Medu lasi negana ai, Iehova ese Elia ia hamaoroa: ‘Sarepata dekenai oi lao. Unuseniai vabu ta ese oi dekenai aniani do ia henia.’ Siti ena geiti ai, Elia ese ogogami vabu ta ia itaia lahi au ia gogoa noho. Elia ese ranu totona vabu ia noia. Vabu be ranu abia totona ia lao neganai, Elia be ia dekenai ia boiboi: ‘Mani beredi ta oi abia mai danu.’ To vabu ia gwau: ‘Lau dekenai beredi be lasi oi lau henia totona. Paraoa bona oela sisina sibona ia noho lau bona egu natuna mero totona.’ Elia ia gwau: ‘Iehova ia gwauhamata bema lau totona beredi oi karaia, emu paraoa bona oela do ia ore lasi ela bona medu do ia diho.’

Unai dainai vabu ia lao bona Iehova ena peroveta tauna totona beredi ia karaia. Iehova ia gwauhamata hegeregerena, vabu bona ena natuna mero edia aniani ia ore lasi ela bona medu ia diho. Iena paraoa hodu bona oela be hanaihanai idia honu.

Bena dika ta ia vara. Vabu ena natuna mero maragina ia gorere bada bona ia mase. Heduru totona Elia ia noia. Elia ese vabu ena imana amo mero ia abia bona ataiai daiutu dekenai ia abia daekau. Bedi latanai ia atoa bona ia guriguri: ‘Iehova e, mani inai natuna oi hamauria lou.’ Dahaka dainai Iehova ese unai ia karaia be hoa kara hereadaena? Badina ita diba, tau ta be guna mase amo ia toreisi lou lasi. Bona inai vabu bona ena natuna mero be Israela taudia lasi.

To mero be ia mauri lou, bona ia hahodi matamaia! Elia ese vabu ia hamaoroa: ‘Itaia! Emu natuna ia mauri.’ Ia moale bona Elia dekenai ia gwau: ‘Momokani oi be Dirava ena hesiai tauna. Unai lau diba badina oi ese Iehova ena hereva sibona oi gwauraia.’

Ieserele ai King Ahaba be ena windo ai tau ta ladana Naboto ena vain uma ia itaia diba. Ahaba be unai vain uma gabu ia ura henia, bona ia ura Naboto amo do ia hoia. To Naboto ia ura lasi vain uma ia hoihoilaia, badina Iehova ena Taravatu ai, sene taudia edia tano hoihoilaia karana be maoro lasi. Ahaba be Naboto ia matauraia, a? Lasi. Ahaba ia badu dikadika, ia ura lasi ena daiutu ia rakatania bona ia ura lasi aniani.

Ahaba ena adavana, Kwini dikana Iesebele, ia gwau: ‘Oi be Israela ena king. Oi ura henia gauna be oi abia diba. Oi totona unai tano do lau abia.’ Iesebele be siti ena tau badadia dekenai revareva ia torea bona ia gwau, Naboto be Dirava ia gwauraia dika bona nadi amo ia do idia hodoa mase. Tatau badadia be Iesebele ena hereva hegeregerena idia karaia, bena Iesebele be Ahaba ia hamaoroa: ‘Naboto ia mase. Vain uma be oiemu.’

Iesebele ese Naboto sibona ia hamasea lasi. To Iehova idia lalokau henia taudia momo ia hamasea danu. Iesebele be kaivakuku ia tomadiho henia bona kara dikadia ma haida ia karaia danu. Iehova be Iesebele ese ia kara dika ibounai ia itaia. Ia dekenai dahaka do ia karaia?

Ahaba ia mase murinai, iena natuna Iehorama be king ai ia lao. Iehova ese tau ta ladana Iehu ia siaia Iesebele bona iena famili ia panisia totona.

Iehu be kariota amo Iesebele ia noho gabuna Ieserele dekenai ia lao. Iehorama be kariota amo ia mai bena Iehu ida ia hedavari, bona ia henanadai: ‘Ita huanai maino ia noho, a?’ Iehu ia gwau: ‘Emu sinana Iesebele be kara dikadia ia karaia noho dainai maino be lasi.’ Iehorama ia giroa bona ia ura heau. To Iehu ese diba amo Iehorama ia pidia bona ia mase.

Bena Iehu be Iesebele ena ruma dekenai ia lao. Iesebele ia kamonai Iehu ia mai noho neganai, makeup ia atoa, huina ia hanamoa bona ataiai daiutu ena windo ai ia naria. Iehu ia ginidae neganai, Iesebele hanamoa hereva ta ia gwauraia lasi. Iehu be kwini ena badinai idia gini taudia dekenai ia boiboi: “Ia negea diho!” Bona Iesebele be windo amo idia negea diho tano dekenai bona ia mase.

Unai murinai, Iehu ese Ahaba ena natudia memero 70 ia hamasea bona Bala tomadiho karana ia kokia. Iehova be gau ibounai ia diba bona iena nega maorona ai kara dika idia karaia taudia do ia panisia karana oi itaia, a?