Lagani momo lalonai Iosua ese Iehova ena taunimanima ia gunalaia murinai, ena mauri lagani be 110 neganai ia mase. Ia mauri noho neganai, Israela taudia be Iehova idia tomadiho henia. To, Iosua ia mase murinai, kaivakuku tomadiho henia karana ia matamaia, Kanana taudia hegeregerena. Israela taudia ese Iosua idia badinaia lasi dainai, Kanana ena king Iabina ese edia mauri ia ha-aukaia neganai, Iehova be unai ia koua lasi. Taunimanima be heduru totona Iehova dekenai idia noinoi. Unai dainai Iehova ese gunalaia tauna matamata Baraki ia abia hidi. Ia ese taunimanima do ia durua Iehova dekenai idia giroa lou totona.

Peroveta hahine Debora ese Baraki totona hereva ia siaia. Debora ese Iehova ena hereva do ia gwauraia, ia gwau: ‘Tatau 10,000 ida Kisona ena sinavai dekenai oi lao, Iabina ena ami umui hedavari henia totona. Unuseniai oi ese Iabina ena ami gunalaia tauna Sisera do oi halusia.’ Baraki ese Debora ia hamaoroa: ‘Do lau lao, bema oi be lau ida oi mai.’ Debora ia gwau: ‘Lau be oi ida do lau lao. To oi ese Sisera do oi hamasea lasi. Iehova ia gwau hahine ta ese ia do ia hamasea.’

Debora be Baraki bona ena tuari orea ida Taboro Ororo ai tuari totona idia hegaegae. Sisera be unai ia kamonai neganai, koura ai ena tuari kariota bona tuari taudia ia haboudia. Debora be Baraki dekenai ia gwau: ‘Hari dina ai, Iehova ese oi dekenai kwalimu do ia henia.’ Baraki bona ena tatau 10,000 be Sisera ena ami goadana tuari henia totona ororo amo idia diho.

Bena Iehova ese Kisona Sinavai dekenai abata ia havaraia. Sisera ena tuari kariota be kopukopu ai idia kamokau. Sisera be ena kariota ia rakatania bona ia heau matamaia. Baraki bona ena tuari taudia ese Sisera ena tuari taudia idia halusia. To Sisera ia heau lao hahine ta ladana Iaela ena palai ruma ai ia hunia. Iaela ese milika ia henia ia inua bona blanketi amo ia koua. Sisera ia hesiku bada dainai ia mahuta. Bena Iaela be metairametaira ia lao bona Sisera ena kwarana be palai ena ikoko amo ia kokoa vareai. Bona Sisera ia mase.

Baraki be ia mai Sisera ia tahua. Iaela be iena palai ruma amo ia raka-lasi bona ia gwau: ‘Mani oi vareai. Oi tahua tauna do lau hahedinaraia.’ Baraki ia raka vareai bona ia itaia Sisera ia mase. Baraki bona Debora ese ane amo Iehova idia hanamoa, badina Israela taudia dekenai kwalimu ia henia. Lagani ma 40 lalonai, Israela taudia be maino ai idia noho.

Israela ai doe ia vara dainai Israela hahine ta ladana Naomi be ena adavana bona natudia memero rua ida Moaba dekenai idia lao. Gabeai, Naomi ena adavana ia mase. Iena natuna memero rua ese Moaba hahinedia Ruta bona Oropa idia adavaia. Madi, gabeai Naomi ena natudia rua idia mase.

Naomi ia kamonai Israela ai doe ia ore neganai, ia ura Israela dekenai ia giroa lou. Ruta bona Oropa be Naomi ida idia giroa lou, to dala dekenai Naomi ese idia ia hamaoroa: ‘Umui be egu natudia memero edia adavana namodia bona egu ravana hahine namodia. Lau ura umui headava lou. Moaba dekenai umui giroa lou.’ Idia gwau: ‘Oi ai lalokau henia! Ai ura lasi oi ai rakatania.’ Naomi be idia ia hamaoroa loulou idia giroa lou totona. Gabeai, Oropa ia giroa lou, to Ruta be ia noho. Naomi ese Ruta ia hamaoroa: ‘Oropa be ena taunimanima bona ena dirava dekenai ia giroa lou noho. Ia ida oi lao, bona emu sinana ena ruma dekenai oi lao.’ To, Ruta ia gwau: ‘Oi do lau rakatania lasi. Emu taunimanima be egu taunimanima bona emu Dirava be egu Dirava.’ Ruta be unai hereva ia gwauraia neganai, oi laloa Naomi ena hemami be edena bamona?

Ruta bona Naomi be Israela ai bali idia gogoa matamaia negana ai idia ginidae. Dina ta, Ruta ia lao tau ta ladana Boasi ena uma ai idia rakatania witi ia gogoa totona, Boasi be Rahaba ena natuna mero. Boasi ia kamonai Ruta be Moaba hahine to Naomi ia rakatania lasi. Boasi ese ena gaukara taudia ia hamaoroa witi haida idia rakatania Ruta ese ia gogoa totona.

Unai hanuaboi ai, Naomi ese Ruta ia nanadaia: ‘Hari dina ai, daika ena uma gabu ai oi gaukara?’ Ruta ia gwau: ‘Tau ta ladana Boasi ena uma gabu dekenai.’ Naomi ia gwau: ‘Boasi be egu adavana ena varavara ta. Hahine matamatadia ida ena uma dekenai oi gaukara noho. Oi do ia gimaia.’

Ruta be Boasi ena uma gabu dekenai ia gaukara noho ela bona witi gogoa negana ia ore. Boasi ia itaia Ruta ia gaukara goada bona ia be hahine namona. Unai negadia ai, bema tau ta ia mase bona ia be natuna mero lasi, ena varavara ta ese ena vabu do ia adavaia. Unai dainai Boasi ese Ruta ia adavaia. Natuna mero ladana Obeda idia havaraia, ia be gabeai King Davida ena tubuna ai ia lao. Naomi ena turadia idia moale. Naomi dekenai idia gwau: ‘Guna, Iehova ese oi dekenai Ruta ia henia, ia ese oi ia kara namo henia, bona hari mai emu tubuna mero. Namona be Iehova ita hanamoa.’