Israela taudia be Iehova idia dadaraia lou bona koikoi diravadia idia tomadiho henia. Amono taudia ese idia tuari henia neganai, unai koikoi diravadia ese idia durua lasi. Lagani momo lalonai, Israela taudia be hisihisi idia davaria. Bona Iehova dekenai idia gwau: ‘Ai be kara dika ai karaia. Mani ai idia inai henia taudia amo ai oi hamauria.’ Israela taudia ese edia kaivakuku idia hadikaia bona Iehova idia tomadiho henia matamaia lou. Iehova ia ura lasi hisihisi idia abia noho.

Tuari tauna ladana Iapeta idia abia hidi edia gunalaia tauna ai ia lao bona Amono taudia idia tuari henia. Iapeta be Iehova dekenai ia gwau: ‘Bema ai oi durua inai tuari lalonai ai kwalimu, lau gwauhamata, ruma dekenai lau giroa lou neganai, lau do ia hedavari henia tauna ginigunana be oi dekenai do lau henia.’ Iehova ese Iapeta ena guriguri ia kamonai bona ia durua ia kwalimu totona.

Iapeta be ruma dekenai ia giroa lou neganai, ia hedavari henia totona ia raka-lasi tauna ginigunana be ena natuna kekeni, unai be ena natuna tamona sibona. Ia mavaru bona tambarin ia gadaralaia. Iapeta be dahaka do ia karaia? Iena gwauhamata ia laloatao bona ia gwau: ‘Madi o, egu natuna kekeni! Egu kudouna oi makohia. Iehova dekenai gwauhamata ta lau karaia. Bona unai lau badinaia totona, namona be Silo dekenai oi do lau siaia, palai dubu ai hesiai gaukara oi karaia totona.’ To natuna kekeni ia gwau: ‘Tamagu e, bema Iehova dekenai gwauhamata oi karaia, namona be oi hamomokania. To oi lau noia, hua rua lalonai ororo dekenai egu turadia kekeni ida do ai noho. Bena do lau lao.’ Iapeta ena natuna kekeni be ena mauri lalonai palai dubu ai hesiai gaukara ia karaia. Lagani ta ta ai, ena turadia be Silo dekenai ia idia vadivadi henia.

Hahelaga Tauna Badana Eli be mai ena natudia memero rua, idia be palai dubu ai hahelaga gaukarana idia karaia. Edia ladana be Hopini bona Pineha. Idia be Iehova ena taravatu idia badinaia lasi, bona taunimanima idia kara auka henia. Israela taudia ese Iehova dekenai edia boubou gaudia idia mailaia neganai, Hopini bona Pineha be vamu namodia idia abia. Eli be unai sivarai ia kamonai, to gau ta ia karaia lasi. Iehova be unai bamona kara do ia koua lasi, a?

Samuela be mero matamata sibona, to Hopini bona Pineha edia kara ia tohotohoa lasi. Iehova be Samuela dekenai ia moale. Hanuaboi ta ai, Samuela ia mahuta lalonai, gadona ta ia kamonai ena ladana ia boiria. Ia toreisi, Eli dekenai ia heau lao, bona ia gwau: ‘Lau inai!’ To, Eli ia gwau: ‘Oi lau boiria lasi. Oi giroa lou bona oi mahuta.’ Samuela ia giroa lou bona ia mahuta. Bena ia kamonai lou. Nega ihatoina ai, Eli ia laloparara Iehova ese Samuela ia boiria. Eli ese Samuela ia hamaoroa bema gadona ia kamonai lou, ia gwau diba: ‘Iehova e, mani oi hereva. Emu hesiai tauna ia kamonai noho.’

Samuela ia giroa lou bona ia mahuta. Bena ia kamonai: ‘Samuela e! Samuela e!’ Ia haere: ‘Mani oi hereva, badina emu hesiai tauna be ia kamonai noho.’ Iehova ia gwau: ‘Eli oi hamaoroa, lau ese ia bona ena famili do lau panisia. Eli ia diba ena natudia memero be egu palai dubu lalonai kara dika idia karaia, to gau ta ia karaia lasi.’ Daba ai Samuela ese dubu ena iduara ia kehoa, vaia ia karaia bamona. Hahelaga tauna badana dekenai Iehova ena hereva gwauraia totona ia gari. To Eli ese ia boiria bona ia henanadai: ‘Natugu e, Iehova be dahaka ia gwau? Mani hereva ibounai oi gwauraia.’ Unai dainai Samuela ese Eli ia hamaoroa.

Samuela ia tubu daekau lalonai, Iehova be ia ida. Gabu ibounai dekenai, Israela taudia idia diba Samuela be Iehova ese ia abia hidi peroveta bona hahemaoro tauna.