Israela ena iduhu 10 basileia ena king momo be kara dikadia idia karaia, to Ahaba ena kara dika ese edia kara dika ia hereaia. Ahaba ese Bala ia tomadiho henia hahine dikana ladana Iesebele ia adavaia. Bona Ahaba bona Iesebele ese Israela tanona be Bala tomadiho henia karadia amo idia hahonua bona Iehova ena peroveta taudia idia hamasea. Iehova be dahaka ia karaia? Peroveta tauna Elia ia siaia Ahaba ia hereva henia totona.

Elia ese King Ahaba ia hamaoroa ena kara dikadia dainai Israela ai medu do ia diho lasi. Lagani toi mai kahana lalonai, uma aniani idia tubu lasi bona taunimanima idia hitolo. Gabeai Iehova ese Elia be Ahaba dekenai ia siaia lou. King ia gwau: ‘Oi be kerere karaia tauna! Oi dainai, inai ibounai idia vara.’ Elia ia haere: ‘Lau ese medu lau koua lasi. Oi ese Bala oi tomadiho henia dainai inai ia vara. Unai do ita itaia. Karamele Ororona ataiai Israela besena bona Bala ena peroveta taudia oi haboua.’

Taunimanima be ororo ai idia haboua. Elia ia gwau: ‘Abia hidi umui karaia. Bema Iehova be Dirava momokani, ia umui badinaia. Bema Bala be dirava momokani, ia umui badinaia. Bala ena peroveta taudia 450 ese boubou gaudia do idia hegaegaelaia bona edia dirava dekenai do idia boiboi, bona lau ese boubou gauna ta do lau hegaegaelaia bona Iehova dekenai do lau boiboi. Lahi ia siaia diho tauna be Dirava momokani.’ Taunimanima idia lalotamona.

Bala ena peroveta taudia be edia boubou gaudia idia hegaegaelaia. Bona edia dirava dekenai idia boiboi: ‘Bala e, ai oi haere henia!’ Bala ia haere lasi neganai, Elia ia gwau: ‘Umui boiboi badabada. Ia mahuta bona ta ese ia hanogaia be namo.’ Bala ena peroveta taudia be idia boiboi ela bona hanuaboi. To haere ta be lasi.

Elia ese boubou patana ai ena boubou ia atoa bona ranu ia bubua. Bena ia guriguri: ‘Iehova e, taunimanima do idia diba oi be Dirava momokani.’ Karaharaga, Iehova be guba amo lahi ia hadihoa bona boubou gauna ia gabua ore. Taunimanima idia boiboi: ‘Iehova be Dirava momokani!’ Elia ia gwau: ‘Bala ena peroveta taudia umui dogoatao!’ Unai dina ai, Bala ena peroveta taudia 450 idia hamasea.

Ori korema ta be davara latanai ia hedinarai neganai, Elia ese Ahaba ia hamaoroa: ‘Lai gubana do ia mai. Emu kariota amo ruma dekenai oi lao.’ Guba ai ori idia korema matamaia, bona lai ia toa, bona medu bada ia diho. Vadaeni, medu lasi negana ia ore. Ahaba be kariota amo ia heau haraga. Elia be Iehova ena heduru amo kariota ia heau hanaia haraga! To Elia ena hekwakwanai ibounai be unai nega ai idia ore, a? Mani ita itaia.

Iesebele ese Bala ena peroveta taudia dekenai ia vara gauna ena sivarai ia kamonai, bona ia badu dikadika. Elia dekenai hereva ia siaia: ‘Kerukeru do oi mase, Bala ena peroveta taudia hegeregerena.’ Elia be ia gari bada bona tano kaukauna dekenai ia heau lao. Ia guriguri: ‘Iehova e, lau hesiku vadaeni. Lau mase be namo.’ Elia ia hesiku bada dainai, au henunai ia mahuta.

Aneru ta ese Elia ia hanogaia bona mai gado namo ida ia gwau: ‘Oi toreisi bona aniani.’ Elia ia itaia, beredi ta be nadi siahudia latanai bona ranu hodu danu. Ia aniani bona ranu ia inua bena ia mahuta lou. Aneru ese ia hanogaia lou bona ia gwau: ‘Oi aniani. Goada oi abia be namo.’ Unai dainai Elia ma ia aniani lou. Bena dina 40 bona hanuaboi 40 ia raka ela bona Horeba Ororona dekenai ia ginidae. Elia be kohua lalonai ia vareai bona ia mahuta. To Iehova be ia dekenai ia gwau: ‘Elia e, oi be iniseniai dahaka oi karaia noho?’ Elia ia haere: ‘Israela taudia be edia gwauhamata oi dekenai idia makohia. Emu boubou patana idia hamakohia bona emu peroveta taudia idia hamasea. Lau idia ura hamasea danu.’

Iehova ia gwau: ‘Oi raka-lasi bona ororo ai oi gini.’ Matamanai, lai goadana be kohua ia hanaia. Gabeai, tano mareremarere bena lahi. Dokonai, Elia ese gadona ta ia kamonai. Iena kouti amo ena vairana ia koua bona ia gini. Bena Iehova ese ia nanadaia, dahaka dainai oi heau? Elia ia gwau: ‘Lau sibona lau do noho.’ To Iehova ese ia hamaoroa: ‘Oi be sibona oi noho lasi. Israela ai taunimanima 7,000 be lau idia do tomadiho henia noho. Oi lao bona Elisaia oi abia hidi, emu gabu do ia abia.’ Maoromaoro, Elia be Iehova ena hereva hegeregerena ia karaia. Oi laloa Iehova ese oi do ia durua iena ura oi karaia totona, a? Oibe. Mani medu lasi negana ai ia vara gauna ita itaia.