi Israela taudia ia siaia.

Iehova ese Mose ia siaia lou Farao dekenai bona ia hamaoroa: ‘Egu taunimanima oi siaia lasi, a? Kerukeru aisi nadi be medu bamona do ia diho.’ Murina dinana ai, Iehova ese aisi nadi, kevaru, bona lahi ia hadihoa. Guna Aigupito ai unai bamona ia vara lasi. Unai ese au, uma aniani ibounai ia hadikaia, to Gosena dekenai be lasi. Farao ia gwau: ‘Mani Iehova oi noia, inai hisihisi ia koua totona! Bena umui lao diba.’ To aisi nadi bona medu ia ore neganai, karaharaga Farao ese ena lalohadai ia haidaua.

Bena Mose ia gwau: ‘Hari, kwadi be aisi nadi ese ia hadikaia lasi gaudia ibounai do idia ania.’ Kwadi milioni momo ese tubutubu gaudia ibounai idia ania ore. Farao ia noinoi: ‘Dirava umui noia, inai hisihisi ia kokia totona.’ Ena be Iehova ese kwadi ia kokia, to Farao ia do kwara auka noho.

Iehova be Mose ia hamaoroa: ‘Emu imana be guba dekenai oi abia isi.’ Karaharaga, Aigupito ena gabu ibounai be ia dibura. Dina toi lalonai, Aigupito taudia be gau ta eiava tau ta idia itaia diba lasi. Israela taudia edia ruma sibona ai diari ia noho.

Farao be Mose ia hamaoroa: ‘Oi bona emu taunimanima umui lao. To emui animal umui rakatanidia.’ Mose ia gwau: ‘Animal do ai abidia lao badina Dirava dekenai do ai bouboulaia.’ Farao be ia badu dikadika. Ia boiboi badabada: ‘Lauegu vairana amo oi siri! Bema oi lau itaia lou, oi do lau hamasea.’

Mose ia gwauhamata Farao dekenai ia do ia itaia lou lasi. To ia do lao lasi neganai, Farao ia hamaoroa: ‘Hanuaboi momokani ai, Aigupito ai idia noho vara guna natudia ibounai, Farao ena natuna amo ela bona hesiai taudia edia natudia danu be do idia mase.’

Iehova ese Israela taudia ia hamaoroa spesel aniani ta idia karaia totona. Ia gwau: ‘Mauri lagani tamona mamoe tau ta umui alaia, bona ena rara be emui iduara ai umui atoa. Vamu umui gabua, bona isti lasi beredi ida umui ania. Dabua umui atoa bona tamaka umui karaia, bona lao totona umui hegaegae. Inai hanuaboi ai umui do lau ruhaia.’ Israela taudia edia moale mani oi laloa.

Hanuaboi momokani ai, Iehova ena aneru be Aigupito ena ruma ta ta dekenai ia lao. Bema ruma ta be rara amo idia makaia lasi, vara guna natuna do ia hamasea. To Aneru be ruma ena iduara ai rara ia itaia neganai, do ia hanaia. Aigupito ena famili ibounai, ena be idia taga o ogogami, edia natuna ta ia mase. To Israela taudia edia natuna ta ia mase lasi.

Farao ena natuna mero ia mase danu. Vadaeni Farao be gau ta ia karaia diba lasi. Karaharaga Mose bona Arona ia hamaoroa: ‘Toreisi. Inai gabu amo umui siri. Umui lao, emui Dirava umui tomadiho henia. Emui animal umui abia bona umui lao!’

Hua ia diari momokani negana ai, Israela taudia be Aigupito idia rakatania, famili bona iduhu ta ta ai idia raka. Israela tatau ibounai be 600,000 bona momo be hahine bona natudia. Bona idau bese taudia momo idia lao, unai amo Iehova do idia tomadiho henia danu. Hari Israela taudia be Aigupito amo idia raka-lasi!

Iehova ese idia ia hamauria dalana idia laloatao totona, lagani ta ta ai unai bamona spesel aniani do idia karaia. Unai idia gwauraia Pasova.