Emu Maduna Oi Huaia Namonamo

EMU MADUNA OI HUAIA ENA ANINA BE DAHAKA?

Edia maduna idia huaia namonamo taudia be taunimanima ese do idia matauraidia bona abidadama henidia. Idia be oi henia gaukaradia do idia karaia bona nega maorona ai idia haorea.

Ena be natu ta be maragi, to maduna huaia namonamo dalana ia dibaia diba. Buka ta ladana Parenting Without Borders ia gwau: “Natu maragidia edia hua be 15 neganai, edia tama sina ese idia gwauraia gaudia do idia karaia, bona hua 18 idia abia neganai, do idia ura edia tama sina ese idia karaia gaudia idia karaia danu. Gabu momo ai, natudia edia mauri lagani be 5 bona 7 bamona neganai, edia tama sina ese idia dekenai ruma gaukaradia karaia dalana idia hadibaia matamaia. Ena be idia be maragi to gaukara momo idia karaia namonamo diba.”

DAHAKA DAINAI MADUNA HUAIA KARANA BE MAI ANINA BADA?

Tano haida dekenai matamata taudia momo be idia ura sibodia idia noho to idia hegeregere lasi dainai, edia tama sina dekenai idia giroa lou. Matamata taudia haida dekenai unai ia vara, badina edia tama sina ese idia dekenai moni gaukaralaia namonamo, ruma gaukaradia eiava edia dina ta ta maurina ai maduna huaia daladia idia hadibaia lasi.

Unai dainai, namona be hari emu natudia dekenai maduna huaia dalana oi hadibaia, unai amo idia bada neganai maduna do idia huaia namonamo. Buka ta ladana How to Raise an Adult, ia gwau: “Namo lasi idia totona gau ibounai oi karaia ela bona edia mauri lagani be 18 bena idia oi rakatania sibona edia maduna idia huaia totona.”

MADUNA HUAIA DALANA HADIBAIA

Gaukara oi henia.

BAIBEL ENA HAKAUA HEREVANA: “Hekwarahi ibounai ese davana namona idia henia noho.”​—Aonega Herevadia 14:23.

Matamata taudia be hanaihanai idia ura edia tama sina ida idia gaukara. Unai be nega namona idia dekenai ruma gaukaradia oi henia totona.

Tama sina haida be idia ura lasi unai bamona idia karaia. Badina idia laloa edia natudia be mai edia homework momo bona idia ura lasi ruma gaukaradia idia henia.

To, ruma gaukara idia karaia natudia be sikuli gaukara idia karaia namonamo diba, badina ruma gaukara karaia dalana ese idia ia durua idia abia gaukara idia karaia namonamo bona hagugurua totona. Danu, inai buka Parenting Without Borders ma ia gwau: “Bema natu maragidia idia ura heduru to idia ita koua, do idia laloa ma ta durua karana be mai anina bada lasi . . . Danu, do idia ura idia totona gau ibounai oi karaia.”

Unai buka ena hereva hegeregerena, natudia be hanaihanai ruma gaukaradia idia karaia neganai, ma haida durua dalana do idia dibaia bona do idia mataganigani lasi. Natudia ese ruma gaukaradia idia karaia neganai, do idia mamia ruma bese lalonai idia be mai edia maduna bona unai idia karaia be namo.

Emu natudia oi durua edia kerere idia hamaoromaoroa.

BAIBEL ENA HAKAUA HEREVANA: “Bema oi ura bada diba do oi abia, bona sisiba oi kamonai henia noho neganai, oi ese dina ta aonega do oi davaria.”​—Aonega Herevadia 19:20.

Bema emu natuna ese ma ta ena kohu ia hadikaia, namo lasi iena kerere oi hunia. Namona be emu natuna ese ena kerere ia abia dae bona sori herevana ia gwauraia, eiava ia hadikaia kohu ena davana ia henia.

Bema natudia be edia kerere idia hunia lasi unai ese idia do ia durua . . .

• mai momokani ida edia kerere idia gwauraia hedinarai

• ma haida idia bleim lasi

• ekskius herevadia do idia gwauraia lasi

• sori herevana idia gwauraia totona