Haida Edia Haheitalai Namona Dainai Hahenamo Momo Lau Abia

Lau be Quebec siti ai lau vara, bona Quebec provinsi ai French gado idia herevalaia Canada taudia idia noho. Egu tama sina, Louis bona Zélia ese lau idia naria namo herea. Egu tamana be hemarai tauna bona ia be duahiduahi karana ia ura henia bada. To lau be toretore karana lau moalelaia bona lau ura nega ta journalist ai do lau lao.

Egu mauri lagani be 12 neganai, egu tamana ida ia gaukara tauna Rodolphe Soucy bona ena turadia ese ai idia vadivadi henia. Idia be Iehova ena Witnes taudia. Lau be Witnes taudia lau diba namonamo lasi bona edia tomadiho lau ura henia lasi. To, Baibel amo henanadai ta ta idia haerelaia karana lau ura henia. Egu tama sina danu be unai idia moalelaia dainai Baibel stadi ai abia dae.

Unai nega ai lau be Katolik sikuli ta dekenai lau lao. Nega haida, Baibel stadi amo lau dibaia gaudia be egu sikuli turadia dekenai lau herevalaia. Nega ta, tisa taudia, idia be pris taudia danu, ese unai sivarai idia kamonai. Idia ta ese egu hereva ia hakoikoia totona Baibel ena siri ia gaukaralaia lasi, to class taudia vairanai lau ia gwauraia gwau-edeede tauna. Ena be unai ia vara dainai lau lalohisihisi, to lau moale badina lau diba unai tomadiho ena sikuli ese idia hadibaia gaudia be Baibel ena hereva hegeregerena lasi. Lau laloparara unai sikuli lau rakatania be namo. Egu tama sina edia gwaumaoro dainai sikuli ma ta dekenai lau lao.

HARORO GAUKARA LAU URA HENIA MATAMAIA

Baibel lau stadilaia noho, to lau goada momokani lasi badina lau gari ruma-ta-ruma-ta haroro gaukara lau karaia totona. Katolik dubu be ita karaia haroro gaukara idia inai henia momokani. Maurice Duplessis be Quebec gavamani ena minista ta, bona ia be Katolik dubu ida ia gaukara hebou. Bona ena gwaumaoro dainai, momo ese Witnes taudia idia dagedage henia. Unai negai haroro gaukara karaia totona haheauka karana be mai anina bada.

Gilead Sikuli ena klas namba nain amo ia gradueit tadikaka ta, John Rae, ese lau ia durua gari karana lau hanaia totona. John be ekspiriens tadikaka, manau tauna, bona ia auka lasi ia oi hereva henia totona. Ia be maoromaoro lau do ia sisiba henia lasi, to ena haheitalai namodia amo gau momo lau dibaia. John be French gado ia diba namonamo lasi dainai, nega momo haroro gaukara ai ia lau bamoa bona lau durua French gado ia diba totona. John lau bamoa karana ese lau ia durua Witnes tauna goadana ai lau lao totona. Witnes taudia ida lau hedavari bona lagani ten idia hanaia murinai, May 26, 1951 ai, bapatiso lau abia.

Quebec siti ai, emai kongrigeisen maragina lalonai painia taudia be momo. Edia haheitalai namona ese lau ia durua painia gaukara lau karaia totona. Unai negai, ruma ta ruma ta haroro gaukara ai Baibel sibona ai gaukaralaia. Pablikeisen ai gaukaralaia lasi dainai, Baibel siridia ai gaukaralaia namonamo. Unai dainai, lau gaukara goada Baibel siri lau laloatao totona, unai amo hereva momokani do lau gwauraia diba. To, momo idia ura lasi Katolik Dubu ese ia abia dae lasi Baibel idia duahia.

Lagani 1952 ai, abidadama taihu ta Simone Patry, lau adavaia. Ai be Montreal dekenai ai lao, bona lagani ta murinai emai natuna kekeni Lise ia vara. Ena be ai do headava lasi lalonai painia gaukara lau rakatania, to Simone bona lau be kohu momo lasi maurina ai noholaia, unai amo egu ruma bese ida kongrigeisen ena gaukara idauidau ai durua diba.

Lagani ten idia hanaia murinai, lau laloa egu haroro gaukara lau habadaia be namo. Lagani 1962 ai, Canada Betele ai elda taudia ese hua tamona lalonai idia karaia Kingdom Ministry School totona lau lao bona tadikaka Camille Ouellette ida daiutu tamona dekenai ai noho. Camille be mai ena ruma bese to ia ese haroro gaukara ia goadalaia, unai ese lau ia durua bada. Unai negai, Quebec dekenai mai edia natudia tama sina momo ese painia gaukara idia karaia be auka, to Camille be painia gaukara ia karaia. Ai noho hebou negadiai, lau ia hagoadaia unai lau lalohadailaia totona. Hua haida murinai, lau laloparara regula painia gaukara lau karaia lou diba. Haida idia laloa unai be lalohadai maorona lasi, to lau diba bema haroro gaukara habadaia totona lau hekwarahi Iehova ese lau do ia hanamoa.

