HEKWAKWANAI TANOBADANA AI

4 | Emu Helaro Oi Gimaia

DAHAKA DAINAI IA BE GAU BADANA

Tanobada ai idia vara hekwakwanai dainai taunimanima be idia gorere bona daradoko. Hekwakwanai idia davaria taudia idia laloa gau namona ta do ia vara lasi. Dahaka idia karaia?

Haida idia ura lasi vaira negana idia laloa.
Haida idia ura lasi edia hekwakwanai idia laloa momo dainai, idia inuinu kekero o drag dikadia idia abia.
Haida idia laloa idia mauri noho be anina lasi, bona idia mase be namo.

Inai Oi Diba be Namo

Reana hekwakwanai haida be nega sisina sibona idia vara bona idia ore haraga bona hahenamo oi davaria.
Ena be unai hekwakwanai ia ore lasi to gau haida oi karaia diba oi haheaukalaia totona.
Baibel be helaro korikorina ia henia, taunimanima ese idia davaria hekwakwanai do ia haorea momokani.

Oi Karaia Diba Gauna

Baibel ia gwau: “Kerukeru totona umui lalohekwarahi lasi, badina kerukeru danu be mai ena lalohekwarahi gaudia. Hari dina sibona ena lalohekwarahi gaudia umui laloa.”—Mataio 6:34.

Dina ta ena metau sibona oi laloa. Namo lasi kerukeru ena lalohekwarahi ese hari dina oi karaia diba gaudia ia koua.

Idia do vara lasi hekwakwanai oi laloa momo neganai, emu lalohekwarahi do oi habadaia bona vaira nega ai do idia vara gau namodia do oi laloa lasi.

OI GOADA DALANA—Heduru Herevadia

GAU NAMODIA OI LALOA

Baibel ia gwau: “Ia hisihisi noho tauna ena mauri dinadia ibounai be dika, to kudouna ai ia moale tauna be dina ta ta ai mai moale ida ia noho.” (Aonega Herevadia 15:15) Bema ia vara hekwakwanai sibona oi laloa momo, hamaoromaoroa dalana do oi itaia lasi. To, laloa namonamo karana ese oi do ia durua emu hekwakwanai oi hanamoa totona.

Nius oi itaia momo lasi.
Dina ena dokona ai, gau rua o toi dainai Dirava oi tanikiu henia.
Lista ta oi torea, bona hari dina sibona oi karaia diba gaudia oi torea. Gaukara badadia be kahana maragidia ai oi haria bona dina ena dokona ai oi haorea gaukarana do oi moalelaia.

HAIDA AMO HEDURU OI ABIA

Baibel ia gwau: “Ia sibona ia noho tauna be . . . aonega herevadia ibounai ia ura henia lasi.” (Aonega Herevadia 18:1) Oi sibona be guri dobu masemase amo do oi daekau diba lasi, to ta ese oi do ia veria daekau diba.

Famili o turadia oi noia oi idia durua totona.
Danu oi tahua edena dala ai idia oi durua diba. Ma haida totona gau ta oi karaia neganai, oi do ia durua emu hekwakwanai oi laloa maoromaoro totona.
Bema oi daradoko bona oi mamia mauri be anina lasi, namona be doketa oi itaia. Nega haida bema ta ia lalometau, unai be gorere ena toana, hegeregere depression. Momo be medikol heduru idia abia neganai idia namo.a

a Noga! ese medikol heduru dalana ta ia abia hidi lasi.

Baibel ese Helaro Korikorina Ia Henia

Salamo torea tauna be Dirava ia guriguri henia, ia gwau: “Emu hereva be egu aena ena lamepa, bona egu dala ena diari.” (Salamo 119:105) Mani ita itaia edena dala ai Dirava ena Hereva, Baibel, be unai bamona:

Hanuaboi diburana ai, lamepa ese ita ia durua iseda aena atoa gabuna ita itaia totona. Unai hegeregerena, bema hari ita ura disisen badana ta ita karaia, Baibel ena aonega herevadia ese ita idia durua diba.

Lamepa ese iseda raka dalana ia hadiaria, unai amo vaira kahana ita itaia diba. Unai hegeregerena, Baibel ese vaira nega totona helaro namona ia hahedinaraia.

Baibel be buka helagana bona ia be taunimanima edia matamana ia herevalaia sibona lasi, to vaira negana totona helaro korikorina ia henia danu. Inai ia hadibaia:

Baibel ese Helaro Korikorina Ia Henia

1. Hisihisi ia vara dalana: Baibel ia gwau “tau tamona dekena amo kara dika be tanobada dekenai ia vareai, bona kara dika ese mase ia mailaia. Bona mase be taunimanima ibounai dekenai ia hanaia lao, badina idia ibounai be idia kara dika vadaeni.”—Roma 5:12.

2. Gavamani ese hekwakwanai idia haorea diba lasi ena badina: Baibel ia gwau “tau ta be ia hegeregere lasi sibona ia hakaua totona.” (Ieremia 10:23) Tanobada ai idia vara noho gaudia ese unai idia hamomokania.

3. Dirava ese hekwakwanai do ia haorea dalana: Baibel ia gwau “ia ese mata ranu ibounai be edia matana amo do ia dahua ore, bona mase, lalohisihisi, taitai, bona hisihisi be do idia ore.”—Apokalupo 21:4.