Israela taudia be Sinai Ororona idia rakatania bona Parana ena taunimanima lasi gabuna idia hanaia bona Kadesi dekenai idia lao. Unuseniai, Iehova ese Mose ia hamaoroa: ‘Iduhu ta ta amo tatau 12 oi siaia, Kanana tano idia itaia totona, unai tano be Israela taudia dekenai do lau henia.’ Unai dainai Mose ese tatau 12 ia abia hidi bona ia gwau: ‘Kanana dekenai umui lao, bona itaia bema tano ese anina namona ia havaraia eiava lasi. Danu, umui itaia taunimanima be idia goada eiava idia manoka, idia be palai rumadia ai eiava siti ai idia noho.’ Spai taudia 12, Iosua bona Kaleba danu be Kanana itaia totona idia lao.

Dina 40 murinai, spai taudia ese fig au huahuadia, pomogranet, bona greips idia abia mai. Spai taudia idia gwau: ‘Unai be tano namona, to taunimanima be mai edia goada bona siti edia magu be latadia.’ Bena Kaleba ia gwau: ‘Ita kwalimu diba. Hari ita daekau lao be namo!’ Oi diba dahaka dainai Kaleba be unai bamona ia hereva? Badina ia bona Iosua be Iehova idia trast henia. To spai taudia 10 idia gwau: ‘Lasi! Idia be taunimanima badadia! Edia matana ai ita be kwadi bamona.’

Unai hereva dainai Israela taudia idia lalomanoka. Idia maumau matamaia bona ta ta dekenai idia gwau: ‘Namona be gunalaia tauna ta ita abia hidi bona Aigupito dekenai ita giroa lou. Dahaka dainai unai gabu dekenai ita lao bona ita idia hamasea?’ Iosua bona Kaleba idia gwau: ‘Iehova gwau-edeede henia lasi, bona gari lasi. Iehova ese ita do ia gimaia.’ To Israela taudia be idia kamonai lasi. Danu Iosua bona Kaleba idia ura hamasea!

Iehova be dahaka ia karaia? Mose ia hamaoroa: ‘Idia totona gau ibounai lau karaia, to lau idia do kamonai henia lasi. Unai dainai, idia be lagani 40 taunimanima lasi gabuna ai do idia loaloa, bona iniseniai do idia mase. To edia natudia, bona Iosua bona Kaleba sibona ese lau gwauhamatalaia tanona do idia noholaia.’

Gabeai, Israela taudia be taunimanima lasi tanona ai idia noho neganai, Kora, Datana, Abirama, bona taunimanima 250 ese Mose idia gwau-edeede henia. Ia dekenai idia gwau: ‘Ai be umui dekenai ai hesiku vadaeni! Dahaka dainai oi be emai gunalaia tauna bona Arona be hahelaga tauna badana? Iehova be ita ibounai ida ia noho, oi bona Arona sibona lasi.’ Iehova be idia dekenai ia moale lasi. Unai be Ia gwau-edeede henia karana!

Mose ese Kora bona ena bamodia ia hamaoroa: ‘Kerukeru palai dubu dekenai do umui mai, bona emui lahi gida udaia gauna do umui abia bona latanai bonana namo muramura do umui atoa. Iehova ese ita dekenai do ia hahedinaraia daika ia abia hidi.’

Murina dinana ai, Kora bona taunimanima 250 be palai dubu dekenai idia lao Mose ida hedavari totona. Unuseniai hahelaga taudia bamona bonana namona muramura idia gabua. Iehova ese Mose bona Arona ia hamaoroa: ‘Kora bona ena tatau amo umui siri.’

Kora be Mose hedavari henia totona palai dubu dekenai ia lao, to Datana, Abirama, bona edia famili be idia ura lasi lao. Iehova ese Israela taudia ia hamaoroa Kora, Datana, bona Abirama edia kamepa amo do idia raka siri. Karaharaga Israela taudia be idia raka siri. Datana, Abirama, bona edia famili be edia kamepa murimuri ai idia gini noho. Bena tano ia kehoa bona ibounai ia hadonoa! Palai dubu ai, lahi ia diho bona Kora bona ena bamodia 250 ia araia ore.

Bena Iehova ese Mose ia hamaoroa: ‘Iduhu gunalaia taudia ta ta amo edia itotohi oi abia, bona edia ladana oi torea. To Levi iduhu ena itotohi ai Arona ena ladana do oi torea. Oi ese palai dubu lalonai itotohi do oi atodia, bona lau abia hidi tauna ena itotohi ai flaoaflaoa do ia tubu.’

Murina dinana ai, Mose be itotohi ibounai ia abia raka-lasi bona gunalaia taudia dekenai ia hahedinaraia. Arona ena itotohi ai flaoaflaoa idia tubu, bona Alamono magedia idia noho. Unai dala amo, Iehova ese ia hamomokania Arona be ia abia hidi hahelaga tauna badana.