“Hebou Taudia Edia Vairanai” Iehova Hanamoa

KERISTANI heboudia amo Iehova ese ena taunimanima ia durua lauma dalanai idia goada noho totona. Hebou dekenai ita lao hanaihanai karana amo ita hahedinaraia Iehova ese ia henia gaudia ita laloa bada. Danu, hebou dekenai eda tadikaka ita durua ‘lalokau dekena amo kara namodia do idia karaia’ totona, unai be ta ta ita lalokau henia karana ia hahedinaraia dalana badana. (Heberu 10:24; Ioane 13:35) To, hebou dekenai eda tadikaka be edena bamona ita durudia diba?

Taunimanima Edia Vairanai Haere Henia

King Davida be sibona ena kara ia herevalaia: “Lauegu bese taudia dekenai, oiemu kara do lau hadibaia. Oiemu ladana be, hebou taudia edia vairanai do lau hanamoa. Hebou badana lalonai, lau ese oi do lau hanamoa.” “Unai neganai hebou badana lalonai, oi do lau tanikiu henia. Taunimanima momo edia vairana dekenai oi do lau hanamoa bada.” “Lohiabada e, lau ese oiemu taudia momo edia vairanai, hamauria sivaraina lau gwauraia hedinarai. . . . Lauegu udu bibina do lau koua lasi.”—Salamo 22:22, 25; 35:18; 40:9.

Aposetolo Paulo ena negai, Keristani taudia be tomadiho totona idia hebou neganai, idia danu ese Iehova bona ena hairai idia abidadama henia herevadia idia gwauraia hedinarai. Unai dala amo ta ta idia hagoadaia heheni, bona ta ta idia durua lalokau dekena amo kara namodia idia karaia totona. Iseda nega lalonai, Davida bona Paulo idia mase bona lagani handred momo idia hanaia murinai, ita diba momokani “Lohiabada ena Dina be kahirakahira do ia ginidae.” (Heberu 10:24, 25) Kahirakahira Satani ena tanobada dikana be dika bada do ia davaria, bona hekwakwanai ia bada daekau noho. ‘Do ita haheauka’ be namo, guna bamona lasi. (Heberu 10:36) Iseda tadikaka sibona ese ita idia hagoadaia diba ita haheauka noho totona.

Hari, guna bamona, dala ia noho abidadama taudia ta ta ese edia abidadama be “hebou taudia edia vairanai” idia gwauraia hedinarai totona. Ibounai ese unai idia karaia dalana ta be, kongregesen heboudia lalonai helai taudia dekenai idia henia henanadai haerelaia karana. Haere karana ese namo ia havaraia diba. Hegeregere, haere karana amo hekwakwanai hanaia eiava dadaraia daladia ita gwauraia hedinarai neganai, unai ese eda tadikaka edia lalona idia hagoadaia Baibel ena hakaua herevadia idia badinaia totona. Haere lalonai idia gwauraia to idia torea hanai lasi Baibel siridia eiava sibona eda stadi amo ita davaria gaudia ita gwauraia hedinarai neganai, unai ese ma haida ia durua diba edia stadi karana idia hanamoa totona.

Ita diba bema hebou dekenai haere ita henia, ita bona ma haida ese namo do ita davaria diba, bona unai ese Iehova ena Witnes taudia ibounai ia durua gari karana idia hanaia totona. Hebou dekenai elda bona hesiai taudia idia haere be gau badana, badina hebou dekenai haere henia karana bona hebou lao henia karana idia gunalaia be namo. To, bema ta ia davaria hebou dekenai haere ia henia totona be ia auka, edena bamona unai ia hanamoa diba?

Haere Karana Hanamoa Herevadia

Laloatao, haere henia karana be Iehova tomadiho henia karana. Germany dekenai ia noho Keristani taihu ta ese ena lalohadai haere henia karana dekenai ia herevalaia. “Lauegu haere karana amo lau hahedinaraia Satani ese Dirava ena taunimanima edia abidadama idia gwauraia hedinarai karana be ia koua diba lasi.” Unai kongregesen tamona ia bamoa bapatiso matamata tadikaka ta ia gwau: “Haere henia totona lau guriguri momo.”

