Solomona be Israela ena king ai ia lao murinai, Iehova ese ia nanadaia: ‘Oi ura gauna mani oi noia, do lau henia.’ Solomona ia gwau: ‘Lau be mero sibona, bona lau diba lasi dahaka lau karaia noho. Mani lau dekenai aonega oi henia, unai amo emu taunimanima do lau naria namonamo.’ Iehova ia gwau: ‘Badina aonega totona oi noinoi, oi dekenai aonega do lau henia, emu aonega ese tanobada taudia edia aonega do ia hereaia. Danu taga bada do lau henia. Bona, bema lau oi kamonai henia, do oi mauri daudau.’

Solomona be dubu helaga ia haginia matamaia. Golo, siliva, au bona nadi namodia ia gaukaralaia. Gaukara idia diba momo tatau bona hahine tausen ese dubu helaga idia haginia. Lagani 7 murinai, dubu helaga idia haginia ore bona Iehova dekenai idia ura henia. Unuseniai boubou patana ta ia noho, bona mai ena boubou gaudia. Solomona be boubou patana vairanai ia tui diho bona ia guriguri: ‘Iehova e, inai dubu helaga ena bada bona ena hairai be hegeregere lasi oi totona, to mani emai tomadiho karana oi abia dae bona emai guriguri oi kamonai henia.’ Iehova ese dubu helaga bona Solomona ena guriguri be edena bamona ia laloa? Solomona ia guriguri murinai, lahi be guba amo ia diho bona boubou patana latanai idia noho bouboudia ia gabua ore. Iehova be unai dubu helaga ia abia dae. Israela taudia be unai idia itaia neganai, idia moale bada.

King Solomona ena aonega dainai Israela bona daudau tanodia ai idia noho taudia be ia idia diba. Solomona dekenai idia mai edia hekwakwanai hamaoromaoroa totona. Sieba ena kwini danu ia mai bona henanadai aukadia ia henia. Solomona ena haere ia kamonai neganai, ia gwau: ‘Taunimanima edia hereva lau abia dae lasi, to hari lau itaia emu aonega be bada herea. Emu Dirava, Iehova ese oi ia hanamoa bada.’ Israela besena ena mauri be ia namo, bona taunimanima idia moale. To gaudia do idia idau.

Solomona be Iehova ia tomadiho henia neganai, Israela ai maino ia noho. To Solomona ia adavaia idau tano hahine momo be kaivakuku idia tomadiho henia. Metairametaira, Solomona danu be kaivakuku ia tomadiho henia matamaia. Iehova be ia badu. Solomona ia hamaoroa: ‘Israela basileia be emu famili amo do lau kokia bona kahana rua ai do ia parara. Kahana badana be emu hesiai tauna ta dekenai do lau henia, bona emu famili be kahana maragina sibona do idia lohiaia.’

Danu, Iehova ese dala ma ta ai ena disisen ia hahedinaraia namonamo. Solomona ena hesiai tauna, Ieroboama be dala ai ia lao noho neganai, peroveta tauna Ahaisa ida ia hedavari. Ahaisa ese ena dabua ia darea kahana 12 dekenai bona Ieroboama ia hamaoroa: ‘Iehova ese Solomona ena famili amo Israela ena basileia do ia kokia bona kahana rua dekenai do ia hapararaia. Inai dabua ena kahana 10 oi abia, badina oi ese iduhu 10 do oi lohiaia.’ King Solomona be unai ia kamonai bona ia ura Ieroboama ia hamasea! Unai dainai Ieroboama be Aigupito dekenai ia heau lao. Daudau lasi, Solomona ia mase bona iena natuna mero Rehoboama be king ai ia lao. Bena Ieroboama ia mamia ia be seif dainai Israela dekenai ia giroa lou.

Israela ena tau badadia be Rehoboama idia hamaoroa: ‘Bema taunimanima oi kara namo henia, oi do idia badinaia.’ To Rehoboama ena tura matamatadia idia gwau: ‘Namona be taunimanima oi kara auka henia! Edia gaukara ena metau oi habadaia!’ Rehoboama be iena turadia edia sisiba ia badinaia. Taunimanima ia dagedage henia, bona ia dekenai idia gwau-edeede. Idia ese Ieroboama be iduhu 10 ena king ai idia halaoa bona Israela basileiana ai ia lao. Iduhu ma rua be Iuda basileiana ai ia lao, bona taunimanima be Rehoboama idia badinaia. Israela ena iduhu 12 be hari ia parara.

Ieroboama ia ura lasi ena taunimanima be tomadiho totona Rehoboama ena basileia, Ierusalema dekenai do idia lao. Oi diba dahaka dainai? Ieroboama ia gari badina taunimanima ese Rehoboama do idia badinaia. Unai dainai ia ese golo boromakau rua ia karaia bona ena taunimanima ia hamaoroa: ‘Ierusalema be daudau. Iniseniai umui tomadiho diba.’ Taunimanima be golo boromakau kaivakuku idia tomadiho henia matamaia bona Iehova idia laloaboio lou.