SPESEL PAINIA TOTONA QUEBEC SITI DEKENAI AI GIROA LOU

Lagani 1964 ai, Simone bona lau idia abia hidi Quebec siti ai emai taoni dekenai spesel painia gaukara ai karaia totona. Hari haroro gaukara ai karaia diba to nega haida dagedage ai davaria.

Saturday adorahi ta, Quebec siti ena taoni maragina ta Sainte-Marie ai pulisi ese lau idia arest. Pulisi ofesa ta ese lau ia abia lao pulisi steiseni dekenai bona dibura ruma ai lau ia atoa, badina ruma-ta-ruma-ta haroro gaukara karaia totona permit lau abia lasi. Gabeai, diadi ta ladana Baillargeon dekenai lau idia abia lao, bona momo be unai tauna idia gari henia. Ia be lau ia hamaoroa egu loea be daika. Lau ese Glen How,a momo idia dibaia Witnes taudia edia loea, ena ladana lau gwauraia neganai, ia lalohekwarahi bona ia gwau: “Oh lasi! Unai tauna lasi!” Glen How be loea namona ta bona unai nega ai kota momo lalonai Witnes taudia ia durua. Gabeai kota ese lau idia hadibaia lau totona idia gwauraia samania hereva idia kokia.

Quebec ai iseda haroro gaukara ai dagedage karana ia vara dainai, ia auka hebou gabuna ta ai rentaia totona. Emai kongrigeisen maragina ese garage ta idia davaria, bona ia lalonai heater ia noho lasi. Keru bada neganai, tadikaka be oil heater ta idia gaukaralaia. Nega momo hebou ia do matamaia lasi lalonai, unai heater badinai hora haida do ai gini, bona ekspiriens namodia amo ta ta ai hagoadaia.

Lagani momo lalonai haroro gaukara ia bada ia lao karana ai itaia neganai ai moale. Lagani 1960 lalonai, Quebec siti ai kongrigeisen maragidia haida idia noho, bona Côte-Nord region bona Gaspé Peninsula be idia gaukara hebou. Hari, unai gabu dekenai tadikaka taihu be momo, bona Kingdom Hall namodia ai idia hebou.

SEKIT GAUKARA TOTONA AI IDIA BOIRIA

Lagani 1970 ai, Simone bona lau idia boiria sekit gaukara ai karaia totona. Bena lagani 1973 ai, distrik gaukara ai karaia. Unai lagani lalodiai, sekit gaukara idia karaia tadikaka, Laurier Saumurb bona David Splane,c amo gau momo lau dibaia. Hanaihanai hebouhebou badadia idia ore murinai, lau bona David be emai hadibaia gaukara hanamoa daladia do ai herevalaia. Lau laloatao nega ta David be lau ia hamaoroa: “Léonce, emu tok dokona lau moalelaia. Unai be tok namona, to oi henia hereva namodia amo tok toi lau karaia diba!” Egu tok ai infomeisen momo lau gwauraia. Namona be egu tok lau hakwadogia.

Distrik naria taudia edia gaukara ta be sekit gaukara idia karaia tadikaka do idia hagoadaia. To, Quebec ai pablisa momo be lau idia diba namonamo. Nega momo edia sekit lau vadivadi neganai, idia ura haroro gaukara ai lau idia bamoa. Ena be idia ida lau gaukara hebou karana lau moalelaia, to nega be lasi sekit naria taudia lau durua totona. Nega ta sekit naria tauna ta be lau ia hadibaia: “Lau moale tadikaka dekenai emu nega oi henia, to oi laloaboio lasi inai wiki ai oi be lau oi vadivadi henia. Lau danu be heduru lau ura!” Unai sisiba namona ese egu gaukara ia durua.

Lagani 1976 ai, karaharaga gau ta ia vara. Simone, egu lalokau adavana, be gorere badana ta ia abia bona ia mase. Ena hesiai gaukara ia atoa guna bona Iehova ia lalokau henia dainai ia be egu turana namona ai ia lao. Haroro gaukara ai lau bisi karana ese lau ia durua egu hahine ena mase lau haheaukalaia totona, bona Iehova lau tanikiu henia badina unai nega aukadia lalonai lau ia durua. Gabeai, English gado ia diba painia taihu ta Carolyn Elliott, lau adavaia, ia be Quebec dekenai ia mai pablisa be momo lasi gabudia ai heduru ia henia totona. Carolyn be ia gari lasi taunimanima ia hereva henia totona, hegeregere idia hemarai bona sibona idia noho taudia ia laloa bada. Lau ida sekit gaukara ai karaia negadiai lau ia durua bada.

