Iehova ese Samuela ia hamaoroa: ‘Iese ena ruma dekenai oi lao. Iena natuna ta be Israela ena king ai do ia lao.’ Unai dainai Samuela ia lao. Natuna ginigunana ia itaia neganai, ia laloa: ‘Tau matamata be reana inai.’ To Iehova ese Samuela ia hamaoroa ia lasi. Iehova ia gwau: ‘Lau ese ta ena kudouna lau itaia, to ena toana sibona lau itaia lasi.’

Iese be ena natudia memero ma 6 ia abia mai. To Samuela ia gwau: ‘Iehova ese idia ta ia abia hidi lasi. Emu natudia ma haida idia noho, a?’ Iese ia gwau: ‘Mero dokona ia noho, ia be Davida. Ia be egu mamoe ia naria noho.’ Davida ia mai neganai, Iehova ese Samuela ia hamaoroa: ‘Tauna be inai!’ Samuela ese Davida ena kwarana ai oela ia bubua, ia horoa Israela ena king ai ia lao totona.

Gabeai, Israela taudia be Filistia taudia ida idia tuari, edia tuari tauna badana Goliata be idia totona ia tuari. Dina ta ta ai, Goliata be Israela taudia ia kirikirilaia. Ia boiboi: ‘Tau ta umui siaia mai lau ia tuari henia totona. Bema unai tauna ia kwalimu, ai be emu hesiai taudia ai do ai lao. To bema lau kwalimu, umui be emai hesiai taudia ai do umui lao.’

Davida ena kakadia be tuari taudia, idia totona Israela ena tuari kamepa dekenai aniani ia abia lao. Goliata ena hereva ia kamonai bona ia gwau: ‘Lau ese ia do lau tuari henia!’ King Saulo ese ia hamaoroa: ‘To oi be mero sibona.’ Davida ia gwau: ‘Iehova ese lau do ia durua.’

Saulo ese ena tuari dabua be Davida dekenai ia atoa, to Davida ia gwau: ‘Inai gaudia lau karaia bona lau tuari be hegeregere lasi.’ Davida be ena vilipopo ia abia bona sinavai dekenai ia lao. Nadi manadamanada 5 ia abia bona ena puse lalonai ia udaia. Bena Davida be Goliata dekenai ia heau lao. Unai tau badana ia boiboi: ‘Iniseni oi mai, mero maragina. Emu hidio be guba manudia bona uda animal dekenai do lau henia.’ Davida ia gari lasi. Ia boiboi: ‘Tuari kaia bona io ida oi mai lau oi tuari henia totona, to lau be Iehova ena ladana ai lau mai. Oi be ai ida oi tuari lasi, to Dirava oi tuari henia noho. Ibounai do idia diba Iehova ena siahu be bada herea, tuari kaia eiava io ia hereaia. Umui be emai imana dekenai do ia atoa.’

Davida ese nadi ta be ena vilipopo ai ia atoa, ia hagiroa goada bena ia negea. Iehova ena heduru dainai, nadi be Goliata ena baguna lalonai ia vareai. Goliata be tano dekenai ia moru. Bena Filistia taudia idia heau boio. Davida hegeregerena Iehova oi abidadama henia, a?

Davida ese Goliata ia hamasea murinai, King Saulo ese Davida be ena ami ena gunalaia tauna ai ia halaoa. Davida be tuari momo ai ia kwalimu, bona ena ladana ia bada. Ia be tuari amo ia giroa mai neganai, hahine idia mavaru bona ane idia abia: ‘Saulo ese taunimanima tausen momo ia hamasea, bona Davida ese taunimanima ten tausen momo ia hamasea!’ Saulo ia mama bona ia ura Davida ia alaia.

Davida be hap ia gadaralaia namonamo tauna. Dina ta Davida be Saulo totona hap ia gadaralaia lalonai, Saulo ese ena io be Davida dekenai ia negea. Davida ia siri haraga bona io be haba ai ia kamokau. Unai murinai, Saulo be nega momo ia hekwarahi Davida ia alaia totona. To, Davida ia heau lao bona tano kaukau dekenai ia hunia.

Saulo be tatau 3,000 ida Davida tahua totona idia lao. Bona kohua ta lalonai idia vareai, to Saulo ia diba lasi unai be Davida bona ena tatau edia hunia gabuna. Davida ena tatau idia gwau: ‘Inai be nega namona Saulo oi alaia totona.’ Davida be ia rau lao Saulo badinai bona iena kouti rimuna ia utua oho. Saulo ia diba lasi. Unai murinai, Davida ia mamia, Iehova ese ia abia hidi king ia matauraia lasi. Ia ese ena tatau ia koua Saulo ia alaia lasi totona. Danu Saulo dekenai ia boiboi, oi lau hamasea diba to lau karaia lasi. Saulo ese ena lalohadai Davida dekenai do ia haidaua, a?

Lasi. Saulo ese Davida ia tahua noho. Hanuaboi ta Davida bona ena vavana Abisai be Saulo ena kamepa dekenai idia vareai. Saulo ia gimaia tauna Abinere be ia mahuta. Abisai ia gwau: ‘Inai be nega namona! Ia lau hamasea be namo.’ Davida ia haere: ‘Iehova ese Saulo do ia panisia. Iena io bona ranu hodu sibona ita abia bona ita lao.’

Davida be ororo ta dekenai ia daekau, unuseniai Saulo ena kamepa ia itaia diba. Bona ia boiboi: ‘Abinere, dahaka dainai emu king oi gimaia lasi? Saulo ena ranu hodu bona io be edeseni?’ Saulo ia laloparara unai be Davida ena gadona neganai, ia gwau: ‘Oi ese lau oi hamasea diba, to oi karaia lasi. Lau diba gabeai oi be Israela ena king ai do oi lao.’ Saulo be ena ruma dekenai ia giroa lou. To Saulo ena famili ibounai be Davida idia inai henia lasi.