Hegaegae namonamo. Bema stadi gaudia oi stadilaia guna lasi, haere oi henia totona be do ia auka bona emu haere ese namo bada do ia havaraia lasi. Kongregesen heboudia dekenai ita haere totona, heduru herevadia be Tiokratik Haroro Sikuli amo Heduru Oi Abia bukana ena rau 70 ese ia herevalaia.a

Tahua gauna ta oi atoa, hebou ta ta dekenai haere tamona oi henia totona. Unai ena anina be haere momo oi hegaegaelaia be namo, badina bema emu imana oi abia isi momo, reana stadi ia hakaua tadikakana be oi do ia boiria oi haere totona. Danu, reana ia oi hadibaia guna edena henanadai oi hegaegaelaidia vadaeni, oi haere totona. Unai be dala namona bema haere henia karana be emu nega ginigunana. Reana do oi ura lasi “hebou taudia edia vairanai” oiemu imana oi abia isi, to bema oi diba inai be emu paragraf bona hebou ia hakaua tadikakana be emu imana do ia tahua karana ese oi do ia hagoadaia oi haere totona.

Haere henia haraga. Gaukara aukana do ia auka herea bema karaia totona ena nega ita haidaua loulou. Hebou dekenai haere ta henia haraga karana ese ta ia durua diba. Do oi hoa bada badina haere ginigunana oi henia neganai, haere iharuana bona ihatoina totona be do ia auka lasi.

Sea maorona oi abia hidi. Haida idia davaria Kingdom Hall ena vaira kahana ai idia helai neganai haere idia henia diba. Edia matana veria gauna ta be lasi, bona hebou ia hakaua tadikakana ese edia imana ia itaia diba. Bema unai oi tohoa, laloaboio lasi ibounai idia kamonai totona oi haere badabada be namo, unai be gau badana bema kongregesen dekenai maikrofon idia loalaia lasi.

Kamonai namonamo. Inai kara ese oi do ia durua ta ia haerelaia gauna oi gwauraia lou lasi totona. Danu, reana haida edia haere dainai siri ta eiava point ta do oi laloa lou, bena unai amo edia haere oi habadaia diba. Nega haida, reana ekspiriens kwadogina amo idia haerelaia point oi hahedinaraia. Unai bamona haere karana ese heduru bada ia henia.

Sibona emu hereva amo haere dalana oi dibaia. Stadi gauna amo haere duahia karana ese ia hahedinaraia haere maorona oi davaria vadaeni, bona reana ia be dala namona oi haere matamaia totona. To, bema oi gaukara goada bona sibona emu hereva amo oi haere, unai ese ia hahedinaraia stadi ena point oi lalo-pararalaia. Iseda buka ai idia noho herevadia ta ta ita duahia hedinarai be namo lasi. Iehova ena Witnes taudia ese edia buka lalonai idia noho herevadia idia gwauraia kava lasi.

Stadi herevadia sibona gaukaralaia. Stadi dekenai idia noho lasi herevadia eiava stadi ena lalohadai badana ia koua herevadia haere dekenai ita gaukaralaia be maoro lasi. Unai ena anina be, stadi dekenai emu haere be mai anina bada be namo. Bena emui haere ese lauma dalanai umui do ia hagoadaia bona umui herevalaia sinado do ia habadaia.

Haida hagoadaia karana oi laloa. Haere ita henia ena badina badana be ma haida ita hagoadaia totona, unai dainai idia ita hamanokaia diba herevadia ita gwauraia toho lasi be namo. Danu, namo lasi paragraf ibounai oi haerelaia dainai haida be haere kwadogina do idia henia eiava idia haere lasi. Haere latadia eiava aukadia ese stadi ena anina ia koua. Haere kwadogidia ese anina namona idia havaraia diba, bona unai ese matamatadia do ia hagoadaia haere kwadogidia idia henia totona.

Hebou Idia Hakaua Tadikaka Edia Maduna

Hebou ia hakaua tadikakana ena maduna badana be, ma haida ia hagoadaia be namo. Ia hahedinaraia ia ese tadikaka bona taihu edia haere ibounai ia laloa bada dainai, edia haere ia kamonai namonamo bona gau ma haida ia laloa bada lasi to mai hemataurai ida haere ia henia tauna ia raraia. Bema hebou ia hakaua tadikakana ia kamonai namonamo lasi dainai idia haerelaia vadaeni gauna ia gwauraia kava lou, eiava idia haerelaia vadaeni henanadai ia gwauraia lou, unai be maoro momokani lasi!