MAI ANINA BADA LAGANINA

Lagani 1978 January ai, lau idia hadibaia Quebec ai Painia Gaukara Sikuli ena klas ginigunana do lau hadibaia totona. Lau gari sisina, badina unai be sikuli matamatana lau bona stiuden taudia dekenai danu. To lau moale, badina unai klas ginigunana ai ekspiriens painia taudia be momo. Ena be lau be hadibaia tauna, to stiuden taudia amo gau momo lau dibaia!

Gabeai, lagani 1978 ai, “Victorious Faith” intanesinol Hebouhebou be Montreal’s Olympic Stadium ai idia karaia. Quebec ai, unai be hebouhebou badana, badina unai hebou ai idia mai taudia edia namba be 80,000 mai kahana. Lau idia abia hidi unai hebouhebou ai News Service Department ida lau gaukara totona. Journalist taudia momo lau hereva henidia bona lau moale badina idia ese iseda hebouhebou totona gau namodia momo idia torea. Hora 20 bamona lalonai televisen bona reidio intaviu idia karaia, bona atikol handred bamona idia printaia. Unai dala amo momo ese Iehova bona ena taunimanima idia dibaia!

TERITORI MA TA DEKENAI AI LAO

Lagani 1996 ai, senisi badana ta ia vara. Quebec ai, lau bapatiso negana amo French gado teritori dekenai lau noho bona hari egu asainmen be Toronto dekenai, unuseniai English gado distrik gaukara lau karaia. Lau mamia lau hegeregere lasi tok do lau henia totona, badina English gado lau diba namonamo lasi. Lau guriguri loulou bona Iehova dekenai lau tabekau be namo.

Toronto ai distrik gaukara lau hamatamaia neganai lau gari, to hari unai gabu ai lagani rua lalonai ai karaia gaukara lau moalelaia. Carolyn be mai haheauka ida lau ia durua English gado lau dibaia totona, bona tadikaka ese lau idia durua bona hagoadaia bada. Daudau lasi, tura matamatadia ai davaria.

Wiken ena sekit hebouhebou totona ai hegaegae bona gaukara ma haida lau karaia, to nega momo Friday adorahi ai, hora tamona bamona ruma-ta-ruma-ta haroro gaukara do lau karaia. Reana haida idia laloa, ‘Wiken ai hebouhebou do ita abia, dahaka dainai ia lao haroro?’ To, lau davaria haroro gaukara ai haida ida herevahereva karana ese lau ia hagoadaia. Hari danu, haroro gaukara lau karaia dainai lau moale.

Lagani 1998 ai, lau bona Carolyn emai asainmen idia haidaua bona Montreal dekenai spesel painia gaukara ai karaia. Lagani momo lalonai, lau karaia asainmen ma ta be spesel intaviu lau hegaegaelaia, bona nius halasia oreadia ida lau gaukara unai amo taunimanima be Iehova ena Witnes Taudia edia ladana do idia hadikaia lasi. Lau bona Carolyn be mai moale ida tano ma ta amo Canada dekenai idia mai taudia ai haroro henia bona idia be mai ura ida Baibel amo diba idia abia.

Lau bapatiso bona lagani 68 lalonai Iehova ena hesiai tauna ai lau lao karana lau laloa lou neganai, momokani Iehova ese lau ia hanamoa. Haroro gaukara lau moalelaia bona momo lau durua hereva momokani idia dibaia totona be hahenamo badana. Egu natuna kekeni, Lise, bona ena adavana be edia natudia idia bada vadaeni dainai, regula painia gaukara idia hamatamaia. Ena haroro gaukara ia goadalaia karana lau itaia neganai, unai ese lau ia hamoalea. Egu Keristani tadikaka lau tanikiu henidia bada badina edia haheitalai bona sisiba namodia ese lau ia durua, hereva momokani dekenai lau gini goada bona tiokratik asainmen idauidau lau karaia. Lau dibaia gauna be inai, mai abidadama ida emu asainmen oi karaia diba bema Iehova ena lauma helaga dekenai oi tabekau. (Sal. 51:11) Hanaihanai Iehova lau tanikiu henia badina iena ladana lau hanamoa diba!​—⁠Sal. 54:6.