Daudau lasi, Israela taudia be Iehova idia rakatania bona koikoi diravadia idia tomadiho henia matamaia. Lagani 7 lalonai, Midiana taudia ese Israela taudia edia animal idia henaoa bona uma aniani idia hadikaia. Israela taudia be Midiana taudia amo sibona idia gimaia totona, kohua bona ororo dekenai idia hunia. Iehova ese idia ia hamauria totona idia noinoi. Unai dainai Iehova ese tau matamata ladana Gideona dekenai aneru ta ia siaia. Aneru ia gwau: ‘Iehova be oi ia abia hidi tuari tauna goadana ai oi lao totona.’ Gideona ia henanadai: ‘Edena dala ai Israela do lau hamauria? Lau be ladana maragi tauna.’

Edena dala ai Gideona do ia diba ia be Iehova ese ia abia hidi? Ia ese wulu ta be tano ai ia atoa bona Iehova dekenai ia gwau: ‘Daba ai, bema daba ena paripari ese wulu ia haparia bona tano be ia kaukau, do lau diba oi ura lau ese Israela taudia do lau hamauria.’ Murina dinana ai daba momokani ai, wulu be ia paripari bona tano be ia kaukau! To Gideona ia noinoi, daba ma ta ai wulu do ia kaukau bona tano do ia paripari. Unai ia vara neganai, Gideona ia diba momokani ia be Iehova ese ia abia hidi. Iena tuari taudia ia haboua Midiana taudia tuari henia totona.

Iehova be Gideona ia hamaoroa: ‘Lau ese Israela taudia dekenai kwalimu do lau henia. To emu tuari taudia be momo dainai, reana do oi laloa sibona emu goada amo tuari ai oi kwalimu. Idia gari taudia oi hadibaia edia ruma dekenai do idia giroa lou.’ Unai dainai tuari taudia 22,000 be edia ruma dekenai idia lao, bona 10,000 idia noho. Bena Iehova ia gwau: ‘Tuari taudia be do momo herea. Sinavai maragina dekenai umui lao, bona idia oi hamaoroa ranu idia inua totona. Ranu idia inua lalonai, edia inai taudia totona idia gima noho tuari taudia sibona be oi abia hidi.’ Tatau 300 sibona be idia gima noho. Iehova ia gwauhamata idia sibona ese Midiana ena tuari taudia 135,000 do idia halusia.

Unai Hanuaboi ai, Iehova ese Gideona ia hamaoroa: ‘Hari be Midiana taudia tuari henia negana!’ Gideona ese ena tatau dekenai kibi bona hodu badadia lalonai diari gaudia idia noho ia henia. Idia dekenai ia gwau: ‘Lau umui itaia. Bona lau karaia hegeregerena do umui karaia.’ Gideona ese ena kibi ia hiriria, ena hodu ia makohia, ena diari gauna ia davea lao mai, bona ia boiboi: ‘Iehova ena tuari kaia bona Gideona ena!’ Ena tatau 300 danu be unai bamona idia karaia. Midiana taudia idia gari bona gabu idauidau dekenai idia heau kava. Bona ta ta idia tuari henia matamaia. Iehova ese Israela taudia ia durua lou bona edia inai henia taudia idia halusia.

Israela tauna ladana Elikana ena adavadia be rua, Hana bona Penina, to Hana ia lalokau henia bada. Penina be mai ena natudia dainai hanaihanai Hana dekenai ia hevaseha badina Hana be natudia lasi. Lagani ta ta ai, Elikana be ena famili ida tomadiho totona Silo dekenai idia lao. Nega ta unuseniai Elikana ia itaia Hana ia lalohisihisi. Ia gwau: ‘Hana, oi tai lasi. Oi ida lau noho. Oi lau lalokau henia.’

Gabeai, Hana be guriguri totona ia lao. Ia taitai bona Iehova ena heduru ia noia. Ia gwauhamata: ‘Iehova, bema lau dekenai natuna mero ta oi henia, ia do lau henia oi dekenai, bona iena mauri ibounai lalonai oi do ia hesiai henia.’

Hahelaga Tauna Badana Eli ia itaia Hana ia taitai noho bona ia laloa Hana ia kekero. Hana ia haere: ‘Lasi, egu lohia, lau kekero lasi. Mai egu hekwakwanai, bona Iehova lau hereva henia noho.’ Eli be Hana ia hamaoroa: ‘Dirava ese oi noinoi gauna do ia henia.’ Unai neganai, Hana ena hemami ia namo bona ia lao. Lagani ta do lasi neganai, natuna mero ia vara ena ladana be Samuela. Hana ia moale bada, ani?

Hana be ena gwauhamata Iehova dekenai ia laloaboio lasi. Samuela be rata amo ia kokia neganai, maoromaoro dubu helaga dekenai ia abia lao. Hana ese Eli ia hamaoroa: ‘Natuna mero ta totona lau guriguri be inai. Ia be Iehova dekenai lau henia, ena mauri dinadia lalonai ia do ia hesiai henia.’ Lagani ta ta ai, Elikana bona Hana be Samuela idia vadivadi henia, bona imana lasi kouti matamata idia mailaia. Danu Iehova ese Hana dekenai natudia memero toi bona kekeni rua ia henia.