Danu, bema hebou ia hakaua tadikakana be hanaihanai idia haerelaia vadaeni herevana be hereva ma haida amo ia haidaua sisina be maoro lasi, ia be hegeregere ia hahedinaraia unai haere be kerere. To, hereva haida eiava henanadai haida amo stadi ena point badana ia hahedinaraia neganai be hagoadaia gauna. Inai bamona henanadai, ‘Iseda kongregesen lalonai unai hereva be edena bamona ita badinaia diba?’ eiava ‘Edena siri paragraf ai ia noho be unai haere ia durua?,’ ese haere maorona idia habadaia bona anina namona idia havaraia.

Momokani, matamatadia eiava idia hemarai taudia ese haere ta idia henia neganai, ita hanamodia be namo. Reana hebou ia hakaua tadikakana ese stadi murinai idia ta ta sibona dekenai unai bamona ia hanamodia diba, unai amo haere ia henia tauna do ia hemarai lasi bona ia be nega namona heduru ia henia totona.

Herevahereva hebou karana lalonai, gau ibounai ia herevalaia tauna ese herevahereva karana ia hamanokaia. Iena hereva idia kamonai taudia do idia laloa idia hereva be anina lasi. Ena be iena hereva idia kamonai, to mai edia kudouna ibounai ida ena hereva do idia kamonai henia lasi. Unai dika do ia vara diba bema hebou ia hakaua tadikakana ese gau ibounai ia herevalaia. To, reana hebou ia hakaua tadikaka ese henanadai haida amo hebou taudia ia hagoadaia diba, edia lalohadai stadi dekenai idia gwauraia hedinarai totona. Unai bamona henanadai ia gaukaralaia momo lasi be namo.

Namona be hebou ia hakaua tadikakana ese imana ia abia isi tauna ginigunana ia boiria haraga lasi. Unai ese haere idia do lalohadailaia noho taudia ia hamanokaia diba. Bema nega sisina ia naria, reana dala ia kehoa ia do haere lasi tauna ia haere totona. Danu, namona be laloa kehoa karana ia hahedinaraia, namo lasi natudia ia boiria bena idia lalo-pararalaia lasi herevana ta idia haerelaia.

Bema ta ese haere kererena ia henia be edena bamona? Hebou ia hakaua tadikakana ese haere ia henia tauna ia hahemaraia lasi be namo. Nega momo haere iboudiai, haere kereredia danu, be hereva momokani ia noho. Unai dainai hebou ia hakaua tadikakana be mai aonega ida unai haere amo hereva maorona ta ia abia hidi, henanadai ia gwauraia lou, eiava henanadai ma ta ia gwauraia amo unai haere ia hamaoromaoroa diba bona ta ia hahemaraia lasi be namo.

Tadikaka bona taihu idia haere totona, hebou ia hakaua tadikakana ese henanadai haida, hegeregere ‘Ta be mai ena lalohadai ta?,’ ia gwauraia lasi be namo. Inai bamona henanadai, ‘Daika ia do haere lasi? Inai be emu nega namona oi haere totona!,’ oi gwauraia be namo to unai ese ta ia hagoadaia lasi sibona ena lalohadai amo ia haere totona. Namo lasi tadikaka edia hemami oi hadikaia badina stadi ena matamanai idia haere lasi. To, hebou ia hakaua tadikakana be idia ia hagoadaia idia haere totona, badina unai be lalokau karana. Ma danu, hebou ia hakaua tadikakana ese ta ia boiria ia haere totona neganai, namo lasi ia gwau: “Tadikaka ia haere murinai, tadikaka . . . , bena taihu . . . edia haere do ita kamonai.” Namona be hebou ia hakaua tadikakana ese haere ia kamonai henia guna, bena unai amo do ia abia hidi ma ta ia haere be namo eiava.

Haere Henia Karana be Hahenamo Ta

Keristani hebou lao henia karana be gau badana lauma dalana dekenai. Unai gabu dekenai haere ita henia be hahenamo ta. Unai dala namona amo “hebou taudia edia vairanai” Iehova ita hanamoa, bona Davida ena haheitalai ita tohotohoa bona Paulo ena sisiba ita badinaia. Hebou dekenai haere henia karana amo ita hamomokania iseda tadikaka ita lalokau henia bona ita be Iehova ena kongregesen badana lalonai ita noho. “Lohiabada ena Dina be kahirakahira” lalonai, ita ura Keristani heboudia dekenai ita noho be namo, ani?—Heberu 10:25.

[Footnote]

[Pictures on page 4]

Keristani heboudia dekenai kamonai bona haere henia karana be gau badana