King Saulo ena natuna ginigunana Ionatana be tuari tauna goadana. Davida ia gwau Ionatana be ugava bamona ia haraga bona ena goada be laiona bamona. Dina ta Ionatana ese ororo ai Filistia tuari taudia 20 ia itaia. Iena tuari kohu huaia tauna ia hamaoroa: ‘Idia do ita tuari henia bema Iehova ese ita dekenai toa ta ia henia. Bema Filistia taudia idia gwau do ita daekau lao, anina be idia do ita tuari henia.’ Bona Filistia taudia idia boiboi: ‘Daekau mai bona ita tuari!’ Vadaeni idia rua be ororo idia daekau bona unai tuari taudia idia halusia.

Ionatana be Saulo ena natuna ginigunana dainai, reana king ai do ia lao diba. To Ionatana ia diba Iehova ese Davida ia abia hidi Israela ena king ai ia lao totona, to Ionatana be ia mama lasi. Ionatana bona Davida be tura namodia. Idia gwauhamata ta ta do idia naria bona gimaia. Ionatana ese edia hetura karana ia hamomokania totona, Davida dekenai iena kouti, tuari kaia, peva, bona beleta ia henia.

Davida be Saulo amo ia heau neganai, Ionatana ia lao bona Davida ia hamaoroa: ‘Oi goada, bona oi gari lasi. Iehova ese oi ia abia hidi king ai oi lao totona. Egu tamana be unai ia diba.’ Ionatana bamona tura namona ta oi ura, a?

Nega momo, Ionatana be ena turana durua totona kahirakahira ena mauri ia haboioa. Ia diba King Saulo ia ura Davida ia hamasea, unai dainai ena tamana ia hamaoroa: ‘Davida oi hamasea be kara dika badana, ia be kerere ta ia karaia lasi.’ Saulo be Ionatana dekenai ia badu dikadika. Lagani haida murinai, Saulo bona Ionatana be tuari ai idia mase.

Ionatana ia mase murinai, Davida be Ionatana ena natuna mero Mefiboseta ia tahua. Davida ese Mefiboseta ia davaria neganai, ia hamaoroa: ‘Emu tamana be egu tura namona dainai, lau ese oi do lau naria. Egu ruma ai do oi noho bona egu teibolo ai do oi aniani.’ Davida be ena tura namona Ionatana ia laloaboio lasi.

Saulo ia mase murinai, Davida be king ai ia lao. Iena mauri lagani be 30. Lagani haida murinai, hanuaboi ta ai ia be ruma ena guhi ataiai ia noho neganai, hahine hairaina ta ia itaia. Davida ia kamonai unai hahine ena ladana be Bataseba bona tuari tauna Uria ena adavana. Davida be hereva ia siaia Bataseba be iena ruma dekenai ia mai totona. Idia mahuta hebou, bona Bataseba ia rogorogo. Davida ia ura ena kara dika do ia hunia. Unai dainai ena tuari biaguna ia hamaoroa tuari ia bada gabuna ai Uria do ia atoa. Bona Uria be tuari ai ia mase, bena Davida ese Bataseba ia adavaia.

To Iehova be idia vara kara dikadia ibounai ia itaia. Dahaka do ia karaia? Iehova ese peroveta tauna Natana be Davida dekenai ia siaia. Natana ia gwau: ‘Taga tauna be mai ena mamoe momo herea, to ogogami tauna be mai ena mamoe natuna tamona sibona. Bona ia lalokau henia bada. To taga tauna ese ogogami tauna ena mamoe tamona ia abia.’ Davida ia badu dikadika bona ia gwau: ‘Unai taga tauna ia mase be namo!’ Bena Natana ese Davida ia hamaoroa: ‘Oi be unai taga tauna!’ Unai hereva ese Davida ena kudouna ia makohia bona Natana dekenai ia gwau: ‘Lau be Iehova dekenai lau kara dika.’ Inai kara dika ese Davida bona ena famili dekenai hekwakwanai momo ia havaraia. Iehova ese Davida ia panisia, to ia hamasea lasi badina ia hereva momokani bona ia manau.

Davida ia ura Iehova totona dubu helaga do ia haginia, to Iehova ese Davida ena natuna mero Solomona ia abia hidi. Davida be Solomona totona gaudia ia abia hegaegae bona ia gwau: ‘Iehova ena dubu helaga be do ia hairai momokani be namo. Solomona be mero matamata, to ia durua totona kohu do lau hegaegaelaia.’ Davida be unai gaukara totona kontribiusen moni bada herea ia henia. Bona gaukara idia diba namonamo taudia ia abidia. Golo bona siliva ia gogoa, bona Turo bona Sidono amo sida au ia abia mai. Davida ena mauri dokona ai, Solomona dekenai dubu helaga haginia ena palani ia henia. Davida ia gwau: ‘Iehova ese lau ia durua inai gaudia lau torea oi totona. Iehova ese oi do ia durua. Oi gari lasi. Oi goada bona gaukara oi karaia.’