Israela spai taudia be Ieriko siti dekenai idia vareai neganai, hahine ta ladana Rahaba ena ruma dekenai idia noho. Ieriko ena king be unai ia diba neganai, ena tuari taudia be Rahaba dekenai ia siaia. Rahaba ese guhi ataiai spai taudia rua ia hunia bona tuari taudia be dala ma ta dekenai ia siaidia lao. Rahaba ese spai taudia ia hamaoroa: ‘Lau ese umui lau durua, badina lau diba Iehova be emui kahanai bona inai tano do umui abia. Mani lau umui gwauhamata henia egu famili do umui hamauria.’

Spai taudia ese Rahaba idia hamaoroa: ‘Ai gwauhamata emu ruma lalonai idia noho taudia ta be dika do ia davaria lasi.’ Idia gwau: ‘Emu windo amo varo kakakaka oi kwatua, bona emu famili do idia mauri.’

Rahaba ese varo ia gaukaralaia bona spai taudia be windo amo ia siaia diho. Idia be ororo dekenai dina toi idia hunia, unai murinai Iosua dekenai idia giroa lou. Bena Israela taudia be Ioridane Sinavai idia hanaia bona Ieriko siti tuari henia totona idia hegaegae. Unai be idia halusia siti ginigunana. Iehova ese ia hamaoroa, dina ta ta ai nega tamona siti do idia raka hagegea, bona dina 6 lalonai unai bamona do idia karaia. Dina namba 7 ai, nega 7 siti idia raka hagegea. Bena hahelaga taudia ese kibi idia hiriria, bona tuari taudia idia boiboi badabada. Bena siti ena magu ia moru! To Rahaba ena ruma, magu ena kahana ta ai ia noho be ia moru lasi. Rahaba bona ena famili idia mauri, badina Rahaba ese Iehova ia abidadama henia.

Ieriko ena sivarai be Kanana ai idia noho bese haida ese idia kamonai. Unai dainai edia king idia haboua Israela taudia idia tuari henia totona. To Gibeona taudia be palani ta idia karaia. Dabua dikadia idia karaia bena Iosua dekenai idia lao bona idia gwau: ‘Ai be daudau tanona amo ai mai. Iehova ese umui totona Aigupito bona Moaba ai ia karaia gaudia ai kamonai. Mani oi gwauhamata, ai do umui tuari henia lasi, bona ai be emui hesiai taudia ai do ai lao.’

Iosua ese edia hereva ia abia dae bona ia gwau idia do ia tuari henia lasi. Dina toi murinai, Iosua ia davaria idia be tano daudauna amo idia mai lasi. To idia be Kanana tano amo idia mai. Iosua ese Gibeona taudia ia nanadaia: ‘Dahaka dainai ai umui koia?’ Bena idia haere: ‘Ai be ai gari! Ai diba Iehova emui Dirava be umui totona ia tuari. Mani ai oi hamasea lasi.’ Iosua ese ena gwauhamata ia badinaia bona idia ia hamasea lasi.

Gabeai, Kanana ena king 5 bona edia tuari taudia ese Gibeona taudia idia hagaria. Iosua bona ena tuari taudia be Gibeona taudia idia durua totona hanuaboi ibounai idia raka. Bena daba ai idia tuari henidia matamaia. Bona Kanana taudia be gabu idauidau dekenai idia heau lao matamaia. Idia lao gabudia dekenai Iehova ese idia latanai aisi nadi badadia ia hadihoa. Bena Iosua ese Iehova ia noia dina ia diho lasi totona. Guna unai bamona gauna ta ia vara lasi, to dahaka dainai hari Iosua be dina ia diho lasi totona Iehova ia noinoi henia? Badina Iosua ese Iehova ia abidadama henia. Dina be ia diho lasi ela bona Israela taudia ese Kanana ena king taudia bona tuari taudia idia halusia.