Iehova be Mose dekenai ia gwau: ‘Ororo ai lau dekenai oi daekau mai, lau ese egu taravatu be nadi palakadia latanai do lau torea bona do lau henia.’ Mose ia daekau lao bona dina bona hanuaboi 40, ororo dekenai ia noho. Unuseniai ia noho neganai, Iehova ese nadi palakadia rua latanai Taravatu 10 ia torea bona Mose dekenai ia henia.

Dina haida idia hanaia dainai, Israela taudia idia laloa Mose be idia ia rakatania vadaeni. Arona idia hamaoroa: ‘Ai ura ta ese ai do ia gunalaia. Ai totona dirava ta oi karaia!’ Arona ia gwau: ‘Emui golo be lau dekenai umui henia.’ Golo ia havevea bona boromakau kaivakuku ta ia karaia. Taunimanima idia gwau: ‘Inai boromakau be emai Dirava, ia ese Aigupito amo ai ia hakaua mai!’ Idia ese golo boromakau idia tomadiho henia, bona aria idia karaia. Unai be kerere, a? Oibe, badina taunimanima idia gwauhamata Iehova sibona do idia tomadiho henia. To unai gwauhamata idia badinaia lasi.

Iehova ese idia vara gaudia ia itaia, bona Mose ia hamaoroa: ‘Taunimanima dekenai oi diho lao. Idia be lau idia badinaia lasi, to koikoi dirava idia tomadiho henia noho.’ Mose be nadi palakadia rua ia dogoatao bona ororo amo ia diho.

Mose be kamepa kahirakahira ia mai neganai, taunimanima edia ane ia kamonai. Bena ia itaia idia mavaru bona boromakau idia tomadiho henia noho. Mose ia badu dikadika. Nadi palakadia rua be tano dekenai ia negadia bona idia makohi maragimaragi. Maoromaoro kaivakuku ia hadikaia. Bena Arona ia nanadaia: ‘Edena bamona inai taunimanima ese emu lalona idia veria inai kara dika badana oi karaia totona?’ Arona ia gwau: ‘Oi badu lasi. Inai taudia edia kara oi diba. Idia be dirava ta idia ura, unai dainai edia golo be lahi lalonai lau negea bona inai boromakau ia hedinarai!’ Arona be unai ia karaia lasi be namo. Bena Mose be ororo dekenai ia daekau lou bona Iehova ia noia taunimanima edia dika ia gwauatao totona.

Iehova ese ia idia ura badinaia taudia edia dika ia gwauatao. Oi laloa Israela taudia ese Mose ena hakaua dalana idia badinaia be mai anina bada, a?

Mose be Sinai Ororona ai ia noho neganai, Iehova ese ia hamaoroa kamepa ta ia haginia totona, idia gwauraia palai dubu, unuseniai Israela taudia ese Ia do idia tomadiho henia. Idia lao gabudia dekenai palai dubu do idia abia lao danu.

Iehova ia gwau: ‘Taunimanima oi hamaoroa, idia henia diba gaudia do idia henia palai dubu haginia totona.’ Israela taudia ese golo, siliva, kopa, nadi namo hereadia, bona taia gaudia bona ageva idia henia. Danu wulu, linen, animal kopina, bona gau namodia ma haida idia henidia. Harihari bada karana idia hahedinaraia, bona Mose ese ia hamaoroa: ‘Gau momo ita haboua vadaeni! Inai be hegeregere.’

Mai edia diba tatau bona hahine momo ese palai dubu haginia gaukarana idia durua. Unai gaukara totona Iehova ese idia dekenai aonega ia henia. Haida be varo idia hatua, varo amo dabua idia karaia, eiava dabua ai kerubi laulau idia turia. Ma haida be nadi idia atodia, golo amo gau haida idia karaia, eiava au idia koroa.

Iehova ena hereva hegeregerena, taunimanima ese palai dubu idia haginia. Keten hairaina idia karaia, Helaga bona Helaga Herea gabuna hapararaia totona. Helaga Herea gabuna lalonai ia noho taravatu mauana be, akasia au bona golo amo idia karaia. Helaga gabuna lalonai, golo lamepa atoa gabuna, teibolo ta, bona bonana namo muramura ena boubou patana idia noho. Ariara ai, kopa disi bona boubou pata badana ta idia noho. Taravatu mauana ese Israela taudia ia hadibaia edia gwaubou Iehova ida do idia laloatao. Oi diba gwaubou be dahaka? Ia be spesel gwauhamatana.

Iehova ese Arona bona ena natudia memero ia abia hidi palai dubu ai hahelaga tauna ena gaukara idia karaia totona. Idia ese palai dubu do idia naria namonamo bona Iehova dekenai boubou gaudia do idia henia. To hahelaga tauna badana Arona sibona be Helaga Herea gabuna lalonai do ia vareai. Lagani ta lalonai, nega tamona iena kara dika, ena famili edia kara dika, bona Israela besena ibounai totona kara dika boubouna do ia henia.

Israela taudia ese Aigupito idia rakatania murinai, lagani tamona lalonai palai dubu idia haginia ore. Hari, unuseniai Iehova idia tomadiho henia diba.

Iehova ena hairai ese palai dubu ia koua bona ori be ataiai ia hedinarai. Palai dubu ataiai ori ia noho neganai, Israela taudia be edia noho gabuna do idia rakatania lasi. To ori ia abia isi neganai, idia diba edia noho gabuna do idia rakatania. Idia ese edia palai dubu idia kokia bona ori idia badinaia.