Diba Abia Karana amo Dirava Kahirakahira Ita Lao
Iseda Havaraia Tauna be siahu ta sibona lasi. Ia be mai ena kara namodia. Bona iena ura be ia ita dibaia bona ita tura henia. (Ioane 17:3; Iamesi 4:8) Unai dainai ita dekenai ia sibona ena kara ia hahedinaraia.
Iseda Havaraia Tauna be mai Ena Ladana Korikorina
“Namona be taunimanima do idia diba, oiemu ladana be Iehova, oi sibona be tanobada ibounai ena Ataiai Momokani Diravana, tanobada ibounai oi lohiaia noho.”—SALAMO 83:18.
Baibel ese ita ia hadibaia Iehova be Dirava momokani tamona. Ia ese iunives bona mauri gaudia ibounai ia Havaraia Tauna. Bona ia sibona ita tomadiho henia be maoro.—Apokalupo 4:11.
Iehova be Lalokau Diravana
“Dirava be lalokau.”—1 IOANE 4:8.
Baibel bona havaraia gaudia ese idia hahedinaraia, Iehova be mai ena kara namodia momo. Lalokau be Dirava ena kara badana. Bona ia karaia gaudia ibounai ese unai lalokau ena anina ia hahedinaraia. Iehova dibaia karana ita habadaia neganai, ia do ita lalokau henia bada danu.
Iehova be Dika Gwauatao Diravana
“Dirava e, oi noho hegaegae dika oi gwauatao totona.”—NEHEMIA 9:17.
Iehova ia diba ita be goevadae lasi taudia. Unai dainai iseda dika gwauatao totona ia “noho hegaegae.” Bema Dirava dekenai ita gwau, ita sori, bona kara dikadia hadokoa totona ita hekwarahi, ita do ia gwauatao bona iseda kara dika gunadia dainai ita do ia panisia lasi. —Salamo 103:12, 13.
Iehova Ia Ura Ia Dekenai Do Ita Guriguri
“Iehova be ia dekenai idia boiboi taudia kahirakahira ia noho . . . Heduru totona ia dekenai idia taitai neganai ia kamonai.” —SALAMO 145:18, 19.
Iehova tomadiho henia totona, spesel ariadia, kaivakuku eiava gau ma haida ita gaukaralaia lasi be namo. Ia ese iseda guriguri ia kamonai henia, lalokau tama sina ese edia natudia idia kamonai henia hegeregerena.