Edena Dala ai Oi Davaria Diba?

OI BE MOALE TAUNA,A? Bema oibe, dahaka ese oi ia hamoalea? Emu ruma bese, emu moni gaukara, emu tomadiho karadia? Reana oi ia hamoalea gauna ta oi tahua noho, hegeregere sikuli oi haorea, moni gaukara namona oi abia, o motuka matamata ta oi hoia.

Taunimanima momo be idia tahua gauna o idia ura henia gauna idia abia neganai, unai idia moalelaia. To unai moale be ia noho daudau,a? Nega momo, ia ore haraga, unai ese lalohisihisi ia havaraia diba.

Ita moale neganai, unai hemami be ia ore haraga lasi. Unai hemami be ia noho daudau diba dainai, iseda mauri ita moalelaia diba. Unai dainai, ta be ia moale diba lasi bema ena mauri ai kohu momo ia tahua, to ia moale diba bema mauri dalana maorona ia badinaia. So bema ita gwau, “Inai lau abia neganai do lau moale,” to bema unai ia vara lasi, do ita moale lasi.

Unai ita lalopararalaia totona moale bona helt namona edia idau mani ita laloa. Edena dala ai helt namona oi moalelaia diba? Reana oi eksasais, aniani maorona oi ania, bona emu tauanina oi naria namonamo. Unai hegeregerena, do oi moale bema mauri dala maorona bona hakaua daladia maorodia oi badinaia.

Edena hakaua herevadia o kara badadia ese moale ia havaraia? Ena be unai bamona gaudia haida be mai anina bada, to henunai idia noho dala idauidau ese ita do idia durua bada:

• MOALE BONA HARIHARIBADA KARANA

• HELT NAMONA BONA HAHEAUKA KARANA

• LALOKAU

• DIKA GWAUATAO KARANA

• MAURI BE MAI ENA BADINA

• HELARO

Taunimanima ese idia matauraia aonega bukana ia gwau: “Mai edia kerere lasi dekenai idia noho taudia,... be do idia moale noho” (Salamo 119:1) Unai dala 6 mani ita herevalaia.